Read Tunen Matíó 25 Bible Online

Matíó 25 - Tunen bible

Matíó 25

¹Nɔ́yɛ́, Nɛmanɛna nɛ́ nɔɔ́mɛná nɛ́ ŋɔ bámɛnɛna hɔ́ákátɔ́ ɔ niómo nɛ́ babɔ́la ɔnɛ́á nɛ́ ná bitútúə́ ɛtá ɔ nɛnyáná na ibə́.

²Ɔ uwəbú ətíə́, bálánɔ bá sa bá na ɛmanya, bálánɔ bá ka bá na ɛmanya.

³Báyɛ́ bá ɛŋaná ɛmanya bá sa mooló ɛ́ta məəŋí ɔ bitútúə́ ɔ wákaka.

⁴Bɛ́manya, bá ka bitútúə́ ɛtaka na mooló ɔ uwəbú mabɛka.

⁵Ɛ́sɛ́á ibə́ a ná bá a ndɔ nə́ŋə́liniə, bəkimə bá ná tɔmbɔ, bá ná bíndə́ŋúnə́ ɔ hinó.

⁶Ɔ ətíə́ yɛ́ bulúə́, bá ná nióni ɔ́kɔ́ nɛ́ sɛ́á: «Ibə́ a nɔ́ ndafámá óo! Nɔ́ fámáká ɔ ɔwayɛ́ nɛnyáná!»

⁷Əlimə yɛ nɔ́yɛ́, nɛ́ɛ́yɛ́ niómo nɛ́ babɔ́la bá ná hɔnyɔ́ákɛ́á, bá ná bɛ́tábɔ́náka ɔ bitútúə́ utiə.

⁸Bá ɛŋaná ɛmanya bá ná bɛ́manya bɛ́tɔ́kɔ́lɔ́kɛ́ná bá sɛ́á: «Nɔ́ bəsú tɛ́tɛ́á yɛ mooló índíə́, bíə́súə́ bitútúə́ bɛ́ ndɔ nímə.»

⁹Bɛ́manya bá ná bəə́bu bíhíə́níníə́ bá sɛ́á: «Bóo, má sɔ́ ŋɔ hɔ́ánana na bəsú na bənú! Nɔ ká mə́ə́nu ɔ́ndɔ́ ɔ bɛsábɛa.»

¹⁰Ikúílí ɔyɛ́á bá ná ákáná ɔ mooló ɔwɔ́ndɔ, ibə́ a ná ndáfama. Babɔ́la ɔbá bá ná bɛ́tábɔ́náka, bá ná fínə́ ɔ miímə yɛ nɛbɛ́lɛna, bɛndɔ bá ná hɛkɔ́kɛ fanja.

¹¹Əlimə yɛ ikúílí, bááyɛ́ bá ɛŋana ɛmanya bá ná ndáfámá na ɔlaa bá sɛ́á: «Á Isə́lúkú, á Isə́lúkú, tɔ́kɔ́lɛ, kunə́ bəsú hɛkɔ́kɛ!»

¹²Mba, a ná bəə́bu bíhíə́níníə́ a sɛ́á: «Ɔ taká, mɛ ndɔ bənú nɔ́yɛ́ lɛna, mɛ lɛ ndɔ bənú manya.»

¹³Yə́susu a ná ɔŋana tifə́níə́ a sɛ́á: «Nɔ́ báá ɛmbɛnyɛ́ bɔkɔasɛ́á nɔ lɛ ndɔ buɔsɛ́ manya ata ɔŋgɛ́ŋɛ́.»

¹⁴«Ɔ taká, nɛmanɛna nɛ́ Nɔɔ́mɛná nɛ́ ŋɔ hɔ́áka tɔ́na ɔ bɔnyɛna bálálɔ́ ɔbá yə́búə́ isə́lúkú ɔ wákaka ɔ mɔkɛnda, a ná bəə́bú máyɛ́á maasɛ afákɛ́ná.

¹⁵A ná wɔ́ɔwɔ índíə́ bɛcácɔ́ bɛ́lánɔ, ɔ wɔmɔtɛ́ bɛ́fandɛ́, ɔ wɔmɔtɛ́ tɔ́na ɛcácɔ́ ɛ́mɔtɛ́. A ná mɔndɔ tɛ́á índíə́ ɛ́sɛ́á yayɛ́á iŋgínə́ yɛ́ lɛ́á, a ná ákana.

¹⁶Mɔnyɛna ɔwá bá ná índíə́ bɛcácɔ́ bɛ́lánɔ, a ná hútú undunə́ botoliə na bɛɛ́ta, a ná manyɔ́ kusənə bɛcácɔ́ bɛ́lánɔ.

¹⁷Wɔ́ɔwɔ ɔwá bá ná índíə́ bɛ́fandɛ́, a ná manyɔ́ kusənə bɛcácɔ́ bɛ́fandɛ́.

¹⁸Mba, wɛ́ɛ́yɛ́ ɔwá bá ná índíə́ ɛcácɔ́ ɛ́mɔtɛ́, a ná ká yɛɛ́ta tímínə́ ɔ misí.»

¹⁹«Ɛnaka ikúílí yɛ́ tɔ́mbáká, isə́lúkú yɛ bááyɛ́ bɔnyɛna a ná ndáhiana, a ná bəə́bu ɛ́lɛ́ákɛ́na. A ná bəə́bu batá ɔwá, bá wɛɛ́ya nífúnə́kínə́ ɛ́sɛ́á bá ná tíkə́ bɛ́áyɛ́á bɛcácɔ́ bɛ́kɛakɛna.»

²⁰Wɛ́ɛ́yɛ́ ɔwá a ná kúsə́nə́ bɛ́lánɔ, a ná bɛ́nyálɛ́la, a sɛ́á: «Á isə́lúkú, ɔ ka mɛaŋɔ́á índiə bɛcácɔ́ bɛ́lánɔ, siəlínə, ɔ́ bɛ́mɔtɛ́ bɛ́lánɔ bɛ́ɛbɛ mɛ́ ná kúsə́nə.»

²¹Yayɛ́á isə́lúkú a ná wɛɛ́ya lɛ́na a sɛ́á: «Muɛsɛ nɔ́yɛ́! Ɔ báka mɔnyɛna muɛsɛ na yɔkɛ́nana. Ɛ́sɛ́á ɔ ná mɛaŋɔ́á ínə́níə́ ɔwá, ɔ lɛa mɔnyɛna wa yɔkɛ́nana ɔ tɔkɔakɔ́á, mɛ ŋɔ aŋɔ́á tínímiə isə́lúkú yɛ bɛkɔa bɛŋɛ́ŋa; sɔ́nɔ háha ɔ́ bílə́nə́kə́ na mɛaŋɔ́á.»

²²Wɛ́ɛ́yɛ́ ɔwá bá ná índíə́ bɛ́fandɛ́, a ná bɛ́nyálɛ́la, a sɛ́á: «Á isə́lúkú, ɔ ka mɛaŋɔ́á índíə́ bɛcácɔ́ bɛ́fandɛ́, mɛ ná manyɔ́ kusənə bɛ́fandɛ́.»

²³Isə́lúkú ná wɛɛ́ya lɛ́na a sɛ́á: «Muɛsɛ nɔ́yɛ́! Ɔ lɛa mɔnyɛna muɛsɛ wa yɔkɛ́nana, ɛ́sɛ́á ɔ ná mɛaŋɔ́á ínə́níə́ ɔwá ɔ lɛa mɔnyɛna wa yɔkɛ́nana ɔ tɔkɔakɔ́á, mɛ ŋɔ aŋɔ́á tínímiə isə́lúkú yɛ bɛkɔa bɛŋɛ́ŋa. Sɔ́nɔ ɔ́ bílə́nə́kə́ na mɛaŋɔ́á.»

²⁴Wɛ́ɛ́yɛ́ ɔwá a ná kúsə́nə́ ɛcácɔ́ ɛ́mɔtɛ́, a ná tíkə́ ayɛ́ bɛ́nyálɛla, a sɛ́á: «Á isə́lúkú, mɛ ka bá mɛ ndɔ manya ɔwá ɔ lɛa mɔndɔ wa natákátɔ: Ɔ ndɔ sáŋa ɔ ɛbɔ́ka ɔyɛ́á ɔ sa sɛɛla, ɔ huəkə ɔ ɛbɔ́ka ɔyɛ́á ɔ sa nɛma.

²⁵Bɔkɔ́lɔ́ma bɔ́ ka mɛaŋɔ́á ítiə, ɔ́ ɛlɔ́áyɛ́ nɔ́yɛ́ mɛ ná ká yáwɔ́á ɛcácɔ́ tímínə́ ɔ misí: Á yɛ́ɛyɛ, ɛta!»

²⁶Mba, yayɛ́á isə́lúkú a ná wɛɛ́ya bɛ́kámɔ́sɔ́ná a sɛ́á: «Á mɔnyɛna mɔbɛ́á na bɔtɔmbɔ́! Ɔ ka bá ɔ ndɔ manya ɔwá, abáka mɛ sáŋáka ɔ ɛbɔ́ka ɔyɛ́á mɛ sa sɛɛla, mɛ huəkə ɔhá mɛ sa nɛma.

²⁷Yɛ́ ka bá muɛsɛ ɔwá, ɔ ká yámɛ́á ɛcácɔ́ háá ɔ ɛbɔ́ka ɔyɛ́á abáka bá bɛɛ́ta fɔlɔkɔ ɔkɛaka ɔwá, ɛnáká mɛ ndáhíáná, mɛ ká yɛɛ́ta húlíə́ na mɔɔsɛ́ŋɛ́.

²⁸Nɔ́ yáyɛ́á ɛcácɔ́ ɛ́ta, nɔ́ yɛɛ́ta índíə́ ɔ mɔnyɛna ɔwá a lɛ́á na niómo nɛ́ bɛcácɔ́.

²⁹Ɔ taká, ata ɛ́yánɛ́ ɔwá a lɛ́á na bɛɛ́la itíə́nə́tɔ́, a ŋɔ kusənə ɔ ɔyáyɛ́na, mba, wɛ́ɛ́yɛ́ ɔwá a lɛ bá itíə́nə́tɔ́, bá ŋɔ yayɛ́á tɛ́tɛ́á kátɔ́na ɔyɛ́á a lɛ́á itíə́nə́tɔ.

³⁰Ɔ wɛ́ɛ́yɛ́ mɔnyɛna, á mɔlɛkɛ́ábɔ́kɔa, nɔ́ wɛɛ́ya fə́míə́ ɔ níə́lətíə́ ɔ ibínə́binə nuúmə́, ɔ ɛbɔ́ka ɔyɛ́á malɛlá, na nikóto nɛ́ bɛka nɛ́ ŋɔ bámɛnɛna.»

³¹«Ikúílí ɔyɛ́á Mɔná wa mɔndɔ a ŋɔ ndahíáná ɔ ɔwayɛ́ tuúmə ilúkunə na bɛ́áyɛ́á bɛáŋgɛlɛ bikimə, a ŋɔ tuənə ɔ ɔwayɛ́ hikómo hɛ́ tuúmə na bufəyí bukimə.

³²Bɛndɔ bá mɔnɔŋɔ məkimə bá ŋɔ kɔtakana ɔwayɛ́ busíə́, a ŋɔ bəə́bu álɔ́na báaba na bə́ə́ní ɛ́sɛ́á abáka mɔtátá bilúkə́ a ɛndɔ́mbá na tɔbɛ́bɛ́ álɔ́naka.

³³A ŋɔ ɛndɔ́mbá bɛ́lɛakɛna ɔ ɔwayɛ́ mɔkátá wɔ́ bɛnɔ́mɛ, tɔbɛ́bɛ́ ɔ ɔwayɛ́ mɔkátá wɔ́ biəní.

³⁴Nɔ́yɛ́, Munəni a ŋɔ bááyɛ́ bá mɔkátá wɔ́ bɛnɔ́mɛ lɛna a sɛ́á: “Uwənú ɔbá yamɛ́á Isə́ ná sáná, sákɔ́nánɔ nɔ́ ɛsalɛ yɛ́ Nɛmanɛna kusə́nə ɔnɛ́á bá ná bənú tábɔ́nákɛ́na ɔ botolokiə ɔ nɛbɔ́tɛ́ná nɛ́ misí.

³⁵Ɔ taká, ikúílí mɛtaná yɛ́ ná bá yɛ́ ndɔ mɛaŋɔ́á nɔɛna, nɔ ka mɛaŋɔ́á áfɛna. Nuiyí nɛ́ ná mɛaŋɔ́á ítíə́, nɔ ná mɛaŋɔ́á nyə́síə́. Mɛ ka bá mukiníə́nú, nɔ ka mɛaŋɔ́á káhá ɔ uwə́nú ɔmbɛ́la.

³⁶Mɛaŋɔ́á ikə́ndəli, nɔ ka mɛaŋɔ́á lɛŋaka, mɛaŋɔ́á ɔ mɔɔ́mbɔ, nɔ ka mɛaŋɔ́á bíhíkə. Mɛaŋɔ́á ɔ ɛbɔka, nɔ ka ndá mɛaŋɔ́á siəlinə.”

³⁷Nɔ́yɛ́, bátaká bá ŋɔ bata bá sɛ́á: “Ə́ə́! Á Isə́lúkú, manánɛ́á tɔ ná aŋɔ́á síə́kínə́ mɛtaná, tɔ ná aŋɔ́á afɛ́ná, aŋɔ́á na nuíyí, tɔ ná aŋɔ́á nyə́síə́ əə́?

³⁸Aŋɔ́á mukiníə́nú, tɔ ná aŋɔ́á káha, aŋɔ́á inkə́ndəli, tɔ ná aŋɔ́á lɛ́ŋáka əə́?

³⁹Manánɛ́á ɔ ná bá ɔ mɔɔ́mbɔ mbá ata ɔ miímə yɛ ɛbɔka, tɔ ná ndá aŋɔ́á síə́línə əə́?”

⁴⁰Munəni a ŋɔ bəə́bu bɛ́kámɔsɔna a sɛ́á: “Ɔ taká, mɛ ndɔ bənú nɔ́yɛ́ lɛna ɔwá; ikúílí tɛ́á ɔyɛ́á nɔ ná nɔ́yɛ́ kɛ́áka ɔ wɔmɔtɛ́ wa bááyɛ́ ɔ batɛ́tɛ́á ɔbá bá lɛ́á bámɛ́á bənísə́, ɔ ɔwámɛ nɔ́ ná nɔ́yɛ́ kɛ́áka.”»

⁴¹«Nɔ́yɛ́, a ŋɔ bááyɛ́ bá ɛsalɛ yɛ́ mɔkátá wɔ́ biəní lɛna a sɛ́á: “Uwənú ɔbá bunímə́! Nɔ́ ákáká hata na mɛaŋɔ́á, ɔ hiwə hɛ́ ikúílíə́kimə ɔhɛ́á bá ná tábɔ́náka ɛlɔ́áyɛ́ Sátana na bɛ́áyɛ́á bɛáŋgɛlɛ.

⁴²Ɔ taká, ikúílí mɛtaná yɛ́ ná bá yɛ́ ndɔ mɛaŋɔ́á nɔɛna, nɔ sa ndá mɛaŋɔ́á áfɛna; nuiyí nɛ́ ka mɛaŋɔ́á ítiə, nɔ sa mɛaŋɔ́á nyə́siə;

⁴³mɛ ka bá mukiníə́nú, nɔ sa mɛaŋɔ́á káha; mɛ ka bá inkə́ndəli, nɔ sa mɛaŋɔ́á lɛŋa; mɛaŋɔ́á ɔ mɔɔ́mbɔ ata ɔ miímə yɛ ɛbɔka, nɔ sa ndá mɛaŋɔ́á siəlinə.”»

⁴⁴Nɔ́yɛ́, bááyɛ́ tɔ́na bá ŋɔ bɛ́kámɔsɔna bá sɛ́á: «Ə́ə́! Á Isə́lúkú, manánɛ́á tɔ ná aŋɔ́á síə́kínə́ mɛtaná, nuiyí, ata mukiníə́nú, ikə́ndəli, ɔ mɔɔ́mbɔ mbá ata aŋɔ́á ɔ miímə yɛ́ ɛbɔka, tɔ ná kinə́ ɔ ɔwáwɔ ɔwɔ́lɔ əə́?»

⁴⁵Nɔ́yɛ́, a ŋɔ bəə́bu bɛ́kámɔsɔna a sɛ́á: «Ɔ taká, mɛ ndɔ bənú nɔ́yɛ́ lɛna ɔwá, Ikúílí tɛ́á ɔyɛ́á nɔ sa nɔ́yɛ́ kɛa ɔ wɔmɔtɛ́ wa bááyɛ́ ɔ batɛ́tɛ́á, ata ɔ ɔwámɛ nɔ ka nɔ́yɛ́ kinə ɔ ɔkɛa.»

⁴⁶Bááyɛ́ bá ŋɔ ákaka, báaba ɔ məsə́kə má ikúílíə́kimə, ɔ bátaká, ɔ bɔnɔmɔ bɔ́ ikúílíə́kimə.