Read Tunen Matíó 17 Bible Online

Matíó 17 - Tunen bible

Matíó 17

¹Əlimə yɛ tunó tɔ́lɛ́ndálɔ, Yə́susu a ná Bíə́lə, Yákɔbɔ na Yɔhánɛsɛ ɔ wayɛ́á munínyə́ ákánana ɔ ilúmə́lúmə́ yɛ́ ɔmáá ɔmbáŋá, hata na bɛndɔ.

²A ná bíhə́ŋə́tə uwəbú busíə́. Nɔ́yɛ́, bɔ́áyɛ́á busíə́ bɔ́ ná botólíə́ ɔ ɔnɔma ɛ́sɛ́á hiɔtɔ́tɔ́, bɛ́áyɛ́á bɛlɛŋa bɛ́ nɔmaka laŋɔlaŋɔ ɛ́sɛ́á isəmú.

³Ɔ umisíúmə́, báyɛ́á bɔkɔ́nɛna bálálɔ́ bá ná Mósisi na Ɛlíásɛ ɛ́ná ɔ ɛŋgamɔ́ na wɛɛ́ya.

⁴Nɔ́yɛ́, Bíə́lə a ná Yə́susu lɛ́na a sɛ́á: «Á Isə́lúkú, yɛ́ lɛa muɛsɛ ɔwá tɔ túə́nə́ háha. Ábá ɔ ndɔ nɔ́yɛ́ hikiə, ɛkasɛ tɔ́ bɛanda falábáká bɛ́lálɔ́: Yáwɔ ɛ́mɔtɛ́, yɛ́ Mósisi ɛ́mɔtɛ́, yɛ́ Ɛlíásɛ ɛ́mɔtɛ́.»

⁵Ɛ́sɛ́á a ná bá a ndɔ hɔ́ɔ́ nɔ́yɛ́, bá ná ɛnɔmakɛ yɛ́ ɛlɔndɔ́ ɛ́ná yɛ́ nɔ́ bəə́bu húə́, nióni nɛ́ ná ɔ́kɔ́nɔ́ ɔ ɛlɔndɔ́ nuúmə́, nɛ́ sɛ́á: «Wɔ́ɔwɔ a báka wamɛ́á mɔná wa nibo, wɛ́ɛ́yɛ́ ɔwá mɛ ná híkə́kíə́ ɔtɛ́fa. Nɔ́ wɛɛ́ya ɔ́kɔ́kɛ́nɛ́na.»

⁶Ɛnaka bɔkɔ́nɛna bá nɛ́táyɛ́ nióni ɔ́kɔ́, bɔkɔ́lɔ́ma bɔ́ ná bəə́bu itíə́ mɔŋɛ́ŋa, bá ná kɔ́á imbúbiə ɔ misí.

⁷Yə́susu a ná bɛ́nyálɛ́la ɔ uwəbú ɛmɛ́ŋɛ́, a ná bə́əbu itíə́lə, a sɛ́á: «Nɔ́ hɔalɛ́na! Nɔ lɛ kɔlɔma!»

⁸Ɛnaka bá məə́sə bɔ́kɔ́ná, bá ná yámá há Yə́susu bíbúə́.

⁹Ɔ ikúílí ɔyɛ́á bá ná báá ɔ ɔlɔɔkɔ ɔ ɔmáá, Yə́susu a ná bəə́bu manɛ́na, a sɛ́á: «Nɔ lɛ mɔndɔ lɛná yatɛ́ ɔyɛ́á nɔ ná siəkínə ɔkafámáká ɔ ikúíli ɔyɛ́á, Mɔná wa mɔndɔ a ŋɔ hɔŋɔa ɔ ətíə́ yɛ bəwə́nú.»

¹⁰Mba, bɔkɔ́nɛna bá ná wɛɛ́ya batá bá sɛ́á: «Ɛlɔ́áyɛ́ yatɛ́ abáka bamanyumbə́ndə́ bá laaka ɔwá, á Ɛlíásɛ a ŋɔ taŋa ɔ ndasá na Mɛ́sia əə́?»

¹¹A sɛ́á: «Ɔ taká, Ɛlíásɛ a ná hɔ́ánána á taŋá ɔ ndasá ɔ bɛkɔa bikimə utikəlinə.

¹²Mba, mɛ ndɔ bənú nɔ́yɛ́ lɛna, Ɛlíásɛ a ka ndasá, bɛndɔ bá sa wɛɛ́ya manya, mba, bá ka wɛɛ́ya bɛ́kɛakɛna ɛ́sɛ́á bá ná híkə́kíə́. Nɔ́yɛ́ tɔ́na á Mɔná wa mɔndɔ a ŋɔ məsə́kə siəkinə.

¹³Nɔ́yɛ́, bɔkɔ́nɛna bá ná manyá ɔwá, a ndɔ bəə́bu hɛ́na ɛlɔ́áyɛ́ Yɔhánɛsɛ Mɔsɔabɛndɔ.»

¹⁴Ɛnaka bá káfámá hoóyi na ilúkunə yɛ́ bɛndɔ, wɔmɔtɛ́ mɔndɔ a ná bɛ́nyálɛ́la a Yə́susu busíə́, a ná kiníə́;

¹⁵a sɛ́á: «Á Isə́lúkú, tɔ́kɔ́lɛ, wə́ə́ wamɛ́á mɔná mɛɛ́lɔ. A ndɔ kɔa ɔ itíə́, a ndɔ məsə́kə ɔ́kɔ mɔŋɛ́ŋa. Ɔ yɛ́mɔtɛ́ ikúílí, yɛ́ wɛɛ́ya halɛ́na, a kɔa ɔ hiwə nuúmə́ ata ɔ mənífə́ nuúmə́.

¹⁶Mɛ ka wɛɛ́ya ákánana ɔ báwɔ́á bɔkɔ́nɛna busíə́, bá sa óso ɔ ɔwayɛ́ uniŋəsiə.»

¹⁷Yə́susu a ná kɔaya, a sɛ́á: «Uwə́nú á bɛndɔ babɛ́á, ɛŋaná ilumininə! Ɔ́ uyə́níə́ ikúílí mɛ ŋɔ kafámá ɔ uwənú uwisíbiniə əə́? Nɔ́ mɛaŋɔ́á mɔ́táyɛ́ mɔná húlə́nínə́ háha.»

¹⁸A ná umbúínyi mɔbɛ́á bámálɛ́na; wɔ́ ná fámá a mɔná mɛɛ́lɔ. Ɔ umisíúmə́ mɔná a ná niŋə.

¹⁹Nɔ́yɛ́ bɔkɔ́nɛna bá ná bɛ́nyálɛ́la a Yə́susu busíə́, bá na wɛɛ́ya batá ɔ inditiə bá sɛ́á: «Ɛlɔ́áyɛ́ yatɛ́ tɔ sá óso ɔ wútə́yí umbúínyi mɔbɛ́á ubulə əə́?»

²⁰Mba, a sɛ́á: «Nɔ lɛ bá hɔ́ánánátɔ́ ɔ muítə ubulə bɔkɔasɛ́á, yə́núə́ ilumininə yɛ́ lɛa tɔmbɔ́kɔ́tɔ́ ɛmbáta. Ɔ taká, mɛ ndɔ bənú nɔ́yɛ́ lɛna: Ata yə́núə́ ilumininə yɛ́ bá yɛtɛ́tɛ́á ɛ́sɛ́á mɔsámá wɔ́ hɛlɔa, há nɔ wúuwu ɔmáá lɛna nɔ sɛ́á: “Hɔalɛ́ná háha, káká hə́níə́, nɔ́yɛ́ yɛ́ ŋɔ bɛ́kɛaka.” Ata bɔkɔa bɔ́ sa ndá bənú yáyɛ́ná ɔ ɔkɛa. [

²¹Mba, ɔ tɔ́mbákɛna mabɛ́kálɛ́na na ikotí bíbúə́ bá óso ɔ yɛ́ɛ́yɛ́ ɛnya yɛ umbúínyi mɔbɛ́á ubulə].»

²²Ɛ́sɛ́á bá ná bá kɔtálánátɔ́ bəə́bu na bəə́bu ɔ misí yɛ Kalɛ́lɛa, Yə́susu a sɛ́á: «Ɛkasɛ bá Mɔná wa mɔndɔ sɛmɛ́na ɔ bɛndɔ;

²³bá ŋɔ wɛɛ́ya ɔ́nɔ́kɔ, mba, əlimə yɛ́ mɔɔsɛ́ málálɔ́, a ŋɔ hɔŋɔa ɔ nyɛmbɛ́.» Nɔ́yɛ́, bɔkɔ́nɛna bá ná busə́kə ɔ́kɔ́ mɔŋɛ́ŋa.

²⁴Yə́susu na báyɛ́á bɔkɔ́nɛna bá káfámá ɔ Kafalanahúmu, Basɛmabɛtásɛ bá Tɛ́mbɛlɛ bá ná bɛ́nyálɛ́la á Bíə́lə ɛmɛ́ŋɛ́, bá sɛ́á: «Baánɛ, abáka wənúə́ Muínə́niə a lɛ ɛtásɛ yɛ́ Tɛ́mbɛlɛ sábɔ́ná əə́?»

²⁵Bíə́lə a sɛ́á: «Ɛ́ɛ, abáka a yɛɛ́ta sábɔ́naka.» Ikúíli ɔyɛ́á Bíə́lə a ná kə́fínə́ ɔ miímə, Yə́susu a ná taŋá ɔ ɔhɔ́lɔ a sɛ́á: «Á Símono, nəníə́ ɔ ndɔ bɛ́kɔ́lɔmɔna əə́? Banɛ́ bá ná hɔ́ánáná ɔ bɛtásɛ ɔsábɔ́nɛna ɔ bənəni bá misí əə́? Bifəyí bɛ́ bɔnɔŋɔ alɛ́ɛ́, bəkiníə́nú əə́?»

²⁶Bíə́lə a sɛ́á: «Bəkiníə́nú abáka bá ɛtásɛ sábɔ́naka.» Mba, Yə́susu a sɛ́á: «Ɔ taká, bifəyí bɛ́ bɔnɔŋɔ bá sá hɔ́ánana ɔsábɔ́na.

²⁷Mba ata nɔ́yɛ́, ɔkɛaka ɔwá, tɔ lɛ bááyɛ́ bɛndɔ kuəsíə́ ɔ bɔbɛ́á, káka ɔ ulumbə ɔ nɔmɔ́, əmbínə́ hɛnɔ́fɔ ɔ nuíyi; hiɔfɔ́ híbúsíə́ ɔhɛ́á ɔ ndɔ húlə́kiə, úbúnə́ wə́yíə́ munuə, ɔ ndɔ ɛcácɔ́ bɔ́ŋɔ́kɔ ɔ nuúmə́: Ɛtá yɛɛ́ta, káka bəə́bu ɛtásɛ sábɔ́nɛ́ná na yámɛ na yáwɔ.»