Read Tunen Mə́líkusu 10 Bible Online

Mə́líkusu 10 - Tunen bible

Mə́líkusu 10

¹Yə́susu a ná hɔ́álɛ́na ɔmɔ́tɔ́yɛ́, a ná ákáná ɔ misí yɛ Yútɛa. A ná manyɔ́ hɔalɛ́na ɔ Yútɛa, a ná ákáná ɔ mɔnɔŋɔ má yííní tanɛ́ yɛ nuíyi nɛ́ Yúlútɛnɛ; bɛndɔ bəəŋí bá ná kɔtákána ɔ ɔwayɛ́ ɛmɛ́ŋɛ́. Nɔ́yɛ́, a ná túə́nə ɔ misí, a ná botólíə́ ɔ uwəbú uwukúniə ɛ́sɛ́á a ná bá a ndɔ bəə́bu úkúniə bikúílí bikimə.

²Nɔ́yɛ́, Bɛfalísia bá ná bɛ́nyálɛ́lá hoóyi na wɛɛ́ya ɔkɛaka ɔwá bá wɛɛ́ya kɔsɔ́na. Bá ná wɛɛ́ya batá ábá bikiní bɛ́ bɔnɔŋɔ bɛ́ ndɔ mɛlɛ́mɛndɔ́ iŋgínə́ índiə ɔ wayɛ́á muəndú ubulə.

³Yə́susu a sɛ́á: «Nəníə́ Mósisi a ná hɔ́ɔ́kɔ́ əə́? »

⁴Bá sɛ́á: «Mósisi a ka luminə ɔwá, mɛlɛ́mɛndɔ́ á wayɛ́á muəndú búlə́, a wɛɛ́ya hiəfulə hɛ́ nɛalɔ́nana índiə.»

⁵Yə́susu a sɛ́á: «Ɛ́ɛ! Mósisi a ka hɔ́ɔ́kɔ nɔ́yɛ́ ɛlɔ́áyɛ́ yə́núə́ mɛlɛ́má natákátɔ.»

⁶Mba, ɔ Mətilə má Huɛlɛ́ yɛ́ lɛa tilə́kə́tɔ́ yɛ́ sɛ́á: «Ɔ nɛbalɛ́ná nɛ́ bɛkɔa bikimə, Huɛlɛ́ á ka mɔndɔ tábɔ́naka, mɛlɛ́mɛndɔ́ na muəndú.»

⁷Ɛlɔ́áyɛ́ nɔ́yɛ́, mɛlɛ́mɛndɔ́ a ŋɔ hɔalɛna, á isə́ na inyə́ tíkə́ ɔkɛaka ɔwá, a kátɔ́áná na wayɛ́á muəndú.

⁸Bəə́bu báfandɛ́ bá ŋɔ báá mɔndɔ ɔmɔtɛ́! Nɔ́yɛ́ bá sɔ́ ŋɔ báá tɔ́ná bɛndɔ báfandɛ́, mba, mɔndɔ ɔmɔtɛ́.

⁹Ɛlɔ́áyɛ́ nɔ́yɛ́, ata mɔndɔ a sá hɔ́ánana ɔ nɛbɛ́lɛna nɛ́ bɛndɔ báfandɛ́ uwəlúnəniə ɔnɛ́á Huɛlɛ́ a ná tɔa.

¹⁰Ikúílí ɔyɛ́á bá ná báá ɔ miímə nuúmə́, bɔkɔ́nɛna bá ná manyɔ́ Yə́susu bɔ́táyɛ́ bɔkɔa bata.

¹¹A sɛ́á: «Ata ɛ́yánɛ́ mɛlɛ́mɛndɔ́ ɔwá a ná wayɛ́á muəndú búlə́ mbá a ná bɛ́lɛ́ná muinə́muinə́, mɔ́táyɛ́ mɔndɔ a lɛa kɔ́átɔ́ ɔ bɔbɛ́á bɔ́ nilókóno.

¹²Nɔ́yɛ́ tɔ́ná, ata ɛ́yánɛ́ muəndú ɔwá a ná yayɛ́á ibə́ kínə́, a ná kálɔ́nɔ́ ɔ mɔndɔ muinə́muinə́, a lɛa kɔátɔ.»

¹³Bɛndɔ bá ka baná húlə́kənə á Yə́susu busíə́ ɔwá a bəə́bú itíə́kə. Mba, bɔkɔ́nɛna bá ná bəə́bu sáŋɔ́nɛ́na ɔ nɔ́yɛ́ ɔkɛa.

¹⁴Ɛnaka Yə́susu a siəkínə́ nɔ́yɛ́, a ná məsə́kə ɔ́kɔ́ mɔbɛ́á, a ná bɔkɔ́nɛna lɛ́na a sɛ́á: «Nɔ lɛ bəə́bú kotíə́. Nɔ́ niása tɔlɔ́matɔ́ tɔ́ sákɔ́ná na mɛaŋɔ́á bɔkɔasɛ́á, Nɛmanɛna nɛ́ Huɛlɛ́ nɛ́ lɛa hɔ́ákátɔ́ ɔ bááyɛ́ ɔbá bá ndɔ bítíkə ɛ́sɛ́á bəə́bu.

¹⁵Mɛ ndɔ bə́nú nɔ́yɛ́ lɛna ɔ taká, wɛ́ɛ́yɛ́ ɔwá a sɔ́ ŋɔ Nɛmanɛna nɛ́ Huɛlɛ́ káha ɛ́sɛ́á hɛlɔ́matɔ́, a sa ndə́fínə́ umə́.»

¹⁶Ɔ əlimə yɛ́ wútə́yí ɔhɔ́ɔ́, Yə́susu a ná tɔlɔ́matɔ́ túánáka ɔ makátá, a ná bəə́bu makátá tálákɛ́ná ɔ mɛlɔ́á, a ná bəə́bu sana.

¹⁷Ikúílí ɔyɛ́á Yə́susu a ná bá ɔ ɛnɔ́mɛ, mɔndɔ ɔmɔtɛ́ a ná ákáná mɔlɛ́lá ɔ ɔwayɛ́ busíə́, a ná kiníə́ a sɛ́á: «Á Muinə́niə muɛsɛ, nəníə́ mɛ kɛ́áka mbá mɛ buɔmɔ́ bɔ́ ikúílíə́kimə kusə́nə əə́?»

¹⁸Yə́susu a sɛ́á: «Ɛlɔ́áyɛ́ yatɛ́ ɔ ndɔ mɛaŋɔ́á ɛ́lɛnɛna mɔndɔ muɛsɛ əə́? Ata mɔndɔ ɔmɔtɛ́ a lɛ báá muɛsɛ, ɔ́maná á Huɛlɛ́ bíbúə́.

¹⁹Ɔ ndɔ imbə́ndə́ yɛ́ Huɛlɛ́ manya ɔyɛ́á yɛ́ lɛ́á yɛ́ sɛ́á: “Ɔ lɛ mɔndɔ ɔnɔ, ɔ lɛ lokono, ɔ lɛ obo, ɔ lɛ mɔndɔ kanjɛ́na, ɔ lɛ bɔɔ́la bɔ́ mɔndɔ ɛtɛ́na ɔ maŋgɛ́lɛ́; mba, lúbúnə́kə́ yawɔ́á isə́ na yawɔ́á inyə́.”»

²⁰Mba, mɔndɔ a sɛ́á: «Mɛ ka bɛ́táyɛ́ bikiní ɔŋgɔkɔ ɔ lúmə́kə ɔ ɔwámɛ bɔlɔ́matɔ́.»

²¹Yə́susu a ná wɛɛ́ya bítíbə́kíníə, a ná wɛɛ́ya lə́mbəkiə, mba, a sɛ́á: «Bɔkɔa bɔ́mɔtɛ́ bɔ́ báka ɔbɔ́á bɔ́ ndɔ aŋɔ́á bísiə ɔwá ɔ kɛ́áká tɔ́ná: Káka, ɔ ká nɛ́áwɔ́á nɛbɔ́ŋɔ lúə́kə́ nikimə, ɔ́ bɛcácɔ́ áfákɛ́ná ɔ tɔsɔ́kánɔ́; nɔ́yɛ́, ɔ ŋɔ báá na nɛbɔ́ŋɔ ɔ Nɛmanɛna nɛ́ Huɛlɛ́. Mba, sɔ́nɔ, ɔŋgɔ́kɔ́ mɛaŋɔ́á!»

²²Ɛnaka mɔ́táyɛ́ mɔndɔ á ɔ́kɔ́kɛ́ná nɔ́yɛ́, a ná ákáná na məliŋə́ úndúə́tɔ́ ɔ mɔlɛ́má bɔkɔasɛ́á, a ka báá na nɛbɔ́ŋɔ nɛŋɛ́ŋa.

²³Yə́susu a ná bɛndɔ bítíbə́kíníə́ bəkimə ɔbá bá ná báá ɔ ɔwáyɛ́ ɛmɛ́ŋɛ́, a sɛ́á: «Yɛ́ lɛa ányákátɔ́ ɔwá bambiaŋɛ bá fíə́kínə ɔ Nɛmanɛna nɛ́ Huɛlɛ́.»

²⁴Bɔkɔ́nɛna bá ná ə́lə́mə́nə. Yə́susu a sɛ́á: «Á bámɛ́á baná! Yɛ́ lɛa ányákátɔ́ ɔ ufínə ɔ Nɛmanɛna nɛ́ Huɛlɛ́.

²⁵Yɛ́ lɛa ndɛ́ndɛlɛ́á ɔwá, mɛnyama ɔyɛ́á bá ndɔ ɛ́lɛnɛna bá sɛ́á samó, yɛ́ fínə́ ɔ yósi yɛ́ ndɔtɔkɔ yáyɛ́na ɔwá, mɔmbiaŋɛ á ayɛ́ fínə́ ɔ Nɛmanɛna nɛ́ Huɛlɛ́.»

²⁶Bɔkɔ́nɛna bá ná ə́lə́mə́nə ɔ ɔyáyɛ́ná, bá bɛ́bátaka bá sɛ́á: «Mba, ɔwanɛ́ Huɛlɛ́ a ŋɔ nuəkəniə əə́?»

²⁷Yə́susu a ná bəə́bu məə́sə tála, a sɛ́á: «Yatɛ́ ɔyɛ́á yɛ́ lɛ́á ányákátɔ́ ɛlɔ́áyɛ́ bɛndɔ, yɛ́ lɛa ndɛ́ndɛlɛ́á á Huɛlɛ́ busíə́.»

²⁸Nɔ́yɛ́, Bíə́lə a ná Yə́susu batá a sɛ́á: «Siəkínə, uwəsú tɔ ka bíə́súə́ bɛɛ́la bikimə bɛ́yákáláka, tɔ ná aŋɔ́á ɔ́ŋgɔ́kɔ.»

²⁹Yə́susu a sɛ́á: «Ɔ taká, mɛ ndɔ bənú lɛna, mɔndɔ mukimə ɔwá a ŋɔ wə́yíə́ ɔmbɛ́la tíkə, bənínyə́ balɛ́mɛndɔ́ ata bəəndú, inyə́ ata isə́, báyɛ́á baná ata bɛ́áyɛ́á bɛtɔbɔtɔ́bɔ́ ɛlɔ́áyɛ́ ámɛ mbá ata ɛlɔ́áyɛ́ Imbə́nú Yɛɛsɛ,

³⁰a ŋɔ manyɔ kusənə yáyɛ́ná ɛbɔ́ɛ́yɛa ɔ bɛkɔa bikimə ɔbɛ́á a ná tikə. Ɔ buɔmɔ́ bɔ́ isíŋáka mbá ata ɔ misí yɛ ɔsákɔna, bá ŋɔ kusənə ɔ buɔmɔ́ bɔ́ ikúílíə́kimə: ɔmbɛ́la, bənínyə́ ɔ balɛ́mɛndɔ́ na bəəndú, binyə́, baná, bənísə́ na bɛtɔbɔtɔ́bɔ́ ɔ ətíə́ yɛ indəkəsə.

³¹Ɛlɔ́áyɛ́ nɔ́yɛ́, yɛ́ lɛa ɔwá bɛndɔ bəəŋí ɔbá bá lɛ́á bə́búsíə́ bá ŋɔ híánaka bə́limə; bəəŋí tɔ́na ɔbá bá lɛ́á bə́limə, bá ŋɔ híánaka bə́búsíə́.»

³²Ikúílí ɔyɛ́á bá ná báá ɔ bálaka ɔ Yəlúsalɛma, Yə́susu a buəkəkinə na báyɛ́á bɔkɔ́nɛna, bɛndɔ bá itə́mbí bá wɛɛ́ya ɔŋgɔkɔ na bɔkɔ́lɔ́ma. Ɔ ɛnɔ́mɛ, Yə́susu a ná niómo na báfandɛ́ nɛ́ báyɛ́á bɔkɔ́nɛna bísúə́línə, a ná botólíə́ ɔ uwəbú bɔkɔa ɔ ɔlɛna ɔbɔ́á bɔ́ ndɔ wɛɛ́ya táta,

³³a sɛ́á: «Nɔ́ ɔ́kɔ́kɛ́na, tɔ lɛa ɔ ɔbálaka ɔ Yəlúsalɛma, umə́ bá ŋɔ Mɔná wa mɔndɔ sɛmɛna ɔ bisə́lúkú bɛ́ bətitiəmahánɛna, na ɔ Bamanyumbə́ndə́. Bá ŋɔ wɛɛ́ya hɔkɛna ɔ nyɛmbɛ́, bá ŋɔ wɛɛ́ya hánɛna ɔ balɛmanyáhuɛlɛ́.

³⁴Bátáyɛ́ bɛndɔ bá ŋɔ mɛaŋɔ́á kɔ́báka, bá ŋɔ mɛaŋɔ́á túə́kinə na malá, bá ŋɔ mɛaŋɔ́á súbə́kə na ɛŋɔ́ányɛ́, bá ŋɔ mɛaŋɔ́á ɔ́nɔ́kɔ. Mba, ɔ mɔɔsɛ́ málálɔ́, mɛ ŋɔ hɔŋɔa.»

³⁵Nɔ́yɛ́, Yákɔbɔ na Yɔhánɛsɛ, baná bá Sɛbɛtɛ́, bá ná bɛ́nyálɛ́lá á Yə́susu busíə́, bá ná wɛɛ́ya batá bá sɛ́á: «Á Muinə́niə, tɔ ndɔ siə ɔwá ɔ bəsú bɔkɔa kɛ́áka ɔbɔ́á ɛkasɛ tɔ aŋɔ́á báta.»

³⁶Yə́susu a sɛ́á: «Yatɛ́ nɔ ndɔ siə ɔwá mɛ bənú kɛ́áka əə́?»

³⁷Mba, bá sɛ́á: «Tɔ ndɔ siə ɔwá ɔ bəsú iŋgínə́ índíə́ yɛ utuənə ɔwáwɔ ɛmɛ́ŋɛ́ ikúílí ɔyɛ́á ɔ ŋɔ bámɛnɛna ɔ ɔwáwɔ tuúmə tɔ́ nɛmanɛna: Wɔ́ɔwɔ á túə́nə ɔ ɔwáwɔ mɔkátá wɔ́ bɛnɔ́mɛ, wə́ə́ní ɔ mɔkátá wɔ́ biəní.»

³⁸Yə́susu a sɛ́á: «Nɔ lɛ ndɔ manya yatɛ́ ɔyɛ́á nɔ ndɔ bata. Mba, nɔ óso uwisíbiniə ɔ hindəŋə́ hɛ́ məsə́kə ɔnyáá ɔhɛ́á ɛkasɛ mɛ nyáá əə́?»

³⁹Bá sɛ́á: «Ɛ́ɛ, tɔ ŋɔ ísə́biniə!» Yə́susu a sɛ́á: «Óo! Yɛ́ báka taká ɔwá, nɔ ŋɔ nindínə́ nɛ́ məsə́kə ísə́biniə usinə ɔmá mɛ ŋɔ siəkinə na nɛsɔa ɔnɛ́á bá ŋɔ mɛaŋɔ́á nyəə.

⁴⁰Mba, bɔkɔa bɔ́ iŋgínə́ uwíndiə ɔ utuənə ɔ ɔwámɛ ɛmɛ́ŋɛ́ ɔ ɛsalɛ yɛ́ mɔkátá wɔ́ bɛnɔ́mɛ́ ata ɔ mɔkátá wɔ́ biəní, tátá mɛaŋɔ́á mɛ ndɔ índiənə. Mba, bá ndɔ bɛɛ́ta índiə ɔ bɛndɔ ɔbá Huɛlɛ́ a ná yɛɛ́ta tábɔ́nákɛ́na.»

⁴¹Nɔ́yɛ́, bɔsɔ́kɔ́ bɔkɔ́nɛna bá ná məsə́kə ɔ́kɔ́ ɔ bɔkɔa ɔbɔ́á Yákɔbɔ na Yɔhánɛsɛ bá ná Yə́susu bata.

⁴²Yə́susu a ná bəə́bu ɛ́lɛ́ná, a sɛ́á: «Nɔ ndɔ manya bənú bɛ́múɛ́tɛ́ ɔwá, bamanɛna bá yɛ́ɛyɛ misí bá ndɔ bɔsɔ́kɔ́ kɛndana na mundíbə́ mukimə, ata baŋɛ́ŋa, bá ndɔ bɛndɔ təkəsə ɔ uwinə́niə ɔwá bá ndɔ bɛndɔ manɛna.

⁴³Mba uwə́nú, yɛ́ sa hɔ́ánana ɔbáá nɔ́yɛ́: Mɔndɔ mukimə ɔwá a ndɔ siə ɔbáá mɔŋɛ́ŋa, a ná hɔ́ánána ɔhíána mɔnyɛna wa bɔsɔ́kɔ́ bəkimə.

⁴⁴Nɔ́yɛ́ tɔ́ná, mɔndɔ mukimə ɔwá a ndɔ siə ɔbáá wəbusíə́, a ná hɔ́ánáná ɔbáá yɔlɛ́ yɛ́ bɔsɔ́kɔ́ bəkimə.

⁴⁵Ɔ taká, Mɔná wa mɔndɔ, a sa ndasá ɔ misí ɔkɛaka ɔwá bá wɛɛ́ya nyɔkɛ́na; mba, ɔkɛaka ɔwá a bɛndɔ nyɔkɛ́na, a wínə́ tɔ́na ɛlɔ́áyɛ́ ɔmbana muiŋí ɔháŋɔ́na.»

⁴⁶Nɔ́yɛ́, Yə́susu na báyɛ́á bɔkɔ́nɛna bá ná káfámá ɔ bətínə́ yɛ Yəlíko. Ikúílí ɔyɛ́á bá ná báá ɔ tɔ́mbáka ɔ yɛ́táyɛ́ bətínə́ na ilúkunə yɛŋɛ́ŋa yɛ́ bɛndɔ, bá ná mundímə́ndímə kɔána. A ka bá tuənə́tɔ́ ɔ ɛmɛ́ŋɛ́ ɛnɔ́mɛ, a ndɔlɔkɔ. Nɛ́áyɛ́á niínyə á Balatimə́, mɔná wa Timə́.

⁴⁷Ɛ́sɛ́á Balatimə́ a ná ɔ́kɔ́ ɔwá Yə́susu wa Násalɛtɛ a lɛa ɔ tɔ́mbáka, a ná botólíə́ ɔ uyə́mə a sɛ́á: «Á Yə́susu, á Mɔná wa Ndə́witi, wə́ə́ mɛaŋɔ́á mɛɛ́lɔ!»

⁴⁸Bɛndɔ bəəŋí bá ná wɛɛ́ya kɔ́áyɛ́na ɔwá a nə́yə́níə́ yə́ə́bu; ata nɔ́yɛ́, a ná ákánána ɔ busíə́ ɔ uyə́mə mɔŋɛ́ŋa, a sɛ́á: «Á Yə́susu, á Mɔná wa Ndə́witi, wə́ə́ mɛaŋɔ́á mɛɛ́lɔ!»

⁴⁹Nɔ́yɛ́, Yə́susu a ná tɛnɛma, a sɛ́á: «Nɔ́ mɛaŋɔ́á wɛɛ́ya ɛ́lɛ́nɛ́na, á sɔ́nɔ!» Bá ná wɛɛ́ya ɛ́lɛ́na, bá sɛ́á: «Ɔ́nɛ́nɛ́na! Hɔalɛ́na, sɔ́nɔ, a ndɔ aŋɔ́á ɛ́lɛna.»

⁵⁰Nɔ́yɛ́, mundímə́ndímə a ná nɛ́áyɛ́á nɛbata nɛ́ nikə bɛ́yákálɛ́la, a ná hɔalɛ́na, a ná hə́mə́ ɔ wákaka á Yə́susu busíə́.

⁵¹Yə́susu a sɛ́á: «Yatɛ́ ɔ ndɔ siə ɔwá mɛ aŋɔ́á kɛ́áka əə́?» Mundímə́ndímə a sɛ́á: «Labúni, kɛ́áka ɔwá mɛ híáná ɔ usinənə!»

⁵²Yə́susu a sɛ́á: «Káka, yáwɔ́á ilumininə yɛ́ ná aŋɔ́á núə́kə́níə́.» Ɔ umisíúmə́, a ná botólíə́ ɔ usinənə, a ná Yə́susu ɔŋgɔ́kɔ.