Read Tunen Matíó 21 Bible Online

Matíó 21 - Tunen bible

Matíó 21

¹Ɔ ikúílí ɔyɛ́á bá ná báá hoóyi na Yəlúsalɛma, ɛ́sɛ́á bá ná kafámá ɔ Bɛtɛfasɛ́ ɔ bálaka ɔ ɔmáá wɔ́ Olífia, Yə́susu a ná báyɛ́á bɔkɔ́nɛna báfandɛ́ lɔma,

²a sɛ́á: «Nɔ́ ákáná ɔ bɔnɔŋɔ ɔbɔ́á bɔ́ lɛ́á uwənú busíə́. Nɔ ndɔ inyə́ yɛ ɛnjakásɛ nibəkə tiŋə́tɔ́ na wayɛ́á mɔná ɔ ɛmɛ́ŋɛ́. Nɔ́ yɛɛ́ta tuŋúnə, nɔ́ mɛaŋɔ́á yɛɛ́ta húlə́nínə.

³Ábá mɔndɔ a ná bənú bɔkɔa batá, nɔ́ wɛɛ́ya bɛ́kámɔ́sɔ́ná nɔ sɛ́á: “Isə́lúkú a lɛa ilókí na yɛɛ́ta.” A ndɔ niasaka ɔwá nɔ yɛɛ́ta húlə́nə́ háha tɔfá.»

⁴Nɔ́yɛ́ yɛ́ ka bɛ́kɛaka ɔwá Mətilə má mɔhɛ́nátɔtányɛ́ má bíúndúsíníə́, má sɛ́á:

⁵«Nɔ́ ɔmɔ́la wa bətínə́ yɛ Síyono lɛná nɔ sɛ́á: “Siəlínə, ɔ́ wawɔ́á Munəni wɔ́ɔwɔ, a lɛa ɔ ɔsákɔna ɔwáwɔ busíə́ na nɛlɛaŋɛ nikimə, tálɛ́mátɔ́ ɔ inyə́ yɛ ɛnjakásɛ ɔmbáŋá, umúlə wɔ́ bɛ́ ɛnjakásɛ.”»

⁶Bɔkɔ́nɛna bá ná ákana, bá ná kɛ́áká ɛ́sɛ́á Yə́susu a ná bəə́bu lakɛ́na.

⁷Bá ná inyə́ yɛ ɛnjakásɛ tilə́nə́ na wayɛ́á mɔná. Bá ná bíə́búə́ bɛlɛŋa bɛ́ nikə tálákɛ́na, bá ná Yə́susu tuəníníə́ ɔ ɔmbáŋá.

⁸Bɛndɔ bəəŋí bá ná bíə́búə́ bɛlɛŋa bɛ́ nikə bɛ́lɛ́ákɛ́na ɔ ətíə́ yɛ ɛnɔ́mɛ; bɔ́mɔtɛ́ bá matala sɔ́mbáka ɔ bɛtɔbɔtɔ́bɔ́, bá maáta bɛ́lɛakɛna ɔ ɛnɔ́mɛ.

⁹Iloŋo yɛ́ bɛndɔ ɔyɛ́á yɛ́ ná báá yɛ́ ndɔ buəkinə na ɔyɛ́á yɛ́ ná báá yɛ́ ndɔ wɛɛ́ya ɔŋgɔ, bá yə́mə́kə, bá sɛ́á: «Tuúmə tɔ́ báá na Mɔná wa Ndə́witi! Huɛlɛ́ á wɔ́ɔwɔ saná ɔwá a nɔ́ ndasá ɔ niínyə nɛ́ Isə́lúkú! Tuúmə na Huɛlɛ́ hə́ní ɔ bɛlɔndɔ́ nuúmə́!»

¹⁰Ɛnaka Yə́susu á fínə́ ɔ Yəlúsalɛma, bətínə́ mikimə yɛ́ ná nyɛŋála, bɛndɔ bá bataka bá sɛ́á: «Wa hə́níə́ wɔ́ɔwɔ əə́?»

¹¹Bá bəə́bu bɛ́kámɔsɔkɔna bá sɛ́á: «Á Yə́susu, á Mɔhɛ́nátɔtányɛ́ wa Násalɛtɛ, ɔ misí yɛ Kalɛ́lɛa.»

¹²Əlimə yɛ nɔ́yɛ́, Yə́susu a ná fínə́ ɔ Tɛ́mbɛlɛ. A ná lúmə́ ɔ bəlúə́ bəkimə bá Tɛ́mbɛlɛ ɔ ukúbə. A ná bɛtáka bɛ́ bəsə́njíə́ bɛcácɔ́ nyɛ́kákɛ́ná na bituənínə́ bɛ́ basɛma tubúbə́.

¹³A ná bəə́bu lɛ́na a sɛ́á: «Yɛ́ báka tilə́kə́tɔ́ ɔ Mətilə má Huɛlɛ́ yɛ́ sɛ́á: “Yamɛ́á Miímə yɛ́ ŋɔ báá Miímə yɛ mabɛ́kálɛ́na.” Mba uwə́nú, nɔ ka mɛɛ́ta híə́nəsiə nibítímínə́ nɛ́ boóbi!»

¹⁴Bəndímə́ndímə na bitíndə bá ná bɛ́nyálɛ́la ɔ ɔwayɛ́ ɛmɛ́ŋɛ́ ɔ Tɛ́mbɛlɛ, a ná bəə́bu niŋə́sə́kíə́.

¹⁵Ɛnaka bisə́lúkú bɛ́ bətitiəmahánɛna na bamanyumbə́ndə́ bá bɛ́táyɛ́ bɛkɔa bɛ́ yələ́mənə siəkínə ɔbɛ́á Yə́susu a ná kɛ́áka, bá ná ɔ́kɔ́kɛna tɔ́na ɛ́sɛ́á tɔlɔ́matɔ́ tɔ́ ná báá tɔ́ ndɔ Yə́susu nyama na nióni nɛŋɛ́ŋa ɔ Tɛ́mbɛlɛ, bá sɛ́á: «Tuúmə na Mɔná wa Ndə́witi!» Bá ná busə́kə ɔkɔ.

¹⁶Bá ná Yə́susu batá bá sɛ́á: «Ɔ ndɔ ɔ́kɔ yatɛ́ ɔyɛ́á bá ndɔ laa əə́?» A ná bíhíə́níníə́ a sɛ́á: «Ɛ́ɛ! Mba uwənú, nɔ sa ndá bɛtambá bɛ́ Mətilə fana ɔbɛ́á bɛ́ ndɔ laa bɛ́ sɛ́á: “Ɔ ka kɛaka ɔwá, tɔlɔ́matɔ́ na bosoní bá aŋɔ́á nyámáka əə́?”»

¹⁷Nɔ́yɛ́, a ná bə́əbu tíkə́, a ná fámá ɔ bətínə́, a ná ákáná ɔ Bɛtánia, a ná bulúə́ túmbíə́ bukimə umə́.

¹⁸Ɔyáyáka, Yə́susu a ná hɔalɛ́na ɔ ndahíánáka ɔ bətínə́, mɛtaná yɛ́ ná wɛɛ́ya itíə́.

¹⁹Ɔ tɔ́mbáka ɔ ɛnɔ́mɛ, a ná bufíkiə [1] (bɔnɛŋɛ́) ɛ́ná ɔ ɛmɛ́ŋɛ́, a ná bɛ́nyálɛ́la ɔ indínə́, mba, a ná nibə́ há tɔánjɛ na tɔánjɛ; a ná bɔtámátámá lɛ́na a sɛ́á: «Ɔ sa ndá hɛtámátámá háá tɔ́na iŋísíə́kimə.» Ɔ umisíúmə́, bɔtámátámá bɔ́ ná kɔ́tálá ɔ kɔ́tálá.

²⁰Ɛ́sɛ́á bɔkɔ́nɛna bá ná síə́kínə́ nɔ́yɛ́, bá ná ə́lə́mə́nə́, bá ná Yə́susu batá bá sɛ́á: «Nəníə́ bɔ́ɔbɔ bɔtámátámá bɔ́ nɔ́ kɔ́táka náana əə́? »

²¹A ná bə́əbu bíhíə́níníə́ a sɛ́á: «Ɔ taká, mɛ ndɔ bənú nɔ́yɛ́ lɛna: Ábá nɔ báka na ilumininə ɛŋaná mɛnyɔ́ ɔ uwənú mɛlɛ́má nuúmə, nɔ sɔ́ ŋɔ kɛa ɔbánɔ́ yatɛ́ ɔyɛ́á mɛ nɔ́ kɛaka ɔ bɔ́ɔbɔ bɔtámátámá, mba, ábá nɔ ná manɛ́na ɔwá wúuwu ɔmáá wɔ́ hɔ́álɛ́na háha, wɔ́ kə́bíə́mbínə ɔ nɔmɔ́, nɔ́yɛ́ yɛ́ ŋɔ bɛ́kɛaka.

²²Ɛlɔ́áyɛ́ nɔ́yɛ́, ata yatɛ́ bɔkɔa nɔ ŋɔ Huɛlɛ́ bata na ilumininə yikimə, nɔ ŋɔ bɔɛ́ta kusənə.»

²³Yə́susu a ná ákáná ɔ Tɛ́mbɛlɛ, a ná lúmə́ ɔ bɛndɔ uwukúniə. Nɔ́yɛ́, bisə́lúkú bɛ́ bətitiəmahánɛna na bɛnatákɛ bɛ́ bɔnɔŋɔ bá ná ndásá ɔwayɛ́ busíə́, bá sɛ́á: «Na yatɛ́ bufəyí ɔ ndɔ bɛ́tána bɛkɔa kɛa əə́? Ɛ́yanɛ́ a ná aŋɔ́á bɔ́táyɛ́ bufəyí índíə́ əə́?»

²⁴Yə́susu a sɛ́á: «Ɔwámɛ tɔ́na, ɛkasɛ mɛ bənú ɛmbataka batá ɛ́mɔtɛ́; ábá nɔ ná mɛaŋɔ́á bɛ́kámɔ́sɔ́na, mɛ ndɔ bənú lakɛna ɛ́yánɛ́ a ná mɛaŋɔ́á bufəyí índíə́ ɔ nɔ́yɛ́ ɔkɛa.

²⁵Nɔ́ mɛaŋɔ́á lɛ́na: Á Huɛlɛ́ a ná Yɔhánɛsɛ lɔ́má ɔ nɛsɔa uwíndiənə alɛ́ɛ́, bɛndɔ əə́?» Bá ná lúmə́ ɔ ɔhɔ́ɔ́ bəə́bu na bəə́bu bá sɛ́á: «Ábá tɔ ná bɛ́kámɔ́sɔ́ná ɔwá, á Huɛlɛ́ a ná Yɔhánɛsɛ lɔ́má ɔ nɛsɔa uwíndiənə, ɛkasɛ a bəsú bátá a sɛ́á: “Ɛlɔ́áyɛ́ yatɛ́ nɔ sa bɛ́áyɛ́á bɛtambá luminə əə́?”

²⁶Mba, ábá tɔ ná bɛ́kámɔ́sɔ́ná ɔwá, bɛndɔ bá ná wɛɛ́ya lɔ́má, hum! Tɔ ndɔ iloŋo kɔ́lɔ́ma bɔkɔasɛ́á, bəkimə bá ka luminə ɔwá Yɔhánɛsɛ a lɛa mɔhɛ́nátɔtányɛ́.»

²⁷Bá ná bɛ́kámɔ́sɔ́ná bá sɛ́á: «Tɔ lɛ ndɔ əsú manya.» A sɛ́á: «Ɛ́ɛ! Ata mɛaŋɔ́á tɔ́na mɛ sɔ́ ŋɔ bənú lɛna ɛ́yánɛ́ a ná mɛaŋɔ́á bufəyí índíə́ ɔ ɔkɛa yatɛ́ ɔyɛ́á mɛ ndɔ kɛa.»

²⁸Yə́susu a ná kɔndá a sɛ́á: «Nəníə́ nɔ ndɔ bɔ́ɔbɔ bɔkɔa sinə əə́? Wɔmɔtɛ́ mɔndɔ a ka bá na báyɛ́á baná balɛ́mɛndɔ́ báfandɛ́. A ná wəbusíə́ ɛ́lɛ́ákɛ́na, a ná wɛɛ́ya lɛ́na a sɛ́á: “Á wamɛ́á mɔná, niɔfɛ́nɛ káka ɔ buolí ɔnyɔɔ ɔ ɛtɔbɔtɔ́bɔ́.”»

²⁹Mɔná a sɛ́á: «Mɛ sɔ́ ŋɔ ákána.» Əlimə yɛ ikúílí, ɛnaka á bílúmə́kíníə́, a ná ákáná ɔ buolí.

³⁰Nɔ́yɛ́, a ná wa ɔwɔŋgɔkɔnɔ ɛ́lɛ́ákɛ́na, hɔ́ánánátɔ́ a ná wɛɛ́ya lɔ́má ɛ́sɛ́á wəbusíə́. Mɔná a ná wɛɛ́ya bɛ́kámɔ́sɔ́ná a sɛ́á: «Óo! Á ába, mɛ ndɔ ákaka.» Mba, a sa ákána ata ɛbɔ́ka.

³¹Ətíə́ yɛ baná, báfandɛ́, ɔ́ uwə́níə́ a ná kɛ́áká ɛ́sɛ́á isə́ a ndɔ hikiə əə́? Bá ná wɛɛ́ya bíhíə́níníə́ bá sɛ́á: «Ɔ́ wəbusíə́ a ná kɛ́áká ɛ́sɛ́á isə́ a ndɔ hikiə.» Yə́susu a sɛ́á: «Ɔ taká, mɛ ndɔ bənú nɔ́yɛ́ lɛna, basɛmabɛtásɛ na bolókóno bá ŋɔ taŋa ɔ ufínə ɔ nɛmanɛna nɛ́ Huɛlɛ́.

³²Ɔ taká, Yɔhánɛsɛ a ka ndasá, a ná bənú ɛnɔ́mɛ yɛ́ bátaká ínə́kíníə́, mba, nɔ sa bɛ́áyɛ́á bɛtambá luminə; ɔ nifəŋə, basɛmabɛtásɛ na bolókóno bá ka lumininə. Ata ɛ́sɛ́á nɔ́ ná nɔ́yɛ́ síə́kínə, nɔ sa mɔlɛ́má kɔ́ŋɔ́na ɔkɛaka ɔwá nɔ bɛ́áyɛ́á bɛtambá lúmínə.»

³³Yə́susu a ná bə́əbu lɛná tɔ́na a sɛ́á: «Nɔ́ wúmotí ɔŋana ɔ́kɔ́kɛ́na: Wɔmɔtɛ́ mɔndɔ a ka yáyɛ́á ɛtɔbɔtɔ́bɔ́ nyɔɔkɔ, a ná yɛɛ́ta kákákɛ́na, a na nɔáta tɛ́káká umə́, a ná hɛtɛ́ka bə́lə́kíə́. Əlimə yɛ nɔ́yɛ́, a ná ɛtɔbɔtɔ́bɔ́ índíə́ ɔ ɛlɛ́ndɛa ɔ bətə́tə́niə, a ná ákáná ɔ mɔkɛnda wɔ́ hata.

³⁴Ɛnaka ikúílí yɛ́ məhuə yɛ́ ndáfámá, a ná báyɛ́á bɔnyɛna lɔ́má ɔwá bá ká bɛ́áyɛ́á bɛlɔŋɔ́tɛ́ ɛ́tá á bɔnyɔɔ busíə́, bá wɛɛ́ya húlə́nínə.

³⁵Mba, bɔnyɔɔ bá na bəə́bu halɛ́ákɛ́na; bá ná wɔmɔtɛ́ hɔ́ányáka, ɔ wɔmɔtɛ́, bá ná mɔlɔ́á húmbə, bá ná wɔmɔtɛ́ lúmə́kə́ na miɔkɔ tɔ́na.

³⁶Muití ɛtɔbɔtɔ́bɔ́ a ná bɔnyɛna bənə́bənə́ lɔ́má tɔ́na bəəŋí yáyɛ́ná bə́búsíə́. Mba, bɔnyɔɔ bá ná bəə́bu bɛ́kɛ́ákɛ́ná bɔkɔa bɔ́mɔtɛ́ ɛ́sɛ́á bə́búsíə́.»

³⁷Əlimə yɛ ikúílí, a ná wayɛ́á mɔná lɔ́má, a sɛ́á: «Ata nəníə́, ɛkasɛ bá wɛɛ́ya bə́tíə́.»

³⁸Mba, ikúíli bɔnyɔɔ bá ná mɔná yámá, bá ná botólíə́ ɔ ɔlaa bəə́bu na bəə́bu bá sɛ́á: «Ɔ́ mɔndɔ wɔ́ɔwɔ ɔwá a ŋɔ bɛtɔbɔtɔ́bɔ́ bɛ́ isə́ ɛ́taka. Nɔ́ sákɔ́na, tɔ́ wɛɛ́ya ɔ́nɔ́kɔ́ mbá ɛtɔbɔtɔ́bɔ́ yɛ́ híáná yə́ə́su».

³⁹Bá ná wɛɛ́ya halɛ́na, bá ná wɛɛ́ya fámáná ɔ ɛtɔbɔtɔ́bɔ́, bá ná wɛɛ́ya ɔnɔkɔ.

⁴⁰Yə́susu a sɛ́á: «Ikúílí ɔyɛ́á muití ɛtɔbɔtɔ́bɔ́ a ŋɔ ndafámá, nəníə́ a ŋɔ bátáyɛ́ bɔnyɔɔ ɛtɔbɔtɔ́bɔ́ kɛaka əə́?»

⁴¹Bá ná wɛɛ́ya bíhíə́níníə́ bá sɛ́á: «A ŋɔ bááyɛ́ baŋɛ́na bá bɔnyɔɔ ɔ́nɔ́kɔ ɛŋaná mahana, a ŋɔ ɛtɔbɔtɔ́bɔ́ índiə ɔ ɛlɛ́ndɛa ɔ bənə́bənə́ ɔbá bá ŋɔ botoliə ɔ ɔwayɛ́ ɔ məhuə uwíndiə ɔ ikúílí ɔyɛ́á a ndɔ hikiə.»

⁴²A sɛ́á: «Nɔ́ sa ndáfana ɔ Mətilə ɔwá: Muɔkɔ ɔwá bafalaba bá ná ómbóko, muítə wɔ́ ná híáná wɔ́ nihíkíli. Nɔ́yɛ́ yɛ́ lɛ́á buolí bɔ́ Isə́lúkú.» Yələ́mənə yɛ́ bɔkɔa ɔ uwəsú busíə́.

⁴³«Ɔ́ ɛlɔ́áyɛ́ nɔ́yɛ́ mɛ ndɔ bənú lɛna ɔwá; bá ŋɔ bənú Nɛmanɛna nɛ́ Huɛlɛ́ kátɔ́na, bá nɛɛ́ta índíə́ ɔ bɔnɔŋɔ buinə́buinə́ ɔbɔ́á bɔ́ ŋɔ bɛkɔa bɛɛsɛ kɛaka. [

⁴⁴Wɛ́ɛ́yɛ́ ɔwá a ŋɔ kɔɛna ɔ mútə́yí muɔkɔ, a ŋɔ bɛ́nɔ́kɔkɔ; mba, ábá muɔkɔ wɔ́ ná mɔndɔ kɔɛ́na, wɔ́ ŋɔ muití ɔ́kɔkɔ.»]

⁴⁵Ɛnaka bisə́lúkú bɛ́ bətitiəmahánɛna na Bɛfalísia bá yííyí ɛŋana yɛ́ Yə́susu ɔ́kɔ́kɛ́na, bá ná manyá ɔwá ɛlɔ́áyɛ́ əbú a ná bá a ndɔ hɛ́na.

⁴⁶Bá ná botólíə́ ɛŋgɛ́lɛ́ ɔ usiə ɔkɛaka ɔwá bá wɛɛ́ya halɛ́na; mba, bá ka báá bá ndɔ iloŋo kɔ́lɔ́ma bɔkɔasɛ́á, Yə́susu a ka báá uwəbú busíə́ ɛ́sɛ́á mɔhɛ́nátɔtányɛ́.