Read Tunen Matíó 8 Bible Online

Matíó 8 - Tunen bible

Matíó 8

¹Ɛ́sɛ́á Yə́susu a ná bá ɔlɔɔkɔ ɔ ɔmáá, iloŋo yɛ́ bɛndɔ yɛ́ wɛɛ́ya ɔŋgɔkɔ.

²Nɔ́yɛ́, mɔndɔ wa minú ɔmɔtɛ́ a ná bɛ́nyálɛ́la ɔwayɛ́ busíə́, a ná kiníə́, a sɛ́á: «Á Isə́lúkú, tɔ́kɔ́lɛ, ábá ɔ ndɔ hikiə niŋə́síə́ mɛaŋɔ́á.»

³Yə́susu a ná mɔkátá sándɔ́na, a ná wɛɛ́ya itíə́lə, a sɛ́á: «Ɛ́ɛ, mɛ ná nɔ́yɛ́ hikə́kíə́, niŋə!» Ɔ umisíúmə́, minú yɛ́ ná hɔ́á ɔ mɛɛ́lɔ, a ná niŋə.

⁴A ná wɛɛ́ya lɛ́na a sɛ́á: «Ɔ́kɔ́kɛ́ná, muɛsɛ: Ɔ lɛ lɛ́na ata mɔndɔ. Mba, káka bínə́níə́ ɔ mutitiəmahánɛna, əlimə yɛ nɔ́yɛ́, índíə́ nɛhánɛna ɔnɛ́á Mósisi a ná mánɛ́na ɛlɔ́áyɛ́ uwinə́niə ɔ bəkimə ɔwá, ɔ ná niŋə.»

⁵Ikúílí ɔyɛ́á Yə́susu a ná báá ɔ ufíə́kinə ɔ bətínə́ yɛ Kafalanahúmu, Isə́lúkú yɛ bɔkɔfɔnɛa wa nɛmanɛna nɛ́ Lɔ́ma a ná bɛ́nyálɛ́la, a ná wɛɛ́ya batá a sɛ́á a wɛɛ́ya ɔ́lɔ,

⁶a sɛ́á: «Á Isə́lúkú, wamɛ́á mɔnyɛna a lɛa sianátɔ́ ɔ miímə, a lɛa bɛ́nɔ́kɔ́kɔ́tɔ, a ndɔ məsə́kə ɔ́kɔ mɔŋɛ́ŋa.»

⁷Yə́susu a sɛ́á: «Ɔwámɛ, ɛkasɛ mɛ ká wɛɛ́ya niŋə́síə́.»

⁸Mba, Isə́lúkú yɛ bɔkɔfɔnɛa a ná bíhíə́níníə́ a sɛ́á: «Á Isə́lúkú, mɛ lɛ bá hɔ́ánánátɔ́ ɔwá ɔ fínə́ ɔ ɔwámɛ miímə. Mba, láá ɔbánɔ́ ɛtambá ɛ́mɔtɛ́ wamɛ́á mɔnyɛna a ndɔ niŋəkə.

⁹Mɛaŋɔ́á bɛ́múɛ́tɛ́, mɛ lɛa ɔ matá má bɛ́ámɛ́á bisə́lúkú, mɛ báka na bɔkɔfɔnɛa tɔ́na ɔbá mɛ ndɔ manɛna. Ábá mɛ ná wɔ́ɔwɔ lɛ́ná mɛ sɛ́á: “Káka!” A ákána, mɛ wə́ə́ní lɛna mɛ sɛ́á: “Sɔ́nɔ”, a ndasa, mɛ wamɛ́á mɔnyɛna lɛna mɛ sɛ́á: “Kɛ́áka bɔ́ɔbɔ”, a bɔɛ́ta kɛaka.»

¹⁰Ɛnaka Yə́susu a bɛ́ɛ́yɛ́ bɛtambá ɔ́kɔ́ a ná wɛ́ɛ́yɛ́ mɔndɔ lə́mbə́kíə́, a ná bááyɛ́ lɛ́na ɔbá bá ná wɛɛ́ya ɔŋgɔ́kɔ, a sɛ́á: «Ɔ taká, mɛ ndɔ bənú lɛna ɔwá, mɛ sa ndá nɛ́ɛnɛ nindínə́ nɛ́ ilumininə yámá ata ɔ mɔndɔ ɔmɔtɛ́ ɔ Ísilahɛ́lɛ.

¹¹Mɛ ndɔ bə́nú nɔ́yɛ́ lɛna, bəəŋí bá ŋɔ húlə́kinə ɔ nɛhɔalɛ́nɛ́ná na nɛsianɛ́ná nɛ́ hiɔtɔ́tɔ́, bá ŋɔ níə́kəniə na Ábɛlaháma, Ísakɛ na Yákɔbɔ ɔ Nɛmanɛna nɛ́ nɔɔ́mɛná.

¹²Bááyɛ́ ɔbá Huɛlɛ́ a ná nánákɛ́na ɛlɔ́áyɛ́ Nɛmanɛna, bá ŋɔ bəə́bu fə́mə́kiə ɔ níə́lətíə́ ɔ ibínə́binə nuúmə, ɔhá malɛlá má ŋɔ báá na nikóto nɛ́ bɛka.»

¹³Nɔ́yɛ́, Yə́susu a ná Isə́lúkú yɛ bɔkɔfɔnɛa siəlínə a sɛ́á: «Úlúə́ ɔwáwɔ ɔmbɛ́la, Huɛlɛ́ a ná lumínə́ yatɛ́ ɔyɛ́á ɔ ná batá na nɛkɔmba nikimə.» Ɔ umisíumə́ mɔnyɛna wa isə́lúkú yɛ bɔkɔfɔnɛa a ná niŋə.

¹⁴Yə́susu a ná fínə́ á Bíə́lə miímə, a ná yayɛ́á inyə́kínə́ nibə́ sianátɔ́ ɔ bɔaná: A ka bá na ɛsɔ́kɔ́sɔ́kɔ.

¹⁵A ná wə́yíə́ mɔkátá itíə́lə, ɛsɔ́kɔ́sɔ́kɔ yɛ́ ná hɔa, a ná hɔalɛ́na, a ná wɛɛ́ya afɛ́na.

¹⁶Bɛkɔlakɔ́lá, bá ná wɛɛ́ya bɛndɔ bəəŋí húlə́kə́nínə ɔbá imbúínyi mɛbɛ́á yɛ́ ná bá yɛ́ ndɔ yíbiə. Nɔ́yɛ́ a ná miítə bulə́kə, a ná bɛnákɛnákɛ bikimə niŋə́sə́kíə́ ɔ tɔ́mbákɛna na yáyɛ́á ɛtambá.

¹⁷Ɔ́ ɔkɛaka ɔwá ɛtambá yɛ́ mɔhɛ́nátɔtányɛ́ á Isáya yɛ́ bíúndúsíníə́ yɛ́ sɛ́á: «A ka bíə́súə́ bɛfɛ́kɛ́ ɛ́ta, a ná yə́súə́ mɛɛ́mbɔ tuana.»

¹⁸Ɛnaka Yə́susu a ilúkunə yɛ́ bɛndɔ yámá yɛ́ nɔ́ wɛɛ́ya nɛŋɛlɛna, a ná báyɛ́á bɔkɔ́nɛna manɛ́na ɔwá, bá bíásɛ́na na wɛɛ́ya ɔ yííní ɛsɛ́lɛ́ yɛ́ nɛɛ́ŋɛa.

¹⁹Mɔmanyumbə́ndə́ a ná bɛ́nyálɛ́la ɔ ɔwayɛ́ busíə́, a sɛ́á: «Á Muinə́niə, mɛ ŋɔ aŋɔ́á ɔ́ŋgɔkɔ ata hə́níə́ ɔ ŋɔ ákána.»

²⁰Yə́susu a ná wɛɛ́ya bíhíə́níníə́ a sɛ́á: «Bɛhakɛ bɛ́ báka na imbóko, tunoní na maana, mba, Mɔná wa Mɔndɔ a lɛ bá na ɛbɔka yɛ́ ɔsiana.»

²¹Ɔmɔtɛ́ wa báyɛ́á bɔkɔ́nɛna a ná wɛɛ́ya lɛ́na a sɛ́á: «Á Isə́lúkú, índíə́ mɛaŋɔ́á iŋgínə́ ɔwá mɛ naŋɔ́ ka yamɛ́á isə́ nyəə.»

²²Mba, a sɛ́á: «Ɔwáwɔ ɔŋgɔ́kɔ́ mɛaŋɔ́á, níásá bəwə́nú bá bíə́búə́ biwə́wə́ nyəə́kə.»

²³Yə́susu a ná fínə́ ɔ isóyí, báyɛ́á bɔkɔ́nɛna bá ná wɛɛ́ya ɔŋgɔ́kɔ.

²⁴Ɔ umisíumə́ umbúínyi mɔŋɛ́ŋa wɔ́ ná botólíə́ ɔ uhúkə ɔ nɛɛ́ŋɛa, iŋunu yɛ́ mənífə́ yɛ́ fíə́kinə ɔ isóyí. Mba, Yə́susu a ka bá ɔ hinó.

²⁵Bɔkɔ́nɛna bá ná bɛ́nyálɛ́la, bá ná wɛɛ́ya hunyíə́, bá sɛ́á: «Á Isə́lúkú, nuəkə́níə́ bəsú, ɛkasɛ tɔ́ niminə!»

²⁶Mba, a sɛ́á: «Á bɛndɔ bá ilumininə yɛtɛ́tɛ́á, ɛlɔ́áyɛ́ yatɛ́ nɔ ndɔ kɔ́lɔ́mɛna əə́?» Nɔ́yɛ́, a ná hɔalɛ́na, a ná umbúínyi na mənífə́ má nɛɛ́ŋɛa bámálɛ́na, ɛbɔ́ka yɛ́ ná náyá yə́ə́bu.

²⁷Bɛndɔ bəkimə bá ná ə́lə́mə́nə, bá ná botólíə́ ɔlaa bá sɛ́á: «Yatɛ́ ɛnya yɛ mɔndɔ yɛ́ɛyɛ ɔwá, umbúínyi na iŋunu yɛ́ mənífə́ yɛ́ ndɔ wɛɛ́ya ɔ́kɛ́na əə́?»

²⁸Ɛnaka Yə́susu a káfámá ɔ yííní ɛsɛ́lɛ́, ɔ nɛkɛ́tɛ nɛ́ misí yɛ kataláma, bɛndɔ báfandɛ́ ɔbá bá ná bá na imbúínyi mɛbɛ́á bá ná ndásá ɔ ɔwáyɛ́ nɛnyáná, bá fámáka ɔ minyə́. Bátáyɛ́ bɛndɔ bá samaka mɔŋɛ́ŋa ɔ nindínə́ ɔnɛ́á, ata mɔndɔ a sa bá na iŋgínə́ yɛ uwisíbiniə ɔtɔ́mbɛ́na ɔ yɛ́táyɛ́ ɛnɔ́mɛ.

²⁹Nɔ́yɛ́, bá ná botólíə́ ɔ uyə́mə nióni nɛŋɛ́ŋa, bá sɛ́á: «Á Mɔná wa Huɛlɛ́, yatɛ́ yɛ́ lɛ́á na aŋɔ́á na bəsú! Ɔ ka ndasá háha uwəsú ɔ indəkəsə uwíndiə ikúílí ɛŋaná ɔhɔ́ánana əə́?»

³⁰Uhímbə́ mɔŋɛ́ŋa wɔ́ mɛkɔnɛ́fɛ́ wɔ́ ka bá ɔ ɔnɛ́na bísúə́lə́tɔ́ tɛ́tɛ́á ɔmɔ́tɔ́yɛ́.

³¹Imbúínyi mɛbɛ́á bá ná Yə́susu bɛ́tɔ́kɔ́lɔ́kɛ́ná, bá sɛ́á: «Ábá ɔ ndɔ hikiə ɔ uwəsú ubulə, lɔ́má bəsú ɔ wííní uhímbə́ wɔ́ mɛkɔnɛ́fɛ́.»

³²A ná bəə́bu lɛ́na a sɛ́á: «Oo! Nɔ́ ákáka umə́.» Yɛ́ ná fə́mə́kə́níə́, yɛ́ ná fíə́kínə ɔ mɛkɔnɛ́fɛ́. Ɔ umisíúmə́, uhímbə́ wɔ́ mɛkɔnɛ́fɛ́ mukimə wɔ́ ná lɔɔ́kɔ ɔ ɔmáá wɔ́ ná fíə́kínə́ ɔ matá ma nɛɛ́ŋɛa, wɔ́ ná nímínə́ ɔ mənífə́ nuúmə́.

³³Ɛnaka bətə́tə́niə mɛkɔnɛ́fɛ́ bá siəkínə́ nɔ́yɛ́, bá ná tɛbákɛ́na, bá ná ákáná ɔ bətínə́ ɔ bɛndɔ bɛkɔa bikimə ɔkalɛ́na, na yatɛ́ ɔyɛ́á yɛ́ ná ndáfámɛ́ná ɔ bɛndɔ bá imbúínyi mɛbɛ́á.

³⁴Bɛndɔ bəkimə bá bətínə́ bá ná fə́mə́kə́níə́ ɔ nɛnyáná na Yə́susu, ɛnaka bá wɛɛ́ya ɛ́ná, bá ná wɛɛ́ya bɛ́tɔ́kɔ́lɔ́kɛ́ná bá sɛ́á á hɔ́álɛ́na ɔ uwəbú misí.