Read Tunen Matíó 27 Bible Online

Matíó 27 - Tunen bible

Matíó 27

¹Ɛsɔ́mbalɛ́ siísíə́, bisə́lúkú bɛ́ bətitiəmahánɛna na bɛnatákɛ bɛ́ Bɛyútɛnɛ bá ná kɔtákána ɔkɛaka ɔwá bá ɔ́kɔ́nɔ́, bá Yə́susu ɔnɔkɔ.

²Bá ná bɛndɔ iŋgínə́ índíə́ ɔwá bá wɛɛ́ya ɔ́lɔ́kɔ́kɔ, bá ná wɛɛ́ya ɛtá á mɔmanɛna Bilátɛ busíə́.

³Nɔ́yɛ́, ɛnaka Yútasɛ á mɔsɛma wa Yə́susu á yámá ɔwá bá ná ɔ́kɔ́nɔ́ á Yə́susu ɔ ɔwɔ́nɔ, a ná busə́kə ɔ́kɔ́ mɔŋɛ́ŋa; a ná ákáná ɔwá a ká moómo álálɔ́ má bɛcácɔ́ híə́níə́ ɔ bisə́lúkú bɛ́ bətitiəmahánɛna na bɛnatákɛ bɛ́ Bɛyútɛnɛ,

⁴a sɛ́á: «Mɛ lɛa kɔ́átɔ́ bɔkɔasɛ́á mɛ ná bənú mɔndɔ sɛmɛ́na ɔwá a sa bɔbɛ́á kɛa.» Bá ná wɛɛ́ya bɛ́kámɔ́sɔ́ná bá sɛ́á: «Bɔ́áwɔ bɔ́ɛ́yɛ́! Nɔ́yɛ́ lɛ ndɔ bəsú sinə!»

⁵Nɔ́yɛ́, Yútasɛ a ná tíkə́ a nɔ́ bɛ́táyɛ́ bɛcácɔ́ ə́mbínə ɔ misí ɔ Tɛ́mbɛlɛ, a ná ákana, a ná kábɛlɔŋa.

⁶Bisə́lúkú bɛ́ bətitiəmahánɛna bá ná bɛ́ɛ́yɛ́ bɛcácɔ́ ɛ́ta, bá sɛ́á: «Yɛ́ lɛ bá muɛsɛ ɔ bɛɛ́ta ɔlata ɔ nitə́tə́níə́ bilíkənənə bɛ́ Tɛ́mbɛlɛ bɔkɔasɛ́á, bɛ́ lɛa bɛcácɔ́ bɛ́ manɔ́ŋɔ́.»

⁷Bá ná ɔ́kɔnɔ, bá ná ɛtɔbɔtɔ́bɔ́ yɛ́ mɔmaa ɔ́ndɔ́ na bɛ́ɛ́yɛ́ bɛcácɔ́, ɛlɔ́áyɛ́ bəkiníə́nú unyəə.

⁸Ɔ́ ɛlɔ́áyɛ́ nɔ́yɛ́ abáka bá yɛ́ɛ́yɛ́ ɛtɔbɔtɔ́bɔ́ ɛ́lɛakɛnɛna bá sɛ́á: «Ɛtɔbɔtɔ́bɔ́ yɛ́ manɔ́ŋɔ́.»

⁹Nɔ́yɛ́, bɔ́táyɛ́ bɔkɔa bɔ́ ka bíúndúsiniə ɛ́sɛ́á mɔhɛ́nátɔtányɛ́ á Yələ́mia a ná hɔ́kɔ́, a sɛ́á: «Bá ŋɔ mááyɛ́ moómo álálɔ́ má bɛcácɔ́ ɛta; ɔ́ mukunə́ ɔwá bɛndɔ bá Ísilahɛ́lɛ bá ná súmbə́níə́ ɛlɔ́áyɛ́ ɔwɔndɛ́na ɔ ɔwáyɛ́.»

¹⁰Bá ná bɛɛ́ta ɔ́ndɛ́ná ɔ ɛtɔbɔtɔ́bɔ́ yɛ́ mɔmaa, ɛ́sɛ́á isə́lúkú a ná mɛaŋɔ́á nɔ́yɛ́ lɛ́na.

¹¹Bá ná Yə́susu ákánána á Bilátɛ busíə́, a ná Yə́susu batá a sɛ́á: «Aŋɔ́á ɔ́ lɛ́á munəni wa Bɛyútɛnɛ əə́?» Yə́susu a sɛ́á: «Aŋɔ́á ɔ ndɔ nɔ́yɛ́ laa.»

¹²Nɔ́yɛ́, bisə́lúkú bɛ́ bətitiəmahánɛna na bɛnatákɛ bɛ́ Bɛyútɛnɛ bá ná botólíə́ ɔ ɔwáyɛ́ ɔ tɔkɔma ulúmə, mba, a sa bəə́bu bɛ́kámɔsɔna.

¹³Nɔ́yɛ́, Bilátɛ a sɛ́á: «Ɔ lɛ ndɔ tɔ́ɛ́yɛ́ tɔkɔma tukimə ɔ́kɔ ɔtɔ́á bá ndɔ aŋɔ́á lúmə əə́?»

¹⁴Mba, ata umbúínyi a sa fə́miə, ɔ nindínə́ ɔnɛ́á mɔmanɛna a ná ə́lə́mə́nə́ mɔŋɛ́ŋa.

¹⁵Ɔ ikúílí yɛ́ ɛŋganda yɛ Básɛ́ka, hiɔŋɔ tɛ́á, mɔmanɛna a ka báá a ndɔ bɛndɔ bá bɔnɔŋɔ mɔndɔ wa ɛbɔka niasɛna ɔmɔtɛ́, wɛ́ɛ́yɛ́ ɔwá bá ná báá bá ndɔ hikiə.

¹⁶Mɔndɔ ɔmɔtɛ́ a ka báá ɔ miímə yɛ ɛbɔka, nɛ́áyɛ́á niínyə á Balábasɛ, a úmə́kə ɔ bɛkɔa bɛbɛ́á.

¹⁷Ɛnaka Bilátɛ á siəkínə ɔwá bɛndɔ bəkimə bá ná kɔtákána, a ná bəə́bu batá a sɛ́á: «Ɔwanɛ́ nɔ ndɔ siə nɔ sɛ́á mɛ bənú níásɛ́na, á Balábasɛ alɛ́ɛ́, á Yə́susu ɔwá bá ndɔ ɛ́lɛnɛna Mɛ́sia əə́?»

¹⁸Ɔ taká, a ka bá a ndɔ manya muɛsɛ muɛsɛ ɔwá bá ná wɛɛ́ya Yə́susu sɛmɛ́ná ɛlɔ́áyɛ́ yə́búə́ ikóyí.

¹⁹Ɔ ikúílí ɔyɛ́á Bilátɛ a ná túə́nə ɔ bɛndɔ ɔ ukə́lə́siə, muənyí a ná wɛɛ́ya imbə́nú líákákɛ́na a sɛ́á: «Tɔ́kɔ́lɛ, ɔ lɛ fínə́ ɔ ɛsáká yɛ́ wɛ́ɛ́yɛ́ mɔndɔ wataká; ɔ taká, ɔ bulúə́ bukimə bɔ́ niɔfɛ́nɛ mɛ ná lɛmánáká mɔbɛ́á ɛlɔ́áyɛ́ ayɛ́.»

²⁰Bisə́lúkú bɛ́ bətitiəmahánɛna na bɛnatákɛ bɛ́ Bɛyútɛnɛ bá ka bá bá ndɔ ilúkunə yɛ́ bɛndɔ íkíniə ɔwá bá Bilátɛ batá, á bə́əbu Balábasɛ niasɛ́na ɔkɛaka ɔwá a Yə́susu ɔnɔkɔ.

²¹Mɔmanɛna a ná ɛtambá ɛ́ta, a sɛ́á: «Ətíə́ yɛ báaba bɛndɔ báfandɛ́, ɔwanɛ́ mɛ bənú níásɛ́na əə́?» Bá sɛ́á: «Á Balábasɛ oo!»

²²Bilátɛ a ná kɔndá a sɛ́á: «Yatɛ́ mɛ́ Yə́susu kɛáka nə́ə ɔwá bá ndɔ ɛ́lɛnɛna Mɛ́sia əə́?» Bəə́bu bəkimə bá sɛ́á: «Ɔ́mɔ́kɛ́na wɛɛ́ya ɔ ɔmbásá.»

²³A ná híánɔ́lɔ́ná a sɛ́á: «Yatɛ́ bɔkɔa bɔbɛ́á a ná kɛ́áka nə́ə əə́?» Mba, bá ná botólíə́ ɔ uyə́mə mɔŋɛ́ŋa bá sɛ́á: «Ɔ́mɔ́kɛ́na wɛɛ́ya ɔ ɔmbásá.»

²⁴Ɛnaka Bilátɛ a yámá ɔwá yáyɛ́á ɛmbataka yɛ́ lɛ ndɔ wɛɛ́ya ɔ́lɔ, bɛndɔ bá undumbú ákakana ɔbánɔ́ ɔ busíə́, a ná mənífə́ báta, a ná makátá bɛ́sɔ́áka ɔ busíə́ bɔ́ bɛndɔ bəkimə, a sɛ́á: «Mɛ lɛ bá na hɛkɔma ɛlɔ́áyɛ́ manɔ́ŋɔ má wɔ́ɔwɔ mɔndɔ, nɔ́yɛ́ yɛ́ ndɔ bənú sinə!»

²⁵Bɛndɔ bəkimə bá sɛ́á: «Tɔ ná lumínə́ ɔwá máyɛ́á manɔ́ŋɔ́ má kɔ́ɛ́na ɔ uwəsú mɔlɔ́á na bə́súə́ baná!»

²⁶Nɔ́yɛ́, Bilátɛ a ná bəə́bú Balábasɛ niasɛ́na; a ná iŋgínə́ índíə́ ɔwá, bá Yə́susu súbə́kə́ na ɛŋɔ́ányɛ́, a ná níása ɔwá bá ká wɛɛ́ya ɔ́mɔ́kɛ́na ɔ ɔmbásá.

²⁷Bɔkɔfɔnɛa bá ná Yə́susu ákánáná ɔ miímə yɛ mɔmanɛna, ilúkunə yikimə yɛ́ ná kɔtálána ɔ ɔwayɛ́ ɛmɛ́ŋɛ́.

²⁸Bá ná wɛɛ́ya lɛŋɔ́náka, bá ná wɛɛ́ya nilókiə nɛnyɔakánɔ́ hákɛ́na.

²⁹Bá ná hitəkə́ nɔ́áká na bɛsɛ́ndɛ́, bá ná wɛɛ́ya háá ɔ mɔlɔ́á, bá ná wɛɛ́ya nɛtɔŋɔ háá ɔ mɔkátá wɔ́ bɛnɔ́mɛ, bá ná yɛ́ɛ́yɛ́ ikúílí kíníə́ ɔ ɔwayɛ́ busíə́, bá ná lúmə́ ɔwáyɛ́ ɔ ɔndɛ́sɛ́na bá sɛ́á: «Tɔ ndɔ aŋɔ́á bíhóliə a munəni wa Bɛyútɛnɛ!»

³⁰Bá wɛɛ́ya túə́kinə na malá, bá wɛɛ́ya súbə́kə ɔ mɔlɔ́á na nɛtɔŋɔ ɔnɛ́á bá ná ɛ́tá ɔ ɔwáyɛ́ mɔkátá.

³¹Ɛnaka bá hɔ́á ɔ ɔwayɛ́ ɔndɛ́sɛ́na, bá ná wɛɛ́ya nilókiə húlə́kíə́, bá ná wɛɛ́ya bɛ́áyɛ́á bɛlɛŋa hákɛ́na. Əlimə yɛ nɔ́yɛ́, bá ná wɛɛ́ya ákánána ɔkɛaka ɔwá, bá wɛɛ́ya ɔ́mɔ́kɛ́na ɔ ɔmbásá.

³²Ikúílí ɔyɛ́á bá ná fámá ɔ bətínə́, bá ná mɔndɔ wa Silɛ́nɛ ɛ́nyánána, nɛ́áyɛ́á niínyə á Símono; bá ná wɛɛ́ya íkíníə́ ɔ ɔmbásá wɔ́ Yə́susu ɔtúána.

³³Bá ná káfámá ɔ ɛbɔka ɔyɛ́á bá ndɔ ɛ́lɛnɛna Kɔlɔkɔ́ta, ɔ́ niɔŋɔ́ sɛ́á: «Ɛbɔ́ka yɛ́ hɛbɔmbɔ́.»

³⁴Bá ná wɛɛ́ya bisə́kə́ki bɛ́ məluku índíə́. Ɛnaka á maáta ɔ́kɔ́lɛ́na, a sa hikiə ɔnyáá.

³⁵Bá ná wɛɛ́ya ɔ́mɔ́kɛ́na ɔ ɔmbásá, bá ná bɛ́áyɛ́á bɛlɛŋa súbínə́ ɔ ndɔŋɔ́.

³⁶Əlimə yɛ́ nɔ́yɛ́, bá ná tuənə́kínə ɔ misí ɔ bɛtáta.

³⁷Bá ná hɛkɔma tilə́kə ɔ nɛbámbɔ́ ɔ ɔwayɛ́ mɔlɔ́á ɔmbáŋá ɔhɛ́á hɛ́ ndɔ wɛɛ́ya hɔkɛna, bá sɛ́á «Á Yə́susu wɔ́ɔwɔ, á munəni wa Bɛyútɛnɛ.»

³⁸Nɔ́yɛ́, bá ná bəcəŋə ɔ́mɔ́kɛ́ná báfandɛ́ ɔ ɛmbásá ɔ ɛmɛ́ŋɛ́ yɛ Yə́susu: Wɔ́ɔwɔ ɔ bɛnɔ́mɛ, wə́ní ɔ biəní.

³⁹Batɔ́mbátɔmba bá wɛɛ́ya kɔ́báka bá ndɔ mɔlɔ́á fúkə;

⁴⁰bá sɛ́á: «Á Ifəyí, ɔwáwɔ́ ɔwá ɔ ndɔ Tɛ́mbɛlɛ kata, ɔ falabaka əlimə yɛ tunó tɔ́lálɔ́, ábá ɔ lɛa Mɔná wa Huɛlɛ́, bínúə́kə́níə́ aŋɔ́á bɛ́múɛ́tɛ́ nə́ə, tukínə ɔ ɔmbásá!»

⁴¹Hɔ́ánánátɔ́, bisə́lúkú bɛ́ bətitiəmahánɛna, bamanyumbə́ndə́ na bɛnatákɛ bɛ́ Bɛyútɛnɛ bá wɛɛ́ya ndɛ́sákɛna, bá sɛ́á:

⁴²«A ka bənə́bənə́ nuəkəniə, mba, a sa ósó ubínuəniə wɛɛ́ya bɛ́múɛ́tɛ́! A lɛa munəni wa Ísilahɛ́lɛ, á tukínə isíŋáka nə́ə ɔ ɔmbásá mbá tɔ níə́súə́ nɛkɔmba tálɛ́na ɔ ɔwayɛ́!

⁴³A ka nɛ́áyɛ́á nɛkɔmba tálɛ́na á Huɛlɛ́, Ábá a ndɔ wɛɛ́ya hikiə á wɛɛ́ya hutúnə isíŋáka nə́ə, Ɔ taká a ka laa a sɛ́á: “Mɛ lɛa Mɔná wa Huɛlɛ́!”»

⁴⁴Ata bəcəŋə ɔbá bá ná báá ɔ́mɔ́kɛ́nátɔ́ ɔ ɔmbásá ná wɛɛ́ya, bá wɛɛ́ya kɔ́báka nindínə́ nɛ́mɔtɛ́.

⁴⁵Ɔ botolokiə ɔ kɔɔsɔ, ibínə́binə yɛ́ ná misí húə́ mikimə ɔkafámáká ɛŋgɛ́ŋɛ́ ɛ́lálɔ́.

⁴⁶Ɔ wákaka ɔ ɛŋgɛ́ŋɛ́ ɛ́lálɔ́, Yə́susu a ná yə́mə́ nióni nɛŋɛ́ŋa, a sɛ́á: «Ə́líə́, Ə́líə́, lamá sabakataní.» Ɔ́ niɔŋɔ́ sɛ́á: «Á yámɛ́á Huɛlɛ́, á yámɛ́á Huɛlɛ́, ɛlɔ́áyɛ́ yatɛ́ ɔ ná mɛaŋɔ́á fəlíə́ əə́?»

⁴⁷Báyɛ́ bɔ́mɔtɛ́ ɔbá bá ná báá umə́, bá ná wɛɛ́ya ɔkɔ, bá ná yə́mə́níə́ bá sɛ́á: «Ɔ́ wɛɛ́ya wɛ́ɛ́yɛ́ á ndɔ Ə́líə́ ɛ́lɛna!»

⁴⁸Ɔ umisíúmə́, wɔmɔtɛ́ ɔ uwəbú ətíə́ a ná tɛbálɛ́na, a ná kɔcá ɛtá, a ná yubə́ ɔ bɛnásákɛ bɛ́ məluku, a ná kɛ́má ɔ ɛnjá yɛ nɛtɔŋɔ, a ná Yə́susu ndɛ́ndɛ́nɛ́á ɔkɛaka ɔwá a nyaa.

⁴⁹Mba bɔ́mɔtɛ́ bá sɛ́á: «Naŋɔ́ tátɛ́la mbá tɔ siəlínə ábá Ə́líə́ a ndɔ nda wɛɛ́ya nuəkə́níə́.»

⁵⁰Yə́susu a ná manyɔ́ yə́mə nióni nɛŋɛ́ŋa, a ná kátɛ́á.

⁵¹Ɔ yɛ́ɛ́yɛ́ ikúílí, nɛbata nɛ́ Tɛ́mbɛlɛ nɛ́ ná salɛ́á bɛsalɛ bɛ́fandɛ́ ɔ botolokiə ɔ mɔlɔ́á ɔkafámáká ɔ matá; misí yɛ́ ná ndandɛ́mála, mɛsálábándá yɛ́ ná sánɛ́sánɛ́á.

⁵²Minyə́ yɛ́ ná kúlúnúə́kə, bəlumininə bəəŋí ɔbá bá ná wə́kúnə, bá ná hɔŋɔ́ákɛ́á,

⁵³Əlimə yɛ nɛhɔŋɔa nɛ́ Yə́susu, bá ná fámáká ɔ minyə́. Bá ná fíə́kínə ɔ Yəlúsalɛma á bətínə́ mɛnaŋanaŋa. Bá ná bínə́kíníə́ ɔ ɔmbana muiŋí wɔ́ bɛndɔ.

⁵⁴Ɛnaka isə́lúkú yɛ bɔkɔfɔnɛa na bɔsɔ́kɔ́ ɔbá bá ná báá ɔmɔ́tɔ́yɛ́ na wɛɛ́ya ɔ bɛtáta bɛ́ Yə́susu, bá siəkínə́ ɛ́sɛ́á misí yɛ́ ná bínyúkə́lə́ na bɛkɔa bikimə ɔbɛ́á bɛ́ ná bɛ́kɛ́áká nɔ́yɛ́, bɔkɔ́lɔ́ma bɔŋɛ́ŋa bɔ́ ná bəə́bú itíə́, bá ná lúmə́ ɔ ɔndandɛma, bá sɛ́á: «Ɔ taká, wɔ́ɔwɔ mɔndɔ a ka báá Mɔná wa Huɛlɛ́.»

⁵⁵Bɔ́mɔtɛ́ bəəndú bá ka báá tɛ́nɛ́mákátɔ́ ɔmɔ́tɔ́yɛ́ hata bá ndɔ sinə. Bá ka báá ɔ ilúkunə na Yə́susu ɔ lúmə́kə ɔ Kalɛ́lɛa, bá wɛɛ́ya masɔ́ma kɛakɛna.

⁵⁶Bátáyɛ́ bəəndú bá ka báá: Malɛ́á á milóní yɛ Makatala, Malɛ́á á inyə́ yɛ Yákɔbɔ na Yɔ́sɛbɛ, na inyə́ yɛ baná bá Sɛbɛtɛ́.

⁵⁷Ɔ bɛ́táyɛ́ bɛ́kɔlakɔ́lá, mɔmbiaŋɛ wa bətínə́ yɛ́ Alimatíə́, nɛ́áyɛ́á niínyə á Yɔ́sɛbɛ, a ná ndáfama. A ka báá tɔ́na wɔmɔtɛ́ mɔkɔ́nɛna wa Yə́susu.

⁵⁸Wɛɛ́ya a ná Bilátɛ umimə wɔ́ Yə́susu bata. Bilátɛ a ná iŋgínə́ índíə́ ɔwá bá wɛɛ́ya muítə híə́níníə́.

⁵⁹Yɔ́sɛbɛ a ná umimə ɛta, a ná ɔ́lɔ́kɔ́kɛ́ná na ɔmbɔ́mɔ́ mɔnaŋanaŋa,

⁶⁰a ná kə́nyə́ ɔ munyə́ muɔ́sɔ ɔwá a ná tímə́sə́kíə́ ɔ umbíkə nuúmə́. Əlimə yɛ́ nɔ́yɛ́, a ná ilúmə́lúmə́ yɛ́ muɔkɔ híkə́ ɔ nifínínə́ nɛ́ munyə́, a ná ákana.

⁶¹Malɛ́á, á milóní yɛ Makatala na yɛ́mɔtɛ́ Malɛ́á, bá ka báá tuənə́tɔ́ ɔmɔ́tɔ́yɛ́, ɔ busíə́ bɔ́ munyə́.

⁶²Ɔ ɔyáyáka, ɔ buɔsɛ́ ɔbɔ́á bɔ́ ná ɔ́ŋgɔ́nɔ bɔ́ nɛnánɛna nɛ́ Sábatɛ, bisə́lúkú bɛ́ bətitiəmahánɛna na Bɛfalísia bá ná ákáná iŋgində́ á Bilátɛ busíə́,

⁶³bá sɛ́á: «Á Isə́lúkú, tɔ ná bɛ́kɔ́lɔ́mɔ́na ɔwá, ikúílí ɔyɛ́á wɔ́ɔwɔ mɔkanjakanja a ná báá ɔ buɔmɔ́, a ka bá a ndɔ laa a sɛ́á: “Mɛ ŋɔ hɔŋɔa əlimə yɛ mɔɔsɛ́ málálɔ́.”

⁶⁴Índíə́ iŋgínə́ nə́ə ɔwá bá munyə́ tátáká ɔkafámáká ɔ mátáyɛ́ mɔɔsɛ́ málálɔ́ ɔkɛaka ɔwá, báyɛ́á bɔkɔ́nɛna bá lɛ ndá umimə óbó mbá bá bɛndɔ bá bɔnɔŋɔ túmbə́lə́níə́ bá sɛ́á: “A ná hɔŋɔ́á ɔ ətíə́ yɛ bəwə́nú.” Há yɛ́ɛyɛ ɛkanja yútifəkə yɛ́ ŋɔ báá yɛŋɛ́ŋa yáyɛ́ná ɛkanja yíbúsíə́.»

⁶⁵Bilátɛ a sɛ́á: «Óo! Nɔ lɛa na batáta. Nɔ́ ákana, nɔ́ munyə́ tátáká ɛ́sɛ́á nɔ ndɔ hikiə.»

⁶⁶Bá ná ákáná ɔ munyə́ ɔtáta, bá ná muɔkɔ fanjá muɛsɛ muɛsɛ ɔ nifínínə́ nɛ́ munyə́, bá ná bɔkɔfɔnɛa tíkə́ ɔ muítə ɔtáta.