Read Tunen Matíó 6 Bible Online

Matíó 6 - Tunen bible

Matíó 6

¹«Nɔ́ bítə́tə́kə́níə́ ɔ yə́núə́ taká ɔbɛ́kɛna ɔ busíə́ bɔ́ bɛndɔ ɔkɛaka ɔwá mbá bá bənú síə́kínə: Yɛ́ sá báá nɔ́yɛ́, yə́núə́ Isə́ ɔwá a lɛ́á ɔ Nɔɔ́mɛná a sɔ́ ŋɔ bənú wə́núə́ mɔsábɔ́náná índiə.»

²«Nɔ́yɛ́, ikúílí ɔ ndɔ hɛtɔyɔ́nɔ́ nɛhánɛna índiə, ɔ lɛ hikokó súbə́ ɔwáwɔ busíə́ ɛ́sɛ́á abáka bɛndɔ bá nɛbɛ́nyɔ́nyɔlɔ bá kɛaka ɔ məə́bə má mabɛ́kálɛ́na na ɔ maháná ɔkɛaka ɔwá, bɛndɔ bá bəə́bu tuúmə índíə́kínə. Ɔ taká, mɛ ndɔ bənú nɔ́yɛ́ lɛna, bá lɛa na wə́búə́ mɔsábɔ́náná.

³Mba ɔwáwɔ, ikúílí ɔ ndɔ nɛhánɛna índiə ɔ hɛtɔyɔ́nɔ́, wə́wúə́ mɔkátá wɔ́ biəní wɔ́ sá hɔ́ánana ɔmanya yatɛ́ ɔyɛ́á wə́wúə́ mɔkátá wɔ́ bɛnɔ́mɛ wɔ́ ndɔ kɛa.

⁴Ɔkɛaka ɔwá nɛ́áwɔ́á nɛhánɛna nɛ́ báá ɔ inditiə; nɔ́yɛ́ Huɛlɛ́ ɔ yáwɔ́á Isə́ a ndɔ nɛ́áwɔ́á nɛhánɛna sinə ɔ inditiə, a ŋɔ aŋɔ́á sábɔ́na.»

⁵Ikúílí tɛ́á ɔyɛ́á nɔ ndɔ bɛ́kálɛ́na, nɔ lɛ kɛ́á ɛ́sɛ́á bɛndɔ bá nɛbɛ́nyɔ́nyɔlɔ ɔbá abáka bá hikəkiə ɔbɛ́kálɛ́na mɔtɛ́nɛná ɔ məə́bə má mabɛ́kálɛ́na na ɔ tɔ́áláfandɛ́, ɔkɛaka ɔwá bɛndɔ bəkimə bá bəə́bu siəkínə. Ɔ taká mɛ ndɔ bənú nɔ́yɛ́ lɛna bá lɛa na wə́búə́ mɔsábɔ́náná.

⁶Mba ikúílí ɔ ndɔ siə ɔbɛ́kálɛ́na, bíkúíyíníə́ ɔ ɔwáwɔ ituŋí, bɛ́kálákɛ́ná yáwɔ́á Isə́ ɔwá a lɛ́á ɔmɔ́tɔ́yɛ́ ɔ inditiə, yawɔ́á Isə́ ɔwá a ndɔ sinə ɔ inditiə, a ŋɔ aŋɔ́á índiə yatɛ́ ɔyɛ́á ɔ ndɔ wɛɛ́ya bata.

⁷«Ikúílí tɛ́á ɔyɛ́á nɔ ndɔ bɛ́kálɛ́na, nɔ lɛ yəŋíə́ ɛ́sɛ́á bɛndɔ ɔbá bá lɛ ndɔ Huɛlɛ́ manya; bá ndɔ fɛka bá sɛ́á ubuniə wɔ́ bɛtambá á Huɛlɛ́ a ŋɔ mə́búə́ mabɛ́kálɛ́na ɔ́kɔ́kɛna.

⁸Nɔ lɛ kɛ́á ɛ́sɛ́á bəə́bu bɔkɔasɛ́á ubusíə́ ɔbɔ́á nɔ́ wɛɛ́ya nɔ́yɛ́ bátá, yə́núə́ Isə́ a ndɔ manya yatɛ́ ɔyɛ́á nɔ ndɔ sɔ́ka.»

⁹«Nɔ ná hɔ́ánána ɔbɛ́kálɛ́na náana nɔ sɛ́á: “Á yəsúə́ Isə́ ɔwá a lɛ́á ɔ Nɔɔ́mɛná, nɛ́áwɔ́á niínyə nɛ́ báá naŋátɔ.

¹⁰Nɛ́áwɔ́á nɛmanɛna nɛ́ sɔ́nɔ, wə́wúə́ usiə wɔ́ bɛ́kɛ́áka ɔ misí ɛ́sɛ́á wɔ́ lɛ́á ɔ Nɔɔ́mɛná.

¹¹Indíə́ bəsú búə́súə́ bɔ́labɔ́nɛ́á bɔ́ niɔfɛ́nɛ.

¹²Niasɛ́ná bəsú mə́súə́ mabɛ́á ɛ́sɛ́á bəsú tɔ́na tɔ ndɔ bááyɛ́ niasɛna ɔbá bá bá ndɔ bəsú liŋgəsiə;

¹³ɔ lɛ níása tɔ́ kɔɛ́na ɔ mɔkɔ́lɛna, mba, húlíə́ bəsú ɔ bɔbɛ́á.” [Bɔkɔasɛ́á, nɛmanɛna, injiŋə, na tuúmə bɛ́ lɛa ɛlɔ́áyɛ́ áwɔ ɔ bikúílí bikimə, Amɛna].»

¹⁴«Ɔ taká, ábá nɔ ndɔ bɛndɔ mə́búə́ mabɛ́á niasɛna, yə́núə́ Isə́ ɔwá a lɛ́á ɔ nɔɔ́mɛná a ŋɔ bənú mə́ə́nu niasakɛna tɔ́na.

¹⁵Mba, ábá nɔ lɛ ndɔ bɛndɔ niasɛna, yənúə́ Isə́ a sa ndá bənú mə́ə́nu níásɛ́ná tɔ́na.»

¹⁶«Ikúílí nɔ ndɔ bítə́tə́niə ɔ ɔnɛ́á, nɔ lɛ busíə́ ŋgilítíə́nə́ ɛ́sɛ́á bɛndɔ bá nɛbɛ́nyɔ́nyɔlɔ, ɔ taká, bá ndɔ busíə́ ŋgilitiənə ɔkɛaka ɔwá, bɛndɔ bá siəkínə́ bá sɛ́á bá ndɔ bítə́tə́niə ɔ ɔnɛ́á. Mɛ ndɔ bənú nɔ́yɛ́ lɛna, bá lɛa na wə́búə́ mɔsábɔ́náná.

¹⁷Mba ɔwáwɔ, ikúílí ɔ ndɔ bítə́tə́niə ɔ ɔnɛ́á, bɛ́sɔ́áká busíə́, miəkínə́ bunumbə ɔ ɔwáwɔ mɔlɔ́á,

¹⁸ɔkɛaka ɔwá bɛndɔ bá lɛ manyá bá sɛ́á ɔ ndɔ bítə́tə́niə ɔ ɔnɛ́á, mba, ɔ́maná á yawɔ́á Isə́ ɔwá a lɛ́á ɔ inditiə, yawɔ́á Isə́ ɔwá a lɛ́á ɔ inditiə a ŋɔ aŋɔ́á yɛɛ́ta híə́niniə.»

¹⁹«Nɔ lɛ mambiaŋɛ bɛ́kɔ́tɛ́ná háha ɔ misí ɔhá nɛsɛ́kɛ́ na maŋgɛ́lɛ́tɛ má ndɔ tɛŋɛna, ɔhá boóbi bá ndɔ ɛmbambala sána ɔ ndoobo.

²⁰Mba, nɔ́ mambiaŋɛ bɛ́kɔ́tákɛ́na ɔ nɔɔ́mɛná ɔhá nɛsɛ́kɛ́ na maŋgɛ́lɛ́tɛ má sɔ́ ŋɔ tɛŋɛna, ɔhá boóbi bá sɔ́ ŋɔ ɛmbambala sána ɔ ndoobo.

²¹Ɔ taká, ɔ ɛbɔ́ka ɔyɛ́á nɛ́áwɔ́á nɛmbiaŋɛ nɛ́ lɛ́á, ɔmɔ́tɔ́yɛ́ wə́wúə́ mɔlɛ́má wɔ́ ŋɔ bámɛnɛna.»

²²«Məə́sə má lɛa ɛ́sɛ́á isəmú yɛ́ mɛɛ́lɔ. Ábá máwɔ́á məə́sə má lɛa maasɛ, yawɔ́á mɛɛ́lɔ mikimə yɛ ŋɔ bámɛnɛna ɔ isəmú nuúmə́.

²³Mba, ábá máwɔ́á məə́sə má ndɔ náá, yáwɔ́á mɛɛ́lɔ mikimə yɛ́ ŋɔ bámɛnɛna ɔ ibínə́binə. Ábá isəmú ɔyɛ́á yɛ́ lɛ́á ɔ ɔwáwɔ mɛɛ́lɔ, yɛ́ lɛa fimínimini, yatɛ́ nindínə́ nɛ́ ibínə́binə ɔ ŋɔ bámɛnɛna!»

²⁴«Ata mɔndɔ a sa ósó ɔnyɛna bisə́lúkú bɛ́fandɛ́; a ŋɔ wɔmɔtɛ́ bányáka, a wə́ə́ní hikəkiə, ataná, a ŋɔ wɔmɔtɛ́ bɛ́ɔ́lɔ́kɔkɛna, a wə́ə́ní yəniə. Nɔ sa ósó ɔnyɛna ikúílí ɛ́mɔtɛ́ Huɛlɛ́ na mɔnɛ́á.»

²⁵Ɔ́ ɛlɔ́áyɛ́ nɔ́yɛ́ mɛ ndɔ bənú lɛna mɛ sɛ́á: «Ɛlɔ́áyɛ́ búə́núə́ buɔmɔ́, nɔ lɛ sə́híníə́ yatɛ́ ɔyɛ́á nɔ ŋɔ nɛ́áka, mbá ata bɛlɛŋa ɛlɔ́áyɛ́ yə́núə́ mɛɛ́lɔ ɔlɛŋa. Buɔmɔ́ bɔ́ lɛ bá yáyɛ́ná bɛ́labɔ́nɛ́á, ata mɛɛ́lɔ yáyɛ́ná bɛlɛŋa əə́?

²⁶Nɔ́ tunoní tɔ́ ɔmbáŋá síə́kínə; abáka tɔ́ lɛ sɛlá ata uhuə, tɔ́ lɛ báá na bɛlɔŋɔ́tɛ́ ɔ mafɛná ata ɔ bɛába. Mba, yə́núə́ Isə́ yɛ Nɔɔ́mɛná a ndɔ tɔɛ́ta lúkə! Nɔ lɛa na mukunə́ yáyɛ́ná tɔɛ́ta.

²⁷Ɛ́yánɛ́ ɔ uwənú ətíə́ ɛlɔ́áyɛ́ yáyɛ́á isə́hísə́hí, a óso ɔ tɛ́tɛ́á yɛ bɔ́áyɛ́á buɔmɔ́ ɔkɔndala əə́?

²⁸Mba, nəníə́ nɔ ndɔ sə́híniə ɛlɔ́áyɛ́ bɛlɛŋa, nɔ́ bɛsama bɛ́ mahɔ́ma siəkínə́ ɛ́sɛ́á bɛ́ ndɔ ɔmbɔ; ɛbáka bɛ́ lɛ nɔ́á ata buolí ɔnyɔɔ.

²⁹Ɔ taká, mɛ ndɔ bənú nɔ́yɛ́ lɛna, ata á Munəni á Salómono bɛ́múɛ́tɛ́ ɔwayɛ́ tuúmə tukimə, a sa ndá lɛŋaba ɛ́sɛ́á ɛsama ɛ́mɔtɛ́ ɔ uwəbú ətíə́.

³⁰Ábá Huɛlɛ́ a ndɔ imbuə lɛŋa ɔyɛ́á yɛ́ lɛ́á niɔfɛ́nɛ ɔ bɛtɔbɔtɔ́bɔ́, ɔyɛ́á bulílə́ bá ŋɔ yiítə əmbəkinə ɔ hiwə, a ŋɔ kɛaka tɔ́na muɛsɛ ɛlɔ́áyɛ́ ənú ɔ ɔyáyɛ́na uwənú á bɛndɔ bá ilumininə yɛtɛ́tɛ́á!

³¹Nɔ́yɛ́, nɔ lɛ sə́híníə́ nɔ sɛ́á: “Yatɛ́ tɔ ndɔ nɛ́áka, yatɛ́ tɔ ndɔ nyákɛna, ataná, yatɛ́ tɔ ŋɔ lɛŋabaka əə́?”

³²Bɛ́ɛ́yɛ́ bikimə, bááyɛ́ ɔbá bá lɛ ndɔ Huɛlɛ́ manya, bá ndɔ bɛɛ́ta siə ɛŋaná ɔtɔmbɔ. Mba yə́núə́ Isə́ yɛ Nɔɔ́mɛná a ndɔ manya muɛsɛ yatɛ́ ɔyɛ́á nɔ ndɔ sɔ́ka.

³³Nɔ taŋá ɔ usiə á nɛmanɛna nɛ́ Huɛlɛ́ na taká ɔyɛ́á Huɛlɛ́ a ndɔ bata, nɔ́yɛ́ a ŋɔ bənú bɛ́ɛ́yɛ́ bikimə sukuninə ɔ ɔyáyɛ́na.

³⁴Nɔ lɛ bɛkɔa bɛ́ bulílə́ sə́híníə́: Bulílə́ yɛ́ lɛa na bɛ́áyɛ ɔbɛ́á a ŋɔ sə́hə́kiniə. Hinó tɛ́á na yayɛ́á indəkəsə.»