Read Tunen Matíó 28 Bible Online

Matíó 28 - Tunen bible

Matíó 28

¹Əlimə yɛ hinó hɛ́ Sábatɛ, ɔ ɛsɔ́mbalɛ́ ɔyáyáka wɔ́ buɔsɛ́ bɔ́ indílí, Malɛ́á á milóní yɛ makatala, na yɛ́mɔtɛ́ Malɛ́á, bá ná hɔalɛ́na, bá ná ndásá ɔ munyə́ undəsiəlínə.

²Ɔ yɛ́táyɛ́ ikúílí, misí yɛ́ ná ndandɛ́málá mɔŋɛ́ŋa, áŋgɛlɛ yɛ Isə́lúkú a ná húlínə́ ɔ nɔɔ́mɛná, a ná ilimə́limə́ yɛ́ muɔkɔ buŋúlúə́kíə́, a ná tuə́nə ɔ muɔkɔ ɔmbáŋá.

³Yɛ́táyɛ́ áŋgɛlɛ, a siəkinənə ɛ́sɛ́á ɛmɔanyama, bɛ́áyɛ́á bɛlɛŋa bɛ́ nɔmaka ɛ́sɛ́á maláná.

⁴Bɔkɔ́lɔ́ma bɔ́ ná batáta itíə́, bá ná lúmə́ ɔ ɔndandɛma, bá ná híánáká ɛ́sɛ́á biwə́wə́.

⁵Mba, yɛ́ɛ́yɛ́ áŋgɛlɛ a ná bəəndú lɛ́na a sɛ́á: «Uwənú, nɔ lɛ kɔ́lɔ́má bɔ́ányɛ, mɛ ndɔ manya muɛsɛ ɔwá a Yə́susu nɔ ndɔ siə, wɛ́ɛ́yɛ́ ɔwá bá ná ɔ́mɔ́kɛ́na ɔ ɔmbásá.

⁶A lɛ báá háha, ɔ taká, a ná hɔŋɔ́á ɛ́sɛ́á a ná nɔ́yɛ́ laa. Nɔ́ sɔ́nɔ, nɔ́ siəlínə́ ɔ ɛbɔ́ka ɔyɛ́á bá ná wə́yíə́ umimə siəníníə́.

⁷Nɔ́ ákáná tɔfá, nɔ́ ká báyɛ́á bɔkɔ́nɛna lɛ́na nɔ sɛ́á: “A ná hɔŋɔ́á ɔ ətíə́ yɛ́ bəwə́nú, a ná buəkínə ɔ Kalɛ́lɛa, ɔ umə́ nɔ ŋɔ wɛɛ́ya siəkinə.” Ə́yə́ə́, Mɛaŋɔ́á mɛ ndɔ bənú nɔ́yɛ́ lɛ́na!»

⁸Bá ná hɔalɛ́ná tɔfá ɔ munyə́ mɛlɛ́má undúə́tɔ́ na bɔkɔ́lɔ́ma, na nibílə́nə́ nɛŋɛ́ŋa. Bá ná ákáná mɔlɛ́lá á bɔkɔ́nɛna busíə́ ɔ yɛ́táyɛ́ imbə́nú ɔkalɛ́na.

⁹Tɛ́tɛ́á yɛ ikúílí, bááyɛ́ bá ná Yə́susu yámá ɔsákɔna ɔ uwəbú nɛnyáná, a sɛ́á: «Mɛ ná ənú bíhólíə́.» Bá ná bɛ́nyálɛ́la ɔ ɔwayɛ́ ɛmɛ́ŋɛ́, bá ná wɛɛ́ya kɔɛ́na ɔ makɔlɔ́, bá wɛɛ́ya nyamáka.

¹⁰Nɔ́yɛ́, Yə́susu a sɛ́á: «Nɔ lɛ kɔlɔma, nɔ́ ákáná nɔ́ ká bámɛ́á bənínyə́ lɛ́na ɔwá, bá ákáná ɔ Kalɛ́lɛa; ɔ umə́ bá ŋɔ mɛaŋɔ́á siəkinə.»

¹¹Ikúílí bááyɛ́ bəəndú bá ná báá ɔ wákaka, bɔ́mɔtɛ́ bɔkɔfɔnɛa ɔbá bá ná báá bá ndɔ munyə́ táta, bá ná tilə́ ɔ bətínə́ ɔ bisə́lúkú bɛ́ bətitiəmahánɛna ɔ bɛkɔa bikimə ɔ kəmənyə́síə́ ɔbɛ́á bɛ́ ná bɛ́kɛ́áka.

¹²Ɛnaka bisə́lúkú bɛ́ bətitiəmahánɛna na bɛnatákɛ bɛ́ Bɛyútɛnɛ bá kɔtákána, bá ná ɔ́kɔnɔ; bá ná bɔkɔfɔnɛa bɛcácɔ́ índíə́ biəŋí, bá sɛ́á:

¹³«Nɔ ŋɔ laa náana nɔ sɛ́á: “Báyɛ́á bɔkɔ́nɛna bá ná ndá wə́yíə́ umimə óbó nəbulúə́ bəsú ɔ hinó.”

¹⁴Ábá mɔmanɛna a ná bɔ́táyɛ́ bɔkɔa ɔ́kɔ́, bəsú tɔ ŋɔ manya nəníə́ tɔ wɛɛ́ya nífúnə́kínə́ mbá nɔ sɔ́ ŋɔ fínə ɔ məsə́kə.»

¹⁵Bɔkɔfɔnɛa bá ná bɛ́ɛ́yɛ́ bɛcácɔ́ ɛ́ta, bá ná kɛ́áká ɛ́sɛ́á bá ná bəə́bú lakɛ́na. Bɔ́táyɛ́ bɔkɔa bɔ́ ná yambána ɔ ətíə́ yɛ Bɛyútɛnɛ ɔ ndafámáká ɔ yɛ́ɛyɛ niɔfɛ́nɛ.

¹⁶Nɔ́yɛ́, nɛ́ɛ́yɛ́ niómo nɛ́ bɔkɔ́nɛna na ɔmɔtɛ́ bá ná ákáná ɔ Kalɛ́lɛa ɔ ɔmáá ɔmbáŋá ɛbɔ́ka ɔyɛ́á Yə́susu a ná bəə́bu manɛ́na.

¹⁷Ɛnaka bá káfámá, bá ná wɛɛ́ya yámá, bá ná lúmə́ ɔ ɔwayɛ́ ɔnyama. Mba, bɔ́mɔtɛ́ ɔ uwəbú ətíə́ bá ɛ́nyáka.

¹⁸Yə́susu a ná bɛ́nyálɛ́la ɔ uwəbú ɛmɛ́ŋɛ́, a sɛ́á: «Huɛlɛ́ a ná mɛaŋɔ́á iŋgínə́ yɛ nɛmanɛna nikimə índíə́ ɔ misí na ɔ nɔɔ́mɛná.

¹⁹Nɔ́ ákáná nə́ə ɔ bɛndɔ bá mɔnɔŋɔ məkimə, bá bámɛ́nɛ́ná bámɛ́á bɔkɔ́nɛna; nɔ́ bəə́bú nɛsɔa índíə́kínə, ɔ niínyə nɛ́ Isə́, na nɛ́ Mɔná, na nɛ́ Umbúínyi Mɔnaŋanaŋa;

²⁰nɔ́ bəə́bu bɛkɔa bikimə úkúnə́kíə́ na bɛɛ́ta ɔbɛ́kɛna ɔbɛ́á mɛ ná bənú mánɛ́na. Nɔ́ nɔ́yɛ́ manyá ɔwá, mɛ báka na bənú mɔɔsɛ́ məkimə ɔkafámáká ɔ nisúki nɛ́ misí.»