Read Tunen Mə́líkusu 6 Bible Online

Mə́líkusu 6 - Tunen bible

Mə́líkusu 6

¹Nɔ́yɛ́, Yə́susu a ná hɔalɛ́na, a ná ákáná ɔ bətínə́ ɔyɛ́á a ná ɔ́mbɔ́kɛ́na, báyɛ́á bɔkɔ́nɛna bá ná wɛɛ́ya ɔŋgɔkɔ.

²Ɔ bɔ́mɔtɛ́ buɔsɛ́ bɔ́ hinó hɛ́ Sábatɛ, a ná botólíə́ ɔ bɛndɔ bɛkɔa bɛ́ Huɛlɛ́ uwukúniə ɔ miímə yɛ mabɛ́kálɛ́na. Bɛndɔ bəəŋí ɔbá bá ná bɛ́táyɛ́ bɛkɔa ɔ́kɔ́kɛ́na, bá ná ə́lə́mə́nə, bá laaka bá sɛ́á: «Hə́níə́ bɛ́ɛbɛ bɛkɔa bɛ́ ndɔ wɛɛ́ya húlínə əə́? Nindínə́ nɛ́ ɛmanya nɛ́ hə́níə́ nɛ́ɛnɛ əə́? Yatɛ́ bɛkɔa bɛ́ɛbɛ bɛ́ yələ́mənə a ndɔ kɛa əə́?

³Tátá wɛɛ́ya kábɛ́nda, á mɔná wa Malɛ́á əə́? Tátá munínyə́ wa Yákɔbɔ, Yosə́, Yútu na Símono əə́? Báyɛ́á bənínyə́ ɔ bəəndú bá lɛ báá háha na bəsú əə́?» Na mítə́yí mɛnyɔ́, bá sa níə́búə́ nɛkɔmba tálɛ́na ɔ ɔwáyɛ́.

⁴A ná bəə́bu lɛ́na a sɛ́á: «Abáka bá mɔhɛ́nátɔtányɛ́ bə́təkiə ɔ bɛbɔ́ka bikimə úhúlíə́ ɔ ɔwayɛ́ miímə na nɛ́áyɛ́á nikúlə.»

⁵A sa kɛa ata isə́mə́tə́ ɛ́mɔtɛ́ ɔ yɛ́táyɛ́ ɛbɔ́ka, ɔ́maná tɛ́tɛ́á yɛ bɛnákɛnákɛ a ná níŋə́síə́, a ná bə́əbu makátá tálákɛ́na. 6 Yə́susu a ka báá ə́lə́mə́nə́tɔ́ ɔ mɛnyɔ́ yɛ́ bátáyɛ́ bɛndɔ.

⁶Yə́susu a ka bá a ndɔ kɛnda ɔ mɔnɔŋɔ má mamɛ́ŋɛ́ uwukúniə.

⁷A ná niómo nɛ́ bɔkɔ́nɛna na báfandɛ́ ɛ́lɛ́ákɛ́na, a ná botólíə́ ɔ uwəbú ɔlɔ́ma báfandɛ́ báfandɛ́. A ná bəə́bu iŋgínə́ índíə́ yɛ imbúínyi mɛbɛ́á ɔ ukúbə.

⁸A ná bəə́bu óníníə́ a sɛ́á: «Ikúílí ɔyɛ́á nɔ ndɔ ákána, nɔ lɛ ɛtá ata bɔɔ́la, nɔ́ ɛ́tá há mulúmbə, nɔ lɛ bɛ́labɔ́nɛ́á ɛta, ata ɔmbalá mbá ata ɛcácɔ́.

⁹Nɔ́ bɛtafɛ́ná bɛ́há ɔ makɔlɔ́, nɔ lɛ bɛ́háá maŋgɔmba áfandɛ́.»

¹⁰Nɔ́yɛ́, a ná bəə́bu lɛná tɔ́na a sɛ́á: «Bɛbɔ́ka bikimə ɔbɛ́á nɔ ŋɔ kafámá, nɔ́ tuənə́kínə ɔ miímə ɔyɛ́á bá ná bənú índíə́ ɔkafámáká ikúíli ɔyɛ́á nɔ ŋɔ hɔalɛna umə́.

¹¹Ábá bá ná kinə́ ɔ uwənú ɔkáha muɛsɛ mbá ata bɛkɔa ɔwɔ́kɔ ɔbɛ́á nɔ ndɔ bəə́bu lɛna, nɔ́ hɔalɛ́ná ɔmɔ́tɔ́yɛ́, nɔ́ umbunə́ kútə́lə ɔwá wɔ́ lɛ́á ɔ uwənú makɔlɔ́ ɔkɛaka ɔwá, nɔ ínə́níə́ nɔ sɛ́á bá lɛa nanákátɔ.»

¹²Bɔkɔ́nɛna bá ná hɔalɛ́na, bá ná ákáná ɔ bɛndɔ utúmbə́ləniə ɔwá bá mə́búə́ mabɛ́á sə́hə́kíníə́.

¹³Bá ka imbúínyi mɛbɛ́á miəŋí buləkə ɔ bɛndɔ, bá bɛnákɛnákɛ mooló fofokiə, bá bəə́bu niŋəsəkiə.

¹⁴Nɔ́yɛ́ Munəni á Əlóto a ka ɔ́kɔ́kɛna bá ndɔ hɛ́na ɛlɔ́áyɛ́ Yə́susu, nɛ́áyɛ́á niínyə nɛ́ úmə́kə. Bá laaka bá sɛ́á: «Á Yɔhánɛsɛ Mɔsɔabɛndɔ a ná hɔŋɔ́á, ɔ́ ɛlɔ́áyɛ́ nɔ́yɛ́ a lɛ́á na iŋgínə́ yɛ bisə́mə́tə́ ɔ ɔkɛa.»

¹⁵Bɔ́mɔtɛ́ bá laaka bá sɛ́á: «Á Ɛlíásɛ.» Bənə́bənə́ bá sɛ́á: «Wɔmɔtɛ́ mɔhɛ́nátɔtányɛ́ hɔ́ákátɔ́ ɔ bə́súə́ bɔhɛ́nátɔtányɛ́.»

¹⁶Mba ɛnaka Əlóto á ɔ́kɔ́kɛ́ná nɔ́yɛ́, a sɛ́á: «Yɛ́ɛ́yɛ́ Yɔhánɛsɛ ɔyɛ́á mɛ ná ɛmɛna húmbə́, wɛɛ́ya a ná hɔŋɔ́á əə́?»

¹⁷Ɔ taká, a ka Yɔhánɛsɛ halɛna, a ná wɛɛ́ya mɛsáŋa háá ɔ ɛbɔka bɔkɔasɛ́á, a ka Ɛlotiátɛ á muəndú wa wayɛ́á munísə́ á Filíbo bɛ́lɛ́na.

¹⁸Yɔhánɛsɛ a ka Əlóto lɛna a sɛ́á: «Umbə́ndə́ wɔ́ lɛ ndɔ laa ɔwá ɔ́ muəndú wa mɔnátɛ́á bɛ́lɛ́na.»

¹⁹Ɔ́ ɛlɔ́áyɛ́ nɔ́yɛ́ Əlotiátɛ a ná Yɔhánɛsɛ ɛbɛkɛ́ tə́tə́níníə́, mba, a sa óso ɔ nɔ́yɛ́ ɔkɛa,

²⁰Əlóto a ka bá a ndɔ Yɔhánɛsɛ kɔ́lɔ́ma, a manyaka ɔwá Yɔhánɛsɛ a lɛa mɔndɔ wataká, mɔnaŋanaŋa, a wɛɛ́ya híkə́kə. Nɔ́yɛ́ Əlóto a ka báá ə́lə́mə́nə́tɔ́ ikúílí tɛ́á ɔyɛ́á a ná bá a ndɔ ɔ́kɔ Yɔhánɛsɛ a ndɔ hɔ́ɔ́; a ka wɛɛ́ya ɔ́kɔ́kɛna na nɛhɔnɔ nikimə.

²¹Hinó hɛ́ nyɔnɔ hímotí hɛ́ ná ndáfama, ɛnaka Əlóto á ɛŋganda tíkə́ ɛlɔ́áyɛ́ yáyɛ́á ɛhanyɛhányɛ́, a ná baŋɛ́ŋa ɛ́lɛ́ákɛ́na, bisə́lúkú bɛ́ bɔkɔfɔnɛa na bəkúkə bá Kalɛ́lɛa.

²²Ɔmɔ́la wa Əlotiátɛ a ná fínə́ ɔ yanda yɛ́ məbínə́, a ná bínə́kə́ muɛsɛ ɔ nindínə́ ɔnɛ́á, máyɛ́á məbínə́ má ná Əlóto hikə́kíə́ na báyɛ́á bɛndɔ ɔbá a ná ɛ́lɛ́ákɛ́na ɔ ɛŋganda. Munəni a ná ɔmɔ́la lɛ́na a sɛ́á: «Batá mɛaŋɔ́á ata yatɛ́ ɔ ndɔ hikiə, mɛ ŋɔ aŋɔ́á yɛɛ́ta índiə.»

²³Nɔ́yɛ́, a ná bíkúmə́ a sɛ́á: «Ɔ taká ata yatɛ́ ɔyɛ́á ɔ ndɔ mɛaŋɔ́á bataka, mɛ ndɔ aŋɔ́á índiəkinə, ata ɛsalɛ yɛ́ nɛ́ámɛ́á nɛmanɛna.»

²⁴Nɔ́yɛ́ ɔmɔ́la a ná fámá ɔ niə́lətíə́, a ná inyə́ batá a sɛ́á: «Yatɛ́ mɛ batá əə́?» Inyə́ a sɛ́á: «Batá wɛɛ́ya á mɔlɔ́á wɔ́ Yɔhánɛsɛ.»

²⁵Tɔfá, a ná tilə́ á munəni busíə́, a sɛ́á: «Índíə́ mɛaŋɔ́á ɔ umisíúmə́ á mɔlɔ́á wɔ́ Yɔhánɛsɛ Mɔsɔabɛndɔ ɔ hɛndándámá.»

²⁶Munəni a ná busə́kə ɔkɔ, mba, ɛ́sɛ́á a ná bíkúmə́ ɔ busíə́ bɔ́ bɛndɔ ɔbá a ná ɛ́lɛ́ákɛ́na, yɛ́ sa bá ɔwá a saŋɔna.

²⁷Ɔ umisíúmə́, munəni a ná wɔmɔtɛ́ mɔkɔfɔnɛa lɔ́má na nɛmanɛna ɔwá, a mɔlɔ́á wɔ́ Yɔhánɛsɛ hulənə. Mɔkɔfɔnɛa a ná ká wɛɛ́ya mɔlɔ́á húmbə́ ɔ miímə yɛ ɛbɔka.

²⁸A ná muítə húlə́nə́ ɔ hɛndándámá, a ná índíə́ á ɔmɔ́la, ɔmɔ́la a ná kíndíə́ á inyə́.

²⁹Ɛnaka bɔkɔ́nɛna bá Yɔhánɛsɛ bá ɔ́kɔ́ nɔ́yɛ́, bá ná ká yáyɛ́á ikukulu ɛta, bá ná nyəə.

³⁰Ɛnaka basɔ́másɔma bá ndáhíáná ɔ ɛmɛ́ŋɛ́ yɛ Yə́susu, bá ná wɛɛ́ya bíkə́tə́kíníə́ bɛkɔa bikimə ɔbɛ́á bá ná kɛ́áká na ɔbɛ́á bá ná bɛndɔ úkúnə́kíə́.

³¹Yə́susu a ná bəə́bu lɛ́na a sɛ́á: «Nɔ́ sɔ́nɔ, tɔ́ ákáná ɔ makɔ́tákɛ, tɔ́ hɔtɛ́la.» A ka laa nɔ́yɛ́ bɔkɔasɛ́á, bɛndɔ bá ka báá bəəŋí: Báaba bá ákaka, bɔ́mɔtɛ́ bá ndasákɔ́ná ɔ nindínə́ ɔnɛ́á bɔkɔ́nɛna bá sa bá na ikúílí yɛ́ ɔnɛ́á.

³²Bá ná ákáná ɔ ɛbɔ́ka yɛ́ makɔ́tákɛ, bəə́bu bíbúə́ hata na bɛndɔ.

³³Ata nɔ́yɛ́, bɛndɔ bəəŋí bá ná bəə́bu siəkínə́ bá ndɔ kaakána, ɛnaka bá manyá bá sɛ́á nɔ́yɛ́, bá ná hɔalákɛ́ná mɔlɛ́lá ɔ bətínə́ bəkimə, bá ná taŋá ɔkafámá ɔ yɛ́táyɛ́ ɛbɔ́ka.

³⁴Ikúílí Yə́susu a ná fámá ɔ isóyí, a ná iloŋo yɛŋɛ́ŋa yɛ́ bɛndɔ yámá ɔ ɔsákɔna. Mahana má ná wɛɛ́ya itíə́ bɔkɔasɛ́á, bá ka báá ɛ́sɛ́á ɛndɔ́mbá yɛ́ ɛŋaná mɔkɛndana, a ná botólíə́ ɔ uwəbú uwukúniə bɛkɔa biəŋí.

³⁵Nɔ́yɛ́, ɛ́sɛ́á ikúílí yɛ́ ná bá tɔ́mbátɔ́, bɔkɔ́nɛna bá ná tɔ́mbálɛ́la ɔ ɔwayɛ́ ɛmɛ́ŋɛ́, bá sɛ́á: «Ɛbɔ́ka yɛ́ lɛa makɔ́tákɛ, ikúílí tɔ́na tɔ́mbátɔ.

³⁶Bulə́kə́ bááyɛ́ bɛndɔ ɔkɛaka ɔwá, bá ákáná ɔ bɛsábɛa na mambɛ́la má mamɛ́ŋɛ́, bá ká bɛ́labɔ́nɛ́á siə́kə.»

³⁷A ná bəə́bu lɛ́na a sɛ́á: «Nɔ́ bəə́bu lúkə́kə́ bənú bɛ́múɛ́tɛ́!» Bá ná wɛɛ́ya batá bá sɛ́á. «Ɔ ndɔ siə ɔwá tɔ ká bɛ́labɔ́nɛ́á ɔ́ndɔ́kɔ́ ná bɛbɔ́ɛ́yɛa bɛ́fandɛ́ bɛ́ bɛcácɔ́ mbá tɔ bəə́bu lúkə́kə́ əə́?»

³⁸A ná bəə́bu lɛ́na a sɛ́á: «Bɛbɛlɛ́tɛ bɛ́nɛ́á bɛ́ bənú lɛ́á əə́?» Nɔ́ kə́síə́línə! Ɛnaka bá kə́síə́línə, bá sɛ́á: «Bɛ́ lɛa bɛ́lánɔ na tuɔfɔ́ tɔ́fandɛ́.»

³⁹Mba, a ná bəə́bu manɛna ɔwá, bá bəə́bu tuənə́kíníə́ ɔ misí ɔ bimbí bimbí, ɔ tumbuəmbúə́ tuɔ́sɔ.

⁴⁰Bá ná tuənə́kínə ɔ bimbí bɛ́ ɛbɔ́ɛ́yɛa na moómo álánɔ má bɛndɔ.

⁴¹Yə́susu a ná bɛbɛlɛ́tɛ bɛ́lánɔ ɛtá na tuɔfɔ́ tɔ́fandɛ́, a ná məə́sə bə́líə́ ɔ ɔmbáŋá, a ná Huɛlɛ́ mohóloniə índíə́, a ná bɛbɛlɛ́tɛ bísə́kə́níə́, a ná índíə́ ɔ bɔkɔ́nɛna ɔwá bá afákɛ́ná ɔ bɛndɔ. A ná bəə́bu bəkimə tuɔfɔ́ tɔ́fandɛ́ áfákɛ́ná tɔ́na.

⁴²Bɛndɔ bəkimə bá ná nɛaka, bá ná íyəkə.

⁴³Bá ná bɛbɛ́sɛ́bɛsɛ bɛ́ bɛ́bɛlɛ́tɛ na tuɔfɔ́ kɔ́táka ɔbɛ́á bɛ́ ná tikənə, bá ná úndúsíə́ niómo nɛ́ bɛkana na bɛ́fandɛ́ mbíɔ́kɛ.

⁴⁴Ɔmbana wɔ́ bɛndɔ ɔbá bá ná bɛ́bɛlɛ́tɛ nɛ́áká, wɔ́ ka báá tukóló tɔ́lánɔ.

⁴⁵Əlimə yɛ ikúílí, Yə́susu a ná báyɛ́á bɔkɔ́nɛna fíníə́ ɔ isóyí, ɔkɛaka ɔwá bá buəkínə ɔ yííní ɛsɛ́lɛ́ yɛ́ nɔmɔ́ yɛ́ bətínə́ yɛ Bɛtɛsayíta, ikúílí ɔyɛ́á a tíkə́ bɛndɔ úluəsəkiə.

⁴⁶Ɛnaka á bəə́bu úlúə́sə́kíə́, a ná báláká ɔ ɔmáá ɔmbáŋá ɔ mabɛ́kálɛ́na.

⁴⁷Ɔ bɛkɔlakɔ́lá, isóyí yɛ́ ka báá ɔ ətíə́ yɛ nɔmɔ́; Yə́susu a ka báá wɛɛ́ya bíbúə́ ɔ ɛsɛ́lɛ́.

⁴⁸Ɛnaka Yə́susu á siəkínə́ bɔkɔ́nɛna bá ndɔ nɔa mɔŋɛ́ŋa ɔ mənífə́ ɔ ɔhɔsa bɔkɔasɛ́á, umbúínyi wɔ́ ka bá wɔ́ ndɔ húkə, wɔ́ húlə́kinə ɔ ɛbɔ́ka ɔyɛ́á bá ná báá ɔ ɔwákáka. Ɔ Ɛsɔ́mbalɛ́, a ná botólíə́ ɔ uwəbú ɔwɔŋgɔ, a kɛndaka ɔ mənífə́ ɔmbáŋá, a ka bá a sɛ́á a bəə́bu tɔmba.

⁴⁹Ɔ ikúílí bá ná wɛɛ́ya ɛ́ná a ndɔ kɛnda ɔ mənífə́ ɔmbáŋá, bá ná fɛká ɔwá ɛbatabalɛmba, bá ná botólíə́ ɔ miyə́mə́yə́mə́ ubə́liə.

⁵⁰Ɔ taká, bá ka báá bíndúmbúlə́lə́tɔ́ ɛnaka bá wɛɛ́ya yama. Mba ɔwayɛ́, ɔ umisíúmə́ a ná botólíə́ ɔ uwəbú ɔhɛ́na; a ná bəə́bu lɛ́na a sɛ́á: «Nɔ́ ɔ́nɛ́nɛ́na! Mɛaŋɔ́á, nɔ lɛ kɔlɔma.»

⁵¹A ná fínə́ ɔ uwəbú ɛ́mɛ́ŋɛ́ ɔ isóyí, umbúínyi wɔ́ ná nə́yə́níə́. Bɔkɔ́nɛna bá ná ə́lə́mə́nə́.

⁵²Ɔ taká, bá sa ɔ́kɔ ata bɔkɔa ɔwɔŋgɔkɔnɔ isə́mə́tə́ yɛ́ bɛ́bɛlɛ́tɛ, yə́búə́ mɛlɛ́má yɛ́ ka báá natákátɔ.

⁵³Ɛnaka Yə́susu na báyɛ́á bɔkɔ́nɛna bá nɔmɔ́ bíásɛ́na, bá ná káfámá ɔ misí yɛ Sɛnɛsalɛ́ta, bá ná yə́búə́ isóyí tínímíə́ ɔ ɛsɛ́lɛ́.

⁵⁴Ɛnaka bá tukínə, bɛndɔ bá ná manyá bá sɛ́á á Yə́susu.

⁵⁵Bá húlə́kə ɔ mɔnɔŋɔ məkimə, bá wɛɛ́ya bɛnákɛnákɛ húlə́kəninə túánákátɔ́ ɔ maaná ɔ ɛbɔ́ka ɔyɛ́á bá ná ɔ́kɔ́kɛ́na bá sɛ́á a báka.

⁵⁶Bɛbɔ́ka bikimə ɔbɛ́á a ná bá á ndɔ kafámá, ata ɔ bətínə́, ata ɔ mɔnɔŋɔ mbá ata ɔ bɛanda bɛ́ bɛtɔbɔtɔ́bɔ́, bɛndɔ bá bíə́búə́ bɛnákɛnákɛ húlə́kənə ɔ bɛbɔ́ka bikimə ɔhá bɛndɔ bá ndɔ kɔtana. Bá wɛɛ́ya bɛ́tɔ́kɔ́lɔkɛna bá sɛ́á á niása bátáyɛ́ bɛndɔ bá itíə́lə ata ɛnjá yɛ máyɛ́á maŋgɔmba. Nɔ́yɛ́, bəkimə ɔbá bá ná wɛɛ́ya bɛ́tɔ́mɛ́na, bá ka niŋəkə.