Read Tunen Mə́líkusu 13 Bible Online

Mə́líkusu 13 - Tunen bible

Mə́líkusu 13

¹Ikúílí Yə́susu a ná báá ɔ ɔfámáka ɔ Tɛ́mbɛlɛ, ɔmɔtɛ́ wa báyɛ́á bɔkɔ́nɛna a ná wɛɛ́ya lɛ́na a sɛ́á: «Á Muinə́niə, siəkínə: Yatɛ́ miɔkɔ, yatɛ́ nɛfalaba!»

²Yə́susu a sɛ́á: «Ɔ ndɔ nɛ́ɛnɛ nɛfalaba sinə mɔŋɛ́ŋa! Ata muɔkɔ úmotí wɔ́ sɔ́ ŋɔ tuənə á ɔsɔ́kɔ́ muɔkɔ ɔmbáŋá, bá ŋɔ miítə kataka mikimə.»

³Yə́susu a ná tuə́nə ɔ ɔmáá wɔ́ olífia ɔ busíə́ bɔ́ Tɛ́mbɛlɛ. Bíə́lə, Yákɔbɔ, Yɔhánɛsɛ na Andɛlɛ́ uwəbú, bá ka báá bísúə́lə́tɔ́ na wɛɛ́ya, bá ná wɛɛ́ya batá bá sɛ́á:

⁴«Lɛná bəsú, maánɛ́á bɛ́táná bɛkɔa bɛ́ ŋɔ bɛ́kɛaka əə́? Yatɛ́ hibílíndíníə́ hɛ́ ŋɔ ikúílí ínə́niə ɔyɛ́á bɛ́táná bɛkɔa bikimə bɛ́ ŋɔ bɛ́kɛaka əə́?»

⁵Yə́susu a sɛ́á: «Nɔ́ bíkókósókíə ɔwá, ata mɔndɔ a lɛ bənú nimbə.

⁶Bɛndɔ bəəŋí bá ŋɔ ndasákɔ́na ɔ ɔwámɛ niínyə, bá ŋɔ laaka bá sɛ́á: “Mɛaŋɔ́á mɛ́ lɛ́á Mɛ́sia”, bá ŋɔ bɛndɔ bəəŋí nənəsəkiə.

⁷Ikúílí nɔ ŋɔ ɔ́kɔ́kɛna bá ndɔ hɛ́na ɛlɔ́áyɛ́ bilə́ na tɔsɔkɔ́sɔkɔ tɔ́ bilə́, nɔ lɛ kɔlɔma: Ɔ taká, bɛ́táyɛ́ bikimə bɛ́ ná hɔ́ánana ɔbɛ́kɛa. Mba, nisúki nɛ́ sɔ́ ŋɔ bá nɛ́ nɔ́ ndafama.

⁸Ɔ taká, mɔnɔŋɔ má ŋɔ tátána ɔ bilə́, ɛ́sɛ́á mamanɛna; ɔ bɛ́mɔtɛ́ bɛbɔ́ka misí yɛ́ ŋɔ ndandɛmaka, mətíli má ŋɔ báá məəŋí. Yɛ́ ŋɔ báá nibotólíníə́ nɛ́ məsə́kə má nibíə́nə.

⁹Nɔ́ báá ɔ bɛtátɛ́ná. Bá ŋɔ bənú sɛmaka ɔ bəkə́lə́siə, bá ŋɔ bənú súbə́kə ɔ məə́bə má mabɛ́kálɛ́na. Nɔ ŋɔ káláka ɔ busíə́ bɔ́ bamanɛna na bənəni ɛlɔ́áyɛ́ ámɛ: Ɔmɔ́tɔ́yɛ́ mbá nɔ ŋɔ imbóŋi kusənə.

¹⁰Yɛ́ lɛa hɔ́ánánátɔ́ ɔwá, bá taŋá ɔ Imbə́nú Yɛɛsɛ uyəmbələniə ɔ bɛndɔ bá mɔnɔŋɔ məkimə.

¹¹Ɛnáká bá bənú ákánána ɔ uwənú ɔsɛma, nɔ lɛ sə́híníə́ ubusíə́ bɔ́ ikúílí yatɛ́ ɔyɛ́á nɔ ŋɔ laaka, yatɛ́ ɔyɛ́á yɛ́ ŋɔ bənú bíndiə ɔ yɛ́táyɛ́ ikúíli, nɔ yɛɛ́ta fə́mə́lə́níə́ bɔkɔasɛ́á, tátá bənú nɔ ŋɔ hɔ́ɔ́kɔ, mba Umbúínyi Mɔnaŋanaŋa.

¹²Munínyə́ a ŋɔ wayɛ́á munínyə́ sɛma ɔ nyɛmbɛ́ ɛ́sɛ́á isə́ na wayɛ́á mɔná, baná bá ŋɔ tátána na túə́búə́ tukúlə, bá ŋɔ bəə́bu hɔkakɛna ɔ nyɛmbɛ́.

¹³Bɛndɔ bəkimə bá ŋɔ bənú kóyokiə ɛlɔ́áyɛ́ nɛ́ámɛ́á niínyə, mba, wɛ́ɛ́yɛ́ ɔwá a ŋɔ tiŋiminə ɔkafámáká ɔ nisúki, Huɛlɛ́ a ŋɔ wɛɛ́ya nuəkəniə.»

¹⁴«Ikúílí nɔ ŋɔ nyəkə́ yɛ Mɔtɛŋɛna siəkinə tuənə́tɔ́ ɔ ɛbɔ́ka ɔyɛ́á a sá hɔ́ánana utuənə. (Mɔfana á ɔ́kɔ́ muɛsɛ) nɔ́yɛ́, bɛndɔ ɔbá bá ŋɔ báá ɔ misí yɛ Yútɛa bá ná hɔ́ánáná ɔtɛbɛna ɔ ɛmáá.

¹⁵Mɔndɔ ɔwá a ŋɔ báá ɔ muanda ɔmbáŋá wɔ́ miímə, a lɛ tukínə ɔwá á fínə́ ɔ ɔwayɛ́ miímə ɔ bɔɔ́la ɔwɛta.

¹⁶Wɛ́ɛ́yɛ́ ɔwá a ŋɔ báá ɔ ɛtɔbɔtɔ́bɔ́, a lɛ tilə́ na əlimə ɔwayɛ́ nilókiə ɔkɛɛta.

¹⁷Mahana na bəəndú ɔbá bá ŋɔ báá ɛmɛ́lákátɔ́ na bááyɛ́ ɔbá bá ŋɔ nyóhokiə ɔ mátáyɛ́ mɔɔsɛ́!

¹⁸Nɔ́ bɛ́kálákɛ́na ɔkɛaka ɔwá nɔ́yɛ́ lɛ ndáfámá ɔ ikúílí yɛ́ bɛbɔ́lábɔ́lá.

¹⁹Ɔ taká, mátáyɛ́ mɔɔsɛ́ má ŋɔ báá mɔɔsɛ́ má məsə́kə ɔmá bá sa ndə́sinə ɔ nibotólíníə́ ɔnɛ́á Huɛlɛ́ a ná misí bɔ́tá, ɔ ndafámáká isíŋáka, ɛ́sɛ́á nɔ́yɛ́ yɛ́ sá ndábáá tɔ́na.

²⁰Ata Isə́lúkú a sa mátáyɛ́ mɔɔsɛ́ kútíhə́síə́, há ata mɔndɔ a sɔ́ ŋɔ bínúə́niə, mba, ɛlɔ́áyɛ́ batɛ́fátɛfa ɔbá a ná tɛ́fá, a ka mátáyɛ́ mɔɔsɛ́ kútíhəsiə.

²¹Nɔ́yɛ́, ábá mɔndɔ a ná bənú lɛ́na a sɛ́á: “Siəlínə, Mɛ́sia a lɛa háha! Siəlínə, a lɛa hə́ə́ní!” Nɔ lɛ wɛɛ́ya níə́núə́ nɛkɔmba talɛna.

²²Bɛmɛ́sia bɛ́ bɛkanja na bɔhɛ́nátɔtányɛ́ bá bɛkanja bá ŋɔ fámáka, bá biələ́mənə bɛ́ bɛkɔa kɛ́áká na bisə́mə́tə́, ɛlɔ́áyɛ́ bááyɛ́ unənəsiə ɔbá Huɛlɛ́ a ná tɛ́fá ɛ́bá nɔ́yɛ́ óso ɔ ɔbɛ́kɛa.

²³Mba uwənú, nɔ́ bítə́tə́kə́níə́, mɛ ná bənú bɛkɔa bikimə mə́nyə́síə́.»

²⁴«Mba ɔ mátáyɛ́ mɔɔsɛ́, əlimə yɛ mátáyɛ́ məsə́kə, hiɔtɔ́tɔ́ hɛ́ ŋɔ yɔtɔ, muilí wɔ́ sɔ́ ŋɔ nɔma tɔ́na,

²⁵tusənji tɔ́ ŋɔ kɔakɔna ɔ húlə́kinə ɔ ɔmbáŋá, mənjiŋə má nɔɔ́mɛná má ŋɔ bínyúkəkə.

²⁶Ɔ yɛ́táyɛ́ ikúílí, bá ŋɔ Mɔná wa mɔndɔ siəkinə ɔsákɔna ɔ bɛlɔndɔ́ nuúmə́ na injiŋə yɛŋɛ́ŋa na tuúmə.

²⁷A ŋɔ bɛáŋgɛlɛ lɔ́máka ɔ makásá ə́nisə má misí, ɔ bááyɛ́ ɔkɔta ɔbá a ná tɛfa, bá ŋɔ húlə́kinə ɔ misí mikimə.»

²⁸Nɔ́ yɛ́ɛyɛ iŋgətí ɛ́tɛ́na ɔ bɔnɛŋɛ́: Ikúílí ɔyɛ́á yə́yíə́ mɛlɛ́áfɛ yɛ́ nɔ́ botoliə ɔ ɔtɔ́lɔ yɛ́ tɔánjɛ fə́mə́kíə́, nɔ ndɔ manya ɔwá ikúílí yɛ́ hiɔtɔ́ yɛ́ lɛa hoóyi.

²⁹Hɔ́ánánátɔ́ uwənú tɔ́na, ikúílí nɔ ŋɔ bɛ́tána bɛkɔa siəkinə bɛ́ ndɔ bɛ́kɛa, nɔ́ manyá ɔwá Mɔná wa mɔndɔ a lɛa hoóyi, a lɛa ɔ busíə́ bɔ́ túə́núə́ tɔkɔ́kɛ.

³⁰Ɔ taká, mɛ ndɔ bənú nɔ́yɛ́ lɛna ɔwá híihi hɛsɛká hɛ́ sɔ́ ŋɔ tɔ́mba ɛŋaná bɛ́ɛ́yɛ́ bikimə ɔndafama.

³¹Nɔɔ́mɛná na misí bá ŋɔ tɔ́mba, mba bɛ́ámɛ́á bɛtambá bɛ́ sa ndátɔmba.

³²Mba ɔ bɔ́táyɛ́ buɔsɛ́ ata ɔ wútə́yí ɔŋgɛ́ŋɛ́ mɔndɔ a lɛ ndɔ manya, ata bɛáŋgɛlɛ bɛ́ nɔɔ́mɛná, ata Mɔná, ɔ́maná á Isə́ bíbúə́.

³³Nɔ bɛ́tátáka, nɔ́ túə́nə ɛmbɛnyɛ́, ɔ taká nɔ lɛ ndɔ manya ɔ uyə́níə́ ikúílí yɛ́ ŋɔ ndafama.

³⁴Yɛ́ ŋɔ báá hɔ́ánánátɔ́ ɛ́sɛ́á mɔndɔ ɔwá a ndɔ ákána ɔ mɔkɛnda, a wə́yíə́ ɔmbɛ́la tíkə, a nɛmanɛna tíkínə́ ɔ ɔwayɛ́ bɔnyɛna, mɔnyɛna tɛ́á na bɔ́áyɛ́á buolí, a mɔtátá wa hɛkɔ́kɛ manɛna ɔwá a báá ɛmbɛnyɛ́.

³⁵Nɔ́ bámɛ́nɛ́ná ɛmbɛnyɛ́, ɔ taká nɔ lɛ ndɔ manya ɔ ikúílí ɔyɛ́á muití ɔmbɛ́la a ŋɔ ndahiana, bɛkɔlakɔ́lá mbá ata ətíə́ yɛ nəbulúə́, ɔ nɛlɔ́ŋɔ́ miɔkɔ́ ata siísíə́,

³⁶ɔkɛaka ɔwá, a lɛ bənú fámɛ́ná həmə́tu, á bənú níbə́ ɔ hinó.

³⁷Yatɛ́ ɔyɛ́á mɛ ndɔ bənú lɛna, mɛ ndɔ nɔ́yɛ́ lɛna ɔ bəkimə: Nɔ́ bámɛ́nɛ́ná ɛmbɛnyɛ́.