Read Tunen Mə́líkusu 5 Bible Online

Mə́líkusu 5 - Tunen bible

Mə́líkusu 5

¹Nɔ́yɛ́ bá ná káfámá ɔ yííní ɛsɛ́lɛ́ yɛ nɔmɔ́ ɔ misí yɛ Kalasíə́

²Yə́susu a ná fámá ɔ isóyí. Ɔ umisíúmə́, mɔndɔ ɔmɔtɛ́ a ná ndásá ɔwáyɛ́ busíə́, a húlə́kinə ɔ minyə́; a ka báá na imbúínyi mɛbɛ́á,

³a niŋəkə ɔ minyə́. Nɔ́yɛ́, ata mɔndɔ a sa bá ɔwá a wɛɛ́ya hɔ́kɛna, ata bá nɔ́ wɛɛ́ya ɔ́lɔ́kɔkɔ na mɛsáŋa.

⁴Bɔkɔasɛ́á ɔ yɛ́mɔtɛ́ ikúílí, bá wɛɛ́ya makɔlɔ́ ɔ́lɔ́kɔ́kɔ́ na mikolí yɛ́ bilə́ŋú ɔ makátá na mɛsáŋa, a mɛsáŋa kátáka, a mikolí yɛ́ bilə́ŋú sɔ́mbáka. Ata mɔndɔ a sa bá na iŋgínə́ yɛ ɔwayɛ́ ɔhalɛna.

⁵Bikúílí bikimə, na bulúə́ ɛ́sɛ́á na buɔsɛ́, a ka bá a ndɔ nəyə ɔ minyə́ na ɔ ɛmáá ɔmbáŋá, a húlə́ yə́mə́kə, a bíúmúísəkiə mɛɛ́lɔ mikimə ɔ miɔkɔ.

⁶Nɔ́yɛ́, a ná Yə́susu ɛ́ná hata ɔsákɔna, a ná tɛbálɛ́na ɔwayɛ́ busíə́, a ná wɛɛ́ya moŋgóndi luminə.

⁷A ná yə́mə́ a sɛ́á: «Á Yə́susu, á Mɔná wa Huɛlɛ́ ɔwá a lɛ́á mɔŋɛ́ŋa, yatɛ́ yɛ́ lɛ́á na mɛaŋɔ́á na aŋɔ́á əə́? Tɔ́kɔ́lɛ, ɔ niínyə nɛ́ Huɛlɛ́, ɔ lɛ mɛaŋɔ́á ɛmɔ́kɛ́ índíə́.»

⁸Ɔ taká Yə́susu a ka bá a ndɔ umbúínyi mɔbɛ́á lɛna a sɛ́á: «Fáma á wɔ́ɔwɔ mɔndɔ mɛɛ́lɔ.»

⁹Yə́susu a ná wɛɛ́ya batá a sɛ́á: «Nɛ́áwɔ́á niínyə ɛ́yánɛ́ əə́?» A sɛ́á: «Iloŋo, bɔkɔasɛ́á tɔ lɛa bəsú bəəŋí.»

¹⁰Wííyí umbúínyi wɔ́ Yə́susu bɛ́tɔ́kɔ́lɔkɛna ɔwá, a lɛ bəə́bu lɔ́má hata na misí minə́minə́.

¹¹Ɔmɔ́tɔ́yɛ́ uhímbə́ wɔ́ mɛkɔnɛ́fɛ́ wɔ́ ka báá ɔ ɔnɛ́na ɛmɛ́ŋɛ́ yɛ ɔmáá.

¹²Imbúínyi mɛbɛ́á yɛ́ ná Yə́susu bɛ́tɔ́kɔ́lɔ́kɛ́na yɛ́ sɛ́á: «Tɔ́kɔ́lɛ, níásá bəsú tɔ́ fíə́kínə ɔ yííní mɛkɔnɛ́fɛ́ mɛɛ́lɔ.»

¹³A sɛ́á: «Oo! Nɔ́ kə́fíə́kínə.» Imbúínyi mɛbɛ́á yɛ́ ná fə́mə́kə́níə́ ɔ mɛɛ́lɔ yɛ wɛ́ɛ́yɛ́ mɔndɔ, yɛ́ ná kə́fíə́kínə ɔ mɛkɔnɛ́fɛ́. Nɔ́yɛ́, uhímbə́ wɔ́ mɛkɔnɛ́fɛ́ wɔ́ ná lokóníə́ ɔ ɔmáá, wɔ́ ná kə́bínyə́ ɔ nɔmɔ́. Wɔ́ ná nyúɛ́ná ɔ mənífə́. Mɛkɔnɛ́fɛ́ yɛ́ ka báá hoóyi na tukóló tɔ́fandɛ́.

¹⁴Ɛnaka batáta mɛkɔnɛ́fɛ́ bá ɛ́ná nɔ́yɛ́, bá ná tɛbákɛ́na; bá ná ká bɛndɔ bá bətínə́ imbə́nú lákɛ́na na báaba ɔbá bá ná báá ɔ bɛtɔbɔtɔ́bɔ́. Bɛndɔ bá ná ndásákɔ́na ɔ ndəsínə́ ɛ́sɛ́á bɛkɔa bɛ́ ná bɛ́kɛ́áka.

¹⁵Nɔyɛ́ bá ná ndáfámá á Yə́susu ɛmɛ́ŋɛ́, bá ná mɔndɔ ɛ́ná ɔwá a ná bá na ilúkunə yɛ́ imbúínyi mɛbɛ́á, a nɔ́ tuənə lɛŋábákátɔ́, a lɛa njə́ŋinjə́ŋi. Ɛnaka bá yámá nɔ́yɛ́, bɔkɔ́lɔ́ma bɔ́ ná bəə́bu itíə́.

¹⁶Bɛndɔ ɔbá bá ná nɔ́yɛ́ síə́kínə, bá ná bɛkɔa bikimə nífúnə́kínə́ ɔbɛ́á bɛ́ ná mɔndɔ wa imbúínyi mɛbɛ́á na mɛkɔnɛ́fɛ́ fámɛ́ná na ɔ bəkúlə́kulə ɔbá bá ná ndásákɔ́na.

¹⁷Bá ná botólíə́ á Yə́susu ɔbɛ́tɔ́kɔ́lɛna ɔwá á hɔalákɛ́na ɔ uwəbú misí.

¹⁸Ɔ ikúílí ɔyɛ́á Yə́susu a ná báá ɔ ufíə́kinə ɔ isóyí, ɔkɛaka ɔwá a ákáná, mɔndɔ wa imbúínyi mɛbɛ́á a ná káfámá ɔwayɛ́ busíə́, a ná wɛɛ́ya batá a sɛ́á: «Tɔ́kɔ́lɛ, mɛ ndɔ siə ɔwakána na aŋɔ́á.»

¹⁹Yə́susu a sɛ́á: «Bóo! Híánáka ɔ ɔwáwɔ miímə, ətíə́ yɛ nɛ́áwɔ́á nikúlə; káka bɛndɔ ɔbá bá lɛ́á umə́ bɛkɔa bikimə nífúnə́kínə ɔwá, Huɛlɛ́ a ná aŋɔ́á mɛɛ́lɔ wəə, a ná bɛkɔa bɛɛsɛ kɛ́áka ɛlɔ́áyɛ́ áwɔ.»

²⁰Nɔ́yɛ́, mɔndɔ a ná ákáná ɔ bətínə́ ɔyɛ́á bá ndɔ ɛ́lɛnɛna bá sɛ́á Tɛkabɔ́lɔ, ɔ bɛkɔa bikimə utúmbə́ləniə ɔbɛ́á Yə́susu a ná wɛɛ́ya kɛ́áka. Bɛndɔ bəkimə ɔbá bá ná wə́yíə́ ɔhɔ́ɔ́ ɔ́kɔ́kɛ́na, bá ná ə́lə́mə́nə́ mɔŋɛ́ŋa.

²¹Yə́susu a ná ndáhiana, wɛɛ́ya ɔ isóyí nuúmə́ ɔ yííní tanɛ́ yɛ nɔmɔ́. Ilúkunə yɛŋɛ́ŋa yɛ́ bɛndɔ yɛ́ ka báá kɔtálánátɔ́ ɔ ɔwayɛ́ ɛmɛ́ŋɛ́, ɔ ɛsɛ́lɛ́ yɛ́ nɔmɔ́.

²²Yɛmɔtɛ́ Isə́lúkú yɛ miímə yɛ́ mabɛ́kálɛ́na yɛ Bɛyútɛnɛ a ná fama; nɛ́áyɛ́á niínyə á Sayilúsu. A ná Yə́susu ɛ́ná, a ná wɛɛ́ya moŋgóndi luminə,

²³a ná botólíə́ ɔwɛmbɛ́na na ɔbɛ́tɔ́kɔ́lɛna a sɛ́á: «Wamɛ́á mɔná muəndú ɔ mɔtɛ́tɛ́á a lɛa hoóyi ɔ uwə́kunə. Tɔ́kɔ́lɛ, sɔ́nɔ ɔ ndá wɛɛ́ya makátá tálá ɔ mɛɛ́lɔ, á niŋə́ mbá a báá ɔ buɔmɔ́.»

²⁴Nɔ́yɛ́ Yə́susu a ná ákáná na wɛɛ́ya; ilúkunə yɛŋɛ́ŋa yɛ́ bɛndɔ yɛ́ ná wɛɛ́ya ɔŋgɔ́kɔ, yɛ́ wɛɛ́ya fɔ́táka bɛsalɛ bikimə.

²⁵Wɔmɔtɛ́ muəndú a ka báá ɔmɔ́tɔ́yɛ́, manɔ́ŋɔ má wɛɛ́ya fámáka, ɔ́ niómo nɛ́ tuɔŋɔ na tɔ́fandɛ́ niɔfɛ́nɛ.

²⁶A ka məsə́kə siəkinə mɔŋɛ́ŋa, a húlə́ kɛndaka ɔ mamɔ́ɛ́nɛ́ məəŋí, a ka wə́yíə́ mukusə tɛŋakɛna mukimə, mba, ata ɔmɔtɛ́ a sa wɛɛ́ya niŋəsiə. Máyɛ́á məsə́kə má ákaka ɔbánɔ́ ɔ busíə́.

²⁷A ka ɔ́kɔ́kɛna bá ndɔ Yə́susu bíkómo, a ná ndása, a ná bɛ́látá ɔ ilúkunə yɛ́ bɛndɔ. A ná ákáná á Yə́susu əlimə, a ná bɔ́áyɛ́á bɔlɛŋa itíə́lə.

²⁸Ɔ taká, a ka bá a ndɔ fɛka a sɛ́á: «Ábá mɛ ná bɔ́áyɛ́á bɔlɛŋa itíə́lə, mɛ ndɔ niŋəkə.»

²⁹A ná bɔlɛŋa bɔ́ Yə́susu itíə́lə, manɔ́ŋɔ má ná hɔ́á ɔ umisíúmə́, má lɛ wɛɛ́ya fámá tɔ́na; a ná bɛ́ɔ́kɔ́ ɔwá wə́yíə́ mɔɔ́mbɔ wɔ́ ná hɔa.

³⁰Ɔ umisíúmə́ Yə́susu a ná bɛ́ɔ́kɔ́ ɔwá, yɛmɔtɛ́ iŋgínə́ yɛ́ nɔ́ wɛɛ́ya fáma; nɔ́yɛ́, a ná bɛ́híámɛ́la ɔ ətíə́ yɛ bɛndɔ, a sɛ́á: «Ɛ́yánɛ́ a nɔ́ mɛaŋɔ́á ítiələ əə́?»

³¹Bɔkɔ́nɛna bá sɛ́á: «Ɔ ndɔ sinə ɔwá bɛndɔ bəəŋí bá aŋɔ́á lɛa fɔ́tátɔ́ bɛsalɛ bikimə, ɛlɔ́áyɛ́ yatɛ́ ɔ ndɔ bata tɔ́na ɔ sɛ́á: “Ɛ́yánɛ́ a ná mɛaŋɔ́á ítíə́lə əə́?”»

³²Yə́susu a bɛndɔ hiamaka ɔbá bá ná báá ɔ ɔwayɛ́ ɛmɛ́ŋɛ́ ɔkɛaka ɔwá, a lɛndá ɛ́yánɛ́ a ná wɛɛ́ya itíə́lə.

³³Mɔ́táyɛ́ muəndú a ndandɛmaka na bɔkɔ́lɔ́ma bɔŋɛ́ŋa bɔkɔasɛ́á, a ka bá a ndɔ manya yatɛ́ yɛ́ nɔ́ wɛɛ́ya bɛ́kɛaka. A ná Yə́susu moŋgóndi luminə, a ná wɛɛ́ya taká mikimə lakɛ́na.

³⁴Mba, Yə́susu a sɛ́á: «Á Ámá, yáwɔ́á ilumininə yɛ́ ná aŋɔ́á núə́kə́níə́. Oo! Káká muɛsɛ, ɔ ná niŋə.»

³⁵Yə́susu a ka bá a ndɔ hɔ́ɔ́ nɔyɛ́, bɛndɔ bá ɔmbɛ́la wɔ́ isə́lúkú yɛ miímə yɛ mabɛ́kálɛ́na bá ná ndáfámá na imbə́nú, bá sɛ́á: «Á Isə́lúkú, yatɛ́ tɔ́na ɔ ndɔ Muínə́niə hɔ́mbɛ́na, wawɔ́á ɔmɔ́la a nɔ́ wə́ə́.»

³⁶Mba, Yə́susu a sa wútə́yí ɔhɔ́ɔ́ ɛta ɛ́sɛ́á bɔkɔa ɔwayɛ́ busíə́; a sɛ́á: «Ɔ lɛ kɔlɔma, lumínínə ɔbánɔ́!»

³⁷A sa luminə ɔwá bɛndɔ bá ká wɛɛ́ya tikə, úhúlíə́ á Bíə́lə, Yákɔbɔ na Yɔhánɛsɛ, á munínyə́ wa Yákɔbɔ.

³⁸Bá ná káfámá ɔ ɔmbɛ́la wɔ́ isəlúkú yɛ miímə yɛ mabɛ́kálɛ́na; Yə́susu a ná bɛndɔ ɛ́ná bá ndɔ bínyukə mɔŋɛ́ŋa, bá bísúbə́kə, bá lɛlaka, bá miyə́mə́yə́mə́ bə́ləkiə mɔŋɛ́ŋa.

³⁹A ná fínə́ ɔ miímə, a sɛ́á: «Ɛlɔ́áyɛ́ yatɛ́ nɔ́ ndɔ bísúbínə náana əə́? Yatɛ́ nɔ ndɔ lɛlɛna əə́? A lɛa ɔ hinó, a lɛ báá wə́ə́tɔ.»

⁴⁰Ɛ́sɛ́á Yə́susu a ná hɔ́lɔ́ nɔ́yɛ́, bɛndɔ bá ná botólíə́ ɔ ɔwayɛ́ ɔwɔnɔ. Nɔ́yɛ́, a ná bəə́bu fə́mə́kíə́ bəkimə ɔ niə́lətíə́; a ná tíkə́nə́ na báyɛ́á bɔŋgəlimə bálálɔ́, isə́ na inyə́ yɛ ɔmɔ́la; bá ná fínə́ ɔ ɛbɔ́ka ɔyɛ́á ɔmɔ́la a ná bámɛ́nɛ́na.

⁴¹Yə́susu a ná mɔná muəndú itíə́ ɔ mɔkátá, a sɛ́á: «Talíta kumu», ɔ́ niɔŋɔ́ «Á hɛmɔ́lámɔla, mɛ ndɔ aŋɔ́á lɛna, hɔnyɔ́á!»

⁴²Mɔná muəndú a ná hɔalɛ́na mɔtɛ́nɛná, a ná botólíə́ ɔ ɔkɛnda. A ka báá na niómo nɛ́ tuɔŋɔ na tɔ́fandɛ́. Ɛnaka bɛndɔ bá siəkínə́ nɔ́yɛ́, bá ná ə́lə́mə́nə.

⁴³Yə́susu a ná bəə́bu sáŋɔ́nɛ́ná na ɔwɛmbɛ́na ɔwá, bá lɛ mɔndɔ bɔ́táyɛ́ bɔkɔa lɛ́na, mba a sɛ́á: «Nɔ́ wɛɛ́ya bɔ́labɔ́nɛ́á índíə́.»