Read Tunen Matíó 22 Bible Online

Matíó 22 - Tunen bible

Matíó 22

¹Yə́susu a ná manyɔ́ ɔ uwəbú ɔŋana tɛ́na a sɛ́á:

²«Nɔ́ síə́kínə, Nɛmanɛna nɛ́ Nɔɔ́mɛná nɛ́ lɛa hɔ́ákátɔ́ ɔ munəni ɔmɔtɛ́ ɔwá a ná ɛŋganda yɛ́ nɛbɛ́lɛna nɛ́ wayɛ́á mɔná tikə.»

³Nɔ́yɛ́, a ná báyɛ́á bɔnyɛna lɔ́má ɔwá a ká bɛndɔ ɛ́lɛ́ákɛ́na, bá sákɔ́na ɔ nɛbɛ́lɛna. Mba, bááyɛ́ bɛndɔ bá sa hikiə ɔndasa.

⁴A ná bɔnyɛna bənə́bənə́ lɔma, a ná bəə́bu lɛ́na a sɛ́á: «Bɛɛ́la bikimə bɛ́ báka tábɔ́nákátɔ, Mɛ ná bɛ́ámɛ́á bɛfɔŋɔ na bɛ́ámɛ́á bilúkə́ bɛ́ tɔtɔ́kɔ́tɔ́ ɔ́nɔkɔ, bá sákɔ́na ɔ ɛŋganda.»

⁵Mba, bááyɛ́ bɛndɔ bá sa nɛ́táyɛ́ nɛɛ́lɛna ɛta ɛ́sɛ́á bɔkɔa, bá ná ákáká ɔbánɔ́ ɔ uwəbú masɔ́ma. Wɔ́ɔwɔ ɔ ɔwayɛ́ ɛtɔbɔtɔ́bɔ́, wə́ə́ní ɔ ɔwayɛ́ nyuŋgə́.

⁶Bɔ́mɔtɛ́ bɔnyɛna bá ná bəə́bu súbə́kə́ muɛsɛ, bá ná bəə́bu ɔnɔkɔ,

⁷hilóbi hɛ́ ná mɔ́táyɛ́ munəni ɛta, a ná báyɛ́á bɔkɔfɔnɛa lɔ́má ɔwá bá bááyɛ́ bəcəŋə ɔnɔkɔ, bá yəbúə́ bətínə́ títə́kíə́.

⁸Nɔ́yɛ́, a ná bɔ́mɔtɛ́ báyɛ́á bɔnyɛna lɛ́na a sɛ́á: «Bɛ́labɔ́nɛ́á bɛ́ nɛbɛ́lɛna bɛ́ lɛa tábɔ́nákátɔ, mba, bɛndɔ ɔbá mɛ ná ɛ́lɛ́ákɛ́na, bá lɛ báá hɔ́ánánátɔ́ ɔwá bá bɛɛ́ta nɛaka.

⁹Nɔ́ ákána ɔ manáka, ɔ tusə́mbə́nə́níə́ tɔ́ bɛnɔ́mɛ, nɔ́ bɛndɔ ɛ́lɛ́ákɛ́ná bəkimə ɔbá nɔ ndɔ nibəkə umə́, bá sákɔ́na ɔ ɛŋganda.»

¹⁰Bɔnyɛna bá ná ákáká ɔ mɛnɔ́mɛ, bá ná bɛndɔ bəkimə ɛ́lɛ́ákɛ́na ɔbá bá ná bɔŋɔ; babɛ́á na baasɛ. Yanda yɛ́ ɛŋganda yɛ́ ná úndúə́ mbíɔ́kɛ.

¹¹Munəni a ná fínə́ ɔ yanda ɔ bɛndɔ usinə ɔbá a ná ɛlɛ́ákɛ́na, a ná wɔmɔtɛ́ mɔndɔ ɛ́ná ɛŋaná bɔlɛŋa bɔ́ nɛbɛ́lɛna.

¹²A ná wɛɛ́ya lɛ́na a sɛ́á: «Á ɔŋɔ́ámɛ, nəníə́ ɔ ná fínə́ háha ɛŋaná bɔlɛŋa bɔ́ nɛ́bɛ́lɛna əə́? » Mba, wɔ́ɔwɔ a ná wɛɛ́ya indímə́ sana.

¹³Nɔ́yɛ́, munəni a ná bɔnyɛna lɛ́na a sɛ́á: «Nɔ wɛɛ́ya makátá ɔ́lɔ́kɔ́kɔ́ na makɔlɔ́, nɔ́ wɛɛ́ya fə́míə́ ɔ níə́lətíə́ ɔ ibínə́binə nuúmə́ ɔhá malɛlá má lɛ́á na bɛka ɔ ukóto.»

¹⁴Yə́susu a ná tifə́níə́ a sɛ́á: «Ɛ́ɛ! Bəəŋí bá lɛa ɛ́lɛ́ákɛ́nátɔ, mba, tɛ́tɛ́á bá lɛ́á tɛ́fátɔ.»

¹⁵Əlimə yɛ́ nɔ́yɛ́, Bɛfalísia bá ná Yə́susu hɛtɔkɔ hɔ́kɛ́na ɛlɔ́áyɛ́ hɛkɔma usiə ɔkɛaka ɔwá, bá wɛɛ́ya nənə́síə́ na yɛ́mɔtɛ́ ɛmbataka.

¹⁶Bá ná bɔ́mɔtɛ́ bə́búə́ bɔkɔ́nɛna lɔ́má na bɔ́mɔtɛ́ bɛndɔ bá Əlóto ɔkɛaka ɔwá, bá ká Yə́susu lɛná bá sɛ́á: «Á Muínə́niə, tɔ ndɔ manya ɔwá ɔ ndɔ hɔ́ɔ́ á taká, ɔ ndɔ bɛndɔ úkúniə nəníə́ bá ná hɔ́ánána uniŋə ɛ́sɛ́á Huɛlɛ́ a ndɔ siə. Ɔ lɛ ndɔ bɛndɔ kɔ́lɔ́ma, ata nifəŋə ɔháá.

¹⁷Lɛná bəsú tə́lə́ŋu, ɛ́sɛ́á wə́wúə́ usinə: Wə́súə́ umbə́ndə́ wɔ́ ndɔ bəsú iŋgínə́ índiə ɔ ɛtásɛ ɔsábɔ́na á káyɛsa alɛ́ɛ́, tɔ sá hɔ́ánana ɔ ɔsábɔ́na əə́?»

¹⁸Mba, Yə́susu a yəbúə́ ɛŋgɛ́lɛ́ manyaka, a ná bəə́bu bíhíə́níníə́ a sɛ́á: «Uwənú á bɛndɔ bá ɛbɛ́nyɔ́nyɔlɔ, ɛlɔ́áyɛ́ yatɛ́ nɔ ndɔ mɛaŋɔ́á kɔsɔnɛna əə́?

¹⁹Nɔ́ mɛaŋɔ́á ɛcácɔ́ ínə́níə́ ɔyɛ́á nɔ ndɔ sábɔ́nɛna ɔ ɛtásɛ.» Bá ná wɛɛ́ya yɛɛ́ta ínə́níə́.

²⁰A ná bəə́bu batá a sɛ́á: «Híə́ní hibílíndíníə́ híihi, na bɔ́ɔbɔ á busíə́ əə́?»

²¹Bá sɛ́á: «Hɛ́ káyɛsa.» A ná kɔndá a sɛ́á: «Nɔ́ índíə́ á káyɛsa yatɛ́ ɔyɛ́á yɛ́ lɛ́á yɛ́ káyɛsa, á Huɛlɛ́ yatɛ́ ɔyɛ́á yɛ́ lɛ́á yɛ́ Huɛlɛ́!»

²²Ɛnaka bá bɛ́ɛ́yɛ́ bɛtambá ɔ́kɔ́, bá ná ə́lə́mə́nə́ mɔŋɛ́ŋa. Bá ná wɛɛ́ya tíkə́ ɔmɔ́tɔ́yɛ́, bá ná ákáka.

²³Ɔ bɔ́táyɛ́ buɔsɛ́, bɛ́mɔtɛ́ Bɛsalutúsia bá ná ndáfámá á Yə́susu busíə́. Bá ná wɛɛ́ya batá bá sɛ́á:

²⁴«Á Muínə́niə, Mósisi a ka laa a sɛ́á: “Ábá mɛlɛ́mɛndɔ́ a ná muəndú bɛ́lɛ́na, mbá a ná wə́ə́ ɛŋaná mɔná, munínyə́ a ŋɔ tíkə́ ilíkə́ bísúə́linə, a wɛɛ́ya baná bíə́nəkinə.”

²⁵Bənínyə́ ɔ balɛ́mɛndɔ́ bá ka bá bálɛ́ndɔ́lɔ́mɔnɔ háha ɔ uwəsú, wəbusíə́ a ná muəndú bɛ́lɛ́na, a ná wəə. Ɛ́sɛ́á a sa mɔná tíkə, munínyə́ a ná ilíkə́ bísúə́línə.

²⁶Yɛ́ ná manyɔ́ bɛ́kɛaka nɔ́yɛ́ na munínyə́ ɔwá a ná úndúsíníə́ báfandɛ́ na wa niɔŋgɔnɔ ɛ́lálɔ́ ɔkafámáká ɔ niɔŋgɔnɔ nɛ́ bənínyə́ bálɛ́ndɔ́lɔ́mɔnɔ.

²⁷Əlimə yɛ nɔ́yɛ́, muəndú a ná ayɛ́ wə́ə́ tɔ́ná.

²⁸Ɔ́ ɛlɔ́áyɛ́ nɔ́yɛ́ tɔ ndɔ aŋɔ́á bata ɔwá, ɔ ikúílí yɛ́ nɛhɔŋɔa, ɛ́sɛ́á báyɛ́ bəkimə bálɛ́ndɔ́lɔ́mɔnɔ bá ná wɛɛ́ya bɛ́lɛ́na, uwə́níə́ munínyə́ a ŋɔ báá ibə́ yɛ́ mɔ́táyɛ́ muəndú əə́?»

²⁹Yə́susu a sɛ́á: «Nɔ lɛa nanákátɔ, nɔ lɛ ndɔ Mətilə ɔ́kɔ muɛsɛ ata injiŋə yɛ Huɛlɛ́.

³⁰Ɔ taká, ɔ ikúílí yɛ́ nɛhɔŋɔa, balɛ́mɛndɔ́ bá sa ndábɛ́lɛ́na, ata bəəndú bá sá ndálɔnɔ, bá ŋɔ niŋəkə ɛ́sɛ́á bɛáŋgɛlɛ ɔ nɔɔ́mɛná.»

³¹Mba, ɛlɔ́áyɛ́ bɔkɔa bɔ́ nɛhɔŋɔa nɛ́ bəwə́nú, nɔ́ sa fana ɛ́sɛ́á Huɛlɛ́ a ná bənú hɔ́kɛ́na a sɛ́á:

³²«Mɛaŋɔ́á mɛ lɛ́á Huɛlɛ́ yɛ́ Ábɛlaháma, Huɛlɛ́ yɛ Ísakɛ, Huɛlɛ́ yɛ Yákɔbɔ əə́?» Nɔ́ manyá ɔwá Huɛlɛ́ a lɛa Huɛlɛ́ yɛ bɔɔmɔ́, tátá Huɛlɛ́ yɛ bəwə́nú.

³³Nɛ́áyɛ́á nindínə́ nɛ́ uwukúniə nɛ́ ná ilúkunə yɛ́ bɛndɔ ə́lə́mə́nə́síə́ mɔŋɛ́ŋa ɔyɛ́á yɛ́ ná bá ɔmɔ́tɔ́yɛ́.

³⁴Ɛnaka Bɛfalísia bá ɔ́kɔ́ ɔwá Yə́susu a ná Bɛsalutúsia yóyíə́, bá ná kɔtálána.

³⁵Wɔmɔtɛ́ mukúniə imbə́ndə́ uwəbú ətíə́ a ná Yə́susu kɔsɔ́ná na ɛmbataka, a sɛ́á:

³⁶«Á Muinə́niə, ɔ́ uwə́níə́ umbə́ndə́ wɔ́ ná imbə́ndə́ mikimə yáyɛ́ná əə́?»

³⁷A ná wɛɛ́ya bɛ́kámɔ́sɔ́na a sɛ́á: «Hikə́kíə́ Isə́lúkú ɔ yawɔ́á Huɛlɛ́ na wə́wúə́ mɔlɛ́má mukimə, na yáwɔ́á ɛmanya yikimə, na híə́wúə́ hɛtányɛ́ hikimə.»

³⁸Muítə wɔ́ lɛ́á umbə́ndə́ wúbúsíə́, mɔŋɛ́ŋa tɔ́na ɔwá wɔ́ ná imbə́ndə́ mikimə yáyɛ́ná.

³⁹Wɔ́ ɔwɔŋgɔkɔnɔ ɔwá wɔ́ ndɔ hɔ́ána na wúbúsíə́ ɔwá wɔ́ ndɔ laa wɔ́ sɛ́á: «Hikə́kíə́ wawɔ́á mukúlə́kulə ɛ́sɛ́á aŋɔ́á bɛ́múɛ́tɛ́.»

⁴⁰Yítə́yí imbə́ndə́ ífəndí yɛ́ lɛ́á ɔ hiəfulə hɛ́ Mósisi na hɛ́ Bɔhɛ́nátɔtányɛ́.

⁴¹Ɛ́sɛ́á Bɛfalísia bɛ́ ná bá kɔtákánátɔ́, Yə́susu a ná bə́əbu batá a sɛ́á:

⁴²«Nəníə́ nɔ ndɔ fɛka ɛlɔ́áyɛ́ Mɛ́sia əə́? Ɛlɔ́áyɛ́ ənú, Mɛ́sia a lɛa wa híə́níə́ hikúlə əə́?» Bá ná wɛɛ́ya bɛ́kámɔ́sɔ́ná bá sɛ́á: «A lɛa wa hikúlə hɛ́ Ndə́witi.»

⁴³A sɛ́á: «Nəníə́ nɔ ndɔ ənú sinə, ikúílí ɔyɛ́á Umbúínyi Mɔnaŋanaŋa wɔ́ ná ndə́witi fínə́ ɔ mɛɛ́lɔ, a ka wɛɛ́ya ɛ́lɛnɛna “Isə́lúkú” na ɔlaa ɔwá;

⁴⁴Huɛlɛ́ á Mɔmanɛna a ka yamɛ́á Isə́lúkú lɛna ɔwá, sɔ́nɔ ɔ ndə́túə́nə ɔ ɔwámɛ mɔkátá wɔ́ bɛnɔ́mɛ, mɛ ŋɔ kɛaka ɔwá, báwɔ́á bokóyíkoyi bá bámɛ́nɛ́ná nɛbɛ́lɛ́nɛ́ná nɛ́ máwɔ́á makɔlɔ́.»

⁴⁵«Ábá Ndə́witi a ndɔ wɛɛ́ya ɛ́lɛnɛna yáyɛ́á isə́lúkú, nəníə́ ɛ́kɛ a báá tɔ́na ibíə́nəkənə yɛ́ Ndə́witi əə́?»

⁴⁶Nɔ́yɛ́, ata mɔndɔ tɔ́na a sa ɛtambá bɔ́ŋɔ yɛ́ ɔwáyɛ́ ɔbɛ́kámɔsɔna, ɔ botolokiə ɔ bɔ́táyɛ́ buɔsɛ́, ata mɔndɔ a sa bɛ́ɔ́kɔ́lɛna tɔ́na ɔ ɔwayɛ́ ɛmbataka ɔbata.