Read Tunen Matíó 3 Bible Online

Matíó 3 - Tunen bible

Matíó 3

¹Ɔ yɛ́táyɛ́ ikúílí, Yɔhánɛsɛ Mɔsɔabɛndɔ a ná fámálána ɔ misí yɛ makɔ́tákɛ ɔ hitikə hɛ́ Yútɛa, a húlə Imbə́nú Yɛɛsɛ nɔŋɔnaka a sɛ́á:

²«Nɔ́ mɛlɛ́má kɔ́ŋɔ́náká bɔkɔasɛ́á Nɛmanɛna nɛ́ Nɔɔ́mɛná nɛ́ lɛa hoóyi.»

³Yɔhánɛsɛ a lɛa mɔndɔ ɔwá mɔhɛ́nátɔtányɛ́ wa Huɛlɛ́, Isáya a ná mə́nyə́síə́ a sɛ́á: «Mɔndɔ a ndɔ yə́mə nióni nɛŋɛ́ŋa ɔ misí yɛ makɔ́tákɛ ɔwá, nɔ́ ɛnɔ́mɛ yɛ́ Isə́lúkú tábɔ́náka, nɔ́ bɛ́áyɛ́á bɛnɔ́mɛ sɛkɔ́náka.»

⁴Yɔhánɛsɛ a ka báá lɛŋábákátɔ́ na nɛbata nɔakátɔ́ na mahɔtá má mɛnyama ɔyɛ́á bá ndɔ ɛ́lɛnɛna bá sɛ́á Samó, a ka bá na hɛlɔ́ŋa hɛ́ yɔɔfɔ ɔ nɛlálá. A ka báá a ndɔ bílúkə na bɛtandá na buɔyɛ́ bɔ́ ɛmbɔ́ma.

⁵Nɔ́yɛ́ bɛndɔ bá Yəlúsalɛma, bá misí yɛ Yútɛa mikimə bɛndɔ bəkimə ɔbá bá lɛ́á hoóyi na nuíyi nɛ́ Yúlútɛnɛ bá ndasákɔ́na á Yɔhánɛsɛ busíə́.

⁶Bá ka báá bá ndɔ mə́búə́ mabɛ́á bɛ́mɛ́nɛna ətíə́ yɛ bɛndɔ; Yɔhánɛsɛ a bəə́bu nɛsɔa índiəkinə ɔ nuíyi nɛ́ Yúlútɛnɛ.

⁷Ɛ́sɛ́á Yɔhánɛsɛ a ná báá a ndɔ sinə ɔwá, Bɛfalísia na Bɛsalutúsia biəŋí bá lɛa ɔ ɔsákɔna ɔwayɛ́ busíə́ ɔkɛaka ɔwá a bəə́bu nɛsɔa índíə́kínə, a ná bəə́bu lɛ́na a sɛ́á: «Uwənú á hikúlə hɛ́ ɛmbɛ́nɛ, ɛ́yánɛ́ a ná bənú ínə́kíníə́ ɔ hilóbi hɛ́ Huɛlɛ́ ɔtɛbɛna ɔhɛ́á hɛ́ lɛ́á ɔ ɔsákɔna əə́?»

⁸Mba, nɔ́ naŋɔ́ bɛkɔa kɛaka ɔbɛ́á bɛ́ ndɔ ínə́niə ɔwá nɔ ná mɛlɛ́má kɔŋɔna.

⁹Nɔ lɛ fɛká na ɔbɛ́laa nɔ sɛ́á: «Á Ábɛlaháma a lɛ́á yəsúə́ isə́kínə́!» Ɔ taká mɛ ndɔ bənú lɛna mɛ sɛ́á Huɛlɛ́ óso ɔ yííyí miɔkɔ uhíə́nəsiə baná bá Ábɛlaháma.

¹⁰Isíŋáka nɛhɔ́ká nɛ lɛa hoóyi ɔ malɛ́á ɔsɔ́mbáka ɔ mɛkaŋá. Bɔlɛ́á tɛ́á ɔbɔ́á bɔ́ lɛ ndɔ tɔtámátámá tuɛsɛ háá, bá ŋɔ bɔɛ́ta sɔ́mba, bá bɔɛ́ta titə́kíə́.

¹¹«Ɔwámɛ mɛ ndɔ bənú nɛsɔa índiə na mənífə́ ɛlɔ́áyɛ́ uwinə́niə ɔwá nɔ ná mɛlɛ́má kɔŋɔna. Mba, mɔndɔ a báka na iŋgínə́ ɔwámɛ ɔyáyɛ́na, a lɛa ɔsákɔna ɔwámɛ əlimə, wɛɛ́ya a ŋɔ bənú nɛsɔa índiəkinə na umbúínyi Mɔnaŋanaŋa na hiwə, mɛ lɛ báá hɔ́ánánátɔ́ ɔwayɛ́ bɛtafɛ́ná uhúliə ɔ makɔlɔ́.

¹²A báka na ɛsɛkɛ́lɛ́ná ɔ ɔwayɛ́ mɔkátá ɛlɔ́áyɛ́ bɛnáná ɔtɛ́fa na iŋəŋə́. A ŋɔ iŋəŋə́ kɔtaka, á hákɛ́na ɔ nɛfɛná. Mba, a ŋɔ bɛnáná titəkiə ɔ hiwə ɔhɛ́á hɛ́ sa ndə́nimə.»

¹³Nɔ́yɛ́, Yə́susu a ná hɔalɛ́na ɔ Kalɛ́lɛa a ná ndáfámá ɔ nuíyi nɛ́ Yúlútɛnɛ ɔkɛaka ɔwá Yɔhánɛsɛ a wɛɛ́ya nɛsɔa índíə́.

¹⁴Yɔhánɛsɛ a ka siə́kə ɔsáŋɔ́na, a sɛ́á: «Mɛaŋɔ́á mɛ ná hɔ́ánáná ɔ ndasá ɔwáwɔ busíə́ ɔkɛaka ɔwá ɔ mɛaŋɔ́á nɛsɔa índíə́, mba nəníə́ ɔ nɔ́ ndasá ɔwámɛ busíə́ ɔwá mɛaŋɔ́á ɔbánɔ́ mɛ́ aŋɔ́á nɛsɔa índíə́ əə́?»

¹⁵Mba, Yə́susu a sɛ́á: «Niása yɛ́ bɛ́kɛ́áká nɔ́yɛ́ isíŋáka, ɔ taká, nɔ́yɛ́ tɔ ná hɔ́ánána uhikiə wɔ́ Huɛlɛ́ uwundúsiniə ɔwá a ndɔ bata». Yɔhánɛsɛ a ná lumínə.

¹⁶A ná wɛɛ́ya nɛsɔa índíə́, Yə́susu a ná fámá ɔ mənífə́, ɔ umisíúmə́, ɔmbáŋá wɔ́ ná bíkúnə. A ná Umbúínyi wɔ́ Huɛlɛ́ ɛ́ná wɔ́ nɔ́ tukinə ɔ ɔwayɛ́ mɛɛ́lɔ, hɔ́ákátɔ́ ɔ hibúbə́.

¹⁷Bá ná nióni ɔ́kɔ́ ɔ húlə́kinə ɔ nɔɔ́mɛná nɛ́ sɛ́á: «Wɔ́ɔwɔ a lɛa wamɛ́á mɔná wuhikiə, wɛ́ɛ́yɛ́ ɔwá mɛ ná híkə́kíə́ ɔtɛ́fa.»