Read Tunen Mə́líkusu 8 Bible Online

Mə́líkusu 8 - Tunen bible

Mə́líkusu 8

¹Buɔsɛ́ bɔ́mɔtɛ́ ilúkunə yɛ́ bɛndɔ yɛ́ ná manyɔ́ kɔtakana. Bátáyɛ́ bɛndɔ bá sa báá na bɔ́labɔ́nɛ́á, Yə́susu a ná báyɛ́á bɔkɔ́nɛna ɛ́lɛ́ákɛ́na, a sɛ́á:

²«Mɛɛ́lɔ yɛ́ ndɔ mɛaŋɔ́á wə́ə́ ɛlɔ́áyɛ́ báaba bɛndɔ bɔkɔasɛ́á, ɔ́ tunó tɔ́lálɔ́ tɔ́ɔtɔ, tɔ lɛa ilúkunə na bəə́bu. Bá lɛ bá tɔ́na na bɔ́labɔ́nɛ́á.

³Ábá mɛ ná niása bá ná úlúə́kə́ mɛtaná, ɛkasɛ bá sá kɔakɔna ɔ ɛnɔ́mɛ bɔkɔasɛ́á, bɔ́mɔtɛ́ bá ná húlə́kínə́ hata.»

⁴Báyɛ́á bɔkɔ́nɛna bá sɛ́á: «Hə́ní ɛkasɛ tɔ́ bɛbɛlɛ́tɛ bɔ́ŋɛ́ná háha ɔ bɔtɛ́á mbá tɔ́ báaba bɛndɔ lúkə́kə́ bəkimə, bá nɛ́áká, bá nibíə́kínə əə́?»

⁵Yə́susu a ná bəə́bu batá a sɛ́á: «Bɛbɛlɛ́tɛ bɛ́nɛ́á bɛ́ bənú lɛ́á əə́?» Bá sɛ́á: «Bɛ́lɛ́ndɔ́lɔ́mɔnɔ.»

⁶Nɔ́yɛ́, a ná bɛndɔ tuənə́kíníə́ ɔ misí. A ná bɛbɛlɛ́tɛ bɛ́lɛ́ndɔ́lɔ́mɔnɔ ɛtá, a ná Huɛlɛ́ mohóloniə índíə́, a ná bɛɛ́ta bísə́kə́níə́, a ná índíə́ ɔ bɔkɔ́nɛna ɔkɛaka ɔwá bá bɛndɔ afákɛ́ná. Bá ná bəə́bu afákɛ́ná.

⁷Bá ka báá tɔ́na na tɛ́tɛ́á yɛ tuɔfɔ́, Yə́susu a ná tuɔfɔ́ yɔ́mɛ́na, a ná báyɛ́á bɔkɔ́nɛna lɛ́na ɔwá bá bɛndɔ afákɛ́na.

⁸Bátáyɛ́ bɛndɔ bá ná nɛaka, bá ná nibíə́kínə. Bɔkɔ́nɛna bá ná bɛbɛ́sɛ́bɛsɛ kɔtáka ɔbɛ́á bɛ́ ná tíkə́nə́kə; bá ná úndúsíə́ mbíɔ́kɛ bɛkana bɛ́lɛ́ndɔ́lɔ́mɔnɔ.

⁹Bɛndɔ ɔbá bá ná báá ɔmɔ́tɔ́yɛ́, bá ka báá hoóyi na tukóló túnisə. Əlimə yɛ nɔ́yɛ́, Yə́susu a ná bəə́bu úlúə́sə́kíə́.

¹⁰Ɔ umisíúmə́, a ná fínə́ ɔ isóyí na báyɛ́á bɔkɔ́nɛna, a ná ákáná ɔ nɛkɛ́tɛ nɛ́ misí yɛ Talamanúta.

¹¹Bɛfalísia bá ná ndáfámá, bá ná botólíə́ ɔ uwinyə́niə na Yə́susu, ɔkɛaka ɔwá bá wɛɛ́ya kɔsɔ́na, bá ná wɛɛ́ya batá ɔwá, a bəə́bu hɛŋgɛtɛ́nɛ́á hɛ́ yələ́mənə ínə́níə́ ɔhɛ́á hɛ́ ndɔ húlínə ɔ nɔɔ́mɛná.

¹²A ná fɔtálá mɔŋɛ́ŋa, a sɛ́á: «Ɛlɔ́áyɛ́ yatɛ́ bɛndɔ bá híihi hɛya bá ndɔ hɛŋgɛtɛ́nɛ́á hɛ́ yələ́mənə batɛna əə́? Ɔ taká, mɛ ndɔ bənú lɛna ɔwá, bɛndɔ bá híihi hɛya bá sɔ́ ŋɔ hɛŋgɛtɛ́nɛ́á hɛ́ yələ́mənə sinə ata hímotí.»

¹³Nɔ́yɛ́, a ná hɛ́kɛ́á na bəə́bu, a ná bálá ɔ isóyí, a ná ákáná ɔ yííní ɛsɛ́lɛ́.

¹⁴Bɔkɔ́nɛna bá ka fəliə ɔ bɛbɛlɛ́tɛ ɔwɛta, ɛmɔtɛ́ yɛ́ ná bəə́bu bá ɔ isóyí nuúmə́.

¹⁵Yə́susu a ná bəə́bu manɛ́na a sɛ́á: «Nɔ bɛ́tátáka! Nɔ́ bíkókósíə́ ɔ mətəkí má Bɛfalísia na má Əlóto.»

¹⁶Bɔkɔ́nɛna bá ná botólíə́ ɔ ɔlaa bəə́bu na bəə́bu bá sɛ́á: «A ndɔ hɔ́ɔ́ nɔ́yɛ́ bɔkɔasɛ́á tɔ lɛ báá na bɛbɛlɛ́tɛ.»

¹⁷Yə́susu a ná mányá nɔ́yɛ́, a sɛ́á: «Ɛlɔ́áyɛ́ yatɛ́ nɔ ndɔ hɔ́ɔ́ nɔ́yɛ́ bɔkɔasɛ́á tɔ lɛ báá na bɛbɛlɛ́tɛ əə́? Nɔ lɛ ndɔ ɔ́kɔ muɛsɛ, nɔ lɛ ndɔ manya; nɔ báka na mɛlɛ́má natákátɔ́ əə́?

¹⁸Nɔ báka na məə́sə, nɔ lɛ ndɔ sinənə əə́? Nɔ báka na məlúə́, nɔ lɛ ndɔ ɔ́kɔ́nɔ əə́?

¹⁹Bɛbɛlɛ́tɛ bɛ́lánɔ ɔbɛ́á mɛ ná bísə́kə́níə́ ɔ busíə́ bɔ́ tukóló tɔ́lánɔ tɔ́ bɛndɔ, bɛkana bɛ́nɛ́á bɛ́ ná úndúə́kə ɔ bɛbɛ́sɛ́bɛsɛ ɔbɛ́á nɔ ná kɔ́táka əə́?» Bá sɛ́á: «Niómo na bɛ́fandɛ́.»

²⁰A sɛ́á: «Ikúílí ɔyɛ́á mɛ ná bɛbɛlɛ́tɛ bɛ́lɛ́ndɔ́lɔ́mɔnɔ bísə́kə́níə́ ɔ busíə́ bɔ́ tukóló túnisə tɔ́ bɛndɔ, bɛkana bɛ́nɛ́á nɔ́ ná kɔ́táká na bɛbɛ́sɛ ɔbɛ́á bɛ́ ná tíkə́nə́kə əə́?» Bá sɛ́á: «Bɛ́lɛ́ndɔ́lɔ́mɔnɔ.»

²¹A sɛ́á: «Nɔ nana ɔ́kɔ́ əə́?»

²²Yə́susu na báyɛ́á bɔkɔ́nɛna bá ná káfámá ɔ Bɛtɛsayíta; bá ná wɛɛ́ya mundímə́ndímə húlə́ninə, bá ná wɛɛ́ya bɛ́tɔ́kɔ́lɛ́na ɔwá a wɛɛ́ya itíə́lə.

²³Ɛnaka á mundímə́ndímə itíə́ ɔ mɔkátá, a ná wɛɛ́ya fámána ɔ bɔnɔŋɔ. A ná malá tɛláka ɔ ɔwayɛ́ məə́sə, a ná wɛɛ́ya makátá talɛna, a ná wɛɛ́ya batá a sɛ́á: «Ɔ ndɔ bɔkɔa sinə əə́?»

²⁴Ɛnaka a məə́sə úbúnə́, a sɛ́á: «Mɛ ndɔ bɛndɔ sinə, mɛ ndɔ bəə́bu sinə ɛ́sɛ́á malɛ́á, mba, bá ndɔ kɛnda.»

²⁵Yə́susu a ná manyɔ́ makátá tála ɔ məə́sə, mɔndɔ a ná botólíə́ ɔ usinənə muɛsɛ; a ka niŋə, a siəkinə bikimə naŋátɔ.

²⁶Yə́susu a ná wɛɛ́ya tilə́síə́ ɔ ɔwayɛ́ ɔmbɛ́la a sɛ́á: «Ɔ lɛ fínə́ ata ɔ bɔnɔŋɔ.»

²⁷Yə́susu a ná ákáná na báyɛ́á bɔkɔ́nɛna ɔ mɔnɔŋɔ má ɛmɛ́ŋɛ́ ɔ Sɛsalɛ́ na Filíbo. Ɔ ɛnɔ́mɛ, a ná bəə́bu bata a sɛ́á: «Ɔ nɛlaka nɛ́ bɛndɔ, mɛaŋɔ́á ɛ́yánɛ́ əə́?»

²⁸Bá ná wɛɛ́ya lɛ́na bá sɛ́á: «Bɔ́mɔtɛ́ bɛndɔ bá sɛ́á aŋɔ́á Yɔhánɛsɛ Mɔsɔabɛndɔ, bɔ́mɔtɛ́ bá sɛ́á aŋɔ́á Ɛlíásɛ, bɔ́mɔtɛ́ tɔ́na bá sɛ́á aŋɔ́á wɔmɔtɛ́ Mɔhɛ́nátɔtányɛ́.»

²⁹Yə́susu a ná bəə́bu batá a sɛ́á: «Mba uwənú, nɔ sɛ́á mɛaŋɔ́á ɛ́yánɛ́ əə́?» Bíə́lə a sɛ́á: «Aŋɔá ɔ lɛ́á Mɛ́sia.»

³⁰Nɔ́yɛ́, Yə́susu a ná bəə́bu manɛ́ná ɔwá bá lɛ bɔ́táyɛ́ bɔkɔa lɛɛ́na ata mɔndɔ.

³¹Əlimə yɛ nɔ́yɛ́, Yə́susu a ná botólíə́ ɔ uwəbú uwukúniə, a sɛ́á: «Yɛ́ ná hɔ́ánána ɔwá, Mɔná wa mɔndɔ á məsə́kə ɔkɔ́kɛ́ná mɔŋɛ́ŋa; bisə́lúkú bɛ́ Bɛyútɛnɛ, bisə́lúkú bɛ́ bətitiəmahánɛna na bamanyumbə́ndə́ bəkimə bá ŋɔ wɛɛ́ya bɛ́sáŋɔ́na, ɔwá a lɛ bá hɔ́ánánátɔ́ ɔ ɔnɔmɔ, bá wɛɛ́ya ɔnɔkɔ, mba, ɔ tunó tɔ́lálɔ́, a ŋɔ hɔŋɔa.»

³²A ka bá a ndɔ bəə́bu bɛ́táyɛ́ bɛkɔa lɛna ɔ mianyɔ́. Bíə́lə a ná wɛɛ́ya bísúə́línə ɔ ɛmɛ́ŋɛ́, a ná botólíə́ ɔ ɔwayɛ́ ɔsɔ́kɔ́nɛna na bɛtambá.

³³Nɔ́yɛ́, Yə́susu a ná bɛkɔŋɔna, a ná báyɛ́á bɔkɔ́nɛna siəlínə, a ná Bíə́lə bámálɛ́na a sɛ́á: «Hɔalɛ́na ɔ ɔwámɛ busíə́ á Sátana! Máwɔ́á mabɛ́kɔ́lɔmɔna má lɛ báá má Huɛlɛ́, mba, má bɛndɔ.»

³⁴A ná bilúkunə na báyɛ́á bɔkɔ́nɛna ɛ́lɛ́ákɛ́na, a sɛ́á: «Ábá mɔndɔ a ndɔ siə ɔ ɔwámɛ ɔwɔŋgɔ, á bɛ́sáŋɔ́ná wɛɛ́ya bɛ́múɛ́tɛ́, á wə́yíə́ ɔmbásá túáná, á mɛaŋɔ́á ɔ́ŋgɔ́kɔ.

³⁵Yɛ́ lɛa ɔwá, ábá mɔndɔ a ndɔ hikiə ɔ bɔ́áyɛ́á buɔmɔ́ usuŋəniə, a ŋɔ bɔɛ́ta nímə́siə; mɔndɔ mukimə ɔwá a ŋɔ bɔ́áyɛ́á buɔmɔ́ nímə́siə ɛlɔ́áyɛ́ ámɛ na ɛlɔ́áyɛ́ Imbə́nú Yɛɛsɛ, a ŋɔ bá na buɔmɔ́ bɔ́ ikúílíə́kimə.

³⁶Yatɛ́ mɔsɛ́ŋɛ́ mɔndɔ a ndɔ kusənə ɛlɔ́áyɛ́ nɛbɔ́ŋɔ nɛ́ misí mikimə ukusənə mbá a ná bɔ́áyɛ́á buɔmɔ́ nímə́síə́ əə́?

³⁷Yatɛ́ mɔndɔ a óso uwíndiə ɔkɛaka ɔwá a bɔ́áyɛ́á buɔmɔ́ háŋɔ́ná əə́?

³⁸Ábá mɔndɔ a ndɔ ɛsɛ́má ɔ́kɔ ɛlɔ́áyɛ́ ámɛ na bɛ́ámɛ́á bɛtambá ɔ ətíə́ yɛ́ bɛndɔ bá yɛ́ɛyɛ ɛnyɔŋɔnɔ, Mɔná wa mɔndɔ a ŋɔ bá na ɛsɛ́má ɛ́lɔ́áyɛ́ ayɛ́ ikúílí ɔyɛ́á a ŋɔ ndahíáná na tuúmə tɔ́ yayɛ́á isə́ iŋgində́ na Bɛáŋgɛlɛ bɛnaŋanaŋa.»