Read Tunen Lúkasɛ 10 Bible Online

Lúkasɛ 10 - Tunen bible

Lúkasɛ 10

¹Əlimə yɛ nɔ́yɛ́, Isə́lúkú a ná manyɔ́ tɛ́fa moómo álɛ́ndɔ́lɔ́mɔnɔ na báfandɛ́ má bɔkɔ́nɛna, a ná bəə́bu lɔ́má báfandɛ́ báfandɛ́ ɔ bətínə́ bəkimə na ɔ bɛbɔ́ka bikimə ɔbɛ́á a ŋɔ ákána wɛɛ́ya bɛ́múɛ́tɛ́.

²A ná bəə́bu lɛ́na a sɛ́á: «Məhuə má lɛa maŋɛ́ŋa, mba bɔnyɛna bá lɛa batɛ́tɛ́á. Nɔ́ Isə́lúkú yɛ məhuə bɛ́tɔ́kɔ́lɔ́kɛ́na nə́ə ɔkɛaka ɔwá, a bɔnyɛna lɔ́má ɔ ɔwayɛ́ məhuə.»

³Nɔ́ ákana! Mɛ ndɔ bənú lɔ́ma ɛ́sɛ́á tɔndɔ́mbándɔ́mbá ɔ ətíə́ yɛ bɛŋgaŋgɔ́á.

⁴Nɔ lɛ ɛtá ata hɛmbalambálá hɛ́ bɛcácɔ́, ɔmbalá wɔ́ mɔkɛnda mbá ata bɛtafɛ́ná, nɔ lɛ bíhólíə́ ata mɔndɔ ɔ ɛnɔ́mɛ.

⁵Ata ɔ́ uyə́níə́ miímə nɔ ŋɔ fínə, nɔ taŋa ɔlaa nɔ sɛ́á: «Bumbə́nú bɔ́ báá ɔ yɛ́ɛyɛ miímə.»

⁶Ábá mɔndɔ wa bumbə́nú a ndɔ tuənə ɔmɔ́tɔ́yɛ́, a ŋɔ búə́núə́ bumbə́nú kusənə; yɛ́ sá báá nɔ́yɛ́, nɔ́ búə́núə́ bumbə́nú bísúə́línə.

⁷Nɔ́ tuə́nə ɔ mɛ́táyɛ́ miímə, nɔ́ nɛaka, nɔ́ nyákɛ́ná yatɛ́ ɔyɛ́á bá ŋɔ bənú índiə bɔkɔasɛ́á, mɔnyɛna a lɛa hɔ́ánánátɔ́ ɔ wə́yíə́ mɔsábɔ́náná ukusənə; nɔ lɛ fínə́ ata ɔ́ uyə́níə́ miímə.

⁸Ata uyə́níə́ bətínə́ nɔ ŋɔ fínə, ábá bɛndɔ bá ná bənú káhá, nɔ́ nɛ́áká yatɛ́ ɔyɛ́á bá ŋɔ bənú índiə.

⁹Nɔ́ bɛnákɛnákɛ bá yɛ́ɛ́yɛ́ bətínə́ níŋə́sə́kíə́, nɔ́ bááyɛ́ bɛndɔ lɛ́na nɔ sɛ́á: «Nɛmanɛna nɛ́ Huɛlɛ́ nɛ́ ná ndáfámá hoóyi na bənú.»

¹⁰Mba, ata uyə́níə́ bətínə́ nɔ ŋɔ fínə, ábá bɛndɔ bá sá bənú káha, nɔ́ ákáná ɔwayɛ́ maháná, nɔ́ láá nɔ sɛ́á:

¹¹«Ata umbunə́ wɔ́ yənúə́ bətínə́ ɔwá wɔ́ ná lábɛ́ná ɔ uwəsú makɔlɔ́, tɔ ndɔ bənú muítə híə́niniə, mba, nɔ́yɛ́ nɔ manyá ɔwá: Nɛmanɛna nɛ́ Huɛlɛ́ nɛ́ ná ndáfama.»

¹²Mɛ ndɔ bənú lɛna ɔwá, ɔ buɔsɛ́ bɔ́ nitifə́ Huɛlɛ́ a ŋɔ yɛ́táyɛ́ bətínə́ kə́lə́səkiə yáyɛ́na bɛndɔ bá Sótomo.

¹³«Ɛmɔ́kɛ́ na bənú á bɛndɔ bá Kolasínə! Ɛmɔ́kɛ́ na bənú á bɛndɔ bá Bɛtɛsayíta! Ɔ taká, bisə́mə́tə́ ɔbɛ́á Huɛlɛ́ a ná kɛ́áka ɔ uwənú ətíə́, ata a bɛɛ́ta kɛaka ɔ bətínə́ yɛ Tília na yɛ Sítono, há buɔnɔ́ bá ná mɛlɛ́má kɔŋɔna, bá fíə́kinə ɔ bulíkə́, bá bɛ́sɛ́kɛ́laka tɔ́na ɔ misí na malɛlá.

¹⁴Ɛlɔ́áyɛ́ nɔ́yɛ́, ɔ buɔsɛ́ bɔ́ nitifə́, Huɛlɛ́ a ŋɔ bənú kə́lə́səkiə yáyɛ́na bətínə́ yɛ Tília na yɛ Sítono.

¹⁵Uwənú tɔ́na, á bɛndɔ bá Kafalanahúmu, nɔ ndɔ fɛka ɔwá, bá ŋɔ bənú bə́líə́ ɔkafámáká ɔ nɔɔ́mɛná əə́? Bá ŋɔ bənú lolosolsiə ɔkafámáká ɔ misí yɛ́ bəwə́nú.»

¹⁶Yə́susu a ná báyɛ́á bɔkɔ́nɛna lɛ́na a sɛ́á: «Wɛ́ɛ́yɛ́ ɔwá a ndɔ bənú ɔ́kɛ́na, a ndɔ mɛaŋɔ́á ɔ́kɛ́na; wɛ́ɛ́yɛ́ ɔwá a ndɔ bənú bɛ́sáŋɔna, a ndɔ mɛaŋɔ́á bɛ́sáŋɔna, ɔwá a ndɔ mɛaŋɔ́á bɛ́sáŋɔna, a ndɔ wɛ́ɛ́yɛ́ bɛ́sáŋɔna ɔwá a ná mɛaŋɔ́á lɔma.»

¹⁷Moómo álɛ́ndɔ́lɔ́mɔnɔ na báfandɛ́ má bɔkɔ́nɛna bá ná kə́tílə́ na nɛhɔnɔ, bá sɛ́á: «Á Isə́lúkú, ata imbúínyi mɛbɛ́á yɛ́ ndɔ bəsú ɔ́kɛ́na ɔ ɔwáwɔ niínyə!»

¹⁸Yə́susu a sɛ́á: «Mɛ ná bá mɛ ndɔ Sátana sinə a ndɔ húlínə ɔ nɔɔ́mɛná, a kɔakɔna ɛ́sɛ́á ɛmɔanyama.

¹⁹Nɔ́ ɔ́kɔ́kɛ́na! Mɛ ná bənú iŋgínə́ índíə́ ɔ kɛaka ɔwá nɔ́ miáhɔ, bɛŋɛŋá na injiŋə yikimə yɛ mubəniə tafáka ata bɔkɔa bɔbɛ́á bɔ́mɔtɛ́ bɔ́ sɔ́ ŋɔ bənú kɛa.

²⁰Mba nɔ́yɛ́, nɔ lɛ bílə́nə́ bɔkɔasɛ́á imbúínyi mɛbɛ́á yɛ́ ndɔ bənú ɔ́kɛ́na; nɔ́ bílə́nə́kə́ ɔbánɔ́ ɔwá, Huɛlɛ́ a ná mə́núə́ məə́nyə tilə́kə́ ɔ nɔɔ́mɛná.»

²¹Ɔ umisíumə́, Yə́susu a ná úndúə́ na nɛhɔnɔ nɛ́ Umbúínyi Mɔnaŋanaŋa, a ná yə́mə́ a sɛ́á: «Á Isə́, á Isə́lúkú yɛ nɔɔ́mɛná na misí, mɛ ndɔ aŋɔ́á nyama ɛ́sɛ́á ɔ ná bɛɛ́bɛ bɛkɔa bítə́ ɔ bɛ́manya na bɛ́ŋgɛ́lɛ́, ɛ́sɛ́á ɔ ná mənyə́síə́ ɔ batɛ́tɛ́á. Ɛ́ɛ! Á Isə́, nɔ́yɛ́ ɔ́ ná híkə́kíə́ na wə́wúə́ mɔlɛ́má muɛsɛ.»

²²«Yamɛ́á Isə́ a ka mɛaŋɔ́á bɛkɔa bikimə niasɛna. Ata mɔndɔ a lɛ ndɔ manya ɛ́yánɛ́ a lɛ́á Mɔná, yɛ́ sá báá á Isə́; ata mɔndɔ a lɛ ndɔ manya ɛ́yánɛ́ á lɛ́á Isə́, yɛ́ sá báá á Mɔná, na bááyɛ́ ɔbá Mɔná a ná hikə́kíə́ ɔwá a bəə́bu nɔ́yɛ́ mə́nyə́síə́.»

²³Nɔ́yɛ́, Yə́susu a ná báyɛ́á bɔkɔ́nɛna bɛ́híámɛ́la; a ná lɛ́na uwəbú bíbúə́ a sɛ́á: «Nɛhɔnɔ na məə́sə ɔmá má ndɔ sinə yatɛ́ ɔyɛ́á nɔ ndɔ sinə!

²⁴Ɔ taká, mɛ ndɔ bənú lɛna ɔwá, Bɔhɛ́nátɔtányɛ́ bəəŋí na bisə́lúkú biəŋí bá ka siəkə usinə yatɛ́ ɔyɛ́á nɔ ndɔ sinə, mba, bá sa nɔ́yɛ́ sinə, ɔ ɔwɔ́kɔ yatɛ́ ɔyɛ́á nɔ ndɔ ɔ́kɔ́, mba, bá sa nɔ́yɛ́ ɔ́kɔ.»

²⁵Ɔ yɛ́táyɛ́ ikúílí, wɔmɔtɛ́ mɔmanyumbə́ndə́ a ná ndáfama. Ɔkɛaka ɔwá a Yə́susu kɔsɔ́na, a ná wɛɛ́ya batá a sɛ́á: «Á Mulə́liə, yatɛ́ mɛ kɛ́áka mbá mɛ buɔmɔ́ bɔ́ ikúílíə́kimə kusə́nə əə́?»

²⁶Yə́susu a sɛ́á: «Nəníə́ umbə́ndə́ wɔ́ ndɔ laa, yatɛ́ ɔ ndɔ ɔ́kɔ ikúílí ɔ ndɔ fana əə́?»

²⁷A ná wɛɛ́ya bíhíə́níníə́ a sɛ́á: «Ɔ ŋɔ Isə́lúkú ɔ yawɔ́á Huɛlɛ́ hikəkiə na wə́wúə́ mɔlɛ́má mukimə, na híə́wúə́ hɛtányɛ́ hikimə, na yawɔ́á iŋgínə́ mikimə, na yawɔ́á ɛfɛka yikimə, ɔ ŋɔ wawɔ́á mukúlə́kulə hikəkiə tɔ́na ɛ́sɛ́á aŋɔ́á bɛ́múɛ́tɛ́.»

²⁸Nɔ́yɛ́ Yə́susu a sɛ́á: «Ɔ ná bɛ́kámɔ́sɔ́ná muɛsɛ, kɛ́áká nɔ́yɛ́ mbá ɔ ŋɔ nɔɔmɔkɔ ikúílíə́kimə.»

²⁹Mba ɔwayɛ́, a ka siəkə ɔwá a bínə́níə́ a sɛ́á a báka mɔndɔ muɛsɛ, a ná Yə́susu batá a sɛ́á: «Ɛ́yánɛ́ a lɛ́á wamɛ́á mukúlə́kulə əə́?»

³⁰Yə́susu a sɛ́á: «Mɔndɔ ɔmɔtɛ́ a ka húlínə ɔ Yəlúsalɛma ɔ wákaka ɔ Yəlíko, a ná kɔ́ɛ́na ɔ makátá má baŋɛ́na, bá ná wɛɛ́ya yukúlə́kə, bá ná wɛɛ́ya súbə́kə́ na ɛmbɔ́ŋɔ́, bá ná ákana, bá ná wɛɛ́ya tíkə́ hoóyi na uwə́kunə.

³¹Mutitiəmahánɛna ɔmɔtɛ́ a ka báá ɔ ɔlɔɔkɔ ɔ yɛ́táyɛ́ ɛnɔ́mɛ; ikúílí a ná mɔndɔ bɔ́ŋɔ́ kɔ́átɔ́, a ná ɛnɔ́mɛ fənjíə́.

³²Hɔ́ánánátɔ́, wɔmɔtɛ́ mɔndɛkɛ Lə́wi a ná ndáfámá ɔ yɛ́táyɛ́ ɛbɔ́ka, a ná wɛɛ́ya yámá, a ná ɛnɔ́mɛ fənjíə́.

³³Mba, mɔndɔ wa Samália ɔmɔtɛ́ a ka báá ɔ ɔwákaka ɔ mɔkɛnda, a ná ndáfámá ɔ ɔwayɛ́ ɛmɛ́ŋɛ́, a ná wɛɛ́ya yámá, mahana má ná wɛɛ́ya itíə́.

³⁴A ná bɛ́nyálɛ́lá hoóyi na wɛɛ́ya, a ná bɛ́áyɛ́á bikuəli sɔ́áká na məluku, a ná olókínə́ na ɛsɔŋɔ, a ná ɔ́lɔ́kɔ́kɛ́ná na bifəsiə; a ná wɛɛ́ya tálá ɔ ɔwayɛ́ ɛnjakásɛ, a ná ká wɛɛ́ya tə́tə́níə́ ɔ miímə yɛ batɔ́mbátɔmba, a ná wɛɛ́ya bihikə.

³⁵Ɛnaka ɔyáá wɔ́ yáá, a ná muití miímə tíkínə́ bɛcácɔ́ bɛ́fandɛ́, a sɛ́á: “Tə́tə́kə́níə́ wɛɛ́ya, ata yatɛ́ ɔyɛ́á ɔ ŋɔ bɛ́tɛ́ŋakɛna, mɛ ŋɔ sá aŋɔ́á híə́niniə ɛnáká mɛ kə́tílə.”»

³⁶Yə́susu a ná mɔmanyumbə́ndə́ batá a sɛ́á: «Ɛ́sɛ́á wə́wúə́ usinə, ətíə́ yɛ bááyɛ́ bɛndɔ bálálɔ́, ɛ́yánɛ́ a lɛ́á mukúlə́kulə wa wɔ́ɔwɔ mɔndɔ ɔwá a ná kɔ́ɛ́ná ɔ makátá má baŋɛ́na əə́?»

³⁷A ná wɛɛ́ya bíhíə́níníə́ a sɛ́á: «Ɔ́ wɛ́ɛ́yɛ́ ɔwá a ná wɛɛ́ya mahana wəə.» Yə́susu a ná wɛɛ́ya lɛ́na a sɛ́á: «Káka, kɛ́áká tɔ́na nɔ́yɛ́ ata aŋɔ́á.»

³⁸Ɛ́sɛ́á Yə́susu na báyɛ́á bɔkɔ́nɛna bá ná báá bá ndɔ kɛnda, bá ná tɔ́mbɛ́ná ɔ bɔ́mɔtɛ́ bɔnɔŋɔ, muəndú ɔmɔtɛ́, nɛ́áyɛ́á niínyə á Máta, a ka wɛɛ́ya káha ɔ ɔwayɛ́ ɔmbɛ́la.

³⁹A ka báá na munínyə́, nɛ́áyɛ́á niínyə á Malɛ́á, ɔwá a ná báá tuənə́tɔ́ ɔ makɔlɔ́ má Isə́lúkú ɔ yayɛ́á ɛtambá ɔwɔ́kɔ.

⁴⁰Máta, lúkímə́tɔ́ ɔ masɔ́ma ɔ ikísinə, a ná tɔsɔ, a sɛ́á: «Á Isə́lúkú, nɔ́yɛ́ yɛ́ lɛ ndɔ aŋɔ́á kɛa ata bɔkɔa ɛ́sɛ́á wamɛ́á munínyə́ a ná mɛaŋɔ́á níásá bíbúə́ ɔ bɔsɔ́ma əə́? Lɛná wɛɛ́ya a ndá mɛaŋɔ́á ɔ́lɔ.»

⁴¹Isə́lúkú a sɛ́á: «Á Máta, á Máta, ɔ ndɔ sə́híniə, ɔ ndɔ bímbíkísiə tɔ́na ɔ bɛkɔa biəŋí.

⁴²Mba bɔkɔa bɔ́mɔtɛ́ bɔ́ lɛa na mɔsɛ́ŋɛ́, á Malɛ́á a ná tɛ́fá á nioko ɔ nɛɛsɛ ɔnɛ́á bá sá ndákatɔna.»