Read Tunen Matíó 19 Bible Online

Matíó 19 - Tunen bible

Matíó 19

¹Ɛnaka Yə́susu á bɛndɔ hɔ́á ɔ uwukúniə, a ná hɔalɛ́na ɔ Kalɛ́lɛa, a ná ákáná ɔ misí yɛ Yútɛa ɔ yííní tanɛ́ yɛ nuíyi nɛ́ Yúlútɛnɛ.

²Iloŋo yɛŋɛ́ŋa yɛ́ bɛndɔ yɛ́ ná wɛɛ́ya ɔŋgɔ́kɔ, umə́, a ná bəə́bu niŋə́sə́kíə́.

³Bɛfalísia bá ná bɛ́nyálɛ́la ɔ ɔwáyɛ́ ɛmɛ́ŋɛ́ ɔkɛaka ɔwá bá wɛɛ́ya kɔsɔ́na, bá sɛ́á: «Wə́súə́ umbə́ndə́ wɔ́ ndɔ mɛlɛ́mɛndɔ́ iŋgínə́ índiə ɔ wayɛ́á muəndú ubulə, ata ɛlɔ́áyɛ́ hɛkɔma hinə́hinə́ əə́?»

⁴A ná bɛ́kámɔ́sɔ́na a sɛ́á: «Nɔ́ sa fana ɔ Mətilə ɛ́sɛ́á Mukətiə, ɔ nɛbalɛ́ná, a ná mɛlɛ́mɛndɔ́ na muəndú tábɔ́naka;

⁵a sɛ́á: “Ɔ́ ɛlɔ́áyɛ́ nɔ́yɛ́ mɛlɛ́mɛndɔ́ a ŋɔ isə́ na inyə́ tíkə ɔkɛaka ɔwá, a tɔáná na wayɛ́á muəndú. Bəə́bu báfandɛ́ bá ŋɔ bámɛnɛna mɔndɔ ɔmɔtɛ́.

⁶Bá lɛ báá tɔ́na báfandɛ́, mba, bá báka mɔndɔ ɔmɔtɛ́.” Nɔ́yɛ́, mɔndɔ a lɛ báá hɔ́ánánátɔ́ ɔ ɔwalɔ́na yatɛ́ ɔyɛ́á Huɛlɛ́ a ná tɔa!»

⁷Bɛfalísia bá ná wɛɛ́ya batá tɔ́na bá sɛ́á: «Ɛlɔ́áyɛ́ yatɛ́ Mósisi a ná mɛlɛ́mɛndɔ́ iŋgínə́ índíə́ ɔ hiəfulə hɛ́ nɛalɔ́nana ɔ uwíndiə ɔ muəndú ikúílí a ná wɛɛ́ya bulə́ əə́?»

⁸Yə́susu a sɛ́á: «Ɛ́ɛ! Ɔ́ ɛlɔ́áyɛ́ wə́núə́ mɔlɛ́má natákátɔ́ á Mósisi a ná bənú iŋgínə́ índíə́ ɔ bə́núə́ bəəndú ɔ ubulə; ɔ nɛbalɛ́ná, yɛ́ sa nɔ́yɛ́ bámɛnɛna.

⁹Mɛ ndɔ bənú nɔ́yɛ́ lɛna ɔwá; wɛ́ɛ́yɛ́ ɔwá a ŋɔ wayɛ́á muəndú bulə, úhúlíə́ ɔwá bá nana nɛbɛ́lɛna tɔa, ábá a ná bɛ́lɛ́ná muəndú muinə́muinə́, a lɛa kɔ́átɔ́ ɔ bɔbɛ́á bɔ́ nilókóno.»

¹⁰Bɔkɔ́nɛna bá ná wɛɛ́ya lɛná bá sɛ́á: «Ábá nɔ́yɛ́ yɛ́ lɛ́á ɔbáá wɔ́ mɛlɛ́mɛndɔ́ na wɔ́ muəndú, yɛ́ báka muɛsɛ ɔwá mɔndɔ á túə́nə́ ɛndandɛ́.»

¹¹Yə́susu a sɛ́á: «Tátá bɛndɔ bəkimə bá lɛ́á na iŋgínə́ ɔ yɛ́táyɛ́ ɛtambá ɔ ɔwɔ́kɔ, mba ɔ́maná ɔ bááyɛ́ ɔbá Huɛlɛ́ a ná iŋgínə́ índíə́ ɔ nɔ́yɛ́ uluminə.

¹²Ɔ taká, tɔkɔma tɔ́ lɛa tuəŋí ɔtɔ́á bɛndɔ bá lɛ ndɔ kafámá ɔ ɔbɛ́lɛna: Bɔ́mɔtɛ́ bá lɛa nɔ́yɛ́ ɔ botolokiə ɔ uwəbú nibíbíə́nə, ɛlɔ́áyɛ́ bɔ́mɔtɛ́, bɔsɔ́kɔ́ bɛndɔ bá ndɔ bəə́bu híə́niə tɔaka. Bɔ́mɔtɛ́ bá ndɔ tuənə nɔ́yɛ́ ɛlɔ́áyɛ́ Nɛmanɛna nɛ́ Nɔɔ́mɛná. Mɔndɔ ɔwá óso ɔ yɛ́táná yɔkɔ́na ɔwɔ́kɔ, á ɔ́kɔ́kɛ́na.»

¹³Nɔ́yɛ́, bɛndɔ bá ka tɔlɔ́matɔ́ húlə́kənə á Yə́susu busíə́ ɔkɛaka ɔwá a bəə́bu makátá tálákɛ́na, á bəə́bu bɛ́kálákɛ́nɛ́ná tɔ́na. Mba, bɔkɔ́nɛna bá ná bəə́bu bɛsɔmba.

¹⁴Yə́susu a sɛ́á: «Nɔ lɛ bəə́bu kotíə́ bɔ́ányɛ. Nɔ́ níása tɔlɔ́matɔ́ tɔ́ sákɔ́ná na mɛaŋɔ́á bɔkɔasɛ́á, Nɛmanɛna nɛ́ Nɔɔ́mɛná nɛ́ báka ɛlɔ́áyɛ́ bááyɛ́ ɔbá bá lɛ́á ɛ́sɛ́á bəə́bu.»

¹⁵Ɛnaka á tɔlɔ́matɔ́ makátá tálákɛ́na, a ná hɔalɛ́na ɔmɔ́tɔ́yɛ́, a ná ákana.

¹⁶Wɔmɔtɛ́ mɔndɔ a ná bɛ́nyálɛ́la á Yə́susu busíə́, a ná wɛɛ́ya batá a sɛ́á: «Á Muínə́niə, yatɛ́ ɔ yɛɛsɛ mɛ́ ná hɔ́ánána ɔkɛa mbá mɛ́ buɔmɔ́ bɔ́ ikúílíə́kimə kusə́nə əə́?»

¹⁷Yə́susu a ná wɛɛ́ya bɛ́kámɔ́sɔ́na a sɛ́á: «Ɛlɔ́áyɛ́ yatɛ́ ɔ ndɔ mɛaŋɔ́á batɛna ɔ yatɛ́ ɔyɛ́á yɛ́ lɛ́á yɛɛsɛ əə́? Ɔmɔtɛ́ bíbúə́ a lɛ́á muɛsɛ, ábá ɔ ndɔ siə ɔwá ɔ nɔmɔ́kɔ, ɔŋgɔ́kɔ́ imbə́ndə́.»

¹⁸A ná bíhíə́níníə́ a sɛ́á: «Ɔ́ uyə́níə́ imbə́ndə́ əə́?» Yə́susu a sɛ́á: «Ɔ lɛ ɔnɔnɔ, ɔ lɛ lokono, ɔ lɛ obo, ɔ lɛ mɔndɔ bɔkɔa kanjɛ́na;

¹⁹lúbúnə́kə́ tɛ́á na nɛ́á; hikə́kíə́ wawɔ́á mukúlə́kulə ɛ́sɛ́á aŋɔ́á bɛ́múɛ́tɛ́.»

²⁰Ɛnɔ́kɔ́ yɛ́ mɔndɔ a ná Yə́susu lɛ́na a sɛ́á: «Mɛ ka yítə́yí imbə́ndə́ mikimə ɔŋgɔkɔ, mba yatɛ́ yɛ́mɔtɛ́ yɛ́ ndɔ mɛaŋɔ́á bísiə ɔ ɔkɛa əə́?»

²¹Yə́susu a sɛ́á: «Ábá ɔ ndɔ siə ɔbáá muɛsɛ, káka, lúə́kə́ bikimə ɔbɛ́á ɔ lɛ́á itíə́nə́tɔ, índíə́kínə́ bɛɛ́ta ɔ tɔtɔyɔ́nɔ́, nɔ́yɛ́, ɔ ŋɔ bá na nɛmbiaŋɛ ɔ nɔɔ́mɛná. Əlimə yɛ nɔ́yɛ́, sɔ́nɔ ɔŋgɔ́kɔ́ mɛaŋɔ́á.»

²²Ɛnaka ɛnɔ́kɔ́ yɛ́ mɔndɔ a ɔ́kɔ́kɛ́ná nɔ́yɛ́, a ná ákáná na busə́kə ɔ mɔlɛ́má bɔkɔasɛ́á, a ka báá bɔ́ŋɔ́tɔ́ mɔŋɛ́ŋa.

²³Yə́susu a ná báyɛ́á bɔkɔ́nɛna lɛ́na a sɛ́á: «Hmm! Ɔ taká, mɛ ndɔ bənú nɔ́yɛ́ lɛna; yɛ́ lɛa ányákátɔ́ ɔwá mɔmbiaŋɛ a fínə́ ɔ Nɛmanɛna nɛ Nɔɔ́mɛná.

²⁴Mɛ ndɔ bənú lɛna tɔ́na ɔwá; ɛnjakásɛ yɛ́ óso ɔtɔ́mbɛ́na ɔ yósi yɛ́ ndɔtɔkɔ yáyɛ́na ɔwá, mɔmbiaŋɛ a fínə́ ɔ Nɛmanɛna nɛ́ Huɛlɛ́.»

²⁵Ɛnaka bɔkɔ́nɛna bá ɔ́kɔ́kɛ́ná nɔ́yɛ́, bá ná ə́lə́mə́nə́ mɔŋɛ́ŋa, bá sɛ́á: «Mba, ɔwanɛ́ Huɛlɛ́ a ŋɔ nuəkəniə əə́?»

²⁶Yə́susu a ná bə́əbu məə́sə tala, a sɛ́á: «Yatɛ́ ɔyɛ́á yɛ́ lɛ́á ányákátɔ́ ɛlɔ́áyɛ́ bɛndɔ, yɛ́ lɛa ndɛ́ndɛlɛ́á á Huɛlɛ́ busíə́.»

²⁷Nɔ́yɛ́, Bíə́lə a ná Yə́susu batá a sɛ́á: «Síə́kínə, uwəsú ɔbá tɔ́ ná bɛkɔa bikimə bɛ́yákáláka, tɔ ná aŋɔ́á ɔ́ŋgɔ́kɔ, yatɛ́ tɔ ŋɔ kusənə əə́?»

²⁸A sɛ́á: «Ɔ taká, mɛ ndɔ bə́nú nɔ́yɛ́ lɛna; ikúílí ɔyɛ́á Mɔná wa mɔndɔ a ŋɔ báá tuənə́tɔ́ ɔ ɔwáyɛ́ hikómo hɛ́ tuúmə ɔ misí miɔ́sɔ, uwənú ɔbá nɔ ná mɛaŋɔ́á ɔ́ŋgɔ́kɔ, nɔ ŋɔ báá tɔ́na tuənə́kínə́tɔ́ ɔ niómo nɛ́ tukómo na tɔ́fandɛ́ ɔkɛaka ɔwá, nɔ niómo nɛ́ tutikə na tɔ́fandɛ́ tɔ́ Ísilahɛ́lɛ kə́lə́sə́kíə́.

²⁹Ata ɛ́yánɛ́ ɔwá a ŋɔ mambɛ́la bɛ́yákalaka ɛlɔ́áyɛ́ ámɛ, bənínyə́ balɛ́mɛndɔ́ ata bəəndú, isə́ ata inyə́, baná ata yayɛ́á misí, á manyá ɔwá a ŋɔ kusənə ɔ ɔyáyɛ́na bikimə ɔbɛ́á a ná tíkə́, ɔ nɛafana nɛ́ buɔmɔ́ bɔ́ ikúílíə́kimə.

³⁰Bəəŋí ɔbá bá lɛ́á isíŋáka bə́búsíə́, bá ŋɔ híána bə́limə, bəəŋí ɔbá bá lɛ́á bə́limə, bá ŋɔ híána bə́búsíə́.»