Read Tunen Matíó 16 Bible Online

Matíó 16 - Tunen bible

Matíó 16

¹Bɛfalísia na Bɛsatúsia bá ná bɛ́nyálɛ́la á Yə́susu busíə́ ɔkɛaka ɔwá bá wɛɛ́ya kɔsɔ́na. Bá ná wɛɛ́ya batá ɔwá, a bəə́bu hɛŋgɛtɛ́nɛ́á hɛ́ yələ́mənə ínə́níə́ ɔhɛ́á hɛ́ ndɔ húlínə ɔ nɔɔ́mɛná.

²A ná bəə́bu bɛ́kámɔ́sɔ́na a sɛ́á: «Bɛkɔlakɔ́lá bɛ́ kɔ́á, abáka nɔ laka nɔ sɛ́á: “Ikúílí yɛ́ ndɔ hɛkaka bɔkɔasɛ́á, hɛfɛlɛ hɛ́ lɛ tálákátɔ́ ɔ ɔmbáŋá.”

³Ɔ siísíə́, nɔ sɛ́á: “Ɛmɔ́lá yɛ́ ndɔ naaka niɔfɛ́nɛ bɔkɔasɛ́á, ɔmbáŋá wɔ́ lɛa tə́bə́tɔ.” Nɔ ndɔ manya ɔ bɛkɔa bɛ́ ɔmbáŋá ubítíbíniə, mba, nɔ lɛ ndɔ óso ɔ tɔŋgɛtɛ́nɛ́á tɔ́ bikúílí ɔ ɔmanya!

⁴Bɛndɔ bá yɛ́ɛyɛ ɛnyɔŋɔnɔ bá lɛa babɛ́á, ɛŋaná yɔkɛ́nana yɛ́ Huɛlɛ́, bá ndɔ hɛŋgɛtɛ́nɛ́á hɛ́ yələ́mənə siə ɔ usinə, mba, Huɛlɛ́ a sa ndá bəə́bu hiítə ínə́níə́, úhúlíə́ ɔhɛ́á a ná kɛ́áká ɔ buɔmɔ́ bɔ́ Yɔ́nasɛ.» Á ná bəə́bu tíkə́ ɔmɔ́tɔ́yɛ́, a ná ákana.

⁵Ɛnaka bɔkɔ́nɛna bá bíásɛ́na ɔ yííní ɛsalɛ yɛ́ nɔmɔ́, bá ná bínúnə́ ɔwá bá ná bɛbɛlɛ́tɛ fəlíə́ ɔ ɔwɛta.

⁶Yə́susu a ná bəə́bu lɛ́na a sɛ́á: «Nɔ́ mətəkí má Bɛfalísia bíkókósókíə́ muɛsɛ na má Bɛsatúsia.»

⁷Bɔkɔ́nɛna bá ná lúmə́ ɔ ubílúlə bəə́bu na bəə́bu bá sɛ́á: «A ndɔ hɔ́ɔ́ nɔ́yɛ́ bɔkɔasɛ́á tɔ sá bɛbɛlɛ́tɛ ɛta.»

⁸Mba, Yə́susu a ná manya yatɛ́ ɔyɛ́á bá ndɔ bílúlínə, a sɛ́á: «Uwənú á bɛndɔ bá ilumininə yɛtɛ́tɛ́á, ɛlɔ́áyɛ́ yatɛ́ nɔ ndɔ bílúlə, ɔ́ bɔkɔasɛ́á tɔ́ sá bɛbɛlɛ́tɛ ɛta əə́?»

⁹Nɔ́ ná náana ɔ́kɔ́ muɛsɛ əə́? Nɔ́ bɛbɛlɛ́tɛ bɛ́lánɔ bɛ́kɔ́lɔ́mɔ́na ɔbɛ́á tukóló tɔ́lánɔ tɔ́ bɛndɔ bá ná nɛaka, bɛkana ɔbɛ́á nɔ ná bátáká úndúə́kə́tɔ́ na bɛbɛ́sɛ́bɛsɛ ɔbɛ́á bɛ́ ná tíkə́nə́kə.

¹⁰Nɔ́ bɛbɛlɛ́tɛ bɛ́lɛ́ndɔ́lɔ́mɔnɔ bɛ́kɔ́lɔ́mɔ́ná tɔ́na ɔbɛ́á tukóló túnisə tɔ́ bɛndɔ bá ná nɛ́áká na bɛkana ɔbɛ́á nɔ ná bátáká úndúə́kə́tɔ́, na bɛbɛ́sɛ́bɛsɛ ɔbɛ́á bɛ́ ná tíkə́nə́kə.

¹¹Ɛlɔ́áyɛ́ yatɛ́ nɔ lɛ ndɔ ɔ́kɔ ɔwá, tátá ɛlɔ́áyɛ́ bɛbɛlɛ́tɛ mɛ ná báá mɛ ndɔ hɛ́na ikúílí ɔyɛ́á mɛ ná bə́nú lákɛ́na ɔwá, nɔ́ mətəkí má Bɛfalísia bíkókósókíə́ muɛsɛ na má Bɛsatúsia əə́?

¹²Nɔ́yɛ́, bɔkɔ́nɛna bá ná manyá ɔwá tátá ɔ mətəkí má bɛbɛlɛ́tɛ á ná báá a ndɔ hɛ́na; mba, ɛlɔ́áyɛ́ binə́níníə́ bɛ́ Bɛfalísia na bɛ́ Bɛsatúsia.

¹³Ɛnaka Yə́susu á káfámá ɔ misí yɛ Sɛsalɛ́ yɛ́ Filíbo, a ná báyɛ́á bɔkɔ́nɛna batá a sɛ́á: «Ɛ́sɛ́á ɔlaa wɔ́ bɛndɔ, ɛ́yánɛ́ a lɛ́á Mɔná wa mɔndɔ əə́?»

¹⁴Bá sɛ́á: «Bɔ́mɔtɛ́ bɛndɔ bá ndɔ laa ɔwá, aŋɔ́á ɔ lɛ́á Yɔhánɛsɛ Mɔsɔabɛndɔ; ɛlɔ́áyɛ́ bənə́bənə́, ɔ lɛa Ɛlíásɛ; ɔ bənə́bənə́ tɔ́na, aŋɔ́á ɔ lɛ́á Yələ́mia ata wɔmɔtɛ́ mɔhɛ́nátɔtányɛ́.»

¹⁵Yə́susu a sɛ́á: «Mba uwə́nú, nɔ ndɔ ənú laa nɔ sɛ́á mɛaŋɔ́á ɛ́yánɛ́ əə́?»

¹⁶Símono a sɛ́á: «Aŋɔ́á ɔ lɛ́á Mɛ́sia, Mɔná wa Huɛlɛ́ ɔwá a lɛ́á muɔmɔ́.»

¹⁷Nɔ́yɛ́, Yə́susu a ná wɛɛ́ya lɛ́na a sɛ́á: «Á Símono, a mɔná wa Yɔ́nasɛ, ɔ lɛa na nɛhɔnɔ bɔkɔasɛ́á, tátá mɔndɔ a ná aŋɔ́á nɔ́yɛ́ mə́nyə́síə́, mba, á yamɛ́á Isə́ ɔwá a lɛ́á ɔ Nɔɔ́mɛná.

¹⁸Ɛ́ɛ, mɛ ndɔ aŋɔ́á nɔ́yɛ́ lɛna ɔwá; aŋɔ́á Bíə́lə, ɔ wútə́yí muɔkɔ ɔmbáŋá mɛ́ ŋɔ yámɛ́á ilúkunə yɛ́ bəlumininə falabaka, ata injiŋə yɛ nyɛmbɛ́ yɛ́ sa ndá yɛɛ́ta nyiŋə́líníə́.

¹⁹Mɛ ŋɔ aŋɔ́á tulibə tɔ́ Nɛmanɛna nɛ́ Nɔɔ́mɛná índiə. Bikimə ɔbɛ́á ɔ ŋɔ ɔ́lɔ́kɔkɔ háha ɔ misí, Huɛlɛ́ a ŋɔ ɔ́lɔ́kɔkɔ ɔ nɔɔ́mɛná; bikimə tɔ́na ɔbɛ́á ɔ ŋɔ humbuləkə háha ɔ misí, Huɛlɛ́ a ŋɔ bɛɛ́ta humbuləkə ɔ nɔɔ́mɛná.»

²⁰Nɔ́yɛ́, Yə́susu a ná báyɛ́á bɔkɔ́nɛna manɛ́ná na iŋgínə́ a sɛ́á bá lɛ lɛɛ́ná ata mɔndɔ ɔwá, wɛɛ́ya á lɛ́á Mɛ́sia.

²¹Ɔ botolokiə ɔ yɛ́ɛ́yɛ́ ikúílí, Yə́susu a ná lúmə́ ɔ ɔwayɛ́ bɔkɔ́nɛna ɔ ɔlɛna tə́lə́ŋu a sɛ́á: «Mɛ ná hɔ́ánána ɔwakána ɔ Yəlúsalɛma, mɛ́ ká məsə́kə ɔ́kɔ́kɛ́ná mɔŋɛ́ŋa ɔ húlə́kinə na bɛnatákɛ, bisə́lúkú bɛ́ bətitiəmahánɛna na bamanyumbə́ndə́. Bá ŋɔ mɛaŋɔ́á ɔ́nɔ́kɔ, mba, ɔ mɔɔsɛ́ málálɔ́, mɛ ŋɔ hɔŋɔ́á ɔ nyɛmbɛ́.»

²²Nɔ́yɛ́, Bíə́lə a ná wɛɛ́ya bísúə́línə ɔ ɛmɛ́ŋɛ́, a ná lúmə́ ɔ ɔwayɛ́ ɔkɛ́kɛ́lɛna, a sɛ́á: «Á Isəlúkú, Huɛlɛ́ á aŋɔ́á tə́tə́kə́níə́; ata bɛ́ nəbulúə́, nɔ́yɛ́ yɛ́ sa ndá aŋɔ́á famɛna.»

²³Mba, Yə́susu a ná bɛkɔŋɔna, a ná Bíə́lə lɛ́na a sɛ́á: «Hɔalɛ́na ɔwámɛ busíə́, á Sátana! Ɔ lɛa niumbúfə́nínə́ ɔ ɔwámɛ ɛnɔ́mɛ bɔkɔasɛ́á, bɛ́áwɔ́á bɛfɛka bɛ́ lɛ báá bɛ́ Huɛlɛ́, mba, bɛ́ bɛndɔ.»

²⁴Nɔ́yɛ́, a ná báyɛ́á bɔkɔ́nɛna lɛ́na a sɛ́á: «Ábá mɔndɔ a ndɔ siə ɔ ɔwámɛ ɔwɔŋgɔ, á bɛ́sáŋɔ́ná wɛɛ́ya bɛ́múɛ́tɛ́, á wə́yíə́ ɔmbásá túáná mbá a mɛaŋɔ́á ɔ́ŋgɔ́kɔ.

²⁵Ɔ taká, ábá mɔndɔ a ndɔ siə ɔ ɔwayɛ́ buɔmɔ́ utə́tə́niə, a ŋɔ bɔɛ́ta nímə́siə; mba, wɛ́ɛ́yɛ́ ɔwá a ŋɔ bɔ́áyɛ́á buɔmɔ́ nímə́siə ɛlɔ́áyɛ́ ámɛ, a ŋɔ nɔɔmɔkɔ.

²⁶Ɔ taká, yatɛ́ mɔsɛ́ŋɛ́ mɔndɔ a ndɔ kusənə ɛlɔ́áyɛ́ nɛbɔ́ŋɔ nikimə nɛ́ misí ukusənə ábá a ná bɔ́áyɛ́á buɔmɔ́ nímə́síə́ əə́? Yatɛ́ mɔndɔ a óso uwíndiə ɔkɛaka ɔwá a bɔ́áyɛ́á buɔmɔ́ háŋɔ́ná əə́?

²⁷Ɔ taká, Mɔná wa mɔndɔ a ŋɔ ndasá ɔ ətíə́ yɛ tuúmə tɔ́ yayɛ́á Isə́ ɔ ilúkunə na bɛ́áyɛ́á bɛáŋgɛlɛ; nɔ́yɛ́, a ŋɔ mɔɛ́ta tɛ́á híə́niniə ɛ́sɛ́á nɛ́áyɛ́á nibítíkə.

²⁸Ɔ taká, mɛ ndɔ bənú nɔ́yɛ́ lɛna; ətíə́ yɛ bɛndɔ ɔbá bá lɛ́á háha, bɔ́mɔtɛ́ bá sa ndá wə́ə́ ɛŋaná Mɔná wa mɔndɔ usinə a lɛa ɔ ɔsákɔna ɛ́sɛ́á munəni.»