Read Tunen Matíó 7 Bible Online

Matíó 7 - Tunen bible

Matíó 7

¹«Nɔ lɛ bɔsɔ́kɔ́ tɔkɔma lumə, nɔ́yɛ́ Huɛlɛ́ a sɔ́ ŋɔ ənú tɔkɔma lúmə;

²bɔkɔasɛ́á a ŋɔ bənú tɔkɔma lúmə́kə bɔkɔa bɔ́mɔtɛ́ ɛ́sɛ́á nɔ ndɔ ənú bɔsɔ́kɔ́ lúmə. Nɔ́yɛ́ a ŋɔ bənú kɛaka bɔkɔa bɔ́mɔtɛ́ ɛ́sɛ́á nɔ ndɔ ənú bɔsɔ́kɔ́ kɛa.

³Ɛlɔ́áyɛ́ yatɛ́ ɔ ndɔ ɛnáná sinə ɔyɛ́á yɛ́ lɛ́á ɔ niísə nɛ́ mɔnátɛ́á, mba nɔ́yɛ́ ɔ lɛ ndɔ hɛkasakásá sinə ɔhɛ́á hɛ́ lɛ́á ɔ ɔwáwɔ niísə əə́?

⁴Nəníə́ ɔ óso ɔ wawɔ́á mukúlə́kulə ɔlɛna ɔ sɛ́á: “Tátɛ́la, mɛ́ aŋɔ́á ɛnáná hɛ́kɛ́á ɔ niísə”, mbá nɔ́yɛ́ ɔ lɛ́á na hɛkasakásá ɔ nɛ́áwɔ əə́?

⁵Ɔwáwɔ́ á mɔndɔ wa nɛbɛ́nyɔ́nyɔlɔ naŋɔ́ hɛkasakásá bɛ́hɛ́kɛa ɔhɛ́á hɛ́ lɛ́á ɔ ɔwáwɔ niísə mbá ɔ ɛnáná síə́kínə́ muɛsɛ ɔyɛ́á yɛ́ lɛ́á ɔ niísə nɛ́ wawɔ́á mukúlə́kulə.»

⁶«Nɔ lɛ ɛmɔ́á bɛɛ́la bɛ́ bɔnaŋanaŋa índíə́ bɔkɔasɛ́á, yɛ́ ŋɔ bənú bɛ́kɔ́ŋɔnɛna, yɛ́ ŋɔ bənú nɔ́máka, nɔ lɛ túə́núə́ tubilə tɔ́ bufəyí ómbókínə ɔ mɛkɔnɛ́fɛ́, yɛ́ ŋɔ tɔɛ́ta tafaka.»

⁷«Nɔ́ batá bá ŋɔ bənú índiə; nɔ́ síə́kə, nɔ ŋɔ bɔ́ŋɔ; nɔ́ kitə́lə ɔ nikí bá nɔ bənú kuunə.

⁸Bɔkɔasɛ́á ata ɛ́yánɛ́ ɔwá a ŋɔ bata, bá ŋɔ wɛɛ́ya índiə; ɔwá a ŋɔ siəkə, a ŋɔ bɔ́ŋɔ. Bá ŋɔ nikí kuninə ɔ wɛ́ɛ́yɛ́ ɔwá a ndɔ nɛɛ́ta kitə.

⁹Ɛ́yánɛ́ isə́ yɛ baná ɔ uwənú ətíə́ a ósó ɔ muɔkɔ uwíndiə ɔ wayɛ́á mɔná, ábá mɔná a ná wɛɛ́ya batá á bɔ́labɔ́nɛ́á əə́?

¹⁰Ataná, mɔná a wɛɛ́ya batá á hiɔfɔ́, a wɛɛ́ya índiə á miáhɔ əə́?

¹¹Abá uwə́nú á bɛndɔ babɛ́á nɔ ndɔ manya ɔ bɛɛ́la bɛɛsɛ uwíndiə ɔ uwənú baná, bikúílí bɛ́nɛ́á na yənúə́ Isə́ ɔwá a lɛ́á ɔ Nɔɔ́mɛná, a ŋɔ bɛɛ́la bɛɛsɛ índiəkinə ɔ bááyɛ́ ɔbá bá ndɔ wɛɛ́ya bɛɛ́ta bata.»

¹²«Bɛkɔa bikimə ɔbɛ́á nɔ ndɔ siə ɔwá bɔsɔ́kɔ́ bá bənú kɛ́áka, bənú tɔ́na nɔ́ ənú bəə́bú kɛ́áká hɔ́ánánátɔ́ bɔkɔasɛ́á, nɔ́yɛ́ Umbə́ndə́ na Mətilə má Mósisi na má bɔhɛ́nátɔtányɛ́ má ndɔ bənú úkúniə.»

¹³«Nɔ́ fínínə́ ɔ hɛkɔ́kɛ hɛ́ tɔ́tɛ́hátɔ́ bɔkɔasɛ́á, hɛkɔ́kɛ hɛ́ sakɔ́nɔ́átɔ́ na ɛnɔ́mɛ yɛ́ ndɛ́ndɛlɛ́á, ɔ́ bɛkɔa ɔbɛ́á bɛ́ ndɔ bɛndɔ ákánana ɔ bunímə́; bəəŋí bá ndɔ tɔ́mbɛ́na ɔ umə́.

¹⁴Nɔ́yɛ́ hɛkɔ́kɛ hɛ́ tɔ́tɛ́hátɔ́ na ɛnɔ́mɛ yɛ́ fɔ́tátɔ, ɔ́ bɛkɔa ɔbɛ́á bɛ́ ndɔ bɛndɔ ákánana ɔ buɔmɔ́ bɔ́ ikúílíə́kimə. Ɔmbana mɔtɛ́tɛ́á wɔ́ lɛ́á bááyɛ́ ɔbá bá ndɔ bɛɛ́ta bɔ́ŋɔ.»

¹⁵«Nɔ́ bakanjakanja bá bɔhɛ́nátɔtányɛ́ bítə́tə́kə́níə́. Bá ndɔ ndasá uwə́nú busíə́ na bɛɔfɔ bɛ́ ɛndɔ́mbá bɛ́hákɛ́nátɔ, mba, ɔ uwəbú mɛlɛ́má nuúmə́, bá ndɔ sama ɛ́sɛ́á mɛkɔ.

¹⁶Bənú bɛ́múɛ́tɛ́ nɔ ŋɔ bəə́bu manyakɛna ɔ uwəbú nɛbɛ́kɛna. Abáka bá lɛ tɔlɔ́ndɔ́ kɛ́tá ɔ bɛsɛ́ndɛ́, ata bɛtɔtɔ ɔ bufunú.

¹⁷Nɔ́yɛ́ malɛ́á maasɛ má ndɔ tɔtámátámá tuɛsɛ háá, malɛ́á mabɛ́á má tɔtámátámá tɔbɛ́á hákɛna.

¹⁸Nɔ́yɛ́, ata buɔsɛ́, bɔlɛ́á buɛsɛ bɔ́ sá ósó ɔ tɔtámátámá tɔbɛ́á ɔháá.

¹⁹Bɔlɛ́á tɛ́á ɔbɔ́á bɔ́ lɛ ndɔ tɔtámátámá tuɛsɛ háá, bá ŋɔ bɔɛ́ta sɔ́mba, bá ŋɔ tíábakɛna ɔ tuinyí tɔ́ hiwə.

²⁰Nɔ́yɛ́ bənú bɛ́múɛ́tɛ́ nɔ ŋɔ bɔhɛ́nátɔtányɛ́ bá bɛkanja manyakɛna ɔ uwəbú nɛbɛ́kɛna.

²¹Tátá bɛndɔ bəkimə ɔbá bá ndɔ mɛaŋɔ́á ɛ́lɛnɛna bá sɛ́á: “Á Isə́lúkú, á Isə́lúkú”, bá ŋɔ fíə́kinə ɔ nɛmanɛna nɛ nɔɔ́mɛná; mba, ɔ́maná bááyɛ́ ɔbá bá ndɔ kɛa ɛ́sɛ́á yamɛ́á Isə́ ɔwá a lɛ́á ɔ nɔɔ́mɛná a ndɔ siə.»

²²Bəəŋí bá ŋɔ báá bá ndɔ mɛaŋɔ́á lɛna bá sɛ́á: «Á Isə́lúkú, á Isə́lúkú! Tátá ɔwáwɔ niínyə tɔ ná bɛndɔ bɛkɔa mənyə́sə́kíə́ əə́? Tátá ɔwáwɔ niínyə tɔ́ ná bá tɔ ndɔ imbúínyi mɛbɛ́á bulə əə́? Tátá ɔ ɔwáwɔ niínyə tɔ ná bɛkɔa biəŋí bɛ́ yələ́mənə kɛ́áka əə́?»

²³Nɔ́yɛ́, ɔwámɛ mɛ ŋɔ bəə́bu bɛ́kámɔsɔna mɛ sɛ́á: «Uwənú á bakɛamabɛ́á, nɔ́ hɔalɛ́ná ɔwámɛ busíə́. Mɛ sa nda bənú manyá iŋísíə́kimə.»

²⁴«Nɔ́yɛ́, mɛ ndɔ bənú lɛna mɛ sɛ́á ata ɛ́yánɛ́ a ná wúuwu ɔhɔ́ɔ ɔ́kɔ́kɛ́na ɔwá mɛ nɔ́ hɔ́kɔ, mbá a ná muítə bɛ́kɛ́ákɛ́na, a óso ɔbáá hɔ́ákátɔ́ ɔ mɔndɔ wa ɛmanya ɔwá a ná yayɛ́á miímə lúmə́kə́ ɔ muɔkɔ ɔmbáŋá.

²⁵Ɛbɔ́lábɔ́lá yɛ́ ka naaka, biəŋə́lumə́ bɛ́ ná hɔmbáka, umbúínyi wɔ́ ná hukəkə, bɛ́ ná ndá bɛ́sábákɛ́na ɔ yɛ́táyɛ́ miímə, yɛ́ sa sukunuə, yɛ́ ka bá lúmə́kə́tɔ́ ɔ muɔkɔ ɔmbáŋá.

²⁶Mba, ata ɛ́yánɛ́ ɔwá a ná bɛ́ámɛ́á bɛtambá ɔ́kɔ́kɛ́na, a lɛ bɛɛ́ta ɔŋgɔ́, a ŋɔ hɔ́áka ɔ mɔndɔ wa ɛŋaná ɛmanya ɔwá a ná yayɛ́á miímə lúmə́kə́ ɔ mɔsɛ́á ɔmbáŋá.

²⁷Ɛbɔ́labɔ́lá yɛ́ ka naaka, biəŋə́lumə́ bɛ́ ná hɔmbáka, imbúínyi yɛ́ ná hukəkə, biəŋə́lumə́ bɛ́ ná ndá bɛ́sábáká ɔ yɛ́táyɛ́ miímə, yɛ́ ná sukúnúə́kíə́ hulukutukutu. Bɔ́áyɛ́á bunímə́ bɔ́ ka bá bɔŋɛ́ŋa ɔ ɔyáyɛ́na.»

²⁸Ɛnaka Yə́susu a hɔ́á ɔ bɛndɔ uwukúniə, bá ná ə́lə́mə́nə́ ɔ nɛ́áyɛ́á nindínə́ nɛ́ uwukúniə;

²⁹bɔkɔasɛ́á a ka bá a ndɔ bəə́bu úkúniə ɛ́sɛ́á mɔndɔ ɔwá a lɛ́á na iŋgínə́ yɛ nɛmanɛna, tátá ɛ́sɛ́á bə́búə́ bamanya tuəfulə.