Read Tunen Matíó 18 Bible Online

Matíó 18 - Tunen bible

Matíó 18

¹Ikúílí ɔyɛ́á, bɔkɔ́nɛna bá ná bɛ́nyálɛ́la á Yə́susu busíə́, bá ná wɛɛ́ya batá bá sɛ́á: «Ɛ́yánɛ́ a lɛ́á mɔŋɛ́ŋa ɔ Nɛmanɛna nɛ́ Nɔɔ́mɛná əə́?»

²Yə́susu a ná mɔná mɔtɛ́tɛ́á ɛlɛ́ákɛ́na, a ná wɛɛ́ya tínímíə́ ɔ uwəbú ətíə́, a sɛ́á:

³«Ɛ́ɛ! Taká, mɛ́ ndɔ bənú nɔ́yɛ́ lɛna ɔwá; ábá nɔ́ sá mɛlɛ́má kɔ́ŋɔ́na, nɔ́ híáná ɛ́sɛ́á tɔ́lɔ́matɔ́, nɔ sa ndə́fínə́ ɔ Nɛmanɛna nɛ́ Nɔɔ́mɛná.

⁴Wɛ́ɛ́yɛ́ ɔwá a ŋɔ bílólosoliə ɛ́sɛ́á wɔ́ɔwɔ mɔná mɔtɛ́tɛ́á, wɛɛ́ya a lɛ́á mɔŋɛ́ŋa ɔ Nɛmanɛna nɛ́ Nɔɔ́mɛná.

⁵Wɛ́ɛ́yɛ́ ɔwá a ŋɔ mɔná káha muɛsɛ ɛ́sɛ́á wɔ́ɔwɔ ɔ ɔwámɛ niínyə, ɔwámɛ bɛ́múɛ́tɛ́ á ná kaha.»

⁶«Mba, ata ɛ́yánɛ́ ɔwá a ŋɔ ɔmɔtɛ́ nənəkiə ɔ mɔtɛ́tɛ́á ɔwá a ndɔ nɛ́áyɛ́á nɛkɔmba tálɛ́na ɔ ɔwámɛ, yɛ́ lɛa muɛsɛ ɔwá bá wɛɛ́ya muɔkɔ tiŋə́ ɔ ɛmɛna, bá wɛɛ́ya əmbínə ɔ nɔmɔ́ nuúmə́.

⁷Ɛmɔ́kɛ́ na bɛndɔ bá misí ɔbá bá ndɔ bɔsɔ́kɔ́ nənəsiə ɔ bɔbɛ́á ɔkɛa! Ɛ́ɛ! Yɛ́ lɛa muɛsɛ ɔwá nɔ́yɛ́ yɛ́ bɛ́kɛ́áka, mba, ɛmɔ́kɛ́ na mɔndɔ ɔwá nɔ́yɛ́ yɛ́ ndɔ ndafamɛna!

⁸Ábá, wə́wúə́ mɔkátá ata wə́wúə́ mɔkɔlɔ́ wɔ́ ndɔ aŋɔ́á lɔ́ma ɔ bɔbɛ́á ɔkɛa, sɔ́mbá muítə, ombókó muítə hata na aŋɔ́á; yɛ́ lɛa muɛsɛ na aŋɔ́á ɔwá, ɔ fínə́ ɔ buɔmɔ́ bɔ́ ikúílíə́kimə mɔkátá ata mɔkɔlɔ́ úmotí, yáyɛ́na ɔbáá makátá na makɔlɔ́ məkimə, əmbínə́tɔ́ ɔ hɛfɛa hɛ́ hiwə nuúmə́ ɔhɛ́á hɛ́ sa ndə́nimə.

⁹Nɔ́yɛ́ tɔ́na, ábá nɛ́áwɔ́á niísə nɛ́ ndɔ aŋɔ́á lɔ́ma ɔ ɔkɔa ɔ bɔbɛ́á, sáná nɛɛ́ta, ombókó nɛɛ́ta hata na aŋɔ́á. Yɛ́ lɛ muɛsɛ ɔwá ɔ fínə́ ɔ buɔmɔ́ bɔ́ ikúílíə́kimə na niísə nɛ́mɔtɛ́ yáyɛ́na ɔbáá na məə́sə məkimə, bá aŋɔ́á ə́mbínə ɔ hɛfɛa hɛ́ hiwə ɔhɛ́á hɛ́ sá ndə́nimə.»

¹⁰«Nɔ bɛ́tátáka, nɔ lɛ yəníə́ ata ɔmɔtɛ́ wa báyɛ́ ɔ batɛ́tɛ́á, ɔ taká, mɛ ndɔ bənú nɔ́yɛ́ lɛna ɔwá, bíə́búə́ bɛáŋgɛlɛ bɛ́ lɛa tɛ́nɛ́mákátɔ́ ɔ ikúílí tɛ́á ɔ busíə́ bɔ́ yamɛ́á Isə́ ɔwá a lɛ́á ɔ Nɔɔ́mɛná. [

¹¹Mɔná wa mɔndɔ a ka ndasá ɔ misí ɔ bááyɛ́ ɔwɔ́lɔ ɔbá bá ná niminə].

¹²Nəníə́ nɔ ndɔ fɛka əə́? Ábá mɔndɔ a lɛa na ɛbɔ́ɛ́yɛa yɛ́ ɛndɔ́mbá, mbá úmotí wɔ́ ná nyɔ́áká, a sá yííyí moómo ibo na ibo yɛ́ ɛndɔ́mbá tíkə ɔ ɔmáá ɔmbáŋá ɔkɛaka ɔwá, a ká wííní síə́kə ɔwá wɔ́ ná nimínə́ əə́?

¹³Ábá a ná muítə bɔ́ŋɔ́, ɔ taká, mɛ ndɔ bənú nɔ́yɛ́ lɛna, a ŋɔ bílə́nə́kə mɔŋɛ́ŋa yáyɛ́ná yííyí moómo ibo na ibo ɔyɛ́á yɛ́ sá nímínə.

¹⁴Nɔ́yɛ́, yə́núə́ Isə́ ɔwá a lɛ́á ɔ Nɔɔ́mɛná a lɛ ndɔ siə ɔwá, ata ɔmɔtɛ́ wa bááyɛ́ ɔ batɛ́tɛ́á á niminə.»

¹⁵Ábá wɔmɔtɛ́ wawɔ́á munísə́ a ná bɔ́mɔtɛ́ bɔbɛ́á kɛ́áka, káka wɛɛ́ya kɔaná bənú báfandɛ́. Abá a ná aŋɔ́á ɔ́kɛ́ná, bísúə́línə́ wɛɛ́ya.

¹⁶Ábá a sá aŋɔ́á ɔ́kɛ́na, ɛtá bɛndɔ báfandɛ́ na aŋɔ́á. Ɔkɛaka ɔwá ɛsáká yɛ́ sɔ́mbɛ́á ɔ busíə́ bɔ́ bəmbóŋímboŋi báfandɛ́ ata bálálɔ́.

¹⁷Mba, ábá a ná kinə́ ɔ məlíhə́ní má bááyɛ́ bɛndɔ ɔwɔ́kɔ, ákáná bɔ́táyɛ́ bɔkɔa ɔ busíə́ bɔ́ ilúkunə yɛ́ bəlumininə. Ábá a ná kinə́ ɔ ilúkunə yɛ́ bəlumininə ɔwɔkɛ́na, ɛtá wɛɛ́ya ɛ́sɛ́á mɔlɛmanyáhuɛlɛ́ ata mɔkɔtabɛtásɛ.

¹⁸Ɔ taká, mɛ ndɔ bənú nɔ́yɛ́ lɛna: Ata yatɛ́ nɔ ŋɔ ɔ́lɔ́kɔkɔ háha ɔ misí, bá ŋɔ ɔ́lɔ́kɔkɔ ɔ nɔɔ́mɛná, bikimə ɔbɛ́á nɔ ŋɔ humbuləkə ɔ misí, bá ŋɔ bɛɛ́ta humbuləkə ɔ nɔɔ́mɛná.

¹⁹«Ɔ taká, mɛ ndɔ bənú lɛna tɔ́na ɔwá, ábá bɛndɔ báfandɛ́ bá ná ɔ́kɔ́nɔ́ ata yatɛ́ bɔɔ́la ɔbata háha ɔ misí ɔ ətíə́ yɛ mabɛ́kálɛ́na, yamɛ́á Isə́ ɔwá a lɛ́á ɔ nɔɔ́mɛná a ŋɔ bəə́bu índiə.

²⁰Ɔ taká, ɔ ɛbɔ́ka ɔyɛ́á báfandɛ́ ata bálálɔ́ bá ŋɔ kɔtalana ɔ ɔwámɛ niínyə, mɛ ŋɔ bámɛnɛna ɔ uwəbú ətíə́.»

²¹Bíə́lə a ná yɛ́ɛ́yɛ́ ikúílí bɛ́nyálɛ́lá á Yə́susu busíə́, a sɛ́á: «Á Isə́lúkú, bikúílí bɛ́nɛ́á mɛ ná hɔ́ánáná ɔ wamɛ́á munísə́ ɔnɛasɛna ábá a ná mɛaŋɔ́á líŋgə́síə́ əə́? Bikúílí bɛ́lɛ́ndɔ́lɔ́mɔnɔ əə́?»

²²A sɛ́á: «Mɛ lɛ ndɔ laa ɔwá bikúílí bɛ́lɛ́ndɔ́lɔ́mɔnɔ, mba, moómo álɛ́ndɔ́lɔ́mɔnɔ má bikúílí buníə́tɔ́ bikúílí bɛ́lɛ́ndɔ́lɔ́mɔnɔ.»

²³«Nɔ́yɛ́, Nɛmanɛna nɛ́ Nɔɔ́mɛná nɛ́ lɛa hɔ́ákátɔ́ ɔ munəni ɔmɔtɛ́ ɔwá a ná síə́kə ɔ ɔwáyɛ́ mə́hínə ɔbata ɔ ɔwayɛ́ bɔnyɛna.»

²⁴Nɔ́yɛ́, a ná bótólíə́ ɔ mátáyɛ́ mə́hínə ɔ ɔfana; bá ná wɛɛ́ya mɔnyɛna húlə́nínə́ ɔmɔtɛ́ ɔwá a ná bá a ndɔ buhínə bata bɔ́ bɛcácɔ́ biəŋí ɔ ɔyáyɛ́na.

²⁵Ɛ́sɛ́á mɔ́táyɛ́ mɔnyɛna a sa bá na bɛhámbálɛ́ bɛ́ bɔ́táyɛ́ buhínə ɔ ɔsábɔ́na, isə́lúkú a ná manɛ́na ɔwá, bá wɛɛ́ya lúə́ na muənyí, báyɛ́á baná na bɛ́áyɛ́á bɛɛ́la bikimə ɔkɛaka ɔwá, bá sábɔ́nɛ́na ɔ ɔwayɛ́ buhínə.

²⁶Mɔnyɛna a ná kɔ́á ɔ ɔwayɛ́ makɔlɔ́ lúŋímə́tɔ́, a sɛ́á: «Tɔ́kɔ́lɛ, ísə́bíníə́ mɛaŋɔ́á, mɛ ŋɔ aŋɔ́á bɔ́áwɔ́á buhínə sábɔ́nɛna bukimə.»

²⁷Isə́lúkú yɛ mɔ́táyɛ́ mɔnyɛna a ná wɛɛ́ya mahana wəə, a ná niása ɔwá a ákana, a ná wɛɛ́ya buhínə niasɛ́ná bukimə.

²⁸Ɛnaka wɛ́ɛ́yɛ́ mɔnyɛna á fámá ɔ ɔmbɛ́la wɔ́ isə́lúkú yɛ́ buolí, bá ná ɛ́nyánáná na wayɛ́á mukúlə́kulə wa buolí; tɛ́tɛ́á yɛ bɛcácɔ́ ɔbánɔ́ a ná báá a ndɔ wɛɛ́ya bata. A ná wɛɛ́ya biɔnjɛ́na, a ná wɛɛ́ya hɛŋgɔ háá ɔ ɛmɛna, a sɛ́á: «Sábɔ́nɛ́ná mɛaŋɔ́á bɔ́ámɛ́á buhínə bukimə».

²⁹Mukúlə́kulə a ná kɔ́á ɔ ɔwayɛ́ makɔlɔ́, a wɛɛ́ya bɛ́táŋɔ́naka, a sɛ́á: «Tɔ́kɔ́lɛ, ísə́bíníə́ mɛaŋɔ́á, mɛ ŋɔ aŋɔ́á bɔ́áwɔ́á buhínə sábɔ́nɛna bukimə».

³⁰Mba, mɔnyɛna a sa bɛtambá bɛ́ mukúlə́kulə ɔ́kɔ, a ná wɛɛ́ya háá ɔ ɛbɔka ɔkafámáká ɔ ikúílí ɔyɛ́á a ŋɔ bɔ́áyɛ́á buhínə sábɔ́na bukimə.

³¹Ɛnaka bɔsɔ́kɔ́ bɔnyɛna bá siəkínə́ nɔ́yɛ́, bá ná məsə́kə ɔ́kɔ́ mɔŋɛ́ŋa, bá ná yəbúə́ isə́lúkú yɛ buolí bɛkɔa bikimə lakɛ́na ɔbɛ́á bɛ́ ná bɛ́kɛ́áka.

³²Nɔ́yɛ́, Isə́lúkú yɛ buolí a ná mɔ́táyɛ́ mɔnyɛna ɛ́lɛ́ákɛ́na, a sɛ́á: «Á mɔnyɛna mɔbɛ́á, mɛ ka aŋɔ́á bɔ́áwɔ́á buhínə niasɛna bukimə bɔkɔasɛ́á ɔ ka mɛaŋɔ́á bɛ́tɔ́kɔ́lɔkɛna.

³³Ɛlɔ́áyɛ́ yatɛ́ ɔ sa wawɔ́á mukúlə́kulə mahana wə́ə́ ɛ́sɛ́á mɛ ná aŋɔ́á mahana wə́ə́ əə́?»

³⁴A ná liŋə, a ná wayɛ́á mɔnyɛna halɛ́na, a ná wɛɛ́ya háá ɔ ɛbɔka ɔkafámáká ɔ ikúílí ɔyɛ́á a ŋɔ bɔ́áyɛ́á buhínə sábɔ́na bukimə.

³⁵Nɔ́yɛ́, mɛ ndɔ bə́nú lɛna ɔwá, yamɛ́á Isə́ ɔwá a lɛ́á ɔ Nɔɔ́mɛná, a ŋɔ bənú bɛ́kɛakɛna hɔ́ánánátɔ́ ábá nɔ sá wənúə́ munísə́ niasɛna na mɔlɛ́má mukimə.