Read Tunen Mə́líkusu 16 Bible Online

Mə́líkusu 16 - Tunen bible

Mə́líkusu 16

¹Ɛnaka Sábatɛ yɛ́ tɔ́mbá, Malɛ́á wa Mákátala, Malɛ́á á inyə́ yɛ Yákɔbɔ na Salomə́ bá ná mɔfɔfɔ má bunumbə ɔ́ndɔ́kɔ́ ɛlɔ́áyɛ́ umimə wɔ́ Yə́susu ufofiə.

²Ɛsɔ́mbalɛ́ ɔ buɔsɛ́ bɔ́ indílí, bá ná ákáná ɔ munyə́, ɔsanɔ́ wɔ́ nɔ́ fáma.

³Bá bɛ́bataka bá sɛ́á: «Ɛ́yánɛ́ a ndɔ bəsú muɔkɔ nyɛkakɛnɛna ɔwá wɔ́ lɛ́á ɔ nifínínə́ nɛ́ munyə́ əə́?»

⁴Bá məə́sə bə́líə́, bá ná muɔkɔ yámá ɔwá wɔ́ ná báá mɔŋɛ́ŋa bákɛ́átɔ́ ɔ ɛmɛ́ŋɛ́ yɛ nifínínə́ nɛ́ munyə́.

⁵Ɛnaka bá fínə́ ɔ munyə́, bá ná ɛnɔ́kɔ́nɔkɔ yɛ́ mɔndɔ yámá tuənə́tɔ́ ɔ bɛnɔ́mɛ, a ka bá lɛŋábákátɔ́ na maŋgɔmba manaŋanaŋa, bɔkɔ́lɔ́ma bɔ́ ná bəə́bu itíə́.

⁶Mba, a ná bəə́bu lɛ́na a sɛ́á: «Nɔ lɛ kɔ́lɔ́má bɔ́ányɛ! Nɔ́ ndɔ Yə́susu wa Násalɛtɛ siə ɔwá bá ná ɔ́mɔ́kɛ́na ɔ ɔmbásá, a ná hɔŋɔ́á, a lɛ báá háha; nɔ́ ɛbɔ́ka siəlínə ɔyɛ́á bá ná wɛɛ́ya bɛ́lɛ́na.

⁷Mba, nɔ́ ákáná nɔ́ ká báyɛ́á bɔkɔ́nɛna na Bíə́lə lɛ́na ɔwá, a ndɔ bənú táta ɔ Kalɛ́lɛa ɔmɔ́tɔ́yɛ́ nɔ́ ndɔ wɛɛ́ya siəkinə ɛ́sɛ́á a ná bənú lɛ́na.»[3]

⁸Bá ná fámá, bá ná tɛbákɛ́ná hata na munyə́ bɔkɔasɛ́á, bá ka báá bá ndɔ ndandɛma na bɔkɔ́lɔ́ma. Bá sa mɔndɔ lɛna ata bɔkɔa bɔkɔasɛ́á bá ka báá na bɔkɔ́lɔ́ma.

⁹Yə́susu a ka hɔŋɔa ɔ nyɛmbɛ́ siísíə́ yɛ buɔsɛ́ bɔ́ indílí, a ka taŋa ɔ ubínə́niə á Malɛ́á wa Mákátala, ɔwá a ná imbúínyi mɛbɛ́á ɛ́lɛ́ndɔ́lɔ́mɔnɔ bulə́kə.

¹⁰Wɔ́ɔwɔ muəndú a ná ákáná ɔ báyɛ́ ɔkalɛ́na ɔbá bá ná báá na wɛɛ́ya ɔ buwə́ə́ na malɛlá.

¹¹Mba, bá sa luminə ikúílí bá ná ɔ́kɔ́ a ndɔ laa a sɛ́á: «Yə́susu a lɛa muɔmɔ́, mɛ ná wɛɛ́ya siəkínə».

¹²Əlimə yɛ nɔ́yɛ́, Yə́susu a ná bínə́níə́ ɔ báfandɛ́ ətíə́ yɛ báyɛ́á bɔkɔ́nɛna ɔ nindínə́ ninə́ninə́. Bátáyɛ́ bɔkɔ́nɛna bá ka báá ɔ ɔwákaka ɔ əlimə yɛ bɔnɔŋɔ.

¹³Ɛnaka bá kə́tílə́, bá ná bɔsɔ́kɔ́ bɔkɔ́nɛna nɛ́táyɛ́ nibínuəniə bíkə́tə́kíníə́, mba, bá sa luminə ɔ yatɛ́ ɔyɛ́á bá ná bəə́bu lakɛ́na.

¹⁴Ɔ nitifə́, Yə́susu a ná bínə́níə́ ɔ niómo na ɔmɔtɛ́, ikúílí bá ná báá ɔ ɔnɛ́á, a ná bəə́bu hɛkɔma lúmə́ ɛlɔ́áyɛ́ yə́búə́ mɛnyɔ́ na yə́búə́ mɛlɛ́má natákátɔ́ bɔkɔasɛ́á, bá sa níə́búə́ nɛkɔmba tálɛ́na ɔ bááyɛ́ ɔbá bá ná wɛɛ́ya siəkínə́ muɔmɔ́.

¹⁵A ná bəə́bu lɛ́na a sɛ́á: «Nɔ́ ákáná ɔ misí mikimə ɛlɔ́áyɛ́ Imbə́nú Yɛɛsɛ ɔnɔŋɔnɛna ɔ mɔsá mɔndɔ mukimə.

¹⁶Wɛ́ɛ́yɛ́ ɔwá a ŋɔ lumininə, á nɛsɔa kusə́nə, bá ŋɔ wɛɛ́ya nuəkəniə, ɔwá a sɔ́ ŋɔ lumininə, bá ŋɔ wɛɛ́ya hɔkɛna.

¹⁷Ɔ́ tubílíndíníə́ tɔ́ɔtɔ tɔ́ ŋɔ bá ɔ baáyɛ́ ɔbá bá ŋɔ lumininə: Ɔwámɛ niínyə, bá ŋɔ imbúínyi mɛbɛ́á buləkə, bá ŋɔ mohókí mɔɔ́sɔ hɔ́ɔ́kɔ,

¹⁸bá ŋɔ miáhɔ halɛakɛna na makátá, ábá bá ná hɛlɔkɔ nyáá, hɛ́ sa ndá bəə́bu bɔbɛ́á kɛa, bá ŋɔ bɛnákɛnákɛ makátá tálákɛna, báaba bá ŋɔ niŋəkə.»

¹⁹Ɛnaka á hɔ́á ɔ uwəbú ɔhɛ́na nɔ́yɛ́, Huɛlɛ́ a ná Isə́lúkú á Yə́susu hɔalɛ́nána ɔ nɔɔ́mɛná, a ná tuə́nə ɔwayɛ́ mɔkátá wɔ́ bɛnɔ́mɛ.

²⁰Bɔkɔ́nɛna bá ná ákáka ɔ bɛbɔ́ka ɔbánɔ́ bikimə ɔ Imbə́nú Yɛɛsɛ ɔnɔŋɔna. Isə́lúkú a ka bá a ndɔ bəə́bu ɔ́lɔ ɔ bɔ́táyɛ́ buolí, a taká yɛ níə́búə́ nɛnɔŋɔna ónókiniə na tɔŋgɛtɛ́nɛ́á tɔ́ yələ́mənə ɔtɔ́á tɔ́ ná bá tɔ́ ndɔ nɛɛ́ta ɔŋgɔ.