Read Tunen Matíó 24 Bible Online

Matíó 24 - Tunen bible

Matíó 24

¹Yə́susu a ka bá ɔ ɔfámáka ɔ Tɛ́mbɛlɛ, wɛɛ́ya ɔ wákaka, báyɛ́á bɔkɔ́nɛna bá ná bɛ́nyálɛ́la ɔ ɔwayɛ́ ɛmɛ́ŋɛ́, bá ná wɛɛ́ya Tɛ́mbɛlɛ ínə́níə́ ɛ́sɛ́á yɛ́ lɛ́á lúmə́kə́tɔ́ muɛsɛ.

²A ná bəə́bu lɛ́na a sɛ́á: «Nɔ ndɔ bɛ́ɛ́yɛ́ bikimə sinə əə́? Ɔ taká, mɛ ndɔ bənú lɛna ɔwá, ata muɔkɔ úmotí wɔ́ sa ndə́túə́nə́ háha tálátɔ́ ɔ ɔsɔ́kɔ́ ɔmbáŋá: Bá ŋɔ miítə sánáka mikimə.»

³Yə́susu a ka tuənə ɔ misí ɔ ɔmáá wɔ́ Olífia, báyɛ́á bɔkɔ́nɛna bá ná wɛɛ́ya bísúə́línə ɔ ɛmɛ́ŋɛ́, bá ná wɛɛ́ya batá bá sɛ́á: «Lɛná bəsú; maánɛ́á bɛ́táyɛ́ bɛkɔa bɛ́ ŋɔ bɛ́kɛaka, yatɛ́ hibílíndíníə́ hɛ́ ŋɔ nɛ́áwɔ́á nɛndahíáná na nisúki nɛ́ misí ínə́niə əə́?»

⁴Yə́susu a sɛ́á: «Nɔ́ bíkókósókíə́, ata mɔndɔ a lɛ bənú nimbə.»

⁵Ɔ taká, bɛndɔ bəəŋí bá ŋɔ húlə́kə ɔ ɔwámɛ niínyə, bá sɛ́á: «Mɛaŋɔ́á mɛ lɛ́á Mɛ́sia.» Bá ŋɔ bɛndɔ nímbə́kə bəəŋí.

⁶Ikúílí ɔyɛ́á nɔ ŋɔ ɔ́kɔ́kɛna bá ndɔ laa ɔwá, mɔnɔŋɔ má lɛa ɔ bilə́, ata ɔwá bilə́ bɛ́ lɛa ɔ ɔsákɔna, nɔ lɛ kɔ́lɔ́má ata bɔkɔa bɔkɔasɛ́á, bɛ́táyɛ́ bɛkɔa bɛ́ ná hɔ́ánána bɛ́ bɛ́kɛ́áka, mba, tátá ɔ́ nisúki nɛ́ bɛkɔa.

⁷Bɔnɔŋɔ bɔ́ ŋɔ ɔsɔ́kɔ́ bɔnɔŋɔ nuəkiə, nɛmanɛna nɛ́ ŋɔ nɛ́mɔtɛ́ nɛmanɛna kásɔ́na; mɛtaná yɛ́ ŋɔ báá ɛmbáta, misí yɛ́ ndandamaka ɔ bɛbɔ́ka.

⁸Bɛ́ɛ́yɛ́ bɛkɔa bikimə bɛ́ ŋɔ báá ɛ́sɛ́á məsə́kə má nibotólíníə́ nɛ́ nɛyɛ́bɛ́na.

⁹Nɔ́yɛ́, bɛndɔ bá ŋɔ bə́nú təkəsəkə, bá ŋɔ bənú ɔ́nɔ́kɔ. Balɛmanyáhuɛlɛ́ bá ŋɔ bənú bányáka ɛlɔ́áyɛ́ nɛ́ámɛ́á niínyə.

¹⁰Nɔ́yɛ́, ilumininə yɛ́ bɛndɔ bəəŋí yɛ́ ŋɔ yɔtɔ. Bá ŋɔ halɛakɛnana, bá ŋɔ bányákana bəə́bu na bəə́bu.

¹¹Bɔhɛ́nátɔtányɛ́ bá bɛkanja bá ŋɔ fámáka, bá ŋɔ bɛndɔ bəəŋí nənəkiə.

¹²Bɔbɛ́á bɔ́ ŋɔ áŋánaka ɔ bɛbɔ́ka bikimə ɔ nindínə́ ɔnɛ́á, nibo nɛ́ ɔmbana muiŋí nɛ́ támbɔ́á.

¹³Mba, wɛ́ɛ́yɛ́ ɔwá a ŋɔ ɔ́nɛ́na ɔkafámáká ɔ nisúki, Huɛlɛ́ a ŋɔ wɛɛ́ya nuəkəniə.

¹⁴Bá ŋɔ yɛ́ɛ́yɛ́ Imbə́nú Yɛɛsɛ yɛ́ Nɛmanɛna nɛ́ Nɔɔ́mɛná nɔŋɔnakɛna ɔ bɛndɔ bá misí mikimə ɔkɛaka ɔwá, balɛmanyáhuɛlɛ́ bəkimə bá yɛɛ́ta ɔ́kɔ́kɛ́na. Əlimə yɛ nɔ́yɛ́ mbá nisúki nɛ́ misí nɛ́ ndáfama.

¹⁵Ɛnáká nɔ məə́ŋə́ŋə má Mɔsakata ɛ́ná tuənə́tɔ́ ɔ ɛbɔ́ka yɛnaŋanaŋa ɛ́sɛ́á mɔhɛ́nátɔtányɛ́ á Taníɛ́lɛ a ná hɔ́kɔ́, wɛ́ɛ́yɛ́ ɔwá a lɛ́á mɔfana, á nɔ́yɛ́ ɔ́kɔ́ muɛsɛ!

¹⁶Nɔ́yɛ́, bááyɛ́ ɔbá bá ŋɔ bámɛnɛna ɔ Yútɛa bá kəbítímə́kə ɔ ɛmáá.

¹⁷Wɛ́ɛ́yɛ́ ɔwá a ŋɔ bá ɔ muanda, a lɛ tukínə ɔwá, a kə́fínə́ ɔ miímə ɔ bɛɛ́la ɔbáta mbá a ákánána.

¹⁸Wɛ́ɛ́yɛ́ ɔwá a ŋɔ báá ɔ ɛtɔbɔtɔ́bɔ́, a lɛ ndahíáná ɔ ɔmbɛ́la ɔ bɔlɛŋa bɔ́ nikə ɔndɛɛta.

¹⁹Ɛmɔ́kɛ́ na bəəndú bá məfumə na bááyɛ́ ɔbá bá ŋɔ báá bá ndɔ nyóhiə ɔ mátáyɛ́ mɔɔsɛ́.

²⁰Nɔ́ Huɛlɛ́ bɛ́kálákɛ́na ɔkɛaka ɔwá, yɛ́táyɛ́ ikúílí yɛ́ lɛ ɛ́nyáná na ikúílí yɛ́ ɛmbɔŋɔ mbá ata ɔ buɔsɛ́ bɔ́ Sábatɛ.

²¹Ɔ taká, bɛndɔ bá ŋɔ məsə́kə maŋɛ́ŋa siəkinə, məsə́kə ɔmá bá sa ndə́sinə ɔ lúmə́kinə ɔ nɛbalɛ́ná nɛ́ misí ɔ ndafámáká isíŋáka. Bá sa ndá nɛ́táyɛ́ nindínə́ nɛ́ məsə́kə sinə́ tɔ́na.

²²Ata Huɛlɛ́ a lɛ mááyɛ́ mɔɔsɛ́ kútíhə́síə́, há ata mɔndɔ a sa ndábɛɔlɔ. Mba, a ka maáta kútíhəsiə ɛlɔ́áyɛ́ bɛndɔ ɔbá a ná tɛfa.

²³Nɔ́yɛ́, ábá mɔndɔ a na bənú lɛ́na a sɛ́á: «Ɔ́ Mɛ́sia yɛ́ɛ́yɛ́ háha!» Ataná: «Ɔ́ Mɛ́sia yííní hə́ní» nɔ lɛ lumínə.

²⁴Ɔ taká, bɛmɛ́sia bɛ́ bɛkanja na bɔhɛ́nátɔtányɛ́ bá bɛkanja bá ŋɔ fámáka, bá ŋɔ tɔŋgɛtɛ́nɛ́á tɔ́ yələ́mənə na bɛkɔa bɛŋɛ́ŋa kɛaka ɔkɛaka ɔwá, bá nímbə́kə́ ata báyɛ́ ɔbá Huɛlɛ́ a ná tɛfa.

²⁵Nɔ́ ɔ́kɔ́ muɛsɛ, mɛ ná bə́nú nɔ́yɛ́ mə́nyə́síə́ ubusíə́ bɔ́ ikúílí.

²⁶Ábá bá ná bə́nú lɛná bá sɛ́á: «Nɔ́ síə́línə, Mɛ́sia a lɛa hə́ní ɔ makɔ́tákɛ!» Nɔ lɛ ákáná umə́. Ata ɔwá bá sɛ́á: «Á wɔ́ɔwɔ bítímə́tɔ́ háha» nɔ lɛ lumínə.

²⁷Ɔ taká, nɛndahíáná nɛ́ Mɔná wa mɔndɔ nɛ́ ŋɔ báá ɛ́sɛ́á abáka ɛmɔanyama yɛ́ fámá ɔ nɛhɔalɛ́nɛ́ná, yɛ́ nɔmaka ɔkafámáká ɔ nɛsianɛ́ná nɛ́ hiɔtɔ́tɔ́.

²⁸Ɔ ɛbɔ́ka ɔyɛ́á ɛkɔɔ́lɛa yɛ́ mɛnyama yɛ́ lɛ́á, ɔmɔ́tɔ́yɛ́ abáka bilúmə bɛ́ kɔtakana.

²⁹«Ɔ əlimə yɛ́ mááyɛ́ mɔɔsɛ́ má məsə́kə, hiɔtɔ́tɔ́ hɛ́ ŋɔ nímə, muilí wɔ́ sɔ́ ŋɔ nɔma tɔ́na, tusənji tɔ́ ɔmbáŋá tɔ́ ŋɔ kɔakɔna, mənjiŋə má ɔmbáŋá tɔ́na má ŋɔ bínyúkəkə.

³⁰Nɔ́yɛ́ hɛŋgɛtɛ́nɛ́á hɛ́ Mɔná wa mɔndɔ hɛ́ ŋɔ fámálana ɔ nɔɔ́mɛná, tutikə tukimə tɔ́ misí tɔ́ ŋɔ bɛ́lɔ́mɔ́nɔ. Tɔ́ ŋɔ Mɔná wa mɔndɔ siəkinə ɔsákɔna ɔ bɛlɔndɔ́ nuúmə́ úndúə́tɔ́ na injiŋə na tuúmə tɔŋɛ́ŋa.

³¹Mɛsɛ́bá yɛ́ ŋɔ bɛ́kámɔsɔkɔna, Mɔná wa mɔndɔ a ŋɔ bɛ́áyɛ́á bɛáŋgɛlɛ lɔ́máka ɔ tɔlɛ́ŋɛ́ túnisə tɔ́ misí, a ŋɔ bááyɛ́ kɔtaka ɔbá a ná tɛfa.»

³²Nɔ́ iŋgətí yɛ bufíkiə ɔ́kɔ́ muɛsɛ. Ikúílí ɔyɛ́á yə́yíə́ mɛlíáfɛ yɛ́ ndɔ tɔsɔ, abáka nɔ manya ɔwá ɛmɔ́lá yɛ́ lɛa hoóyi.

³³Hɔ́ánánátɔ́, uwənú tɔ́na, ɛnáká nɔ́ bɛ́ɛ́yɛ́ bikimə siəkínə, nɔ manya ɔwá Mɔná wa mɔndɔ a lɛa hoóyi, a lɛa bá tɔ́na hata.

³⁴Ɔ taká, mɛ ndɔ bənú nɔ́yɛ́ lɛna, bɛndɔ bá yɛ́ɛyɛ ɛnyɔŋɔnɔ bá sa ndátɔ́mbá ubusíə́ ɔbɔ́á bɛ́ɛ́yɛ́ bɛkɔa bikimə bɛ́ ndafama.

³⁵Misí na nɔɔ́mɛná yɛ́ ŋɔ tɔ́mba, mba, bɛ́ámɛ́á bɛtambá bɛ́ sa ndátɔmba.

³⁶Ɛlɔ́áyɛ́ buɔsɛ́ mbá ata ɔŋgɛ́ŋɛ́, ata mɔndɔ ɔmɔtɛ́ a lɛ ndɔ manya, ata bɛáŋgɛlɛ bɛ́ nɔɔ́mɛná, ata Mɔná wa Huɛlɛ́, ɔ́maná á Isə́ bíbúə́ a ndɔ manya.

³⁷Yatɛ́ ɔyɛ́á yɛ́ ná bɛ́kɛ́áka ɔ ikúílí yɛ́ Nɔ́wa, yɛ́ ŋɔ bɛ́kɛaka hɔ́ánánátɔ́ ɔ ikúílí ɔyɛ́á Mɔná wa mɔndɔ a ŋɔ ndahiana.

³⁸Ɔ taká, ɔ yɛ́táyɛ́ ikúílí, ubusíə́ ɔbɔ́á mulumə mɔŋɛ́ŋa wɔ́ fɛndáka, bɛndɔ bá lɛ nɛ́áka, bá nyákɛna, bá bɛ́lɛakɛnana, bá milóní lónokiə ɔkafámáká ɔ buɔsɛ́ ɔbɔá Nɔ́wa a ná fínə́ ɔ isóyí;

³⁹ɔ ikúílí ɔyɛ́á mulumə mɔŋɛ́ŋa wɔ́ ná fɛ́ndáka, bá sa bɛ́manya, wɔ́ ná bəə́bu bəkimə hɔmbɛ́na. Nɔ́yɛ́ tɔ́na yɛ́ ŋɔ bɛ́kɛaka ɔ ikúílí ɔyɛ́á Mɔná wa mɔndɔ a ŋɔ ndahiana.

⁴⁰Nɔ́yɛ́, bɛndɔ báfandɛ́ bá ŋɔ báá ɔ bɛtɔbɔtɔ́bɔ́, bá ŋɔ ɔmɔtɛ́ ákánana, bá wɔmɔtɛ́ tikə.

⁴¹Bəəndú báfandɛ́ bá ŋɔ báá ɔ imílə ɔtafa ɔ nɔáta, bá ɔmɔtɛ́ ákánana, bá wɔmɔtɛ́ tikə.

⁴²Nɔ báá ɛmbɛnyɛ́ bɔkɔasɛ́á nɔ lɛ ndɔ buɔsɛ́ manya ɔbɔá Isə́lúkú a ŋɔ ndahiana.

⁴³Nɔ ndɔ nɔ́yɛ́ manya muɛsɛ ɔwá, ata muití ɔmbɛ́la a bá a ndɔ ɔŋgɛ́ŋɛ́ wɔ́ bulúə́ manya ɔwá muíbi a ndɔ ndafámáká, há a ka tuənə ɛmbɛnyɛ́ ɔkɛaka ɔwá, muíbi a lɛ ɔmbambala wɔ́ yayɛ́á miímə oso.

⁴⁴Ɛlɔ́áyɛ́ nɔ́yɛ́, bənú tɔ́na nɔ báá ɛmbɛnyɛ́ bikúílí bikimə bɔkɔasɛ́á Mɔná wa mɔndɔ a ŋɔ ndahíáná ɔ ikúílí ɔyɛ́á nɔ lɛ ndɔ manya.

⁴⁵Ɔ́ uwə́níə́ mɔnyɛna a lɛ́á muɛsɛ na ɛmanya ɔwá isə́lúkú ná tínímíə́ ɔkɛaka ɔwá, a bɔsɔ́kɔ́ bɔnyɛna bɛ́labɔ́nɛ́á índíə́kínə ɔ ikúílí yɛ́ hɔ́ánánátɔ́ əə́?

⁴⁶Nɛhɔnɔ na wɛ́ɛ́yɛ́ mɔnyɛna ɔwá isə́lúkú a ŋɔ kɔana a ndɔ bímbíkísiə ɔ buolí ɛnáká a ndáhiana.

⁴⁷Ɔ taká, mɛ ndɔ bənú nɔ́yɛ́ lɛna, yayɛ́á isə́lúkú a ŋɔ wɛɛ́ya máyɛ́á maasɛ niasɛna məkimə ɔkɛaka ɔwá a maáta kɛndákána.

⁴⁸Mba, ábá wɛ́ɛ́yɛ́ mɔnyɛna mɔbɛ́á a ná bɛ́láá a sɛ́á: «Yamɛ́á isə́lúkú a ndɔ nə́ŋə́liniə ɔ ndahíánáka»,

⁴⁹mbá a ná botólíə́ ɔ bɔsɔ́kɔ́ bɔnyɛna usúbə, a nɛ́áka, a nyákɛna na bəhíólóhiolo.

⁵⁰Nɔ́yɛ́, Isə́lúkú yɛ wɛ́ɛ́yɛ́ mɔnyɛna a ŋɔ ndahíáná ɔ buɔsɛ́ ɔbɔ́á a lɛ ndɔ bɛ́táta na ɔŋgɛ́ŋɛ́ ɔwá a lɛ ndɔ manya;

⁵¹a ŋɔ wɛɛ́ya bulə, a ŋɔ wɛɛ́ya məsə́kə índiəkinə ɔmá má ná wɛɛ́ya yayɛna, ɔ iŋgətí yɛ məsə́kə má bɛndɔ bá nɛbɛ́nyɔ́nyɔlɔ: Ɔmɔ́tɔ́yɛ́ yɛ́ ŋɔ báá malɛlá na nikóto nɛ́ bɛka.