Read Tunen Mə́líkusu 12 Bible Online

Mə́líkusu 12 - Tunen bible

Mə́líkusu 12

¹Ɔ yɛ́ɛ́yɛ́ ikúílí, Yə́susu a na botólíə́ ɔ uwəbú ɔhɛ́na ɔ tɔ́mbákɛna na ɛŋana, a sɛ́á «Wɔmɔtɛ́ mɔndɔ a ka yáyɛ́á ɛtɔbɔtɔ́bɔ́ nyɔɔkɔ, a ná bɛlɔŋɔ́tɛ́ nɛ́máka, a ná mɔkákɔ hákɛ́na, a ná nɔáta tábɔ́náka, a ná hɛtɛ́ka bə́lə́kíə́. Əlimə yɛ nɔ́yɛ́, a ná yɛɛ́ta índíə́ ɔ ɛlɛ́ndɛa ɔ bɔnyɔɔ, a ná ákáná hata ɔ mɔkɛnda.

²Ikúílí yɛ́ kɛndáka, a ná mɔnyɛna lɔ́má á bɔnyɔɔ busíə́ ɔkɛaka ɔwá, a yáyɛ́á ɛsalɛ kusə́nə ɛ́sɛ́á bá ná bílíhə́níə́.

³Mba, bɔnyɔɔ ɛtɔbɔtɔ́bɔ́ bá ná mɔnyɛna halɛ́na, bá ná wɛɛ́ya subəkə, bá ná wɛɛ́ya úlúə́síə́ makátá ndəmə.

⁴Muití ɛtɔbɔtɔ́bɔ́ a ná manyɔ́ mɔnyɛna lɔ́ma muinə́muinə́; ɔ mɔ́táyɛ́ tɔ́na, bá ná wɛɛ́ya súbə́ ɔ mɔlɔ́á, bá ná wɛɛ́ya kɔbaka.

⁵Muití ɛtɔbɔtɔ́bɔ́, a ná bɔnyɛna bá ná úndúsíníə́ bálálɔ́ lɔma, bá ná wɛɛ́ya ɔnɔ; á nɔ́yɛ́ bá ná bɔnyɛna bəkimə bɛ́kɛ́ákɛ́na. Bá ná báaba subəkə, bá ná bə́ní ɔ́nɔkɔ.»

⁶A ka tíkə́nə na wayɛ́á mɔná wa uhikiə ɔ́hɔ́á. A ná wɛɛ́ya lɔ́má ɔ bɔnyɔɔ bɛtɔbɔtɔ́bɔ́, a ná bílúmə́kíníə́ a sɛ́á: «Bá ŋɔ wamɛ́á mɔná ɔ́kɔ́kɛnɛna.»

⁷Mba bɔnyɔɔ bɛtɔbɔtɔ́bɔ́ bá ná botólíə́ ɔ ɔbɛ́laa bəə́bú ná bəə́bú bá sɛ́á: «Ɔ́ mɔndɔ wɔ́ɔwɔ ɔwá a ŋɔ ilíkinənə yɛ́ isə́ ɛ́ta. Tɔ́ wɛɛ́ya ɔnɔ́kɔ́ mbá ɛtɔbɔtɔ́bɔ́ yɛ́ ŋɔ híáná yə́ə́su.»

⁸Bá ná wɛɛ́ya halɛ́na, bá ná wɛɛ́ya ɔ́nɔ́kɔ́, bá ná wə́yíə́ umimə fámáná ɔ ɛtɔbɔtɔ́bɔ́, bá ná muítə ombóko.

⁹Yə́susu a sɛ́á: «Ɛ́sɛ́á wə́núə́ usinə, nəníə́ muití ɛtɔbɔtɔ́bɔ́ a ŋɔ kɛaka əə́? Ɔ taká, a ŋɔ bɔnyɔɔ bɛtɔbɔtɔ́bɔ́ ɔ́nɔ́kɔ, a yɛɛ́ta índíə́ ɔ bənə́bənə́.»

¹⁰Nɔ́ sa ɛsalɛ yɛ́ Mətilə fana ɔmá má ndɔ laa má sɛ́á: «Muɔkɔ ɔwá bafalaba bá ná ombóko, muítə wɔ́ ná híáná muɔkɔ wɔ́ nihíkíli.

¹¹Nɔ́yɛ́ yɛ́ lɛ́á buolí bɔ́ Isə́lúkú. Yɛ́ ndɔ bəsú ə́lə́mənəsiə!»

¹²Bá ka siəkə ɔ ɔwayɛ́ ɔhalɛna, mba, bá ka iloŋo yɛ́ bɛndɔ kɔ́lɔ́maka. Bá ka ɔ́kɔ́kɛna muɛsɛ ɔwá, ɛlɔ́áyɛ́ əbú a ná wútə́yí ɔŋana tɛna. Bá ná wɛɛ́ya tikə, bá ná ákana.

¹³Bá ka bɛ́mɔtɛ́ Bɛfalísia na bɛndɔ bá ilúkunə yɛ́ Əlóto lɔ́ma á Yə́susu busíə́ ɔkɛaka ɔwá, bá wɛɛ́ya ŋgə́fə́ na ɛmbataka.

¹⁴Bá ná ndasá ɔwayɛ́ ɔlɛna bá sɛ́á: «Á Muinə́niə, tɔ ndɔ manya ɔwá ɔ ndɔ hɔ́ɔ́ taká, ɔ lɛ ndɔ mɔndɔ kɔ́lɔ́ma. Ɔ ndɔ bɛndɔ úkúniə nəníə́ bá ná hɔ́ánána ubítíkə ɛ́sɛ́á Huɛlɛ́ a ndɔ hikiə. Lɛ́na bəsú, ɛ́ɛ, ata bóo, ábá yɛ́ lɛa muɛsɛ ɔwá tɔ Káyɛsa ɛtásɛ sábɔ́nákɛ́na.»

¹⁵Yə́susu a ka bá ndɔ níə́búə́ nɛbɛ́nyɔ́nyɔlɔ manya, a sɛ́á: «Ɛlɔ́áyɛ́ yatɛ́ nɔ ndɔ mɛaŋɔ́á kɔsɔnɛna əə́? Nɔ́ mɛaŋɔ́á ɛcácɔ́ húlə́nínə́ háha mɛ́ siəlínə!»

¹⁶Bá ná wɛɛ́ya yɛɛ́ta húlə́nínə. Yə́susu a sɛ́á: «Nɛ́ɛnɛ nilutə, híihi hibílíndíníə́ na máama məkə́tə má ánɛ́ əə́?» Bá sɛ́á: «Nilutə nɛ́ Káyɛsa na máyɛ́á məkə́tə.»

¹⁷Yə́susu a ná bəə́bu lɛ́na a sɛ́á: «Nɔ́ Káyɛsa índíə́ yatɛ́ ɔyɛ́á yɛ́ lɛ́á yɛ́ Káyɛsa, nɔ́ Huɛlɛ́ índíə́ yatɛ́ ɔyɛ́á yɛ́ lɛ́á yɛ́ Huɛlɛ́.» Yayɛ́á ɛbɛ́kámɔsɔna yɛ́ ka bəə́bu ə́lə́mənəsiə mɔŋɛ́ŋa.

¹⁸Bɛ́mɔtɛ́ Bɛsatúsia bá ná ndásá á Yə́susu busíə́. Bátáyɛ́ bɛndɔ bá ndɔ laa ɔwá, nɛhɔŋɔa nɛ́ lɛ boóko. Bá ná Yə́susu batá bá sɛ́á:

¹⁹«Á Muinə́niə, Mósisi a ka tiləkə ɛlɔ́áyɛ́ əsú a sɛ́á: “Ábá mɔndɔ a báka na munínyə́ ɔwá a ná wə́ə́ mbá a ná muəndú tíkə́ ɛŋana mɔná, munínyə́ á ilíkə́ bɛ́lɛna ɔkɛaka ɔwá, a wɛ́ɛ́yɛ́ ɛndɛkɛ tíkínə́ ɔwá a ná wəə.”

²⁰Bənínyə́ balɛ́mɛndɔ́ bá ka báá bálɛ́ndɔ́lɔ́mɔnɔ. Wəbusíə́ a ná muəndú bɛ́lɛ́na, a ná wə́ə́ ɛŋana mɔná ubíə́nə.

²¹Ɔwá a ná úndúsíníə́ báfandɛ́ a ná ilíkə́ ɛ́ta. Wɛɛ́ya tɔ́na a ná wə́ə́ ɛŋana mɔná ubíə́nə. Nɔ́yɛ́ yɛ́ ná bɛ́kɛ́áka ɔ bənínyə́ bá na úndúsíníə́ bálálɔ́.

²²Ata ɔmɔtɛ́ ətíə́ yɛ bátáyɛ́ bənínyə́ bálɛ́ndɔ́lɔ́mɔnɔ á sa mɔná bíə́nə na yɛ́táyɛ́ ilíkə́. Uwəbú əlimə muəndú tɔ́na a ná ayɛ́ wəə.

²³Ɔ nɛhɔŋɔa, ɛnáká bá hɔŋɔ́ákɛ́á, ɛ́yánɛ́ uwəbú ətíə́ a ŋɔ bá ibə́ yɛ mɔ́tána muəndú əə́? Ɔ taká, bəə́bu bəkimə bálɛ́ndɔ́lɔ́mɔnɔ bá ka wɛɛ́ya bɛ́lɛna.»

²⁴Yə́susu a sɛ́á: «Tátá bɔkɔasɛ́á nɔ lɛ ndɔ Mətilə manya ata injiŋə yɛ Huɛlɛ́, ɛlɔ́áyɛ́ nɔ́yɛ́ nɔ ndɔ bínímbə əə́?

²⁵Ɔ taká, ikúílí bəwə́nú bá ŋɔ hɔŋɔakɛa, balɛ́mɛndɔ́ bá sɔ́ ŋɔ bəəndú bɛ́lɛna, bəəndú tɔ́na bá sɔ́ ŋɔ lɔ́nɔ, mba, bá ŋɔ niŋəkə ɛ́sɛ́á bɛáŋgɛlɛ ɔ nɔɔ́mɛná.»

²⁶Ɛlɔ́áyɛ́ nɛhɔŋɔa nɛ́ bəwə́nú, nɔ́ sa ɛsalɛ yɛ́ hiəfulə hɛ́ Mósisi fana ɔhɛ́á hɛ́ ndɔ hɛ́na ɛlɔ́áyɛ́ hɛkataka ɔhɛ́á hɛ́ ná bá hɛ́ ndɔ kɔnjɔ, nəníə́ Huɛlɛ́ a ná wɛɛ́ya lɛ́na, a sɛ́á: «Mɛ lɛa Huɛlɛ́ yɛ Ábɛlaháma, Huɛlɛ́ yɛ Ísaakɛ na Huɛlɛ́ yɛ Yákɔbɔ.»

²⁷Yə́susu a ná tifə́níə́ a sɛ́á: «Nɔ́ manyá ɔwá, Huɛlɛ́ a lɛa Huɛlɛ́ yɛ bɔɔmɔ́, tátá Huɛlɛ́ yɛ bəwə́nú. Nɔ́yɛ́, nɔ lɛa kɔ́átɔ́ ɔ hɛkɔma.»

²⁸Mɔmanyumbə́ndə́ ɔmɔtɛ́ a ná tɔ́mbálɛ́la, a ka bəə́bu ɔ́kɔ́kɛna bá ndɔ tə́ŋə́niə, a ná siəkínə́ ɔwá Yə́susu a ná bəə́bu bíhíə́níníə́ muɛsɛ. A ná wɛɛ́ya batá a sɛ́á: «Yatɛ́ yɛ́ lɛ́á umbə́ndə́ wúbúsíə́ ɔ imbə́ndə́ mikimə əə́?»

²⁹Yə́susu a sɛ́á: «Ɔ́kɔ́kɛ́na, á Ísilahɛ́lɛ, Isə́lúkú ɔ yəsúə́ Huɛlɛ́ a lɛa bíbúə́ Isə́lúkú;

³⁰ɔ ná hɔ́ánáná á Isə́lúkú ɔ yawɔ́á Huɛlɛ́ uhikiə na wə́wúə́ mɔlɛ́má mukimə, na híə́wúə́ hɛtányɛ́ hikimə, na yáwɔ́á ɛfɛka yikimə na yáwɔ́á iŋgínə́ mikimə.

³¹Ɔ́ umbə́ndə́ wɔ́ ná úndúsíníə́ úfəndí wúuwu: Ɔ ŋɔ wawɔ́á mukúlə́kulə hikəkiə ɛ́sɛ́á aŋɔ́á bɛ́múɛ́tɛ́. Umbə́ndə́ mɔŋɛ́ŋa muinə́muinə́ wɔ́ lɛ báá ɔ ɔyáyɛ́ná yííyí ífəndí.»

³²Mɔmanyumbə́ndə́ a sɛ́á: «Muɛsɛ nɔ́yɛ́ á Muinə́niə, ɔ ná hɔ́lɔ́ taká: Isə́lúkú á Huɛlɛ́ wɛɛ́ya bíbúə́ a lɛ́á Isə́lúkú, muinə́muinə́ a lɛ báá ɔ húlíə́ wɛɛ́ya,

³³ɔwayɛ́ uhikiə tɔ́na na wə́yíə́ mɔlɛ́má mukimə, na yáyɛ́á ɛŋgɛ́lɛ́ yikimə, na yáyɛ́á iŋgínə́ mikimə, mukúlə́kulə uhikiə ɛ́sɛ́á aŋɔ́á bɛ́múɛ́tɛ́, nɔ́yɛ́ yɛ́ ná bɛfɔná na mahánɛna məkimə yayɛna.»

³⁴Ɛnaka Yə́susu á siəkínə́ ɔwá a ná bíhíə́níníə́ muɛsɛ, a sɛ́á: «Ɔ lɛ báá hata na Nɛmanɛna nɛ́ Huɛlɛ́.» Ata mɔndɔ á sa óso tɔ́na ɔ ɔwayɛ́ ɛmbataka ɔbata.

³⁵A ná ɛtambá ɛ́ta, Yə́susu a ka bá a ndɔ ínə́niə ɔ Tɛ́mbɛlɛ, a sɛ́á: «Nəníə́ ɛ́kɛ bamanyumbə́ndə́ bá óso ɔlaa ɔwá Mɛ́sia a lɛa mɔná wa Ndə́witi əə́?»

³⁶Mba, ikúílí Umbúínyi Mɔnaŋanaŋa wɔ́ ná Ndə́witi fínə́ ɔ mɛɛ́lɔ, a ka wɛɛ́ya ɛ́lɛnɛna a sɛ́á: «Isə́lúkú a ná yámɛ́á Isə́lúkú lɛ́na ɔwá: Sɔ́nɔ ɔ ndə́túə́nə ɔ ɔwámɛ mɔkátá wɔ́ bɛnɔ́mɛ, mɛ ŋɔ kɛaka ɔwá báwɔ́á bokóyíkoyi bá bámɛ́nɛ́ná nɛbɛ́lɛ́nɛ́ná nɛ́ máwɔ́á makɔlɔ́.»

³⁷Ndə́witi wɛɛ́ya bɛ́múɛ́tɛ́ a ndɔ wɛɛ́ya ɛ́lɛna Isə́lúkú; mba, nəníə́ a óso ɔbáá wayɛ́á mɔná əə́? Nɛmɔndɔ nɛ́ wɛɛ́ya ɔ́kɔ́kɛna na nɛhɔnɔ.

³⁸Ɔ ɔwayɛ́ binə́níníə́ a laaka a sɛ́á: «Nɔ́ bamanyumbə́ndə́ bítə́tə́kə́níə́ ɔbá bá ndɔ hikiə ɔ ɔŋáŋɔ́bɔa na maŋgɔmba matatánɛ, bá bəə́bu hólókíə́ na hibə́təniə ɔ manáka,

³⁹ɔ utuənə ɔ bɛɔkɔ́ bíbúsíə́ ɔ məə́bə má mabɛ́kálɛ́na, ɔ bɛbɔ́ka bíbúsíə́ ɔ manɛ́áka.

⁴⁰Uwəbú ɔwá bá ndɔ maasɛ má bilíkə́ ɔ́lɔ; bá ndɔ mabɛ́kálɛ́na buniə ɔkɛaka ɔwá mbá bá bəə́bu siəkínə. Bá ŋɔ bəə́bu kə́lə́səkiə mɔŋɛ́ŋa yáyɛ́ná bənə́bənə́.»

⁴¹Yə́susu a ná túə́nə ɔ ɛmɛ́ŋɛ́ yɛ ɛkana yɛ́ mahánɛna ɔ Tɛ́mbɛlɛ, a siəkinə ɛ́sɛ́á bá ndɔ bɛcácɔ́ háá umə́. Bobóŋóní bá bɛcácɔ́ hákɛna biəŋí.

⁴²Hɛtɔyɔ́nɔ́ hɛ́ ilíkímúə́ndú a ná ndafama, a ná háá bɛcácɔ́ bɛ́fandɛ́.

⁴³Yə́susu a ná báyɛ́á bɔkɔ́nɛna ɛ́lɛ́ná, a ná bəə́bu lɛ́na a sɛ́á: «Ɔ taká, mɛ ndɔ bənú lɛna ɔwá, híihi hɛtɔyɔ́nɔ́ hɛ́ ilíkímúə́ndú a ná háá ɔ ɛkana yáyɛ́ná bəkimə.

⁴⁴Ɔ taká bə́ə́ní bəkimə bá ná bɛcácɔ́ índíə́kínə ɔbɛ́á bɛ́ lɛ bəə́bu báá mɔɔsɛ́ŋɛ́; mba ɔwayɛ́, na bɔ́áyɛ́á bɔtɔyɔ́ bukimə, a ná hánɛ́ná yatɛ́ ɔyɛ́á a ná bá itíə́nə́tɔ, yatɛ́ ɔyɛ́á yɛ́ ná wɛɛ́ya báá ɔwá a ayɛ́ niŋə́kə.»