Read Tunen Mə́líkusu 11 Bible Online

Mə́líkusu 11 - Tunen bible

Mə́líkusu 11

¹Ɔ ikúílí ɔyɛ́á bá ná bɛ́nyálɛ́la na Yəlúsalɛma, hoóyi na mɔnɔŋɔ má Bɛtɛfasɛ́ na Bɛtánia, bá ná káfámá ɔ ɔmáá wɔ́ Olífia. Yə́susu a ná báyɛ́á bɔkɔ́nɛna báfandɛ́ búə́kíníə́,

²a sɛ́á: «Nɔ́ ákáná ɔ bɔnɔŋɔ ɔbɔ́á bɔ́ lɛ́á ɔ uwə́nú busíə́. Ɔ ikúílí ɔyɛ́á nɔ ŋɔ kafámá ɔmɔ́tɔ́yɛ́, nɔ ŋɔ ɛnjakásɛ nibə wayɛ́á mɔná tiŋə́tɔ. Ata mɔndɔ a lɛ boóko ɔbála. Nɔ́ tuŋúnə, nɔ́ mɛaŋɔ́á húlə́nínə.

³Ábá mɔndɔ a ná bənú bátá a sɛ́á: “Ɛlɔ́áyɛ́ yatɛ́ nɔ ndɔ yɛɛ́ta tuŋuninə əə́?” Nɔ́ wɛɛ́ya bíhíə́níníə́ nɔ sɛ́á: “Isə́lúkú a ndɔ yɛɛ́ta siə.” Ɔ yɛ́táyɛ́ ikúílí ɛkasɛ a niása ɔwá nɔ yɛɛ́ta húlə́nə́ háha.»

⁴Bɔkɔ́nɛna báfandɛ́ bá ná ákáná, bá ná ɛnjakásɛ nibə́ tiŋə́tɔ́ ɔ niə́lətíə́ ɔ busíə́ bɔ́ hɛkɔ́kɛ hɛ́ miímə ɔyɛ́á yɛ́ ná bá ɔ ɛnɔ́mɛ, bá ná yɛɛ́ta tuŋúnə.

⁵Bɔ́mɔtɛ́ bɛndɔ ɔbá bá ná báá ɔmɔ́tɔ́yɛ́ bá sɛ́á: «Haa! Yatɛ́ nɔ ndɔ hɔ́yɛ́ kɛ́á əə́? Ɛlɔ́áyɛ́ yatɛ́ nɔ ndɔ yɛ́táyɛ́ ɛnjakásɛ tuŋuninə əə́?»

⁶Bɔkɔ́nɛna bá ná bəə́bu bíhíə́níníə́ ɛ́sɛ́á Yə́susu a ná laa; nɔ́yɛ́, bá ná bəə́bú niása ɔkɛaka ɔwá bá ɛnjakásɛ ákánána

⁷Bá ná yɛɛ́ta tilə́nə á Yə́susu busíə́. Bá ná mə́búə́ molókiə táláká ɔ əlimə yɛ mɛnyama. Yə́susu a ná talɛma.

⁸Bɛndɔ bəəŋí bá ná mə́búə́ molókiə bɛ́lɛ́ákɛ́ná ɔ ɛnɔ́mɛ; bɔ́mɔtɛ́ bá mɛlɛ́áfɛ sɔ́mbáka yɛ́ malɛ́á ɔ bɛtɔbɔtɔ́bɔ́, bá miítə əmbəkinə ɔ ɛnɔ́mɛ.

⁹Bɛndɔ ɔbá bá ná báá ɔ busíə́ na Yə́susu na bááyɛ́ ɔbá bá ná báá bá ndɔ wɛɛ́ya ɔŋgɔkɔ bá moóni bə́ləkiə bá sɛ́á: «Tuúmə na Huɛlɛ́! Huɛlɛ́ á wɔ́ɔwɔ saná ɔwá a ná ndásɛ́ná ɔ niínyə nɛ́ Isə́lúkú!

¹⁰Huɛlɛ́ á nɛmanɛna saná ɔnɛ́á nɛ́ lɛ́á ɔ ɔsákɔna. Nɛmanɛna nɛ́ yəsúə́ isə́kínə́ á Ndə́witi! Tuúmə na Huɛlɛ́ ɔ nɔɔ́mɛná!»

¹¹Nɔ́yɛ́ Yə́susu a ná fínə́ ɔ Yəlúsalɛma, a ná káfámá ɔ Tɛ́mbɛlɛ nuúmə́. Ɛnaka a bítíbə́kíníə́ bɛsalɛ bikimə, a ná ákáná ɔ Bɛtánia, na niómo na báfandɛ́ nɛ́ bɔkɔ́nɛna, ɛkɔlákɔ́lá yɛ́ ka báá kɔ́átɔ.

¹²Ɔ ɔyáyáka, ikúílí yɛ́ wə́búə́ ɔhɔalakɛna ɔ Bɛtánia, mɛtaná yɛ́ ná botólíə́ á Yə́susu ɔnɔɛna.

¹³A ná bɔlɛ́á ɛ́ná hatá ɔbɔ́á bá ndɔ ɛ́lɛnɛna bufíkiə, bɔ́ lɛa na tɔánjɛ. Nɔ́yɛ́ a ná bɛ́nyálɛ́la ɔ indínə́ ɔwá a siəlínə́ ábá a óso ɔ tɔtámátámá ɔbɔ́ŋɔ ɔmɔ́tɔ́yɛ́. Mba, a ná nibə́ ɔbánɔ́ há tɔánjɛ bɔkɔasɛ́á, yɛ́ sa bá ikúílí yɛ́ tɔtámátámá tɔ́ fíkiə.

¹⁴Yə́susu a ná yɛ́ɛ́yɛ́ ikúílí bufíkiə lɛ́na a sɛ́á: «Ɔ botolokiə isíŋáka ata mɔndɔ a sa ndá híə́wúə́ hɛtámátámá nɛ́á tɔ́na.» Báyɛ́á bɔkɔ́nɛna tɔ́na bá ná nɔ́yɛ́ ɔ́kɔ́kɛ́na.

¹⁵Əlimə yɛ nɔ́yɛ́, bá ná káfámá ɔ Yəlúsalɛma. Yə́susu a ná fínə́ ɔ Tɛ́mbɛlɛ, a ná botólíə́ ɔ bəlúə́ na bɔɔ́ndɔ bɛɛ́la ɔ ukúbə ɔbá bá ná báá ɔmɔ́tɔ́yɛ́. A bɛtáka bɛ́ bəsə́njíə́ bɛcácɔ́ nyɛkakɛna na bɛɔkɔ́ bɛ́ bəlúə́ tubúbə́.

¹⁶A sa niasa ɔwá mɔndɔ a bɔɔ́la bátá ɔ bíásakɛna ɔ Tɛ́mbɛlɛ.

¹⁷Nɔ́yɛ́ a ná botólíə́ ɔ uwəbú uwukúniə, a sɛ́á: «Yɛ́ lɛa tilə́kə́tɔ́ ɔ Mətilə má Huɛlɛ́ yɛ́ sɛ́á: “Yamɛ́á miímə yɛ́ ŋɔ báá miímə yɛ mabɛ́kálɛ́na ɛlɔ́áyɛ́ bɛndɔ bá mɔnɔŋɔ məkimə.” Mba uwənú, nɔ ná mɛɛ́ta híə́nə́síə́ nibítímínə́ nɛ́ boóbi.»

¹⁸Ɛnaka bisə́lúkú bɛ́ bətitiəmahánɛna na bamanyumbə́ndə́ bá ɔ́kɔ́kɛ́ná nɔ́yɛ́, bá ná botólíə́ ɔ hɛkɔma usiə hɛ́ ɔwayɛ́ ɔwɔ́nɔ; ɔ taká bá ka bá bá ndɔ wɛɛ́ya kɔ́lɔ́maka bɔkɔasɛ́á, ilúkunə yikimə yɛ́ bɛndɔ yɛ́ ka báá ə́lə́mə́nə́tɔ́ mɔŋɛ́ŋa na nɛ́áyɛ́á nindínə́ nɛ́ uwukúniə.

¹⁹Bɛkɔlakɔ́lá bɛ́ ndáfámá, Yə́susu na báyɛ́á bɔkɔ́nɛna bá ná hɔalɛ́na ɔ Yəlúsalɛma.

²⁰Ɔyáyáka, bá tɔ́mbáka ɔ ɛnɔ́mɛ, bɔkɔ́nɛna bá ná bufíkiə ɛ́ná ɔbɔ́á Yə́susu a ná tíkísíə́ naánɛkɔla bɔ́ nɔ́ kálásaka na mɛkaŋá ánɛ!

²¹Bíə́lə a ná bɔ́táyɛ́ bɔkɔa bɔ́ naánɛkɔla bɛ́kɔ́lɔ́mɔ́na ɛlɔ́áyɛ́ bufíkiə, a ná Yə́susu lɛ́na a sɛ́á: «Á Isə́lúkú, siəlínə! Bufíkiə ɔbɔ́á ɔ ná tíkísíə́ naánɛkɔla bɔ́ ná kálásáká bukimə.»

²²Yə́susu a sɛ́á: «Ɔ taká, mɛ ndɔ bənú nɔ́yɛ́ lɛna ɔwá; Nɔ́ níə́núə́ nɛkɔmba tálɛ́na á Huɛlɛ́!

²³Ábá mɔndɔ a ná wúuwu ɔmáá lɛná a sɛ́á: “Hɔalɛ́ná háha, káka bíómbóko ɔ nɔmɔ́”, ábá a lɛ báá na mɛnyɔ́ ɔ ɔwayɛ́ mɔlɛ́má, á lumínínə ɔwá yatɛ́ a ndɔ laa yɛ́ ŋɔ bɛ́kɛaka, nɔ́yɛ́ yɛ́ ŋɔ bɛ́kɛaka.

²⁴Ɔ́ ɛlɔ́áyɛ́ nɔ́yɛ́ mɛ ndɔ bə́nú lɛna ɔwá; bɛkɔa bikimə ɔbɛ́á nɔ ŋɔ Huɛlɛ́ bata na mabɛ́kálɛ́na, nɔ́ fɛká ɔ mɔlɛ́má nuúmə́ ɔwá nɔ ŋɔ bɛɛ́ta kusənə; a ŋɔ bənú bɛɛ́ta índiə.

²⁵Ikúílí ɔyɛ́á ɔ ndɔ bɛ́kálɛ́na, ábá ɔ báka itə́níə́tɔ́ na mukúlə́kulə, niasɛ́ná wɛɛ́ya ɔkɛaka ɔwá, yənúə́ Isə́ ɔwá a lɛ́á ɔ nɔɔ́mɛná a aŋɔ́á máwɔ́á mabɛ́á niasɛ́na. [

²⁶Mba, ábá nɔ lɛ ndɔ niasɛnana, yənúə́ Isə́ ɔwá a lɛ́á ɔ nɔɔ́mɛná wɛɛ́ya tɔ́na, a sa ndá bənú mə́núə́ mabɛ́á niasɛ́na].»

²⁷Bá ná tilə́ ɔ Yəlúsalɛma. Yə́susu a ka bá a ndɔ kɛnda ɔ Tɛ́mbɛlɛ, bisə́lúkú bɛ́ bətitiəmahánɛna, bamanyumbə́ndə́ na bɛnatákɛ bɛ́ Bɛyútɛnɛ bá ná ndásá ɔwáyɛ́ busíə́,

²⁸bá sɛ́á: «Na yanɛ́ iŋgínə́ ɔ ndɔ bɛ́ɛ́yɛ́ bɛkɔa kɛna əə́? Ɛ́yánɛ́ a ná aŋɔ́á yɛ́táyɛ́ iŋgínə́ índíə́ yɛ́ bɛ́táyɛ́ bɛkɔa ɔ ɔkɛa əə́?»

²⁹Yə́susu a sɛ́á: «Ɛkasɛ mɛ bənú ɛmbataka batá ɛ́mɔtɛ́; ábá nɔ ná mɛaŋɔ́á bɛ́kámɔ́sɔ́na, mɛ ndɔ bənú laakɛna ɛ́yánɛ́ a ndɔ mɛaŋɔ́á iŋgínə́ índiə yɛ bɛkɔa ɔkɛa.

³⁰Nɛsɔa nɛ́ Yɔhánɛsɛ nɛ́ ndɔ húlínə na Huɛlɛ́ alɛ́ɛ́, na bɛndɔ əə́?»

³¹Bá ná botólíə́ ɔ ubílúlə bəə́bu na bəə́bu bá sɛ́á: «Ábá tɔ ná bɛ́kámɔ́sɔ́ná tɔ sɛ́á: “Nɛ́ ndɔ húlínə na Huɛlɛ́”, ɛkasɛ a bə́súə́ bátá a sɛ́á: “Ɛlɔ́áyɛ́ yatɛ́ nɔ sa wɛɛ́ya níə́núə́ nɛkɔmba tálɛ́na əə́?”

³²Mba ábá tɔ ná wɛɛ́ya bɛ́kámɔ́sɔ́ná tɔ sɛ́á: “Bɛndɔ bá ná wɛɛ́ya lɔma”». Bá ka bá bá ndɔ ilúkunə kɔ́lɔ́ma, ɔ taká, bɛndɔ bəkimə bá ka bá bá ndɔ fɛka ɔwá, Yɔhánɛsɛ a lɛa taká taká mɔhɛ́nátɔtányɛ́.

³³Nɔ́yɛ́, bá sɛ́á: «Tɔ lɛ ndɔ manya.» Yə́susu a sɛ́á: «Óo! Ata mɛaŋɔ́á mɛ sɔ́ ŋɔ bənú wɛ́ɛ́yɛ́ lɛna ɔwá a ndɔ mɛaŋɔ́á iŋgínə́ índiə yɛ bɛ́ɛbɛ bɛkɔa.»