Read Tunen Lúkasɛ 12 Bible Online

Lúkasɛ 12 - Tunen bible

Lúkasɛ 12

¹Ɔ yɛ́táyɛ́ ikúílí, bɛndɔ bá ka báá kɔtákánátɔ́ ɔ tukóló ɔ nindínə́ ɔnɛ́á bá tafakana ɔ makɔlɔ́. Yə́susu a ná lúmə́ ɔ ɔwayɛ́ bɔkɔ́nɛna ɔ ɔlɛna a sɛ́á: «Ubusíə́ bɔ́ bikimə, nɔ́ mətəkí má Bɛfalísia bítə́tə́kə́níə́ ɔmá má lɛ́á bɛkɔa bɛ́ bɛkanja.»

²Bikimə ɔbɛ́á bɛ́ lɛ́á bítímə́tɔ́, bɛ́ ŋɔ fámálana ɔ mianyɔ́, ata yatɛ́ ɔyɛ́á yɛ́ lɛ́á ɔ nibítə, yɛ́ ŋɔ bɛ́mányana.

³Ɛlɔ́áyɛ́ nɔ́yɛ́, bikimə ɔbɛ́á nɔ ŋɔ laaka ɔ ibínə́binə, bá ŋɔ ɔ́kɔ́kɛna ɔ ɛnjaŋɛnjaŋɛ yɛ buɔsɛ́; ata yatɛ́ ɔyɛ́á nɔ ŋɔ sɔkɔlɛna ɔ mulúə́ wɔ́ ɔsɔ́kɔ́ ɔ nibítə, bá ŋɔ yə́mə́kə ɔ mianda ɔmbáŋá.

⁴Mɛ ndɔ bənú lɛna, uwə́nú ɔ bɛ́ámɛ́á bɛŋgɔ́áyɛ́: Nɔ lɛ bááyɛ́ kɔ́lɔ́má ɔbá bá ndɔ ɛkɔlɛ ɔ́nɔ, mba ɔ nitifə́, bá lɛ ósó ɔkɛa ata bɔkɔa ɔ ɔyáyɛ́na.

⁵Ɛkasɛ, mɛ bənú ínə́níə́ ɔwanɛ́ nɔ ná hɔ́ánána ɔkɔ́lɔ́ma: Nɔ́ kɔ́lɔ́máka á Huɛlɛ́ ɔwá, əlimə yɛ ɔwɔ́nɔ, a báka na iŋgínə́ yɛ uwənú uwomboko ɔ hiwə hɛ́ ikúílíə́kimə. Ɛ́ɛ! Mɛ ndɔ bənú lɛna: Ɔwayɛ́ nɔ ná hɔ́ánána ɔkɔ́lɔ́ma!

⁶Ɛbáka bá lɛ tɔbátáməhə́ŋə lúə́ tɔ́lánɔ ɛlɔ́áyɛ́ bɛcácɔ́ bɛ́fandɛ́ əə́? Mba abáka Huɛlɛ́ a lɛ fəlíə́ ata hímotí ɔ uwəbú ətíə́.

⁷Ɔ yáyɛ́na nɔ́yɛ́, túə́núə́ tuhúínyi tɔ́ lɛa tukimə fanákátɔ. Nɔ lɛ kɔlɔma, nɔ lɛa na mukunə́ yáyɛ́ná tɔbátáməhə́ŋə tukimə.

⁸Mɛ ndɔ bənú lɛna ɔwá, ata ɛ́yánɛ́ ɔwá a ŋɔ laa ɔ nɛnáka a sɛ́á a lɛa wamɛ: Mɔná wa mɔndɔ a ŋɔ manya tɔ́na ɔ busíə́ bɔ́ bɛáŋgɛlɛ bɛ́ Huɛlɛ́ ɔwá a lɛa wayɛ.

⁹Mba, ábá mɔndɔ a ná láá ɔ nɛnáka a sɛ́á a lɛ ndɔ mɛaŋɔ́á manya, Mɔná wa mɔndɔ a ŋɔ ayɛ́ laa tɔ́na ɔ busíə́ bɔ́ bɛáŋgɛlɛ bɛ́ Huɛlɛ́ a sɛ́á, a lɛ ndɔ wɛɛ́ya manya.

¹⁰Ata ɛ́yánɛ́ ɔwá a ŋɔ ɛtambá yɛbɛ́á laa ɔwɔŋgɔkɔnɔ Mɔná wa mɔndɔ, bá ŋɔ wɛɛ́ya niasɛna. Mba wɛ́ɛ́yɛ́ ɔwá a ŋɔ Umbúínyi Mɔnaŋanaŋa kɔ́báka, a sa ndá nɛniasɛna kusə́nə.

¹¹Ikúílí ɔyɛ́á bá ŋɔ bá bá ndɔ bənú ákánana ɔ məə́bə má mabɛ́kálɛ́na, ɔ busíə́ bɔ́ bamanɛna, bɔ́ bakɛndana na bəkə́lə́siə ɔkɛaka ɔwá bá bənú kə́lə́sə́kíə́, nɔ lɛ sə́híníə́ nəníə́ nɔ́ bɛ́káláká mbá ata yatɛ́ nɔ́ hɔɔkɔ.

¹²Ɔ taká, Umbúínyi Mɔnaŋanaŋa wɔ́ ŋɔ bənú úkúnəkiə ɔ yɛ́táyɛ́ ikúílí yatɛ́ nɔ ná hɔ́ánána ɔlaa.

¹³Mɔndɔ ɔmɔtɛ́ a ná Yə́susu lɛ́na ɔ ətíə́ yɛ nɛmɔndɔ a sɛ́á: «Á Mulə́liə, lɛná wamɛ́á munínyə́ ɔwá tɔ yə́súə́ ilíkinənə afána.»

¹⁴Yə́susu a sɛ́á: «Á yamɛ́á ɛŋgɔ́áyɛ́, ɛ́yánɛ́ a ná mɛaŋɔ́á tínímíə́ wənúə́ mukə́lə́siə mbá ata mɔafa wa mə́núə́ maasɛ əə́?»

¹⁵Ɔ yɛ́ɛ́yɛ́ ikúílí a ná bəə́bu lɛ́na a sɛ́á: «Nɔ́ ɛhɔ́tɔ́hɔ́tɔ bítə́tə́kə́níə́ muɛsɛ bɔkɔasɛ́á, buɔmɔ́ bɔ́ mɔndɔ bɔ́ lɛ báá tiŋímínə́tɔ́ ɔ ɔwayɛ́ maasɛ, ata nəníə́ a lɛ́á bɔ́ŋɔ́tɔ́ ɔ ɔyáyɛ́ná.»

¹⁶Əlimə yɛ nɔ́yɛ́, a ná bəə́bu wúuwu ɔŋana tɛ́ná a sɛ́á: «Bɛlɔŋɔ́tɛ́ bɛ́ ka hɛkaka mɔŋɛ́ŋa ɔ bɛtɔbɔtɔ́bɔ́ bɛ́ mɔmbiaŋɛ.

¹⁷A ná lúmə́ ɔ ubílúmíniə na ɔbɛ́bata a sɛ́á: “Nəníə́ mɛ ŋɔ kɛaka na bɛ́táná bɛlɔŋɔ́tɛ́ bikimə əə́? Mɛ lɛ báá na ɛbɔ́ka yɛ́ bɛɛ́ta utə́tə́niə.”

¹⁸Əlimə yɛ nɔ́yɛ́ a ná láá a sɛ́á: “Ɛ́ɛ! Náana ɛkasɛ mɛ kɛ́áka. Ɛkasɛ mɛ́ mámɛ́á mafɛná má buɔnɔ́ kátáka, mɛ́ falábáka ɔ maŋɛ́ŋa, ɔmɔ́tɔ́yɛ́ mɛ ŋɔ bɛ́ámɛ́á bɛlɔŋɔ́tɛ́ bikimə tə́tə́kəniə na mámɛ́á maasɛ.

¹⁹Mɛ ŋɔ bɛ́laa ɔwá, mɛ lɛa na maasɛ məəŋí ɛlɔ́áyɛ́ tuɔŋɔ tuəŋí, isíŋáka mɛ́ hɔtɔ́kɔ, mɛ́ nɛaka, mɛ́ nyákɛ́na, mɛ́ bilənəkə.”»

²⁰Ikúílí a ná bá a ndɔ bílúmíniə nɔ́yɛ́, Huɛlɛ́ a ná wɛɛ́ya lɛ́na a sɛ́á: «Á yaála yɛ́ mɔndɔ, ɔ bulúə́ bɔ́ niɔfɛ́nɛ ɔ ndɔ wə́kunə. Bɛɛ́la bikimə ɔbɛ́á ɔ ná tə́tə́kə́níə́, ɛ́yánɛ́ a ŋɔ tíkə́nənə əə́?»

²¹Nɔ́yɛ́ yɛ́ ŋɔ báá ɛlɔ́áyɛ́ mɔndɔ ɔwá a ndɔ nɛbɔ́ŋɔ bɛ́kɔ́tɛna ɛlɔ́áyɛ́ wɛɛ́ya bíbúə́, mba, a lɛ báá bɔ́ŋɔ́tɔ́ á Huɛlɛ́ busíə́.

²²Yə́susu a ná báyɛ́á bɔkɔ́nɛna lɛ́na a sɛ́á: «Ɔ́ ɛlɔ́áyɛ́ nɔ́yɛ́, mɛ ndɔ bənú lɛna ɔwá, nɔ lɛ sə́híníə́ ɛlɔ́áyɛ́ búə́núə́ buɔmɔ́ yatɛ́ nɔ ŋɔ nɛ́áka, ata ɛlɔ́áyɛ́ yə́núə́ ɛkɔlɛ, yatɛ́ nɔ ŋɔ yɛɛ́ta lɛŋaka.

²³Ɔ taká, buɔmɔ́ bɔ́ lɛa yáyɛ́ná bɔ́labɔ́nɛ́á, ɛkɔlɛ yáyɛ́ná bɔlɛŋa.

²⁴Nɔ́ bɛkɔnjɛ́kɔnjɛ́ síə́kínə, abáka bá lɛ sɛlá mbá ata uhuə, bá lɛ boóko na mafɛná ata bɛába, mba, Huɛlɛ́ a ndɔ bəə́bu lúkə. Nɔ lɛa na mukunə́ mɔŋɛ́ŋa yáyɛ́ná tunoní.

²⁵Ɛ́yánɛ́ ɔ uwənú ətíə́ ɛlɔ́áyɛ́ yáyɛ́á isə́hísə́hí bɛ́múɛ́tɛ́, a óso ɔ ɔwayɛ́ buɔmɔ́ utəhəliə ata nəníə́ tɛ́tɛ́á əə́?

²⁶Ɛ́bá hɛkɔakɔ́á hɛtɛ́tɛ́á hɛ́ ndɔ bənú yáyɛ́ná ɔkɛa, ɛlɔ́áyɛ́ yatɛ́ ɔ bɛkɔa binə́binə́ usə́híniə əə́?

²⁷Nɔ́ bɛsama bɛ́ mahɔ́ma siəkínə. Nɔ́ siəkínə́ ɛ́sɛ́á abáka bɛ́ lɔaka, abáka bɛ́ lɛ nyɔ́ɔ́ ata ɔtɔɛna, mba, mɛ ndɔ bənú lɛna, ata á Salómono bɛ́múɛ́tɛ́ ɔ ətíə́ yɛ́ nɛ́áyɛ́á nɛmbiaŋɛ nikimə, a sa kafáma ɔbɛ́lɛ́ŋaba ɛ́sɛ́á ɛsama ɛ́mɔtɛ́ ɔ uwəbú ətíə́.

²⁸Ábá Huɛlɛ́ a ndɔ imbuə lɛŋa ɔyɛ́á yɛ́ lɛ́á niɔfɛ́nɛ ɔ bɛtɔbɔtɔ́bɔ́, ɔyɛ́á bulílə́ bá ŋɔ yiítə əmbəkinə ɔ hiwə, bikúílí bɛ́nɛ́á a sɔ́ ŋɔ kafámá ɔ uwənú ɔlɛŋa. Nɔ́ siəlínə uwənú á bɛndɔ bá ilumininə yɛtɛ́tɛ́á.

²⁹Mba, uwənú, nɔ lɛ síə́ yatɛ́ ɔyɛ́á nɔ ŋɔ nɛ́áka, ata yatɛ́ ɔyɛ́á nɔ ŋɔ nyákɛna; nɔ lɛ sə́híníə́ tɔ́na.

³⁰Ɔ taká, bɛndɔ ɔbá bá lɛ ndɔ Huɛlɛ́ lumininə, bá ndɔ bɛ́ɛ́yɛ́ bɛkɔa bikimə siə ɛŋaná ɔtɔmbɔ; mba uwənú, yənúə́ Isə́ a ndɔ manya ɔwá nɔ báka na yɛ́táyɛ́ ilókí.

³¹Mba, nɔ́ síə́kə ɔbánɔ́ ɔ nɛ́áyɛ́á nɛmanɛna, nɔ́yɛ́ a ŋɔ bənú bɛ́ɛ́yɛ́ bikimə índiə ɔ ɔyáyɛ́na.

³²Á hiɔ́bɔ hɛtɛ́tɛ́á, ɔ lɛ kɔ́lɔ́má ata bɔkɔa bɔkɔasɛ́á, yənúə́ Isə́ a ka siəkinə muɛsɛ ɔ uwənú ɔ Nɛmanɛna nɛ́ nɔɔ́mɛná uwíndiə.

³³Nɔ́ sɛmáká yatɛ́ ɔyɛ́á nɔ lɛ́á itíə́nə́tɔ, nɔ́ nɛɛ́ta hánákɛ́na ɔ tɔtɔyɔ́nɔ́. Nɔ́ mukóbó wɔ́ məndunə́ bɛ́tábɔ́nákɛ́na ɔmá má sɔ́ ŋɔ hɔ́ɛ́nɛna, á nɛbɔ́ŋɔ ɔnɛ́á nɛ́ sa ndáhɔ́á ɔ nɔɔ́mɛná, ɔ ɛbɔ́ka ɔyɛ́á nɛsɛ́kɛ́ nɛ́ sa ndá maáta sɛnjɛla.

³⁴Ɔ taká, ɔhá níə́núə́ nɛbɔ́ŋɔ nɛ́ lɛ́á, ɔ ɔmɔ́tɔ́yɛ́ tɔ́na wə́núə́ mɔlɛ́má wɔ́ ŋɔ bámɛnɛna.»

³⁵«Nɔ́ tuə́nə́ na bɔlɛŋa bɔ́ buolí ɔ mɛɛ́lɔ, nɔ́ bíə́núə́ bitútúə́ níásá tiəkə́tɔ.

³⁶Nɔ́ báá ɛ́sɛ́á bɔnyɛna ɔbá bá ndɔ yəbúə́ isə́lúkú táta. Ɛnáká a kə́tílə́ ɔ ɛŋganda yɛ nɛbɛ́lɛna, a ŋɔ nikí kitələ, ɔ umisíumə́ bá wɛɛ́ya kuúnə.

³⁷Nɛhɔnɔ na bááyɛ́ bɔnyɛna ɔbá Isə́lúkú a ŋɔ kɔana ɛmbɛnyɛ́ ɔ wə́yíə́ ukətilə́kə! Ɔ taká, mɛ ndɔ bənú nɔ́yɛ́ lɛna, a ŋɔ bɔlɛŋa bɔ́ buolí bɛ́háá, á bəə́bu tuənə́kíníə́ ɔ ɛtáka, a ŋɔ bɛ́nyálɛla ɔkɛaka ɔwá á bəə́bú afɛ́na.

³⁸Ábá a ná ndáhíáná ɔ ətíə́ yɛ bulúə́ ata ikúílí tɔ́mbátɔ́ mbá a ná bəə́bu kɔ́ána ɛmbɛnyɛ́, nɛhɔnɔ na bəə́bu!»

³⁹«Nɔ ndɔ nɔ́yɛ́ manya ɔwá, ata muití ɔmbɛ́la a bá a ndɔ manya ɔ yatɛ́ ɔŋgɛ́ŋɛ́ ɛkasɛ muíbi a ndáfámá, há a ka tuənə ɛmbɛnyɛ́ ɔkɛaka ɔwá, muíbi a lɛ ɔmbambala wɔ́ yayɛ́á miímə oso.

⁴⁰Bənú tɔ́na, nɔ́ túə́nə́ ɛmbɛnyɛ́ bɔkɔasɛ́á, Mɔná wa mɔndɔ a ŋɔ ndasá ɔ ɔŋgɛ́ŋɛ́ ɔwá nɔ sɔ́ ŋɔ manya.»

⁴¹Nɔ́yɛ́ Bíə́lə a sɛ́á: «Á Isə́lúkú, ɔ uwəsú ɔ ndɔ nɔ́yɛ́ lɛna alɛ́ɛ́, ɔ bəkimə ɔ ndɔ wútə́nə ɔŋana tɛ́na əə́?»

⁴²Isə́lúkú a sɛ́á: «Ɔ́ uwə́níə́ mɔnyɛna wa yɔkɛ́nana na ɛŋgɛ́lɛ́ ɔwá Isə́lúkú a ŋɔ tínímiə ɔ mɔlɔ́á wɔ́ báyɛ́á bɔnyɛna ɔkɛaka ɔwá, a bəə́bu bɛ́labɔ́nɛ́á índíə́ ɔ ikúílí yɛ́ hɔ́ánánátɔ́ əə́?

⁴³Nɛhɔnɔ na wɛ́ɛ́yɛ́ mɔnyɛna ɔwá Isə́lúkú a ŋɔ nibə a ndɔ bímbíkísiə ɔ ɔwayɛ́ buolí.

⁴⁴Mɛ ndɔ bənú nɔ́yɛ́ lɛna, ɔ taká, a ŋɔ wɛɛ́ya tínímiə ɔ mɔlɔ́á wɔ́ máyɛ́á maasɛ məkimə.

⁴⁵Mba, ábá wɛ́ɛ́yɛ́ mɔnyɛna a ndɔ bɛ́laa ɔ ɔwayɛ́ mɔlɛ́má a sɛ́á: “Yamɛ́á Isə́lúkú a ndɔ yɛ́na ɔ ɔndafama”, a tuənə á bɔsɔ́kɔ́ bɔnyɛna ɔ usúbə, a tuənə ɔ ɔnɛ́á, na ɔnyɛ́na, na uhíólo.

⁴⁶Isə́lúkú yɛ wɛ́ɛ́yɛ́ mɔnyɛna a ŋɔ ndafámá ɔ hinó ɔhɛ́á a lɛ ndɔ bɛ́táta; ata ɔ ikúílí ɔyɛ́á a lɛ ndɔ manya. A ŋɔ wɛ́ɛ́yɛ́ mɔnyɛna bulə, nɔ́yɛ́, a ŋɔ wɛɛ́ya kɛaka ɛ́sɛ́á abáka bá bááyɛ́ kɛaka ɔbá bá lɛ ndɔ lumininə.»

⁴⁷«Mɔnyɛna ɔwá a ndɔ usiə wɔ́ yayɛ́á Isə́lúkú ɔmanya, mbá a sá káfáma ɔ nɔ́yɛ́ ɔkɛa, ata uwundúsiniə, a ŋɔ ɛŋɔ́ányɛ́ kusənə miəŋí.

⁴⁸Ɔ nifəŋə, ábá mɔnyɛna a lɛ ndɔ manya yatɛ́ ɔyɛ́á Isə́lúkú a ndɔ siə mbá a ná kɛ́áká yatɛ́ ɔyɛ́á bá ná hɔ́ánána ɔ ɔwayɛ́ ɔsɔ́kɔ́tɛa, a ŋɔ ɛŋɔ́ányɛ́ kusənə tɛ́tɛ́á. Wɛ́ɛ́yɛ́ ɔwá bá ná índíə́ biəŋí, bá ŋɔ wɛɛ́ya bata bɛɛ́la biəŋí; wɛ́ɛ́yɛ́ ɔwá bá ná bɛɛ́la tíkínə́ biəŋí, bá ŋɔ wɛɛ́ya bata tɔ́na ɔ ɔyáyɛ́na.»

⁴⁹«Mɛ ka ndasá ɔ hiwə uhúlə́nə ɔ misí, mɛ hikə́kiə mɔŋɛ́ŋa ɔwá hɛ́ bámɛ́nɛ́ná tiə́tɔ́ buɔnɔ́.

⁵⁰Mɛ ná hɔ́ánáná mɛ nɛsɔa kusə́nə, mba, yatɛ́ isə́hə́sə́hí yɛŋɛ́ŋa ɛlɔ́áyɛ́ ámɛ ɔkafámáká ɔwá nɛ́ bíúndúsíníə́!

⁵¹Nɔ ndɔ fɛka ɔwá mɛ ka ndasá ɔ bumbə́nú uhúlə́nə ɔ misí əə́? Bóo! Mba mɛ ndɔ bənú lɛna, kɛsalɛ́á ɔbánɔ́.

⁵²Ɔ botolokiə isíŋáka, ɔ nikúlə nɛ́ bɛndɔ bálánɔ, kɛsalɛ́á nɛ́ ŋɔ fínə. Bálálɔ́ bá lɛ ɔ́kɔ́nɔ́ na bááyɛ́ báfandɛ́, báfandɛ́ tɔ́na bá lɛ ɔ́kɔ́nɔ́ na bááyɛ́ bálálɔ́.

⁵³Isə́ a sɔ́ ŋɔ bá a ndɔ ɔ́kɔ́nɔ na wayɛ́á mɔná mɛlɛ́mɛndɔ́, mɔná mɛlɛ́mɛndɔ́ a lɛ ɔ́kɔ́nɔ́ na yayɛ́á isə́, inyə́ a lɛ ɔ́kɔ́nɔ́ na wayɛ́á mɔná muəndú, mɔná muəndú a lɛ ɔ́kɔ́nɔ́ na yayɛ́á inyə́, inyə́kínə́ a lɛ ɔ́kɔ́nɔ́ na wayɛ́á muənyə́mɔná, muənyə́mɔná tɔ́na a lɛ ɔ́kɔ́nɔ́ na yayɛ́á inyə́kínə́.»

⁵⁴Yə́susu a ná manyɔ́ iloŋo lɛna a sɛ́á: «Ikúílí nɔ ná ɛlɔndɔ́ yámá uhúlə́kinə ɔ nɛsianɛ́ná nɛ́ hiɔtɔ́tɔ́, abáka nɔ laa tɔfá nɔ sɛ́á: “Ɛmbɔŋɔ yɛ́ nɔ́ ákána ɔkɔa”, nɔ́yɛ́ abáka yɛ́ ndafáma.

⁵⁵Ikúílí nɔ ná yámá umbúínyi wɔ́ makɛ́ka wɔ́ ndɔ húkə, abáka nɔ laa nɔ sɛ́á: “Ilúkúlúku yɛ́ ndɔ kɛaka, tɔ́na abáka yɛ́ ndafáma.”

⁵⁶Á bɛndɔ bá nɛbɛ́nyɔ́nyɔlɔ, nɔ ndɔ manya ɔ bɛkɔa bɛ́ misí na bɛ́ ɔmbáŋá ɔlɛnda, mba ɛlɔ́áyɛ́ yatɛ́ nɔ lɛ ndɔ ikúílí yɛ́ isíŋáka manyɛna əə́?»

⁵⁷«Ɛlɔ́áyɛ́ yatɛ́ nə́ə nɔ lɛ ndɔ kafámá ɔ ɔmanya bənú bɛ́múɛ́tɛ́ yatɛ́ yɛ́ lɛ́á tɛ́nɛ́mátɔ́ əə́?

⁵⁸Nɔ́yɛ́, ábá ɔ lɛa ɛsáká na mɔndɔ mbá nɔ lɛ́á ɔ ɔwákaka iŋgində́ na wɛɛ́ya ɔ mikə́lə́kí, kɛ́áka ɔwá nɔ ɔ́kɔ́nɔ́ na wɛɛ́ya ɔ ikúílí nɔ́ nalɛ́á ɔ ɛnɔ́mɛ. Yɛ́ sá báá nɔ́yɛ́, wɛ́ɛ́yɛ́ ɔwá nɔ lɛ́á ɔ bɛsáká, a ŋɔ aŋɔ́á ɛ́ta á mukə́lə́siə, a aŋɔ́á índíə́ ɔ makátá má bɔkɔfɔnɛa, bɔkɔfɔnɛa bá ŋɔ aŋɔ́á ə́mbinə ɔ ɛbɔka.

⁵⁹Mɛ ndɔ aŋɔ́á lɛna, ɔ sa ndáfámá ɔ yɛ́ɛ́yɛ́ ɛbɔka ɛŋaná wɛɛ́ya ɔsábɔ́nɛna yatɛ́ ɔyɛ́á a ndɔ aŋɔ́á bata.»