Read Tunen Mə́líkusu 9 Bible Online

Mə́líkusu 9 - Tunen bible

Mə́líkusu 9

¹Yə́susu a ná bəə́bú lɛná tɔ́na a sɛ́á: «Ɔ taká, bɛndɔ ɔbá bá lɛ́á háha, bɔ́mɔtɛ́ bá sa ndə́wə́ə́ ɛŋaná usinə nəníə́ Huɛlɛ́ a ndɔ manɛna na iŋgínə́ yikimə.»

²Ɔ əlimə yɛ́ mɔɔsɛ́ málɛ́ndálɔ, Yə́susu á ná Bíə́lə, Yákɔbɔ na Yɔhánɛsɛ ákánáná ɔ ɔmáá ɔmbáŋá hata na bɛndɔ. A ná bíhə́ŋə́tə ɔ uwəbú busíə́.

³Bɛ́áyɛ́á bɛlɛŋa bɛ́ ná botólíə́ ɔ ɔnɔma mɔŋɛ́ŋa, bɛ́ mɔanyɛmaka, bɛ́ ka báá naŋákátɔ́ ɔ nindínə́ ɔnɛ́á, ata mɔndɔ ɔmɔtɛ́ ɔ misí a sa bá ɔwá a bɛɛ́ta nəŋə́síə́ nɔ́yɛ́.

⁴Ɔ yɛ́táyɛ́ ikúílí, báyɛ́á bɔkɔ́nɛna bálálɔ́ bá ná Ɛlíásɛ na Mósisi ɛ́ná ɔ ɛŋgamɔ́ na wɛɛ́ya.

⁵Mba, Bíə́lə a ná Yə́susu lɛ́na a sɛ́á: «Á Isə́lúkú, yɛ́ lɛa muɛsɛ ɔwá tɔ túə́nə́ háha. Ɛkasɛ tɔ́ bɛanda falábáká bɛ́lálɔ́: Yáwɔ ɛ́mɔtɛ́, yɛ́ Mósisi ɛ́mɔtɛ́, yɛ́ Ɛlíásɛ ɛ́mɔtɛ́.»

⁶A sa bá a ndɔ manya yatɛ́ a ndɔ laa bɔkɔasɛ́á, bɔ́táyɛ́ bɔkɔa bɔ́ ka bá bɔ́ ndɔ bəə́bu kúlúmiə.

⁷Ɛlɔndɔ́ yɛ́ ná bəə́bu huə, ɔ ɛlɔndɔ́ nuúmə́, bá ná nióni ɔ́kɔ́ nɛ́ ndɔ laa nɛ́ sɛ́á: «Wɔ́ɔwɔ a lɛa wamɛ́á Mɔná wuhikiə. Nɔ́ wɛɛ́ya ɔ́kɔ́kɛ́nɛ́na.»

⁸Ɔ umisíúmə́, bɔkɔ́nɛna bá ná bɛ́híámɛ́la, bá lɛ sinə́ tɔ́na ata mɔndɔ, ɔ́maná bəə́bu na Yə́susu.

⁹Ikúílí bá ná báá ɔ ɔlɔɔkɔ ɔ ɔmáá, Yə́susu a ná bəə́bu manɛ́na a sɛ́á: «Nɔ lɛ mɔndɔ lɛ́na yatɛ́ ɔyɛ́á nɔ na siəkínə ɔkafámáká ɔ ikúílí ɔyɛ́á Mɔná wa mɔndɔ a ŋɔ hɔŋɔa ɔ ətíə́ yɛ bəwə́nú.»

¹⁰Bá ná bɔ́táyɛ́ bɔkɔa tə́tə́níə́, bá bɛ́bátaka bəə́bu na bəə́bu bá sɛ́á: «Yatɛ́ yɛ́ lɛ́á ɔhɔŋɔa ɔ ətíə́ yɛ bəwə́nú əə́?»

¹¹Bá ná wɛɛ́ya batá bá sɛ́á: «Ɛlɔ́áyɛ́ yatɛ́ bətilə imbə́ndə́ bá ndɔ əbú laa ɔwá, Ɛlíásɛ a ŋɔ taŋa ndasá ubusíə́ na Mɛ́sia əə́?»

¹²Mba, Yə́susu a sɛ́á: «Yɛ́ báka ɔwá, Ɛlíásɛ a ŋɔ taŋa ɔ ndasá ɔ bɛkɔa bikimə utikəlinə. Mba, ɛlɔ́áyɛ́ yatɛ́ Mətilə má ndɔ laa tɔ́na ɔwá, Mɔná wa mɔndɔ a ŋɔ məsə́kə siəkinə mɔŋɛ́ŋa, bɛndɔ bá ŋɔ wɛɛ́ya yaŋɔnakɛna əə́?

¹³Mba ɔwámɛ, mɛ ndɔ bənú lɛna mɛ sɛ́á: Ɛlíásɛ a ka ndasá, bɛndɔ bá ná wɛɛ́ya bɛ́kɛ́ákɛ́na ɛ́sɛ́á bá ná əbú hikə́kíə́. Nɔ́yɛ́, Mətilə má ndɔ laa ɔ ɔwayɛ́ ɛsalɛ.»

¹⁴Ɛnaka bá ndáfámá hoóyi na bɔ́mɔtɛ́ bɔkɔ́nɛna, bá ná ilúkunə yɛŋɛ́ŋa yámá yɛ́ nɔ́ bəə́bu nɛŋɛlɛna, na bamanyumbə́ndə́ ɔbá bá ná tə́ŋə́kə́níə́ na bəə́bu.

¹⁵Ɛnaka bɛndɔ bá Yə́susu yámá, bəkimə bá ná ə́lə́mə́nə́ mɔŋɛ́ŋa, bá ná káhɔ́álákɛ́na ɔ ɔwayɛ́ ɔ ndəbíhólíə́.

¹⁶Yə́susu a ná báyɛ́á bɔkɔ́nɛna batá a sɛ́á: «Yatɛ́ nɔ́ ná bá nɔ ndɔ tə́ŋə́niə na bəə́bu əə́?»

¹⁷Ɔ ətíə́ yɛ ilúkunə, wɔmɔtɛ́ a ná wɛɛ́ya bíhíə́níníə́ a sɛ́á: «Á Isə́lúkú, mɛ ná aŋɔ́á wamɛ́á mɔná húlə́nínə ɔwá umbúínyi mɔbɛ́á wɔ́ ndɔ tuŋulə, wɔ́ wɛɛ́ya halɛ́na, wɔ́ wɛɛ́ya híə́nəsiə imúkú.

¹⁸Ata hə́níə́ umbúínyi mɔbɛ́á wɔ́ ná wɛɛ́ya halɛ́na, wɔ́ wɛɛ́ya omboko ɔ misí, ihúísí yɛ́ mɔná fámáka ɔ munuə, a bɛka kótóko, a sata. Mɛ ná báwɔ́á bɔkɔ́nɛna batá ɔwá bá muítə bulə́, mba, bá sa óso.»

¹⁹Yə́susu a sɛ́á: «Á bɛndɔ bá ɛŋaná ilumininə! Mɛ ŋɔ bámɛnɛna na bənú tɔ́na ɔkafámáká ɔ uyə́níə́ ikúílí əə́? Ɔkafámáká ɔ uyə́níə́ ikúílí mɛ́ ŋɔ bənú ísə́biniə əə́? Nɔ́ mɛaŋɔ́á wɛɛ́ya húlə́nínə́ háha.»

²⁰Bá ná yɛ́ɛ́yɛ́ ikúílí wɛɛ́ya hulənə. Ɛnaka umbúínyi wɔ́ Yə́susu yámá, wɔ́ ná mɔná fúkə́lə́ na iŋgínə́, a ná kɔ́á ɔ misí, a bíbúŋúləkə, ihúísí yɛ́ ná úndúə́ ɔ munuə.

²¹Yə́susu a ná isə́ batá a sɛ́á: «Á ánɛ́á niɔfɛ́nɛ a ná lúmə́ ɔ nɔ́yɛ́ ɔkɛa əə́?» Isə́ a sɛ́á: «Ɔ botolokiə ɔ ɔwayɛ́ bɔtɛ́tɛ́á bukimə.

²²Ɔ yɛ́mɔtɛ́ ikúílí, umbúínyi mɔbɛ́á wɔ́ wɛɛ́ya omboko ɔ hiwə ata ɔ mənífə́ ɔkɛaka ɔwá wɔ́ wɛɛ́ya ɔnɔ. Mba, wə́ə́ bəsú mahana, ɔ ndá bəsú ɔ́lɔ́ ábá ɔ ndɔ ósóko!»

²³Yə́susu a sɛ́á: «Ɔ ndɔ laa ɔwá ábá ɔ ndɔ ósóko. Ata bɔkɔa bɔ́mɔtɛ́ bɔ́ sa ósó ɔ wɛ́ɛ́yɛ́ ɔyáyɛ́na ɔwá a ndɔ lumininə.»

²⁴Isə́ yɛ mɔná a ná yə́mə́ a sɛ́á: «Ɔ́lɔ́ mɛaŋɔ́á, mɛ lɛ ndɔ óso ulumininə.»

²⁵Yə́susu a ná yámá ɔwá, ilúkunə yɛ́ ndɔ bɛ́nya, a ná umbúínyi mɔbɛ́á bámálɛ́na a sɛ́á: «Ɔwáwɔ á umbúínyi wɔ́ ɛndɔ́kɔ́ na imúkú, mɛ ndɔ aŋɔ́á manɛna, fáma á wɔ́ɔwɔ mɔná mɛɛ́lɔ, ɔ lɛ ndahíáná tɔ́na ɔ umə́.»

²⁶Umbúínyi mɔbɛ́á wɔ́ ná fámá na miyə́mə́yə́mə́, wɔ́ ná mɔná fúkə́lə́ mɔŋɛ́ŋa, a ná híáná ɛ́sɛ́á iwə́wə́ ɔ nindínə́ ɔnɛ́á, bɛndɔ bəəŋí bá sɛ́á: «A lɛa wə́ə́tɔ.»

²⁷Mba, Yə́susu a ná wɛɛ́ya itíə́ ɔ mɔkátá, a ná wɛɛ́ya huəlíníə́, mɔná a ná tɛnɛma.

²⁸Ɛnaka Yə́susu á híánáka ɔ ɔmbɛ́la, báyɛ́á bɔkɔ́nɛna bá ná wɛɛ́ya batá bá sɛ́á: «Ɛlɔ́áyɛ́ yatɛ́ tɔ́ sa óso ɔ wútə́yí umbúínyi mɔbɛ́á ubulə əə́?»

²⁹Yə́susu a sɛ́á: «Ɔ́maná na mabɛ́kálɛ́na bá óso ɔ yɛ́táyɛ́ ɛnya yɛ umbúínyi ufə́miə.»

³⁰Bá ná hɔalɛ́na ɔmɔ́tɔ́yɛ́, bá ná tɔ́mbáká ɔ Kalɛ́lɛa. Yə́susu a sa bá a ndɔ hikiə ɔwá bɛndɔ bá manyá ɔ ɛbɔ́ka ɔyɛ́á a lɛ́á.

³¹Ɔ taká, a ka bá a ndɔ báyɛ́á bɔkɔ́nɛna úkúniə, a sɛ́á: «Bá ŋɔ Mɔná wa mɔndɔ sɛmɛna ɔ bɛndɔ, bá ŋɔ wɛɛ́ya ɔ́nɔ́kɔ, mba əlimə yɛ mɔɔsɛ́ málálɔ́, a ŋɔ hɔŋɔa.»

³²Bá sa binífúnínə́ bɛ́ bɛ́táyɛ́ bɛtambá ɔ́kɔ; bá kɔ́lɔ́maka ɔ ɔwayɛ́ ɔbata.

³³Bá ná ákáná ɔ Kabɛlɛnawúmu. Bəə́bu ɔmɔ́tɔ́yɛ́ ɔ miímə nuúmə́, Yə́susu a ná bəə́bu batá a sɛ́á: «Yatɛ́ nɔ ná bá nɔ ndɔ tə́ŋə́niə ɔ ɛnɔ́mɛ əə́?»

³⁴Bá ná nə́yə́níə́ bɔkɔasɛ́á, ɔ ɛnɔ́mɛ bá ná tə́ŋə́kə́níə́ ɔkɛaka ɔwá, bá manyá ɛ́yánɛ́ a lɛ́á mɔŋɛ́ŋa ɔ uwəbú ətíə́.

³⁵Nɔ́yɛ́, Yə́susu a ná túə́nə ɔ misí, a ná niómo na báfandɛ́ ɛ́lɛ́ná, a sɛ́á: «Ábá mɔndɔ a ndɔ siə ɔbáá wəbusíə́, á bámɛ́nɛ́ná wənitifə́, mɔnyɛna tɔ́na wa bəkimə.»

³⁶A ná mɔná mɔtɛ́tɛ́á tínímíə́ ɔ uwəbú ətíə́, a ná wɛɛ́ya túáná ɔ makátá, a ná bəə́bu lɛ́na a sɛ́á:

³⁷«Wɛ́ɛ́yɛ́ ɔwá a ŋɔ mɔná káha ɛ́sɛ́á wɔ́ɔwɔ ɔ ɔwámɛ niínyə, ɔ ɔwámɛ bɛ́múɛ́tɛ́ a ná kaha; wɛ́ɛ́yɛ́ ɔwá a ŋɔ mɛaŋɔ́á káha muɛsɛ, tátá ɔ ɔwámɛ bíbúə́ a ná káhá, mba, ɔ wɛ́ɛ́yɛ́ ɔwá a ná mɛaŋɔ́á lɔma.»

³⁸Yɔhánɛsɛ a ná Yə́susu lɛ́na a sɛ́á: «Á Isə́lúkú, tɔ ná mɔndɔ siəkínə a ndɔ imbúínyi mɛbɛ́á bulə ɔ ɔwáwɔ niínyə; tɔ ná wɛɛ́ya sáŋɔnɛ́ná ɔ nɔ́yɛ́ ɔkɛa bɔkɔasɛ́á, a lɛ báá wa yə́súə́ ilúkunə.»

³⁹Mba Yə́susu a sɛ́á: «Nɔ lɛ wɛɛ́ya kotíə́ ɔ nɔ́yɛ́ ɔkɛa bɔkɔasɛ́á, mɔndɔ a sa ósó ɔ yələ́mənə yɛ́ bɔkɔa ɔkɛa ɔ ɔwámɛ niínyə, a manyɔ híána ɔ ɔwámɛ ɔbánya.

⁴⁰Yɛ́ báka ɔwá mɔndɔ ɔwá a sá bəsú ɛ́ŋɛ́mana, a lɛa na bəsú.

⁴¹Wɛ́ɛ́yɛ́ tɔ́na ɔwá a ŋɔ bənú mənífə́ nyə́siə ɔ ɔwámɛ niínyə bɔkɔasɛ́á, nɔ lɛa bɛndɔ bá ilúkunə yɛ́ Kilísitusu, ɔ taká, mɛ ndɔ bənú lɛna, a ŋɔ wə́yíə́ mɔsábɔ́náná kusənə.»

⁴²Wɛ́ɛ́yɛ́ ɔwá a ŋɔ ɔmɔtɛ́ ɔ mɔtɛ́tɛ́á wa bááyɛ́ ɔbá bá ndɔ lumininə kuəsiə, yɛ́ lɛa muɛsɛ ɔwá, bá wɛɛ́ya muɔkɔ mɔŋɛ́ŋa ɔ́lɔ́kɔ́kɛ́na ɔ ɛmɛna, bá wɛɛ́ya əmbinə ɔ nɔmɔ́ nuúmə́.

⁴³Ɛ́bá mɔkátá wɔ́ ndɔ aŋɔ́á ákánana ɔ bɔbɛ́á, húmbə́ muítə; Yɛ́ lɛa muɛsɛ ɔwá ɔ fínə́ ɔ buɔmɔ́ bɔ́ ikúílíə́kimə mɔkátá úmotí yáyɛ́ná ɔwá, ɔ fínə́ na makátá məkimə ɔ hɛfɛa hɛ́ hiwə ɔhɛ́á hɛ́ sa ndə́nimə.

⁴⁴[Ɔ ɛbɔ́ka ɔyɛ́á mɛsíɔ́ŋɛ́ yɛ́ ndɔ mɛɛ́lɔ nɛ́á, yɛ́ lɛ wə́ə́, abáka hiwə hɛ́ lɛ nimə].

⁴⁵Ɛ́bá mɔkɔlɔ́ wɔ́ ndɔ aŋɔ́á ákánana ɔ bɔbɛ́á, sɔ́mbá muítə; yɛ́ lɛa muɛsɛ ɔwá ɔ fínə́ yaáta ɔ buɔmɔ́ bɔ́ ikúílíə́kimə, yáyɛ́ná ɔwá ɔ fínə́ na makɔlɔ́ məkimə ɔ hiwə ɔhɛ́á hɛ́ sa ndə́nimə.

⁴⁶[Ɔ ɛbɔ́ka ɔyɛ́á mɛsíɔ́ŋɛ́ yɛ́ ndɔ mɛɛ́lɔ nɛ́á yɛ́ lɛ wə́ə́, abáka hiwə hɛ́ lɛ nimə].[2]

⁴⁷Hɔ́ánánátɔ́ tɔ́na, ɛ́bá nɛ́áwɔ́á niísə nɛ́ ndɔ aŋɔ́á ákánana ɔ bɔbɛ́á, sáná nɛɛ́ta. Yɛ́ lɛa muɛsɛ ɔwá ɔ fínə́ ɔ nɛmanɛna nɛ́ nɔɔ́mɛná na niísə nɛ́mɔtɛ́, yáyɛ́na ɔwá, ɔ fínə́ ɔ hiwə hɛ́ ikúílíə́kimə na məə́sə áfandɛ́,

⁴⁸ɔ ɛbɔ́ka ɔyɛ́á mɔsíɔ́ŋɛ́ wɔ́ lɛ ndɔ wə́ə́ tɔ́na hiwə hɛ́ lɛ ndɔ nímə.

⁴⁹Hiwə hɛ́ ŋɔ mɔndɔ mukimə tábɔ́naka ɛ́sɛ́á ibusə́ yɛ́ ndɔ bɛ́labɔ́nɛ́á tábɔ́na.

⁵⁰Ibusə́ yɛ́ lɛa bɔɔ́la buɛsɛ, ɛ́bá ibusə́ yɛ́ ná sɔnɔ́á, yɛ́ lɛ siomo, nəníə́ bá ŋɔ óso ɔ yɛɛ́ta usiomosiə əə́? Nɔ́ báá na məsiomo má ibusə́, nɔ́ niŋə́kə́ ɔ bumbə́nú bənú na bənú.