Read Tunen Matíó 5 Bible Online

Matíó 5 - Tunen bible

Matíó 5

¹Ɛnaka Yə́susu á iloŋo yɛ́ bɛndɔ siəkinə, a ná báláka ɔmáá ɔ ɔmbáŋá. A ná tuə́nə ɔ misí, əlimə yɛ́ nɔ́yɛ́, báyɛ́á bɔkɔ́nɛna bá ná bɛ́nyálɛ́la ɔ ɔwayɛ́ ɛmɛ́ŋɛ́.

²A ná botólíə́ ɔ uwəbú uwukúniə, a sɛ́á:

³«Nɛhɔnɔ na tɔtɔyɔ́nɔ́ tɔ́ mɛlɛ́má: Nɛmanɛna nɛ́ Nɔɔ́mɛná nɛ́ lɛa níə́bu!

⁴Nɛhɔnɔ na bɛbɔ́yɛ́: Bá ŋɔ misí yɛ́ nɛkaka kusənə.

⁵Nɛhɔnɔ na bááyɛ́ ɔbá bá ndɔ lɛla: Huɛlɛ́ a ŋɔ bə́əbu kokolokiniə.

⁶Nɛhɔnɔ na bááyɛ́ ɔbá bá lɛ́á mɛtaná na ilókí ɛlɔ́áyɛ́ taká: Huɛlɛ́ a ŋɔ bəə́bu íyə́siə.

⁷Nɛhɔnɔ na bíwə́mɛɛ́lɔ: Bá ŋɔ iwə́mɛɛ́lɔ kusənə.

⁸Nɛhɔnɔ na bááyɛ́ ɔbá bá lɛ́á na mɛlɛ́má naŋátɔ: Bá ŋɔ Huɛlɛ́ siəkinə.

⁹Nɛhɔnɔ na bááyɛ́ ɔbá bá ndɔ nyɔɔ ɛlɔ́áyɛ́ bumbə́nú: Huɛlɛ́ a ŋɔ bəə́bu ɛ́lɛakɛnɛna báyɛ́á baná.

¹⁰Nɛhɔnɔ na bááyɛ́ ɔbá ba ndɔ təkəsə ɛlɔ́áyɛ́ taká, Nɛmanɛna nɛ́ Nɔɔ́mɛná nɛ́ lɛa níə́bu.

¹¹Nɛhɔnɔ na bənú ábá bá ndɔ bənú kɔ́ba, bá ndɔ bənú təkəsə, bá ndɔ bənú ɛnya yɛ bɛkɔa bɛbɛ́á kanjɛna ɛlɔ́áyɛ́ ámɛ.

¹²Nɔ́ bilənəkə, nɔ́ tiakáláká bɔkɔasɛ́á, wə́núə́ mɔsábɔ́náná wɔ́ ŋɔ bá mɔŋɛ́ŋa ɔ nɔɔ́mɛná, nɔ́yɛ́ bá ná bə́núə́ bɔhɛ́nátɔtányɛ́ bə́búsíə́ tə́kə́sə́kə.»

¹³«Nɔ lɛa ibusə́ yɛ́ misí. Ɛ́bá ibusə́ yɛ́ ná sɔnɔ́á nəníə́ yɛ́ óso tɔ́na ɔhíána ibusə́ əə́? Yɛ́ lɛ báá tɔ́na yɛ́ ɔ́kɛna ɔ bɔkɔa; yɛ́ lɛa ɔwá bá yɛɛ́ta ombóko, bɛndɔ bá yɛɛ́ta tafáka.»

¹⁴«Nɔ lɛa isəmú yɛ́ misí. Bətínə́ ɔyɛ́á bá ná lúmə́kə́ ɔ ɔmáá ɔmbáŋá, ɛbáka yɛ́ lɛ bitimə.

¹⁵Abáka bá lɛ itiəkətiəkə tíə́ ɔkɛaka ɔwá bá yɛɛ́ta háá ɔ ɛlɔŋgá nuúmə́. Mba, ikúílí bá ná yɛɛ́ta tíə́, bá tála ɔ ɛtáka ɔkɛaka ɔwá, yɛ́ bɛndɔ bəkimə nɔmákɛ́na ɔbá bá lɛ́á ɔ miímə.

¹⁶Hɔ́ánánátɔ́, yə́núə́ isəmú yɛ́ nɔmáká ɔ busíə́ bɔ́ bɛndɔ ɔkɛaka ɔwá, bá bíə́núə́ biolí bɛɛsɛ siəkínə mbá bá yənúə́ Isə́ ɔwá a lɛ́á ɔ nɔɔ́mɛná tuúmə híə́níníə́.»

¹⁷«Nɔ lɛ fɛká ɔwá, mɛ ka ndasá ɔ yɛ́ɛyɛ misí ɔ umbə́ndə́ wɔ́ Mósisi na binə́níníə́ bɛ́ bɔhɛ́nátɔtányɛ́ ɔ uhúə́siə. Mba, mɛ ka ndasá ɔ bɛɛ́ta uwundúsiniə.

¹⁸Ɔ taká, mɛ ndɔ bənú nɔ́yɛ́ lɛna, ubusíə́ ɔbɔ́á nɔɔ́mɛná na misí yɛ́ tɔ́mbá, ata hɛkɔakɔ́á hɛ́ yala, ata nɛtɔtɛ nɛ́mɔtɛ́ nɛ́ umbə́ndə́ nɛ́ sɔ́ ŋɔ tɔ́mba ubusíə́ ɔbɔ́á bikimə bɛ́ bíúndúsíníə́.

¹⁹Ɔ́ ɛlɔ́áyɛ́ nɔ́yɛ́, wɛ́ɛ́yɛ́ ɔwá a ŋɔ himbə́ndə́mbə́ndə́ nɔkɔ ata hímotí, a bɛndɔ úkúnəkiə ɔ nɔ́yɛ́ ɔkɛa, bá ŋɔ wɛɛ́ya ɛ́lɛakɛna hɛndɔndɔ́ ɔ Nɛmanɛna nɛ́ Nɔɔ́mɛná; ɔ nifəŋə, wɛ́ɛ́yɛ́ ɔwá a ŋɔ hiítə bɛ́kɛakɛna, a ŋɔ hiítə úkúnəkiə tɔ́na, bá ŋɔ wɛɛ́ya ɛ́lɛakɛna mɔndɔ mɔŋɛ́ŋa ɔ Nɛmanɛna nɛ́ Nɔɔ́mɛná.

²⁰Ɔ taká, mɛ ndɔ bənú nɔ́yɛ́ lɛna, ábá yənúə́ taká yɛ́ sá yɛ Bamanyumbə́ndə́ na Bɛfalísia yáyɛ́na, nɔ sa fínə́ ɔ Nɛmanɛna nɛ́ Nɔɔ́mɛná.»

²¹«Nɔ ka ɔ́kɔ́kɛna ɔwá, bá ka bíə́súə́ bisə́kúlúlúnə́ lakɛna bá sɛ́á: “Ɔ sa ndá mukúlə́kulə ɔnɔ.” Wɛ́ɛ́yɛ́ ɔwá a ŋɔ mukúlə́kulə ɔ́nɔ́kɔ, a lɛa hɔ́ánánátɔ́ ɔ ɔtɔ́mbɛ́na ɔ bikə́lə́síníə́.

²²Mba ɔwámɛ, mɛ ndɔ bənú nɔ́yɛ́ lɛna ɔwá, ata ɛ́yánɛ́ ɔwá a ndɔ munísə́ hilóbi kɔ́ndɛ́na, bá ŋɔ wɛɛ́ya kə́lə́səkiə; wɛ́ɛ́yɛ́ ɔwá a ŋɔ munísə́ kɔ́bála a sɛ́á: “A yaálála”, bá ŋɔ wɛɛ́ya kə́lə́səkiə ɔ busíə́ bɔ́ nindúmə́ nɛŋɛ́ŋa nɛ́ bəkə́lə́siə; wɛ́ɛ́yɛ́ ɔwá a ŋɔ wɛɛ́ya kɔ́bála a sɛ́á: “Á mɔmbamɔmbámɔ”, bá ná hɔ́ánána ɔ ɔwayɛ́ uwəmbinə ɔ hianyaka hɛ́ hiwə.

²³Ikúílí ɔyɛ́á ɔ nɔ́ bɛ́áwɔ́á bɛnamá ákánana ɔ niɔlɔ nɛ́ mahánɛna, ábá ɔ ná bɛ́kɔ́lɔ́mɔ́na ɔmɔ́tɔ́yɛ́ ɔwá ɔ báka ɔ hɛkɔma na mɔnátɛ́á,

²⁴níásá bɛ́áwɔ́á bɛnamá ɔmɔ́tɔ́yɛ́ ɔ busíə́ bɔ́ niɔlɔ nɛ́ mahánɛna, tilə́, káka híə́nə́níə́ na mɔnátɛ́á, əlimə yɛ nɔ́yɛ́, ɔ ndá bɛ́áwɔ́á bɛnamá hánɛ́na á Huɛlɛ́.»

²⁵«Ábá ɔ lɛa ɛsáká na mukúlə́kulə, kɛ́áka tɔfá ɔwá nɔ híə́nə́níə́ ikúílí ɔyɛ́á nɔ na lɛ́á ɔ ɛnɔ́mɛ na wɛɛ́ya, ɔkɛaka ɔwá mukúlə́kulə a lɛ aŋɔ́á índíə́ ɔ makátá má mukə́lə́siə, mukə́lə́siə a lɛ aŋɔ́á índíə́ ɔ bɔkɔfɔnɛa ɔkɛaka ɔwá bá aŋɔ́á háá ɔ ɛbɔka.

²⁶Ɔ taká, mɛ ndɔ aŋɔ́á nɔ́yɛ́ lɛna, ɔ sa ndáfámá ɔ ɔmɔ́tɔ́yɛ́ ɛŋaná buhínə ɔsɔa bukimə.»

²⁷«Nɔ ka ɔ́kɔ́kɛna umbə́ndə́ wɔ́ ndɔ laa wɔ́ sɛ́á: “Ɔ sa ndə́lokono”.

²⁸Mba ɔwámɛ, mɛ ndɔ bənú lɛna ɔwá, ata ɛ́yánɛ́ ɔwá a ŋɔ muəndú wa mukúlə́kulə siəkinə na ilókílókí yikimə, a lɛa kɔ́átɔ́ ɔ bɔbɛ́á bɔ́ nilókóno na wɛɛ́ya ɔ ɔwayɛ́ mɔlɛ́má nuúmə́.

²⁹Ábá nɛ́áwɔ́á niísə nɛ́ ɛsalɛ yɛ́ bɛnɔ́mɛ nɛ́ ndɔ aŋɔ́á kuəsiə ɔ bɔbɛ́á, lalɔ́ná nɛɛ́ta, ombókó nɛɛ́ta hata na aŋɔ́á: Yɛ lɛa mɔsɛ́ŋɛ́ ɛlɔ́áyɛ́ áwɔ ɔwá, yɛ́mɔtɛ́ ɛláŋa yɛ́ yawɔ́á mɛɛ́lɔ yɛ́ nyɔ́áká yáyɛ́ná ɔwá, bá aŋɔ́á ə́mbínə aŋɔ́á mukimə ɔ hianyaka hɛ́ hiwə.

³⁰Ábá wə́wúə́ mɔkátá wɔ́ bɛnɔ́mɛ wɔ́ ndɔ aŋɔ́á kuəsiə ɔ bɔbɛ́á, sɔ́mbá muítə, ombókó muítə hata na aŋɔ́á, ɔ taká, yɛ́ lɛa mɔsɛ́ŋɛ́ ɛlɔ́áyɛ́ áwɔ ɔwá, yɛ́mɔtɛ́ ɛláŋa yɛ́ yáwɔ́á mɛɛ́lɔ yɛ́ nyɔ́áká yáyɛ́na ɔwá, ɔ fínə́ aŋɔ́á mukimə ɔ hianyaka hɛ́ hiwə.»

³¹«Umbə́ndə́ wɔ́ ndɔ laa tɔ́na wɔ́ sɛ́á: “Wɛ́ɛ́yɛ́ ɔwá a ná wayɛ́á muəndú búlə́, a ná hɔ́ánáná ɔ ɔwayɛ́ ɔ hiəfulə hɛ́ nɛalɔ́nana uwíndiə.”

³²Mba ɔwámɛ, mɛ ndɔ bənú lɛna mɛ sɛ́á: “Wɛ́ɛ́yɛ́ ɔwá a ndɔ wayɛ́á muəndú bulə, úhúlíə́ ɛlɔ́áyɛ́ hɛkɔma hɛ́ mɔkɛnda, a ndɔ wɛɛ́ya lɔ́ma ɔ bɔbɛ́á bɔ́ nilókóno. Wɛ́ɛ́yɛ́ tɔ́na ɔwá a ná muəndú bɛ́lɛ́na ɔwá bá ná bulə́, a lɛa kɔ́átɔ́ ɔ bɔbɛ́á bɔ́ nilókóno.”»

³³«Nɔ ka ɔ́kɔ́kɛna umbə́ndə́ wɔ́ ndɔ bíə́súə́ bisə́kúlúlúnə́ lɛna tɔ́na wɔ́ sɛ́á: “Ɔ sa ndá nɛkaka nɔkɔ, mba, ɔ ŋɔ úndúsiniə yatɛ́ ɔyɛ́á ɔ́ ná Isə́lúkú bílíhə́níə́.”»

³⁴Mba ɔwámɛ, mɛ ndɔ bənú lɛna ɔwá, nɔ lɛ tíkə́ bíkumə ata ɔ tɔ́mbákɛna na nɔɔ́mɛná bɔkɔasɛ́á, yɛ́ lɛa hikómo hɛ́ Huɛlɛ́.

³⁵Ata ɔ tɔ́mbákɛna na misí bɔkɔasɛ́á, ɔ́ nɛbɛ́lɛ́nɛ́ná nɛ́ máyɛ́á makɔlɔ́, ata na Yəlúsalɛma bɔkɔasɛ́á, ɔ́ bətínə́ yɛ Munəni.

³⁶Ɔ lɛ tíkə́ wə́wúə́ mɔlɔ́á bíkúminə bɔkɔasɛ́á, ɔ sa ósó ɔ hihúínyi hímotí uhíə́niə hɛnaŋanaŋa ata hitə́bə́kə́nú.

³⁷Ikúílí ɔyɛ́á nɔ ndɔ hɔ́ɔ́, yə́núə́ ɛtambá yɛ́ bámɛ́nɛ́ná ɛ́ɛ! Ata bóo! Bikimə ɔbɛ́á bɛ́ ndɔ bɛ́kɔnda, á Mɔŋɛ́na a ndɔ húlə́nə.

³⁸Nɔ ka ɔ́kɔ́kɛna umbə́ndə́ wɔ́ ndɔ laa wɔ́ sɛ́á: «Ɔ́ nɛ́ámɛ́á niísə sáná, mɛ nɛ́áwɔ sána, ɔ́ nɛ́ámɛ́á niínyə nɔkɔ́, mɛ nɛ́áwɔ nɔkɔ.»

³⁹Mba ɔwámɛ, mɛ ndɔ bənú lɛna ɔwá, nɔ lɛ bífúnə́ ɔwɔŋgɔkɔnɔ wɛ́ɛ́yɛ́ ɔwá a ndɔ bənú bɔbɛ́á kɛa. Ábá mɔndɔ a ná aŋɔ́á sáná na ɔmɔ́lɛ́ ɔ bɔlɔ́ŋɔ́lɔ́ŋɔ́ bɔ́ bɛnɔ́mɛ, ínə́níə́ wɛɛ́ya tɔ́na bɔ́ biəní.

⁴⁰Ábá mɔndɔ a ná aŋɔ́á sɔ́mɛ́ná ɔwá a yawɔ́á sɔ́tɛ ɛtá, índíə́ wɛɛ́ya tɔ́na nɛ́áwɔ́á nilókiə.

⁴¹Ábá mɔndɔ a ná aŋɔ́á íkíníə́ ɔ ɔtɛbɔna hikóló hɛ́ mabaná, tɛ́bɔ́ná na wɛɛ́ya tukóló tɔ́fandɛ́.

⁴²Índíə́ ɔ wɛ́ɛ́yɛ́ ɔwá a ndɔ aŋɔ́á bata. Ɔ lɛ wɛ́ɛ́yɛ́ əlimə túmə́ ɔwá a ndɔ aŋɔ́á bata ɔwá ɔ wɛɛ́ya bɔɔ́la folíə́.

⁴³Nɔ ka ɔ́kɔ́kɛna umbə́ndə́ wɔ́ ndɔ laa wɔ́ sɛ́á: «Ɔ ŋɔ wawɔ́á mukúlə́kulə hikəkiə, ɔ wawɔ́á mubəniə, ɔ́ wɛɛ́ya bányáka.

⁴⁴Mba ɔwámɛ, mɛ ndɔ bənú lɛna ɔwá: Nɔ bə́núə́ bəbəŋiə hikə́kíə́, nɔ bɛ́kálákɛ́ná ɛlɔ́áyɛ́ bááyɛ́ ɔbá bá ndɔ bənú təkəsə.

⁴⁵Ɔkɛaka ɔwá mbá nɔ báá tiísi yɛ baná bá yənúə́ Isə́ ɔwá a lɛ́á ɔ nɔɔ́mɛná, a ndɔ híə́yíə́ hiɔtɔ́tɔ́ numiə ɔ bɛndɔ babɛ́á na baasɛ; a ndɔ yə́yíə́ ɛmɔ́lá nəsiə tɔ́na ɔ bɛndɔ baasɛ na babɛ́á.

⁴⁶Ábá nɔ ndɔ hikiə ɔbánɔ́ ɔ bááyɛ́ ɔbá bá ndɔ bənú hikiə, yatɛ́ mɔsábɔ́náná nɔ́ ŋɔ kusənə əə́? Ata bakɔtabɛtásɛ bá ndɔ nɔ́yɛ́ kɛa.

⁴⁷Ábá nɔ ndɔ bíhóliə ɔbánɔ́ ɔ bə́núə́ bənísə́, yatɛ́ bɔkɔa bɔ́ nifəŋə nɔ ndɔ kɛa əə́? Ata balɛmanyáhuɛlɛ́ bá ndɔ nɔ́yɛ́ kɛa.

⁴⁸Nɔ́ bámɛ́nɛ́ná bátaká ɛŋaná hɛkabalɛ ɛ́sɛ́á yənúə́ Isə́ ɔ nɔɔ́mɛná a lɛ́á bátaká ɛŋaná hɛkabalɛ.»