Read Tunen Lúkasɛ 13 Bible Online

Lúkasɛ 13 - Tunen bible

Lúkasɛ 13

¹Ɔ yɛ́táyɛ́ ikúílí, bɔ́mɔtɛ́ bɛndɔ bá ka ndásákɔna á Yə́susu unífúninə ɛ́sɛ́á Bilátɛ a ná kɛ́áka ɔwá, bá bɛndɔ bá Kalɛ́lɛa ɔ́nɔ́kɔ́ ɔ ikúílí ɔyɛ́á bá ná bá á Huɛlɛ́ ɔ mahánɛna uwíndiə.

²Yə́susu a sɛ́á: «Nɔ ndɔ fɛka ɔwá, ábá bátána bɛndɔ bá Kalɛ́lɛa bá ka məsə́kə siəkinə bɔkɔasɛ́á, bá ka báá bakɛamabɛ́á yáyɛ́ná bɛndɔ bá Kalɛ́lɛa bəkimə əə́?

³Bóo! Mɛ ndɔ bənú nɔ́yɛ́ lɛna; ábá nɔ sá mɛlɛ́má kɔ́ŋɔ́na, nɔ ŋɔ nímínə ɛ́sɛ́á bəə́bu.»

⁴«Ɔ nɛ́ɛnɛ niómo nɛ́ bɛndɔ na bánámanɛ́ ɔbá hɛlíɔ́ŋɛ́líɔ́ŋɛ́ hɛ́ ɛsalɛ yɛ́ Silowə́ hɛ́ ná ɔ́kɔ́kɔ́ ikúílí hɛ́ ná sukúnúə́kíə́, nɔ ndɔ fɛka ɔwá, bá ka báá na tɔkɔma yáyɛ́ná bə́ə́ní bɛndɔ bɔ́mɔtɛ́ bá Yəlúsalɛma əə́?

⁵Bóo! Mɛ ndɔ bənú lɛna ɔwá, ábá nɔ sá mɛlɛ́má kɔ́ŋɔ́na, nɔ ŋɔ nímə bənú bəkimə ɛnya ɛmɔtɛ́ ɛ́sɛ́á bəə́bu.»

⁶Yə́susu a na wúuwu ɔŋana táá a sɛ́á: «Mɔndɔ ɔmɔtɛ́ a ka báá na bɔlɛ́á bɔ́ tɔtámátámá ɔbɔ́á bá ndɔ ɛ́lɛnɛna bá sɛ́á bufíkiə, nɛmátɔ́ ɔ ɔwayɛ́ ɛtɔbɔtɔ́bɔ́, a ka ndasá ɔmɔ́yɛ́ ɔ tɔtámátámá usiə, mba, a sa yámá ata hímotí.

⁷Nɔ́yɛ́, a ná mɔnyɛna wa ɛtɔbɔtɔ́bɔ́ lɛ́na a sɛ́á: “Siəlínə, ɔ́ tuɔŋɔ tɔ́lálɔ́ tɔ́ɔtɔ niɔfɛ́nɛ mɛ́ ndɔ ndasá ɔ tɔtámátámá usiə ɔ bɔ́ɔbɔ bɔlɛ́á, mɛ lɛ yámá ata hímotí, sɔ́mbá bɔɛ́ta. Ɛlɔ́áyɛ́ yatɛ́ bɔ́ ndɔ misí húínəsiə itə́mbí ə́ə́?”

⁸Mba, mɔnyɛna wa ɛtɔbɔtɔ́bɔ́ a sɛ́á: “Á Isə́lúkú, níásá bɔɛ́ta tɔ́na ɔ híihi hiɔŋɔ, mɛ́ nianá súkúnə́kínə ɔ mamɛ́ŋɛ́, mɛ́ misí kúlə́kínə.

⁹Ɔmbáŋíndíə́, bɔ́ ŋɔ tɔtámátámá hákɛna ɔ hiɔŋɔ ɔhɛ́á hɛ́ lɛ́á ɔ ɔsákɔna, yɛ́ sá báá nɔ́yɛ́, ɔ bɔɛ́ta sɔ́mba.”»

¹⁰Ɔ bɔ́mɔtɛ́ buɔsɛ́ bɔ́ Sábatɛ, Yə́susu a ka bá a ndɔ úkúniə ɔ yɛmɔtɛ́ miímə yɛ́ mabɛ́kálɛ́na.

¹¹Wɔmɔtɛ́ muəndú a ka báá ɔmɔ́tɔ́yɛ́ úndúə́tɔ́ na umbúínyi mɔbɛ́á ɔwá wɔ́ ná wɛɛ́ya híə́nə́síə́ ɛkátá, hata yɛ ikúílí ɔ niómo nɛ́ tuɔŋɔ na tɔ́námanɛ́, a ka báá úmbímə́tɔ, a lɛ ósó ɔbɛ́nɛ́mɔ́na wɛɛ́ya mukimə.

¹²Ikúílí Yə́susu a ná wɛ́ɛ́yɛ́ muəndú yámá, a ná wɛɛ́ya ɛ́lɛ́na, a ná wɛɛ́ya lɛ́na a sɛ́á: «Á muəndú, Huɛlɛ́ a ná aŋɔ́á sɔ́tɔ́ná ɔ ɔwáwɔ bɔkátá.»

¹³Yə́susu a ná wɛɛ́ya makátá talɛna; ɔ umisíumə́ a ná nɛ́mɔ́nɔ́á, a ná lúmə́ á Huɛlɛ́ ɔ ɔnyama.

¹⁴Mba isə́lúkú yɛ́ miímə yɛ́ mabɛ́kálɛ́na a ka məsə́kə ɔ́kɔ́ bɔkɔasɛ́á, Yə́susu a ka wɛ́ɛ́yɛ́ muəndú niŋəsiə ɔ buɔsɛ́ bɔ́ Sábatɛ. A ná yɛ́ɛ́yɛ́ ikúílí nɛmɔndɔ lɛ́na a sɛ́á: «Tunó tɔ́ lɛa tɔ́lɛ́ndálɔ ɛlɔ́áyɛ́ buolí, nɔ́ sákɔ́na nə́ə ɔkɛaka ɔwá bá bənú níŋə́sə́kíə́ ɔ tɔ́táyɛ́ tunó, mba, tátá ɔ buɔsɛ́ bɔ́ Sábatɛ.»

¹⁵Isə́lúkú a sɛ́á: «Á bɛndɔ bá nɛbɛ́nyɔ́nyɔlɔ! Ɔ buɔsɛ́ bɔ́ Sábatɛ abáka mɔɛ́ta tɛ́á a lɛ yáyɛ́á ɛfɔŋɔ, ata yáyɛ́á ɛnjakásɛ tuŋúnə ɔ hikutə́ ɔkɛaka ɔwá a yɛɛ́ta nyə́síə́ əə́?

¹⁶Mba wɔ́ɔwɔ muəndú, wa miímə yɛ́ Ábɛlaháma ɔwá Sátana a ná ɔ́lɔ́kɔ́kɔ ɔ́ niómo nɛ́ tuɔŋɔ na tɔ́námanɛ́ tɔ́ɔtɔ, yɛ́ lɛ báá hɔ́ánánátɔ́ ɔwá mɛ wɛɛ́ya yə́yíə́ mikolí húmbúlə́kə ɔ buɔsɛ́ bɔ́ Sábatɛ əə́?»

¹⁷Ikúílí Yə́susu a ná bá a ndɔ hɔ́ɔ́ nɔ́yɛ́, ɛsɛ́má yɛ́ ná báyɛ́á bəbəniə bəkimə itíə́, mba, nɛmɔndɔ nikimə nɛ́ ka bá nɛ́ ndɔ bílə́nə ɛlɔ́áyɛ́ bɛkɔa bɛ́ yələ́mənə ɔbɛ́á a ná báá a ndɔ kɛa.

¹⁸Yə́susu a ná wúuwu ɔŋana táá a sɛ́á: «Ɔ yatɛ́ Nɛmanɛna nɛ́ Huɛlɛ́ nɛ́ ná hɔ́ákána əə́? Ɔ yatɛ́, mɛ ŋɔ óso ɔ nɛɛ́ta ukətiə əə́?

¹⁹Nɛ́ ná hɔ́ákána ɔ niísə nɛ́ hɛlɔa ɔnɛ́á mɔndɔ a ná ɛ́tá, a ná kánɛ́má ɔ ɔwáyɛ́ ɛtɔbɔtɔ́bɔ́, nɛ́ lɔ́á, nɛ́ híána hɛlɛ́álɛ́á, tunoní tɔ́ ɔmbáŋá tɔ́ nda mə́búə́ maana falábáka ɔ ɔwayɛ́ mɛlɛ́áfɛ.»

²⁰A ná láá tɔ́na a sɛ́á: «Ɔ yatɛ́ mɛ óso ɔ Nɛmanɛna nɛ́ Huɛlɛ́ ukətiə əə́?

²¹Nɛ́ lɛa hɔ́ákátɔ́ ɔ mətəkí ɔmá muəndú a ná bulə́lə́kínə ɔ nioko nɛ́ uŋuŋú wɔ́ iŋəŋə́ ɔkɛaka ɔwá ilufə́lufə yikimə yɛ́ nyɔtáka.»

²²Yə́susu a ka bá a ndɔ tɔ́mbɛ́na ɔ bətínə́ na mɔnɔŋɔ, a ínə́kiniə ɔ wákaka ɔ Yəlúsalɛma.

²³Wɔmɔtɛ́ mɔndɔ a ná wɛɛ́ya batá a sɛ́á: «Á Isə́lúkú, ɔ́maná tɛ́tɛ́á yɛ bɛndɔ á Huɛlɛ́ a ŋɔ nuəkəniə ə́ə́?» A ná bəə́bu bíhíə́níníə́ a sɛ́á:

²⁴«Nɔ́ bɛ́kánɛ́na ɔ ufínə ɔ nikí nɛ́ tɔ́tɛ́hátɔ́ bɔkɔasɛ́á, mɛ ndɔ bənú nɔ́yɛ́ lɛna, bəəŋí bá ŋɔ siəkə ɔ ufínə, mba, bá sɔ́ ŋɔ óso.»

²⁵Ikúílí Isə́lúkú yɛ miímə a ŋɔ hɔalɛna, a ŋɔ nikí fanjaka, nɔ ŋɔ báá ɔ níə́lətíə́, nɔ ŋɔ lúmə ɔ nikí ukitə nɔ sɛ́á: «Á Isə́lúkú kunə́ bəsú!» A ŋɔ bənú bíhíə́niniə a sɛ́á: «Uwənú, mɛ lɛ ndɔ manya hə́níə́ nɔ ná húlínə.»

²⁶Nɔ́yɛ́, nɔ ŋɔ lúmə ɔ ɔwayɛ́ ɔlɛna nɔ sɛ́á: «Tɔ ka nɛ́áka, tɔ ka nyákɛna na aŋɔ́á, ɔ ka ínə́kiniə ɔ mɛnɔ́mɛ yɛ́ yəsúə́ bətínə́!»

²⁷A ŋɔ bənú lɛna a sɛ́á: «Mɛ lɛ ndɔ manya hə́níə́ nɔ nɔ́ húlínə. Nɔ́ bísúə́lə́ hata na mɛaŋɔ́á bənú bəkimə ɔbá nɔ́ ndɔ bɔbɛ́á kɛa.»

²⁸«Ɔmɔ́yɛ́ malɛlá na nikótó nɛ́ bɛka nɛ́ ŋɔ bámɛnɛna, ikúílí nɔ ŋɔ Ábɛlaháma, Ísakɛ, Yákɔbɔ, na bɔhɛ́nátɔtányɛ́ bəkimə siəkinə ɔ Nɛmanɛna nɛ́ Huɛlɛ́, mba uwənú, nɔ ŋɔ báá ombókótɔ́ ɔ níə́lətíə́.

²⁹Bɛndɔ bá ŋɔ húlə́kə ɔ nɛhɔalɛ́nɛ́ná, na nɛsianɛ́ná, ɔ mɔkɔndɔ, na ɔ makɛ́ka tɔ́na ɔkɛaka ɔwá, bá tuənə́kínə ɔ ɛtáka ɔ Nɛmanɛna nɛ́ Huɛlɛ́.

³⁰Nɔ́yɛ́, bɔ́mɔtɛ́ ɔbá bá lɛ́á bitifə́tifə isíŋáka, bá ŋɔ báá bə́búsíə́, ɔ bə́ə́ní ɔbá bá lɛ́á bə́búsíə́ isíŋáka bá ŋɔ bá bitifə́tifə.»

³¹Ɔ yɛ́táyɛ́ ikúílí, bɔ́mɔtɛ́ Bɛfalísia bá ná bɛ́nyálɛ́la ɔ ɛmɛ́ŋɛ́ yɛ Yə́susu, bá ná wɛɛ́ya lɛ́na bá sɛ́á: «Hɔalɛ́na háha, káka ɔ ɛbɔ́ka yinə́yinə́ bɔkɔasɛ́á, Əlóto a ndɔ siə ɔwáwɔ ɔwɔ́nɔ.»

³²Yə́susu a sɛ́á: «Nɔ́ ákáka, nɔ́ wɛ́ɛ́yɛ́ mɔŋɛ́na lɛná nɔ sɛ́á: “Mɛ ndɔ imbúínyi mɛbɛ́á bulə, mɛ ndɔ bɛnákɛnákɛ niŋəsiə niɔfɛ́nɛ na bulílə́, ɔ tunó túnúdúsíníə́ tɔ́lálɔ́ mɛ ndɔ bɔ́ámɛ́á buolí hɔ́nala.”

³³Ɔ taká, yɛ́ lɛa hɔ́ánánátɔ́ ɔwá mɛ yámɛ́á ɛnɔ́mɛ ɔŋgɔ́kɔ niɔfɛ́nɛ, bulílə́ na ɔ buɔsɛ́ ɔsákɔna bɔkɔasɛ́á, yɛ́ lɛ bá muɛsɛ ɔwá bá mɔhɛ́nátɔtányɛ́ ɔ́nɔ́kɔ́ ɔ ɛbɔ́ka yinə́yinə́ yɛ́ sá báá ɔ Yəlúsalɛma.»

³⁴«Á Yəlúsalɛma, á Yəlúsalɛma, ɔwáwɔ ɔwá ɔ ndɔ bɔhɛ́nátɔtányɛ́ ɔ́nɔ, bááyɛ́ ɔbá Huɛlɛ́ a ndɔ aŋɔ́á lɔ́mɛ́na ɔ bəə́bu ɔ́nɔ́kɔ́ na miɔkɔ, bikúílí bɛ́nɛ́á mɛ ná híkə́kíə́ ɔ báwɔ́á baná ɔkɔtala ɔ ɔwámɛ ɛmɛ́ŋɛ́, ɛ́sɛ́á abáka ilínə yɛ́ miɔkɔ́ yɛ́ báyɛ́á banámiɔkɔ́ kɔtaka ɔ ɔwáyɛ́ matá ma bibə́ku. Mba, nɔ sa nɔ́yɛ́ hikiə.

³⁵Siəkínə! Bɛndɔ bá ŋɔ yənúə́ miímə tíkə, mɛ ndɔ bənú nɔyɛ́ lɛna, nɔ sɔ́ ŋɔ mɛaŋɔ́á sinə tɔ́na ɔkafámáká ɔ ikúílí nɔ ŋɔ laa nɔ sɛ́á: “Huɛlɛ́ a wɛ́ɛ́yɛ́ sáná ɔwá a ndɔ ndasá ɔ niínyə nɛ́ Isə́lúkú!”»