Read Tunen Lúkasɛ 11 Bible Online

Lúkasɛ 11 - Tunen bible

Lúkasɛ 11

¹Buɔsɛ́ bɔ́mɔtɛ́ Yə́susu a ka báá ɔ mabɛ́kálɛ́na ɔ yɛ́mɔtɛ́ ɛbɔ́ka. Ikúílí a ná hɔ́á ɔ ɔbɛ́kálɛ́na, wɔmɔtɛ́ wayɛ́á mɔkɔ́nɛna a ná wɛɛ́ya lɛ́na a sɛ́á: «Á Isə́lúkú, úkúnə́kíə́ bəsú mabɛ́kálɛ́na ɛ́sɛ́á Yɔhánɛsɛ a ná báyɛ́á bɔkɔ́nɛna úkúnə́kíə́.»

²A ná bəə́bu lɛ́na a ɔwá, ikúílí nɔ ndɔ bɛ́kálɛ́na, nɔ láá nɔ sɛ́á: «Á Isə́, kɛáka bɛndɔ bá manyá ɔwá ɔ lɛa Huɛlɛ́ Mɛnaŋanaŋa; kɛáka nɛ́áwɔ́á Nɛmanɛna nɛ́ sɔ́nɔ.

³Índíə́ bəsú bɔ́labɔ́nɛ́á bɔ́ buɔsɛ́ tɛ́á.

⁴Niasɛ́ná bəsú mə́súə́ mabɛ́á, bɔkɔasɛ́á bəsú tɔ́na tɔ ndɔ bááyɛ́ bəkimə niasɛna ɔbá bá ndɔ bəsú liŋgəsiə. Mba, ɔ lɛ niása ɔwá tɔ kɔ́á ɔ mɔkɔ́lɛna.»

⁵Yə́susu a sɛ́á: «Ábá ɔmɔtɛ́ uwənú a báka na ɛŋgɔ́áyɛ́, a ná ká wɛɛ́ya kɔ́ána ɔ ətíə́ yɛ́ bulúə́, mbá a ná wɛɛ́ya lɛ́na a sɛ́á: “Á yamɛ́á ɛŋgɔ́áyɛ́, folíə́ mɛaŋɔ́á bɛbɛlɛ́tɛ bɛ́lálɔ́.

⁶Yɛmɔtɛ́ yamɛ́á ɛŋgɔ́áyɛ́ a nɔ́ húlə ɔ mɔkɛnda, a nɔ́ ndafámá ɔ ɔwámɛ ɔmbɛ́la, mɛ lɛ bá na bɔɔ́la ɔ ɔwayɛ́ uwíndiə.”

⁷Mba, ábá wə́ní a ná wɛɛ́ya bíhíə́niniə ɔ miímə nuúmə́ a sɛ́á: “Ɔ lɛ mɛaŋɔ́á yúkúsíníə́, nikí nɛ́ lɛa kuiyíə́tɔ, isíŋáka tɔ lɛa sianátɔ́ na bámɛ́á baná, mɛ sɔ́ ŋɔ óso ɔhɔalɛna ɔwá mɛ aŋɔ́á bɛbɛlɛ́tɛ índíə́.”

⁸Mɛ ndɔ bənú lɛna, ata a sá hɔ́álɛ́na ɔ ɔwayɛ́ uwíndiə, ɛlɔ́áyɛ́ bɔŋgɔ́áyɛ́, a ŋɔ hɔalɛna ɔkɛaka ɔwá a lɛ wɛɛ́ya hɔ́mbɔ́ tɔ́na, a ŋɔ wɛɛ́ya índíə́ yatɛ́ ɔyɛ́á a ndɔ siə.»

⁹«Nɔ́yɛ́ ɔwámɛ mɛ ndɔ bənú lɛna, nɔ́ batá, bá ŋɔ bənú índiə, nɔ́ siə́kə, nɔ ŋɔ bɔ́ŋɔ, nɔ́ kitə́lə, bá ŋɔ bənú nikí kuninə.

¹⁰Ɔ taká ata ɛ́yánɛ́ a ŋɔ bata, bá ŋɔ wɛɛ́ya índiə, ɔwá a ŋɔ siə́kə, a ŋɔ kusənə, ɔwá a ŋɔ kitələ, bá ŋɔ wɛɛ́ya nikí kuninə.

¹¹Ɛ́yanɛ́ isə́ ɔ uwənú ətíə́ ábá wayɛ́á mɔná a ná wɛɛ́ya hiɔfɔ́ bátá, a wɛɛ́ya índiə á miáhɔ miɔmɔ́ ɔ ɛbɔ́ka yɛ́ hiɔfɔ́ əə́?

¹²Ataná, ábá a ná yɔnɔ́ batá, a wɛɛ́ya índiə á ɛŋɛŋá əə́?

¹³Ábá uwənú ɔbá nɔ lɛ́á babɛ́á, nɔ ndɔ manya ɔ bɛɛ́la bɛɛsɛ uwíndiə ɔ uwənú baná, bikúílí, bɛ́nɛ́á á Isə́ yɛ nɔɔ́mɛná a sɔ́ ŋɔ Umbúínyi Mɔnaŋanaŋa índiə ɔ bááyɛ́ ɔbá bá ndɔ wɛɛ́ya muítə bata!»

¹⁴Yə́susu a ka wúmotí umbúínyi mɔbɛ́á kúbə́kə ɔwá wɔ́ ná wɔmɔtɛ́ mɔndɔ híə́nə́síə́ imúkú. Ikúílí umbúínyi mɔbɛ́á wɔ́ ná fámá, imúkú a ná botólíə́ ɔ ɔhɔ́ɔ́, Ilúkunə yɛ́ bɛndɔ bá ná ə́lə́mə́nə.

¹⁵Mba, bɔ́mɔtɛ́ ɔ uwəbú ətíə́ bá laaka bá sɛ́á: «Á Bɛlɛsɛbúlu á isə́lúkú yɛ imbúínyi mɛbɛ́á a ndɔ wɛɛ́ya yɛ́táyɛ́ iŋgínə́ índiə.»

¹⁶Bɔ́mɔtɛ́ ɔ uwəbú ətíə́ bá wɛɛ́ya kɔsɔnaka, bá wɛɛ́ya hɛŋgɛtɛ́nɛ́á hɛ́ yələ́mənə bataka.

¹⁷Mba Yə́susu a mə́búə́ mafɛka manyaka, a sɛ́á: «Nɛmanɛna tɛ́á ɔnɛ́á bɛndɔ bá ndɔ nɔa bəə́bu na bəə́bu, abáka nɛ́ nímə, máyɛ́á məə́bə ma bɔsɔ́kɔ́ kɔakɔnakɛna.

¹⁸Ábá Sátana wɛɛ́ya bɛ́múɛ́tɛ́ a ndɔ bínúə́siə, nəníə́ nɛ́áyɛ́á nɛmanɛna nɛ́ ŋɔ ɔ́nɛ́na əə́? Ɛ́sɛ́á nɔ ndɔ laa nɔ sɛ́á, na iŋgínə́ yɛ Bɛlɛsɛbúlu mɛ ndɔ imbúínyi mɛbɛ́á bulə.

¹⁹Ábá na iŋgínə́ yɛ Bɛlɛsɛbúlu mɛ́ ndɔ imbúínyi mɛbɛ́á bulə, na yanɛ́ iŋgínə́ á bə́núə́ bɔkɔ́nɛna bá ndɔ miítə bulinə əə́? Bəə́bu bɛ́múɛ́tɛ́ bá ŋɔ báá bə́núə́ bəkə́lə́siə.

²⁰Mba, ábá na iŋgínə́ yɛ Huɛlɛ́ mɛ́ ndɔ imbúínyi mɛbɛ́á bulə, Nɛmanɛna nɛ́ Huɛlɛ́ nɛ́ lɛa ndafámátɔ́ ɔ uwənú ətíə́.»

²¹«Ikúílí mɔndɔ wa hɛfanda hɛ́ ɔ́nɔ́kɛ́nátɔ́ a lɛ́á na bɛ́áyɛ́á bikúlúmə́ bɛ́ bilə́, a ndɔ wə́yíə́ ɔmbɛ́la tə́tə́niə, nɛ́áyɛ́á nɛmbiaŋɛ nɛ́ lɛa yə́ə́bu.

²²Mba, ábá wɔmɔtɛ́ mɔndɔ ɔwá a lɛ́á na hɛfanda yáyɛ́ná wɛɛ́ya a ná ndafámá, a wɛɛ́ya súbə́kə́, a bɛ́áyɛ́á bikúlúmə́ bɛ́ bilə́ ɔ́lɔ ɔbɛ́á nɛ́áyɛ́á nɛkɔmba nɛ́ lɛ́á tálɛ́nátɔ, a mítə́yí mikómó áfaka mikimə.

²³Ata ɛ́yánɛ́ ɔwá a lɛ báá na mɛaŋɔ́á, a mɛaŋɔ́á lɛa ɛ́ŋɛ́mánátɔ, ata ɛ́yánɛ́ ɔwá a lɛ ndɔ kɔta na mɛaŋɔ́á, a ndɔ sasa ɔbánɔ́.»

²⁴«Ikúílí umbúínyi mɔbɛ́á wɔ́ ná fámá á mɔndɔ mɛɛ́lɔ, wɔ́ húlə́ nə́kə́ləkənə ɔ makɔ́tákɛ ɔ ɛbɔ́ka ɔtɛ́ka ɔyɛ́á mbá a tuənə́kínə. Ábá a sá bɔ́ŋɔ, nɔ́yɛ́, a bɛ́laa a sɛ́á: “Ɛkasɛ mɛ káhíánáka ɔ ɔwámɛ ɔmbɛ́la ɔ ɛbɔ́ka ɔyɛ́á mɛ ná famaka.”

²⁵Ikúílí a ná káfámá, a muítə nibə sɔnɔ́kɔ́tɔ́, tábɔ́nákátɔ.

²⁶Nɔ́yɛ́, a ákána, a ka yímotí imbúínyi mɛbɛ́á ɛtá ɛ́lɛ́ndɔ́lɔ́mɔnɔ yáyɛ́ná wɛɛ́ya, bá ndahíáná iŋgində́ ɔ ɔmbɛ́la, bá tuənəkinə ɔmɔ́tɔ́yɛ́. Ɔ nitifə́ ɔbáá wɔ́ mɔ́táyɛ́ mɔndɔ wɔ́ híáná mɔbɛ́á yáyɛ́ná wúbúsíə́.»

²⁷Ikúílí Yə́susu a ná hɔ́á ɔ ɔhɔ́ɔ́, muəndú ɔmɔtɛ́ a ná nióni huəlíníə́ ətíə́ yɛ ilúkunə a sɛ́á: «Nɛhɔnɔ na muəndú ɔwá a ná aŋɔ́á túáná ɔ ɔwayɛ́ tɔna, a ná aŋɔ́á nyóhókíə́.»

²⁸Mba, Yə́susu a sɛ́á: «Nɛhɔnɔ ɔbánɔ́ na bááyɛ́ ɔbá bá ndɔ ɛtambá yɛ́ Huɛlɛ́ ɔ́kɔ, bá ndɔ yɛɛ́ta tə́tə́niə.»

²⁹Ɛ́sɛ́á bilúkunə bɛ́ ná báá kɔtákánátɔ́ á Yə́susu ɛmɛ́ŋɛ́, a ná botólíə́ ɔ ɔlaa a sɛ́á: «Bɛndɔ bá ɛnyɔŋɔnɔ yɛ́ niɔfɛ́nɛ bá lɛa babɛ́á, bá ndɔ hɛŋgɛtɛ́nɛ́á hɛ́ yələ́mənə bata, mba, ata hɛŋgɛtɛ́nɛ́á hɛ́ yələ́mənə hímotí, Huɛlɛ́ a sa ndá bəə́bu índíə́ yɛ́ sá báá ɔ hɛ́ Yɔ́nasɛ.»

³⁰Ɔ taká, hɔ́ánánátɔ́ ɛ́sɛ́á Yɔ́nasɛ a ná báá hɛŋgɛtɛ́nɛ́á ɔ ətíə́ yɛ bɛndɔ bá Ninífə, nɔ́yɛ́ Mɔná wa mɔndɔ a ŋɔ báá hɛŋgɛtɛ́nɛ́á ɔ ətíə́ yɛ́ bɛndɔ bá yɛ́ɛyɛ ɛnyɔŋɔnɔ.

³¹Munəni wa muəndú wa makɛ́ka a ŋɔ bəə́bu hɔkakɛna bɔkɔasɛ́á, a ka káhɔalɛna ɔ mɔnɔŋɔ má hata ɔ ɛmanya yɛ Salómono ɔwɔ́kɔ; mbá nɔ́yɛ́, mɔndɔ a lɛa háha ɔwá a ná Salómono yayɛna.

³²Ɔ buɔsɛ́ bɔ́ mikə́lə́kí, bɛndɔ bá Ninífə bá ŋɔ tɛ́nɛ́maka ɔ busíə́ bɔ́ bɛndɔ bá yɛ́ɛyɛ ɛnyɔŋɔnɔ, bá ŋɔ bəə́bu hɔkakɛna bɔkɔasɛ́á, bɛndɔ bá Ninífə bá ka yə́búə́ mɛlɛ́má kɔ́ŋɔ́na ɛnaka Yɔ́nasɛ a bəə́bu Imbə́nú Yɛɛsɛ nɔŋɔ́nákɛ́na, mbá nɔ́yɛ́, mɔndɔ a lɛa háha yáyɛ́ná Yɔ́nasɛ.

³³«Ata mɔndɔ ɔmɔtɛ́ a sa ósó itiəkətiəkə utiə ɔkɛaka ɔwá a yɛɛ́ta bítə́, ataná, a yɛɛ́ta húə́ na ɛbɔmbɔ; ɔ nifəŋə, abáka a yɛɛ́ta tála ɔ ɛtáka ɔmbáŋá ɔkɛaka ɔwá, bɛndɔ ɔbá bá ndɔ fínə ɔ miímə bá isəmú síə́kínə́nə.

³⁴Nɛ́áwɔ́á niísə nɛ́ lɛ́á itiəkətiəkə yɛ́ yáwɔ́á mɛɛ́lɔ. Ikúílí nɛ́áwɔ́á niísə nɛ́ lɛ́á nɛɛsɛ, yáwɔ́á mɛɛ́lɔ yɛ́ lɛa mikimə ɔ isəmú. Mba, ikúílí nɛ́áwɔ́á niísə nɛ́ lɛ bá nɛɛsɛ, yawɔ́á mɛɛ́lɔ yɛ́ lɛa ɔ ibínə́binə nuúmə́.

³⁵Nɔ́yɛ́, siəlínə́ muɛsɛ ábá isəmú ɔyɛ́á yɛ́ lɛ́á ɔ ɔwáwɔ́ mɛɛ́lɔ yɛ́ lɛ báá ibínə́binə.

³⁶Ɛ́bá yáwɔ́á mɛɛ́lɔ mikimə yɛ́ lɛa ɔ isəmú, ɛŋana yɛ́mɔtɛ́ ɛsalɛ ɔ ibínə́binə, yɛ́ ŋɔ báá mikimə ɔ isəmú, ɛ́sɛ́á ikúílí itiəkətiəkə yɛ́ ndɔ aŋɔ́á numiə na yáyɛ́á isəmú.»

³⁷Ikúílí Yə́susu a ná hɔ́á ɔ ɔhɔ́ɔ́, wɔmɔtɛ́ Mɔfalísia a ná wɛɛ́ya ɛ́lɛ́ákɛ́na ɔ ɔnɛ́á ɔwayɛ́ ɔmbɛ́la, a ná fínə́ ɔ miímə a ná tuə́nə ɔ ɛtáka.

³⁸Mɔfalísia a ná Yə́susu ɛ́ná a ndɔ nɛ́á ɛŋaná makátá ɔbɛ́sɔa, a ná ə́lə́mə́nə.

³⁹Mba Isə́lúkú a ná wɛɛ́ya lɛ́na a sɛ́á: «Isíŋáka uwənú á Bɛfalísia, nɔ ndɔ nəŋəsiə ɔbánɔ́ á əlimə yɛ ɛnyɛ́ná na yɛ́ ɛfána, mba, nuúmə́ yɛ yə́núə́ mɛlɛ́má yɛ́ lɛa úndúə́tɔ́ na məhəə́tu na ɛŋgásɔ́.

⁴⁰Nɔ lɛ ndɔ ɔ́kɔ ata bɔkɔa. Huɛlɛ́ a ka ɔmbáŋá tábɔ́náka, a ná nuúmə́ tábɔ́náká tɔ́na.

⁴¹Nɔ́ mahánɛna índíə́kínə ɔbánɔ́ yatɛ́ ɔyɛ́á nɔ lɛ́á itíə́nə́tɔ, əlimə yɛ nɔ́yɛ́ mbá bikimə bɛ́ ŋɔ báá naŋátɔ́ ɛlɔ́áyɛ́ ənú.»

⁴²«Mba, bulú na bənú, á Bɛfalísia, nɔ ndɔ índiə ɛsalɛ ɛ́mɔtɛ́ yɛ́ bɛlɔŋɔ́tɛ́ ɔ mɛɛ́lɔ yɛ niómo, bɛ́mɔtɛ́ bɛlɔŋɔ́tɛ́ na bikimə ɔbɛ́á bɛ́ ndɔ lɔa ɔ ɛtɔbɔtɔ́bɔ́, mba, nɔ ndɔ taká na nibo nɛ́ Huɛlɛ́ yubutiniə; nɔ́yɛ́ yɛ́ ná báá ɔwá nɔ bɛ́kɛ́ákɛ́na, ɛŋaná bɛ́ɛ́yɛ́ bikimə ufəliə.»

⁴³«Bulú na bənú, á Bɛfalísia, nɔ ndɔ hikiə utuənə ɔ bɛɔkɔ́ bíbúsíə́ ɔ məə́bə má mabɛ́kálɛ́na. Nɔ hikəkiə tɔ́na ɔwá bá bənú hólókíə́ na hibə́təniə ɔ maháná.

⁴⁴Bulú na bənú! Nɔ lɛa ɛ́sɛ́á minyə́ ɔyɛ́á bá lɛ ndɔ bílíndiniə, bá kɛndakɛna ɔmbáŋá bá lɛ bílísíə́.»

⁴⁵Nɔ́yɛ́, ɔmɔtɛ́ ətíə́ yɛ bamanyumbə́ndə́ a ná ɛtambá ɛ́ta, a ná wɛɛ́ya lɛ́na a sɛ́á: «Á Mulə́liə, ábá ɔ ndɔ hɔ́ɔ́ nɔ́yɛ́, ɔ uwəsú tɔ́na ɔ ndɔ kɔ́ba!»

⁴⁶Yə́susu a sɛ́á: «Indimisi na bənú tɔ́na á bamanyumbə́ndə́ bɔkɔasɛ́á, nɔ ndɔ bɛndɔ malɔmɔ́ maŋɛ́ŋa túə́niə, nɔ lɛ ndɔ óso ɔ maáta unyukələ na hɛnɔnɔ́ hímotí.

⁴⁷Bulú na bənú, nɔ ndɔ minyə́ yɛ́ bɔhɛ́nátɔtányɛ́ falaba muɛsɛ. Mbá nɔ́yɛ́ ɔ́ bátáyɛ́ bɔhɛ́nátɔtányɛ́ á bíə́núə́ bisə́kínə́ bá ná ɔ́nɔkɔ.

⁴⁸Nɔ́yɛ́, nɔ ndɔ ínə́niə ɔwá, nɔ lɛa ɛ́mɛ́nɛ́nátɔ́ ɔ yatɛ́ ɔyɛ́á bíə́núə́ bisə́kínə́ bá ná kɛ́áka. Uwəbú, bá ka bɔhɛ́nátɔtányɛ́ ɔ́nɔ́kɔ, uwə́nú nɔ ndɔ yə́búə́ minyə́ falaba.

⁴⁹Ɛlɔáyɛ́ nɔ́yɛ́, Huɛlɛ́ ɔwayɛ́ ɛmanya a ka laa a sɛ́á: “Mɛ ŋɔ bəə́bu bɔhɛ́nátɔtányɛ́ na basɔ́másɔma lɔ́mákɛna, bá ŋɔ báaba ɔ́nɔ́kɔ, bá bɔ́mɔtɛ́ tə́kə́sə́kə”,

⁵⁰ɔkɛaka ɔwá bá yɛ́ɛyɛ ɛnyɔŋɔnɔ yɛ niɔfɛ́nɛ binífúnínə́ bátá, ɔ manɔ́ŋɔ́ má bɔhɛ́nátɔtányɛ́ bəkimə ɔmá má ná ólókókíə́, ɔ botolokiə ɔ nɛbɔ́tɛ́ná nɛ́ misí.

⁵¹Ɔ botolokiə manɔ́ŋɔ́ má Ábɛlɛ, ɔkafámáká ɔ manɔ́ŋɔ́ má Sakalɛ́á ɔwá bá ná ɔ́nɔ́kɔ́ ɔ ətíə́ yɛ niɔlɔ nɛ́ mahánɛna na ɛbɔ́ka yɛnaŋanaŋa. Ɔ taká, mɛ ndɔ bənú lɛna: Huɛlɛ́ a ŋɔ binífúnínə́ bata ɔ yɛ́ɛ́yɛ́ ɛnyɔŋɔnɔ.»

⁵²«Indimisi na bənú, á bamanyumbə́ndə́, nɔ ka ɛnɔ́mɛ kuiyiə ɔyɛ́á yɛ́ ndɔ kafámá á Huɛlɛ́ ɔmanya; uwənú nɔ sa yɛ́táyɛ́ ɛnɔ́mɛ ɛta, ɔbá bá ndɔ siə ɔ yɛɛ́ta ɔwɛta, nɔ ndɔ bəə́bu kotiə ɔwá bá lɛ tɔmba.»

⁵³Ikúílí a ná fámá ɔ ɔmbɛ́la wɔ́ Mɔfalísia, hilóbi hɛ́ ná bamanyumbə́ndə́ na Bɛfalísia ɛtá ɔwɔŋgɔkɔnɔ na wɛɛ́ya. Bá ná botólíə́ ɔ ɔwayɛ́ mambataka məəŋí ɔbata.

⁵⁴Nɔ́yɛ́, bá ná botólíə́ ɔwayɛ́ ɔ tɔlámba ɔfɛnɛnɛa ɔkɛaka ɔwá, bá ɛtambá ɛtá ɔ ɔwayɛ́ munuə mbá bá wɛɛ́ya sɔ́mɛ́na.