Read Tunen Matíó 26 Bible Online

Matíó 26 - Tunen bible

Matíó 26

¹Ɛnaka Yə́susu a báyɛ́á bɔkɔ́nɛna hɔ́á ɔ uwukúniə, a na bəə́bu lɛ́na a sɛ́á:

²«Nɔ ndɔ manya ɔwá Básɛ́ka yɛ́ nɔ́ tíkə́nə mɔɔsɛ́ máfandɛ́; bá ŋɔ Mɔná wa mɔndɔ fíɔ́tɔ, bá wɛɛ́ya ɔ́mɔ́kɛ́na ɔ ɔmbásá.»

³Ɛlɔ́áyɛ́ nɔ́yɛ́, bisə́lúkú bɛ́ bətitiəmahánɛna na Bɛnatákɛ bɛ́ ilúkunə bá ná kɔtákána ɔ ɔmbɛ́la wɔ́ Kayífi, á isə́lúkú ɔ mɛŋɛ́ŋa yɛ bətitiəmahánɛna.

⁴Bá ná ɔ́kɔ́nɔ́ ɔwá, bá ɛŋgɛ́lɛ́ síə́kə bá Yə́susu halɛ́na, bá wɛɛ́ya ɔnɔkɔ.

⁵Mba, bá sɛ́á: «Tátá ɔ ikúílí yɛ́ ɛŋganda, ɔkɛaka ɔwá undumbú wɔ́ lɛ fínə́ ɔ bɔnɔŋɔ.»

⁶Ikúílí ɔyɛ́á Yə́susu a ná bá ɔ Bɛtánia ɔ ɔmbɛ́la wɔ́ Símono á mɔndɔ wa minú,

⁷wɔmɔtɛ́ muəndú a ná bɛ́nyálɛ́la ɔwayɛ́ ɛmɛ́ŋɛ́ na hikətə ɔ mɔkátá. Hɛ́ ka báá úndúə́tɔ́ na tiísi yɛ bunumbə bɔ́ mukunə́ mɔŋɛ́ŋa. Ikúílí ɔyɛ́á Yə́susu a ná báá ɔ ɔnɛ́á, wɛ́ɛ́yɛ́ muəndú a ná wɛɛ́ya bɔɛ́ta olókínə ɔ mɔlɔ́á.

⁸Ɛnaka bɔkɔ́nɛna bá siəkínə́ nɔ́yɛ́, bá ná məsə́kə ɔkɔ, bá sɛ́á: «Ɛlɔ́áyɛ́ yatɛ́ a ndɔ bɔɛ́ta tɛŋɛnɛna nɔ́yɛ́ əə́?

⁹Ɔ taká, há bá ka bɔɛ́ta lúə́ mukunə́ mɔŋɛ́ŋa, bá bɛ́táyɛ́ bɛcácɔ́ áfakɛna ɔ tɔsɔ́kánɔ́.»

¹⁰Ɛnaka Yə́susu a nɔ́yɛ́ manyá, a sɛ́á: «Nɔ́ wɛɛ́ya níásá yə́ə́bu. A ná mɛaŋɔ́á bɔkɔa buɛsɛ kɛáka.

¹¹Ɔ taká, nɔ lɛa na tɔsɔ́kánɔ́ ɔ uwənú ətíə́ bikúílí bikimə. Mba ɔwámɛ, mɛ lɛ báá ɔ uwənú ətíə́ bikúílí bikimə.

¹²Wɔ́ɔwɔ muəndú wɔ́ɔwɔ a ná mɛaŋɔ́á ólókínə́ na bunumbə ɔ mɛɛ́lɔ ɛlɔ́áyɛ́ mámɛ́á mənyənə ɔnánɛna.

¹³Ɔ taká, mɛ ndɔ bə́nú nɔ́yɛ́ lɛna ɔwá, ɔ bɛbɔ́ka ɔbánɔ́ bikimə ɔbɛ́á bá ŋɔ bɛndɔ yɛ́táyɛ́ Imbə́nú Yɛɛsɛ yəmbələkəniə, ɔ misí mikimə, bá ŋɔ bɛndɔ bɔ́táyɛ́ bɔkɔa bíkə́təkiniə tɔ́na ɔbɔ́á wɔ́ɔwɔ muəndú a ná kɛ́áka, bá ŋɔ wɛɛ́ya bɛ́kɔ́lɔmɔkɔna.»

¹⁴Ɔ yɛ́táyɛ́ ikúílí, wɔmɔtɛ́ wa niómo na báfandɛ́ nɛ́ bɔkɔ́nɛna bá Yə́susu, nɛ́áyɛ́á niínyə á Yútasɛ Isikalióto, a ná ká bisə́lúkú bɛ́ bətitiəmahánɛna kɔána;

¹⁵a sɛ́á: «Yatɛ́ nɔ ndɔ mɛaŋɔ́á índiəkinə ábá mɛ ná bənú Yə́susu sɛmɛ́na əə́?» Bááyɛ́ bɛndɔ bá ná fanáká moómo álálɔ́ má bɛcácɔ́, bá ná wɛɛ́ya índíə́.

¹⁶Ɔ ubotolokiə yɛ́táyɛ́ ikúílí, Yútasɛ a ka bá a ndɔ ikúílí yɛɛsɛ siə ɔyɛ́á a bəə́bu Yə́susu sɛmɛ́na.

¹⁷Ɔ buɔsɛ́ bɔ́ busíə́ bɔ́ ɛŋganda yɛ bɛbɛlɛ́tɛ bɛ́ ɛŋaná mətəkí, bɔkɔ́nɛna bá Yə́susu bá ná bɛ́nyálɛ́la ɔ ɔwayɛ́ ɛmɛ́ŋɛ́, bá sɛ́á: «Hə́níə́ ɔ ndɔ hikiə ɔwá tɔ Básɛ́ka tábɔ́náka əə́?»

¹⁸A sɛ́á: «Nɔ́ ákana, ábá nɔ ná fínə́ ɔ bətínə́, nɔ́ símbə ɛ́ná, nɔ́ wɛɛ́ya lɛná ɔwá, Muinə́niə a sɛ́á: “Yámɛ́á ikúílí yɛ́ lɛa hoóyi; ɔ ɔwáwɔ ɔmbɛ́la mɛ ndɔ Básɛ́ka túmbə́kiə na bámɛ́á bɔkɔ́nɛna.”»

¹⁹Bɔkɔ́nɛna bá ná ákana, bá ná kɛ́áká ɛ́sɛ́á Yə́susu a ná bəə́bu lakɛ́na, bá ná Básɛ́ka tábɔ́náka.

²⁰Ɔ bɛkɔlakɔ́lá, Yə́susu a ná túə́nə́ ɔ ɔnɛ́á na nɛ́áyɛ́á niómo nɛ́ bɔkɔ́nɛna na báfandɛ́.

²¹Ikúílí bá ná bá báá ɔ ɔnɛ́á, a sɛ́á: «Ɔ taká, mɛ ndɔ bənú nɔ́yɛ́ lɛna ɔwá, ɛkasɛ ɔmɔtɛ́ ɔ uwənú ətíə́ a mɛaŋɔ́á sɛ́ma.»

²²Ɛnaka a hɔ́lɔ́ nɔ́yɛ́, bá ná busə́kə ɔ́kɔ́ mɔŋɛ́ŋa bəə́bu bəkimə, bá ná botólíə́ ɔ ɔwayɛ́ ɔbata ɔmɔtɛ́ na wə́ní bá sɛ́á: «Á Isə́lúkú, baánɛ mɛaŋɔ́á əə́?»

²³A sɛ́á: «Mɔndɔ ɔwá mɔkátá wɔ́ ndɔ bəsú ɛ́nyánakana ɔ ɛfána ɛ́mɔ́tɛ́ na mɛaŋɔ́á, wɛɛ́ya ɛkasɛ a mɛaŋɔ́á sɛ́ma.

²⁴Ɛ́ɛ! Mɔná wa mɔndɔ a ŋɔ wə́ə́ ɛ́sɛ́á Mətilə má ndɔ laa ɔwayɛ́ ɛlɔ́á, mba ɛmɔ́kɛ́ na mɔndɔ ɔwá a ndɔ wɛɛ́ya sɛmaka. Há yɛ́ lɛa muɛsɛ ɔwá, bá lɛ wɛɛ́ya biənə!»

²⁵Nɔ́yɛ́, Yútasɛ ɔ wayɛ́á mɔsɛma a ná ɛtambá ɛ́tá, a sɛ́á: «Á Lábi, baánɛ mɛaŋɔ́á əə́?» Yə́susu a sɛ́á: «Ɔ ná nɔ́yɛ́ laa».

²⁶Ikúílí yɛ́ nɛnɛ́á, Yə́susu a ná bɛlɛ́tɛ ɛta, a ná Huɛlɛ́ mohóloniə híə́níníə́, a ná mɛɛ́ta bísə́kə́níə́, a ná índíə́ ɔ ɔwayɛ́ bɔkɔ́nɛna, a sɛ́á: «Nɔ́ ɛ́ta, nɔ́ nɛaka, yɛ́ɛyɛ yɛ́ lɛa yamɛ́á mɛɛ́lɔ.»

²⁷Əlimə yɛ́ nɔ́yɛ́, a ná ɛnyɛ́ná yɛ́ məluku ɛta, a ná Huɛlɛ́ mohóloniə híə́níníə́, a ná bəə́bu yɛɛ́ta índíə́, a sɛ́á: «Nɔ́ maáta nyákɛ́ná bənú bəkimə.

²⁸Ɔ taká, máama má lɛa mámɛ́á manɔ́ŋɔ́, manɔ́ŋɔ́ má Nɛtɔana ɔmá má ná ólókókíə́ ɛlɔ́áyɛ́ ɔmbana muiŋí, na ɛlɔ́áyɛ́ nɛniasɛna nɛ́ mabɛ́á.

²⁹Mɛ ndɔ bə́nú nɔ́yɛ́ lɛna ɔwá, Ɔ botolokiə isíŋáka, mɛ sa ndá híihi hɛtámátámá hɛ́ fíkiə nyáá tɔ́na ɔkafámáká ɔ ikúílí ɔyɛ́á mɛ ŋɔ hiítə nyákɛna, hiɔ́sɔ, na bənú ɔ Nɛmanɛna nɛ́ yamɛ́á Isə́.»

³⁰Əlimə yɛ Huɛlɛ́ ɔnyama na tumboŋo, bá ná fámá ɔ ɔwákaka ɔ ɔmáá wɔ́ Olífia.

³¹Nɔ́yɛ́, Yə́susu a sɛ́á: «Bənú bəkimə nɔ ndɔ mɛaŋɔ́á bɛ́sáŋɔ́naka ɔ bɔ́ɔbɔ bulúə́ bɔ́ niɔfɛ́nɛ. Ɔ taká Mətilə má ndɔ laa má sɛ́á: “Mɛ ŋɔ mɔtáta ɛndɔ́mbá ɔ́nɔ, ɛndɔ́mbá yɛ́ hiɔ́bɔ yɛ́ ŋɔ sámbána.”»

³²A ná tifə́níə́ a sɛ́á: «Mba, ɛnáká mɛ hɔŋɔ́á, mɛ ŋɔ ka bənú tátáká ɔ Kalɛ́lɛa.»

³³Bíə́lə a sɛ́á: «Ata bɔsɔ́kɔ́ bəkimə bá ndɔ aŋɔ́á bɛ́sáŋɔ́naka, ɔwámɛ, mɛ sa ndá aŋɔ́á bɛsaŋɔna.»

³⁴Yə́susu a sɛ́á: «Ɔ taká, mɛ ndɔ aŋɔ́á nɔyɛ́ lɛna, ɔ bɔ́ɔbɔ bulúə́ bɔ́ niɔfɛ́nɛ, ubusíə́ ɔbɔ́á miɔkɔ́ yɛ́ lɔ́ŋɔ́, ɔ ŋɔ mɛaŋɔ́á bɛ́sáŋɔna bikúílí bɛ́lálɔ́.»

³⁵Mba, Bíə́lə a ná wɛɛ́ya bíhíə́níníə́ a sɛ́á: «Ata yɛ́ nɔ bá ɔwá tɔ wə́ə́níə́, mɛ sa ndá aŋɔ́á bɛsaŋɔna.» Nɔ́yɛ́, bɔkɔ́nɛna bəkimə bá ná hɔ́lɔ́ ɛ́sɛ́á wɛɛ́ya.

³⁶Nɔyɛ́, Yə́susu a ná káfámá ilúkunə na báyɛ́á bɔkɔ́nɛna ɔ Yɛ́mɔtɛ́ ɛbɔ́ka ɔyɛ́á bá ndɔ ɛ́lɛnɛna Kɛtɛsɛmaníə́; a ná bəə́bu lɛná a sɛ́á: «Ikúílí ɔyɛ́á mɛ ndɔ ákaka hə́ní ɔ ɔbɛ́kálɛ́na, nɔ tuənə háha.»

³⁷A ná ákáná na Bíə́lə na baná báfandɛ́ bá Sɛbɛtɛ́. A ná lúmə́ ɔ busə́kə na bɔkɔ́lɔ́ma bɔŋɛ́ŋa ɔ ɔwɔ́kɔ.

³⁸A ná bəə́bu lɛ́na a sɛ́á: «Híə́míə́ hɛtányɛ́ hɛ́ ndɔ busə́kə ɔ́kɔ mɔŋɛ́ŋa. Nɔ́ tuə́nə́ háha ɛmbɛnyɛ́ na mɛaŋɔ́á.»

³⁹Ɛnaka a bəə́bu lɛná nɔ́yɛ́, a ná bísúə́lə́ hata na bəə́bu, a ná kɔ́á imbúbiə, a bɛ́kálákɛna a sɛ́á: «Ə́ə́! Á Ába, ábá nɔ́yɛ́ yɛ́ óso ɔbɛ́kɛa, tɔ́kɔ́lɛ, kɛ́áka ɔwá yɛ́ɛyɛ ɛnyɛ́ná yɛ́ məsə́kə yɛ́ ákáná hata na mɛaŋɔ́á. Ata nɔ́yɛ́, tátá ɛ́sɛ́á mɛ ndɔ hikiə, mba, ɛ́sɛ́á ɔ ndɔ hikiə.»

⁴⁰A ná tilə́ ɔ ɛbɔka ɔyɛ́á báyɛ́á bɔkɔ́nɛna bálálɔ́ bá ná bámɛ́nɛ́na, a ná bəə́bu nibə́ bíndə́ŋúnə́tɔ́ ɔ hinó. A ná Bíə́lə lɛ́na a sɛ́á: «Ɛlɔ́áyɛ́ yatɛ́ nɔ sá óso utuənə ɛmbɛnyɛ́ ɔŋgɛ́ŋɛ́ úmotí na mɛaŋɔ́á əə́?

⁴¹Nɔ́ báá ɛmbɛnyɛ́, nɔ́ Huɛlɛ́ bɛ́kálákɛ́na mbá nɔ́ sɔ́ ŋɔ kɔa ɔ mɔkɔ́lɛna. Hɛtányɛ́ hɛ́ lɛa na iŋgínə́ yɛ bɔkɔa ɔkɛa, mba, mɛɛ́lɔ yɛ́ lɛa tɔmbɔ́kɔ́tɔ.»

⁴²A ná manyɔ́ bísúə́lə ɔ bikúílí bɛ́fandɛ́, a bɛ́kálákɛna a sɛ́á: «Ə́ə́! Á Ába, ábá ɔ óso ɔkɛa ɔwá yɛ́ɛ́yɛ́ ɛnyɛ́ná yɛ́ məsə́kə yɛ́ ákáná hata na mɛaŋɔ́á, mɛ lɛ yɛɛ́ta nyɛna, yɛ́ bɛ́kɛ́áka ɛ́sɛ́á ɔ ndɔ hikiə.»

⁴³A ná ndáhíáná tɔ́na ɔ ɛmɛ́ŋɛ́ yɛ báyɛ́á bɔkɔ́nɛna, a ná bəə́bu nibə́ tɔ́na ɔ hinó, ɔ taká, hinó hɛ́ ka bá hɛ́ ndɔ bəə́bu nɛ́ŋɛ́na mɔŋɛ́ŋa.

⁴⁴A ná manyɔ́ bísúə́lə, a ná ákana, a ná lúmə́ ɔ ɔbɛ́kálɛ́na ɔ bikúílí bɛ́lálɔ́, a híánɔlɔkɔna ɔ bɛ́táyɛ́ bɛtambá.

⁴⁵Əlimə yɛ́ nɔ́yɛ́, a ná tilə́ a bɔkɔ́nɛna busíə́, a sɛ́á: «Nɔ́ hɔtɔ́kɔ, nɔ́ hinó húlə́kíə́! Ikúílí yɛ́ nɔ́ ndafámá ɔyɛ́á, ɛkasɛ bá Mɔná wa mɔndɔ sɛmɛ́na ɔ makátá má bakɛamabɛ́á.

⁴⁶Nɔ́ hɔ́álɛ́na! Tɔ́ ákána! Ə́yə́ə́, Wɛ́ɛ́yɛ́ ɔwá ɛkasɛ a mɛaŋɔ́á sɛ́má, a nɔ́ ndafama.»

⁴⁷Yə́susu a ka bá a ndɔ hɔ́ɔ́ tɔ́ná, Yútasɛ, ɔmɔtɛ́ wa niómo na báfandɛ́, a ná ndáfámá na ilúkunə yɛ́ bɛndɔ ɔbá bisə́lúkú bɛ́ bətitiəmahánɛna na Bɛnatákɛ bɛ́ bɔnɔŋɔ bá ná lɔ́má, bá nɔ́ mɛkɔ́átá itiəkə na ɛmbɔ́ŋɔ́.

⁴⁸Yútasɛ, a mɔsɛma wa Yə́susu, a ka bəə́bu hɛŋgɛtɛ́nɛ́á ínə́niə a sɛ́á: «Wɛ́ɛ́yɛ́ ɔwá mɛ ndɔ bíbóŋokiniə, wɛɛ́ya, nɔ́ wɛɛ́ya halɛ́na!»

⁴⁹Ɔ umisíúmə́, a ná bɛ́nyálɛ́la á Yə́susu busíə́, a sɛ́á: «Mɛ ná aŋɔ́á bíhólíə́ á Lábi.» A ná wɛɛ́ya bíbóŋóníə́.

⁵⁰Yə́susu a sɛ́á: «Á ɔŋɔ́ámɛ, kɛ́áká bɔ́áwɔ́á bɔsɔ́ma!» Ɔ yɛ́ɛ́yɛ́ ikúílí, bá ná Yə́susu bɛlɔtɛna, bá ná wɛɛ́ya halɛ́na.

⁵¹Ɔmɔtɛ́ wa bááyɛ́ ɔbá bá ná báá na Yə́susu, a ná wə́yíə́ mɔkɔ́átá sɔhɔ, a ná mɔnyɛna wa mutitiəmahánɛna mɔŋɛ́ŋa mulúə́ fala.

⁵²Yə́susu a sɛ́á: «Híə́níə́ wə́wúə́ mɔkɔ́átá ɔ ɛbákálá bɔkɔasɛ́á, bááyɛ́ bəkimə ɔbá bá ŋɔ mɔkɔ́átá bɛ́kɛakɛna, bá ŋɔ wə́kuninə ɔ mɔkɔ́átá.

⁵³Ɔ lɛ ndɔ manya ɔwá mɛ óso á yamɛ́á Isə́ ɔbaŋɛna, a mɛaŋɔ́á niómo nɛ́ mɛlɔ́ŋɔ́ na ífəndí yɛ́ banɔabilə́ yɛ́ bɛáŋgɛlɛ índiə əə́?»

⁵⁴Mba, ábá nɔ́yɛ́ yɛ́ ná bɛ́kɛ́áka, nəníə́ Mətilə má ŋɔ bíúndúsiniə nə́ə əə́? Má ndɔ laa ɔwá nɔ́yɛ́ yɛ́ ná hɔ́ánáná yɛ́ bɛ́kɛ́áka.

⁵⁵Nɔ́yɛ́, a ná ilúkunə lɛná a sɛ́á: «Nɔ ná ndásákɔ́na na mɛkɔ́átá na ɛmbɔ́ŋɔ́ ɔ ɔwámɛ ɔndahalɛ́ná ɛ́sɛ́á mucəŋə, mɔɔsɛ́ məkimə mɛ ka báá mɛ ndɔ bɛndɔ úkúniə ɔ Tɛ́mbɛlɛ, nɔ sa mɛaŋɔ́á halɛna.

⁵⁶Mba, bɛ́ɛ́yɛ́ bikimə bɛ́ ná bɛ́kɛ́áka ɔkɛaka ɔwá, Mətilə má bɔhɛ́nátɔtányɛ́ má bíúndúsíníə́.» Bɔkɔ́nɛna bəkimə bá ná wɛɛ́ya tíkə, bá ná tɛbákɛ́na.

⁵⁷Bááyɛ́ ɔbá bá ná Yə́susu halɛ́na, bá ná wɛɛ́ya ákánáná á Kayífi ɔmbɛ́la, á isə́lúkú ɔ mɛŋɛ́ŋa yɛ bətitiəmahánɛna. Umə́, á bamanyumbə́ndə́ na bɛnatákɛ bɛ́ Bɛyútɛnɛ bá ná bá kɔtákánátɔ.

⁵⁸Bíə́lə ɔwayɛ́, a ka báá hata a ndɔ wɛɛ́ya ɔŋgɔ, hata ɔkafámáká ɔ bituənínə́ bɛ́ isə́lúkú mɛŋɛ́ŋa yɛ bətitiəmahánɛna. A ná finə, a ná tuə́nə́ na bɔnyɛna ɔkɛaka ɔwá mbá a siəkínə́ ɛ́sɛ́á bɛkɔa bɛ́ ndɔ tifəkə.

⁵⁹Bisə́lúkú bɛ́ bətitiəmahánɛna na bɛndɔ bəkimə bá ilúkunə yɛ́ bikə́lə́síníə́ bɛŋɛ́ŋa, bá ka báá bá ndɔ imbóŋi yɛ bɛkanja siə ɔkɛaka ɔwá mbá bá Yə́susu hɔkɛ́na ɔ nyɛmbɛ́.

⁶⁰Mba, ata nɔ́yɛ́ ɛ́sɛ́á bɛndɔ bəəŋí bá ná ndásákɔ́na ɔ ɔwáyɛ́ ɔkanjɛna, bá sa yɛɛ́ta bɔ́ŋɔ. Ɔmɔ́yɛ́, bɛndɔ báfandɛ́ bá ná tɛnɛma,

⁶¹bá sɛ́á: «Wɔ́ɔwɔ mɔndɔ a ka laa a sɛ́á: “Mɛ óso ɔ tɛ́mbɛlɛ yɛ Huɛlɛ́ ɔkataka, mɛ mɛɛ́ta falabaka tɔ́na ɔ mɔɔsɛ́ málálɔ́.”»

⁶²Isə́lúkú yɛ́ bətitiəmahánɛna a ná hɔalɛ́na, a ná Yə́susu lɛ́na a sɛ́á: «Ɔ lɛ báá na bɔkɔa bɔ́ ɔbɛ́kámɔsɔna ɔ yatɛ́ ɔyɛ́á bááyɛ́ bɛndɔ bá ndɔ laa ɛlɔ́áyɛ́ áwɔ əə́»

⁶³Yə́susu a ná nə́yə́níə́ yə́ə́bu. Isə́lúkú ɔ mɛŋɛ́ŋa yɛ bətitiəmahánɛna a sɛ́á: «Ɔ niínyə nɛ́ Huɛlɛ́ yɛ buɔmɔ́, mɛ ndɔ aŋɔ́á bata, lɛná bəsú ábá aŋɔ́á ɔ lɛ́á Mɛ́sia, á Mɔná wa Huɛlɛ́.»

⁶⁴Yə́susu a sɛ́á: «Aŋɔá ɔ ndɔ nɔ́yɛ́ laa. Mba ɔwámɛ, mɛ ndɔ bənú nɔ́yɛ́ lɛna ɔbánɔ́ ɔwá, nɔ ŋɔ Mɔná wa mɔndɔ siəkinə tuənə́tɔ́ ɔ mɔkátá wɔ́ bɛnɔ́mɛ wɔ́ Huɛlɛ́ yɛ́ injiŋə yikimə ɔ húlə́kinə ɔ bɛlɔndɔ́ bɛ́ nɔɔ́mɛná.»

⁶⁵Ɛnaka isə́lúkú yɛ bətitiəmahánɛna a ɔ́kɔ́kɛ́ná nɔ́yɛ́, hilóbi hɛ́ ná wɛɛ́ya tuana, a ná bɛ́áyɛ́á bɛlɛŋa saláka, a sɛ́á: «Yatɛ́ tɔ́na əə́? Yatɛ́ imbóŋi tɔ́na tɔ ndɔ siə; nɔ ná ɔ́kɔ́kɛ́ná na mə́núə́ məlúə́ ɛ́sɛ́á a ndɔ Huɛlɛ́ kɔ́ba!

⁶⁶Nəníə́ nɔ ndɔ ənú fɛka əə́?» Bá ná bɛ́kámɔ́sɔ́na bá sɛ́á: «Yɛ́ lɛa hɔ́ánánátɔ́ ɔwá bá wɛɛ́ya ɔnɔkɔ.»

⁶⁷Bá ná botólíə́ ɔ ɔwayɛ́ utúínə na malá ɔ busíə́, bá wɛɛ́ya lúmə́kə́ na bikútú; bɔ́mɔtɛ́ bá wɛɛ́ya sánákɛna na ɛmɔ́lɛ́, bá sɛ́á:

⁶⁸«Ɔwáwɔ á Mɛ́sia, manya nə́ə, lɛná bəsú, ɛ́yánɛ́ a ná aŋɔ́á súbə́ əə́?»

⁶⁹Bíə́lə a ka bá tuənə́tɔ́ ɔ niə́lətíə́, wɔmɔtɛ́ mɔnyɛna ɔ muəndú a ná bɛ́nyálɛ́la ɔwayɛ́ ɛmɛ́ŋɛ́, a sɛ́á: «Aŋɔá tɔ́na ɔ ndɔ báá ilúkunə na Yə́susu á mɔndɔ wa Kalɛ́lɛa!»

⁷⁰Mba, Bíə́lə a ná bɛ́sáŋɔ́ná ɔ busíə́ bɔ́ bɛndɔ bəkimə, a sɛ́á: «Mɛ lɛ ndɔ manya yatɛ́ ɔyɛ́á ɔ ndɔ siə ɔlaa.»

⁷¹A ná hɔalɛ́na ɔ fámáka. Wɔmɔtɛ́ mɔnyɛna ɔ muəndú a ná wɛɛ́ya yama, a ná bɛndɔ ínə́níə́ ɔbá bá ná báá umə́ a sɛ́á: «Wɔ́ɔwɔ mɔndɔ a ná báá ɔ ilúkunə na Yə́susu, á mɔndɔ wa Násalɛtɛ.»

⁷²Mba, Bíə́lə a ná manyɔ́ bɛ́sáŋɔ́na, a sɛ́á: «Mɛ ndɔ bíkumə ɔ taká ɔwá, mɛ lɛ ndɔ wɔ́ɔwɔ mɔndɔ wɔ́ɔwɔ manya!»

⁷³Tɛ́tɛ́á yɛ́ ikúílí, bɛndɔ ɔbá bá ná báá ɔmɔ́tɔ́yɛ́, bá ná bɛ́nyálɛ́la, bá ná Bíə́lə lɛná tɔ́na bá sɛ́á: «Aŋɔá tɔ́na ɔ lɛa taká wa yɛ́táyɛ́ ilúkunə! Nɛ́áwɔ́á nindínə́ nɛ́ ɔhɔ́ɔ́ nɛ́ ndɔ ínə́níə́ muɛsɛ ɔ ɛbɔ́ka ɔyɛ́á ɔ nɔ́ húlínə».

⁷⁴Nɔ́yɛ́, Bíə́lə a ná lúmə́ ɔ minyə́ ɔ ubíkumə, a sɛ́á: «Ɔ taká mɛ lɛ ndɔ wɔ́ɔwɔ mɔndɔ manya!» Ɔ umisíumə́, miɔkɔ́ yɛ́ ná lɔŋɔ.

⁷⁵Bíə́lə a ná ɛtambá bɛ́kɔ́lɔ́mɔ́na ɔyɛ́á Yə́susu a ná láá a sɛ́á: «Ubusíə́ ɔbɔ́á miɔkɔ́ yɛ́ lɔ́ŋɔ́, ɔ ndɔ mɛaŋɔ́á bɛ́sáŋɔ́naka bikúílí bɛ́lálɔ́.» Bíə́lə a ná fama, a ná mə́kúnúə́ ɔ malɛlá na mahana məkimə.