Read Tunen Mə́líkusu 3 Bible Online

Mə́líkusu 3 - Tunen bible

Mə́líkusu 3

¹Əlimə yɛ nɔ́yɛ́, Yə́susu a ná manyɔ́ kəfínə́ ɔ miímə yɛ mabɛ́kálɛ́na. Mɔndɔ ɔmɔtɛ́ a ka bá hɔ́yɛ́ na mɔkátá sɔ́ákátɔ.

²Bɛndɔ bá ka bá bá ndɔ siə á Yə́susu ɔsɔ́mɛna. Ɔ́ ɛlɔ́áyɛ́ nɔ́yɛ́ bá ná bá bá ndɔ wɛɛ́ya tɛ́ka ábá a ndɔ wɛ́ɛ́yɛ́ mɔndɔ niŋəsəkiə ɔ buɔsɛ́ bɔ́ Sábatɛ.

³Nɔ́yɛ́ Yə́susu a sɛ́á: «Hɔalɛ́na, tɛ́nɛ́ma ɔ busíə́ bɔ́ bɛndɔ bəkimə.»

⁴Mba, a ná bəə́bu batá a sɛ́á: «Nəníə́ wə́súə́ umbə́ndə́ wɔ́ ndɔ laa əə́? Buɛsɛ ɔkɛa ɔ buɔsɛ́ bɔ́ Sábatɛ alɛ́ɛ́, bɔbɛ́á ɔkɛa əə́? Mɔndɔ uniŋəsiə alɛ́ɛ́, ɔ ɔwayɛ́ ɔwɔ́nɔ əə́?» Mba uwəbú, bá ná náyá yə́ə́bu, bá lɛ bɛ́kámɔ́sɔ́na.

⁵Yə́susu á bəə́bu məə́sə tálá, a ná busə́kə ɔkɔ, a ná bəə́bu bíndúŋúnə́ ɛlɔ́áyɛ́ mə́búə́ mabɛ́kɔ́lɔmɔna mabɛ́á. A ná mɔndɔ lɛ́na a sɛ́á: «Sandɔ́ná wə́wúə́ mɔkátá.» A ná muítə sandɔ́na, wɔ́ ná híáná muɛsɛ.

⁶Nɔ́yɛ́, Bɛfalísia bá ná fə́mə́kə́níə́, ɔ umisíúmə́ bá ná kɔtáláná na bɛndɔ bá ilúkunə yɛ́ Əlóto ɔkɛaka ɔwá, bá hɛkɔma bɔ́ŋɔ́ mbá bá Yə́susu ɔnɔkɔ.

⁷Yə́susu na báyɛ́á bɔkɔ́nɛna bá ná bísúə́lə́ ɔ ɛsɛ́lɛ́ yɛ́ nɔmɔ́ ɔ Kalɛ́lɛa, iloŋo yɛ́ bɛndɔ miəŋí yɛ́ wɛɛ́ya oŋgokoniə. Bá húlə́kinə ɔ Kalɛ́lɛa,

⁸ɔ Yəlúsalɛma na misí yɛ Itumə́, bá húlə́kinə ɔ misí mɛŋɛ́ŋa yɛ́ yííní tanɛ́ yɛ nuíyi nɛ́ Yúlútɛnɛ ɔ bɔnɔŋɔ bɔ́ Tília na Sítono. Bátáyɛ́ bɛndɔ bəkimə bá ka bá ndɔ ndasá á Yə́susu busíə́ bɔkɔasɛ́á, bá ka bá bá ndɔ bɛkɔa bikimə ɔ́kɔ ɔbɛ́á a ná bá a ndɔ kɛa.

⁹A ná báyɛ́á bɔkɔ́nɛna lɛ́na a sɛ́á bá wɛɛ́ya isóyí tə́tə́níníə́, bá yɛɛ́ta nyɛkɛ́na ɔ nuíyi ɔkɛaka ɔwá bɛndɔ bá lɛ wɛɛ́ya fɔta.

¹⁰Ɔ taká, a ka bá a ndɔ bɛndɔ niŋəsiə, bəəŋí bá wɛɛ́ya kɔakɔnɛna ɔ mɛɛ́lɔ ɔkɛaka ɔwá bá wɛɛ́ya itíə́lə.

¹¹Ikúílí imbúínyi mɛbɛ́á yɛ́ ná wɛɛ́ya ɛ́ná, yɛ́ wɛɛ́ya moŋgóndi lúmə́kinə ɔ misí, yɛ́ sɛ́á: «Aŋɔ́á ɔ lɛ́á Mɔná wa Huɛlɛ́.»

¹²Mba, Yə́susu a ná bəə́bu manɛ́na na ɔwɛmbɛ́na ɔwá, bá lɛ bɛndɔ mənyə́síə́ ɛ́yánɛ́ a lɛ́á wɛɛ́ya.

¹³Əlimə yɛ nɔ́yɛ́, Yə́susu a ná báláka ɔ ɔmáá ɔmbáŋá, a ná bááyɛ́ ɛ́lɛ́ákɛ́na ɔbá a ná bá a ndɔ hikiə, bá ná bɛ́nyálɛ́la ɔ ɔwayɛ́ ɛmɛ́ŋɛ́.

¹⁴Nɔ́yɛ́, a ná tɛ́fá niómo na báfandɛ́, a ná bəə́bu niínyə indíə́ nɛ́ basɔ́másɔma ɔkɛaka ɔwá bá báá na wɛɛ́ya; a ná bəə́bu lɔ́máká uhúlə́ bɛndɔ Imbə́nú Yɛɛsɛ uyəmbələniə.

¹⁵A ná bəə́bu iŋgínə́ índíə́ yɛ́ imbúínyi mɛbɛ́á ɔ ubulə.

¹⁶A ka niómo na báfandɛ́ tínímiə ɔbá a ná tɛfa: Bíə́lə ɔ́ mɔlɔ́ŋɛ́ná ɔwá a ná índíə́ á Símono,

¹⁷Yákɔbɔ, mɔná wa Sɛbɛtɛ́ na Yɔhánɛsɛ á munínyə́ wa Yákɔbɔ, (Yə́susu a ná bəə́bu lɔ́áká Bɔanɛlɛ́ŋgɛsɛ ɔ́ niɔŋɔ́ ɔ sɛ́á: «Baná bá ɛmalamanda.»)

¹⁸Andɛlɛ́ na Filíbo, na Batələmí, na Matíó, na Tɔ́masɛ, na Yákɔbɔ mɔná wa Alafə́, na Tatɛ́, na Símono ɔwá bá ndɔ ɛ́lɛnɛna bá sɛ́á: «Muhikiəbɔnɔŋɔ bɔ́ Ísilahɛ́lɛ»,

¹⁹na Yútasɛ Isikalióto, wɔ́ɔwɔ ɔwá a ná Yə́susu fiɔtɔ.

²⁰Əlimə yɛ nɔ́yɛ́, Yə́susu a ná ndáhíáná ɔ ɔmbɛ́la. Bɛndɔ bá ná botólíə́ ɔ ɔkɔtana ɔmɔ́tɔ́yɛ́ ɔ nindínə́ ɔnɛ́á, Yə́susu na báyɛ́á bɔkɔ́nɛna bá sa bá na ikúílí yɛ́ ɔnɛ́á.

²¹Ɛnaka nikúlə nɛ́ Yə́susu bá bɔ́táyɛ́ bɔkɔa ɔ́kɔ́, bá ná ndásá ɔ ɔwayɛ́ ɔndɛɛta. Bá laaka bá sɛ́á: «A báka famɔ́nɔ́átɔ!»

²²Bamanyumbə́ndə́ ɔbá bá ná húlə́ ɔ Yəlúsalɛma, bá ka báá umə́; bá sɛ́á: «Bɛlɛsɛbúlu á isə́lúkú yɛ imbúínyi mɛbɛ́á a lɛa fínə́tɔ́ ɔ wɔ́ɔwɔ mɔndɔ mɛɛ́lɔ. A ndɔ imbúínyi mɛbɛ́á húliə ɔ bɛndɔ na iŋgínə́ yɛ isə́lúkú yɛ imbúínyi mɛbɛ́á.»

²³Yə́susu a ná bəə́bu ɛ́lɛ́ákɛ́na, a ná bəə́bu ɔŋana tɛ́ná a sɛ́á: «Nəníə́ Sátana a óso ubíbulə wɛɛ́ya bɛ́muɛ́tɛ́ əə́?

²⁴Ábá nɛmanɛna nɛ́ ná bɛ́álɔ́ná na wɛɛ́ya bɛ́múɛ́tɛ́, nɛ́ sa ósó undíŋímə.

²⁵Ábá nikúlə nɛ́ bɛndɔ nɛ́ lɛa bɛ́álɔ́nátɔ́ bɛ́múɛ́tɛ́ nɛ́ sa ósó ɔwakána ɔ busíə́ ata hinó.

²⁶Hɔ́ánánátɔ́, ábá Sátana a ndɔ bínúə́siə wɛɛ́ya bɛ́múɛ́tɛ́, nɛ́áyɛ́á nɛmanɛna nɛ́ lɛa sasɛ́átɔ, nɛ́ sa ósó ɔwakána ɔ busíə́, nɛ́ lɛa hɔ́átɔ.»

²⁷«Mba, ata mɔndɔ a sa ósó ufínə ɔ miímə yɛ mɔndɔ wa iŋgínə́, a máyɛ́á maasɛ ɛtaka, ábá a sá taŋa mɔ́táyɛ́ mɔndɔ ɔwɔlɔ́kɔ; nɔ́yɛ́ mbá a tíkə́ yayɛ́á miímə sɔnɔkɔ.

²⁸Ɔ taká, mɛ ndɔ bənú lɛna ɔwá, bá ŋɔ baná bá bɛndɔ bɛkɔa bikimə niasakɛna, mabɛ́á na bɛyaŋɔyáŋɔ́ biəŋí ɔbɛ́á bá ŋɔ laaka.

²⁹Mba, mɔndɔ ɔwá a ŋɔ Umbúínyi Mɔnaŋanaŋa yaŋɔnakɛna, bá sa ndá wɛɛ́ya niasɛ́na, a lɛa kɔ́átɔ́ ɔ bɔbɛ́á bɔ́ ikúílíə́kimə.»

³⁰Nɔ́yɛ́, bɔkɔasɛ́á bá ka bá bá ndɔ laa bá sɛ́á: «A báka na umbúínyi mɔbɛ́á.»

³¹Inyə́ na bənínyə́ bá Yə́susu bá ná ndafama. Bá ná tɛ́nɛ́má ɔ níə́lətíə́, bá ná mɔndɔ lɔ́má á Yə́susu ɔ ɔkɛɛlɛ́na.

³²Ilúkunə yɛ́ bɛndɔ yɛ́ ka báá tuənə́kínə́tɔ́ ɔ ɔwayɛ́ ɛmɛ́ŋɛ́. Bá ná wɛɛ́ya lɛ́na bá sɛ́á: «Siəlínə, nɛ́á na banánɛ́á bá lɛa ɔ níə́lətíə́; bá ndɔ aŋɔ́á bata.»

³³Mba, a sɛ́á: «Ɛ́yanɛ́ a lɛ́á yamɛ́á inyə́, banɛ́ bá lɛ́á bámɛ́á bənínyə́ əə́?»

³⁴A ná bɛndɔ hiamáka ɔbá bá ná báá ɔ ɔwayɛ́ ɛmɛ́ŋɛ́, ɔmɔtɛ́ na wə́ə́ní, a ná láá a sɛ́á: «Nɔ́ siəlínə, ɔ́ yamɛ́á inyə́ na bámɛ́á bənínyə́ báaba.

³⁵Yɛ́ báka ɔwá, mɔndɔ mukimə ɔwá a ndɔ Ɛtambá yɛ́ Huɛlɛ́ ɔ́kɔ, wɛɛ́ya a lɛ́á wamɛ́á munínyə́ ata yamɛ́á inyə́.»