Read Tunen Lúkasɛ 14 Bible Online

Lúkasɛ 14 - Tunen bible

Lúkasɛ 14

¹Ɔ hímotí hinó hɛ́ Sábatɛ, Yə́susu a ná ákáná ɔ ɔmbɛ́la wɔ́ yɛmɔtɛ́ isə́lúkú yɛ Bɛfalísia ɔkɛaka ɔwá a nɛaka. Bááyɛ́ ɔbá bá ná báá ɔmɔ́tɔ́yɛ́, bá Yə́susu tɛ́káka hoóyíhoóyi.

²Mɔndɔ wa mɔɔ́mbɔ a ka báá ɔmɔ́yɛ́ á Yə́susu busíə́, a ka báá náatɔ́ ɔ tɔndɛmá.

³Yə́susu a ná ɛtambá ɛ́ta, a ná bamanyumbə́ndə́ na Bɛfalísia batá a sɛ́á: «Wə́súə́ umbə́ndə́ wɔ́ ndɔ kuənjə índiə ata ɔ mɔndɔ uniŋəsiə ɔ hinó hɛ́ Sábatɛ ə́ə́?»

⁴Mba, bá sa hikiə ɔbɛ́kámɔsɔna; nɔ́yɛ́, Yə́susu a ná ɛnákɛnákɛ itíə́lə, a ná wɛɛ́ya niŋə́síə́, a ná wɛɛ́ya tilə́síə́.

⁵Ɔwɔŋgɔkɔnɔ, a ná bəə́bu lɛ́na a sɛ́á: «Ɛ́yánɛ́ ɔ uwə́nú ətíə́, ábá wayɛ́á mɔná ata yáyɛ́á ɛfɔŋɔ yɛ́ ná kɔ́á ɔ hɛfɛa hɛ́ mənífə́, a sɔ́ ŋɔ yɛɛ́ta húliə tɔfá ata ɔ hinó hɛ́ Sábatɛ əə́?»

⁶Bá sa óso ɔ yɛ́táyɛ́ ɛmbataka ɔbɛ́kámɔsɔna.

⁷Yə́susu a ná ɛ́ná ɛ́sɛ́á bɛndɔ ɔbá bá ná ɛ́lɛ́ákɛ́na bá ndɔ tɛ́fa há bɛbɔ́ka bɛɛsɛ; ɛlɔ́áyɛ́ nɔ́yɛ́, a ná bəkimə wúuwu ɔŋana tɛ́ná a sɛ́á:

⁸«Ábá mɔndɔ a ná aŋɔ́á ɛ́lɛ́ákɛ́na ɔ nɛnɛ́á nɛ́ nɛ́bɛ́lɛna, ɔ lɛ kətuə́nə ɔ ɛbɔ́ka yíbúsíə́ bɔkɔasɛ́á, bá óso ɔ mɔndɔ wa tuúmə ɔwɛ́lɛakɛna ɔwá a ná aŋɔ́á yayɛna,

⁹ɔkɛaka ɔwá mɔndɔ ɔwá a ná bənú ɛ́lɛ́ákɛ́na, a lɛ ndasá ɔwáwɔ ɔ ndalɛ́na a sɛ́á, niasɛ́ná wɛɛ́ya yɛ́ɛ́yɛ́ ɛbɔ́ka. Nɔ́yɛ́, ɔ hɔalɛna na ɛsɛ́má yikimə, ɔ ákána ukətúə́nə ɔ ɛbɔ́ka yɛ́ nitifə́.

¹⁰Ɔ nifəŋə, ikúílí bá ná aŋɔ́á ɛ́lɛ́ákɛ́na, káka tuə́nə́ ɔ ɛbɔ́ka yɛ́ nitifə́ ɔkɛaka ɔwá, wɛ́ɛ́yɛ́ ɔwá a ná aŋɔ́á ɛ́lɛ́ákɛ́na, a nda aŋɔ́á lɛ́na a sɛ́á: “Á yamɛ́á ɛŋgɔ́áyɛ́ sɔ́nɔ ɔ ndə́túə́nə ɔ ɛbɔ́ka yɛɛsɛ.” Nɔ́yɛ́ ɔ ŋɔ bá na tuúmə ubusíə́ bɔ́ bááyɛ́ bəkimə ɔbá bá ŋɔ báá ɔ ɛtáka na aŋɔ́á.

¹¹Ɔ taká, ata ɛ́yánɛ́ mɔndɔ ɔwá a ndɔ bíbə́liə, bá ŋɔ wɛɛ́ya lolosoliə; wɛ́ɛ́yɛ́ ɔwá a ndɔ bílólosoliə, bá ŋɔ wɛɛ́ya bə́ləliə.»

¹²Yə́susu a ná wɛ́ɛ́yɛ́ lɛ́na ɔwá a ná wɛɛ́ya ɛ́lɛ́ákɛ́na a sɛ́á: «Ikúílí ɔ nɔ́ nɛnɛ́á índiə ɔ kɔɔsɔ mbá ata ɔ bɛkɔlakɔ́lá, ɔ lɛ máwɔ́á maŋgɔ́áyɛ́ ɛ́lɛ́ná, ata báwɔ́á bənínyə́, bɛndɔ bá nɛ́áwɔ́á nikúlə, ata báwɔ́á bənísə́ bá bɔ́ŋɔ́tɔ bá ɛmɛ́ŋɛ́; yɛ́ sá báá nɔ́yɛ́, ikúílí bááyɛ́ bá ŋɔ aŋɔ́á ɛ́lɛakɛna, bá ŋɔ aŋɔ́á híə́niniə yatɛ́ ɔyɛ́á ɔ ná bəə́bu índíə́kínə.

¹³Ɔ nifəŋə, ikúílí ɔ ndɔ nɛnɛ́á tíkə, ɛ́lɛ́ákɛ́ná tɔtɔyɔ́nɔ́, bɛáta, bɛkátá na bəndímə́ndímə.

¹⁴Ɔ ŋɔ bá na nɛhɔnɔ bɔkɔasɛ́á, bátáyɛ́ bá sɔ́ ŋɔ óso ɔ ɔwáwɔ uhíə́niniə yatɛ́ ɔyɛ́á ɔ ná bəə́bu kɛ́áka. Ɔ taká, Huɛlɛ́ a ŋɔ aŋɔ́á híə́niniə bɛ́táyɛ́ bikimə ɔ nɛhɔŋɔa nɛ́ bátaká.»

¹⁵Əlimə yɛ bɛ́ɛ́yɛ́ bɛtambá ɔwɔ́kɔ, ɔmɔtɛ́ ɔwá a ná báá ɛtáka, a ná Yə́susu lɛ́na a sɛ́á: «Nɛhɔnɔ na wɛ́ɛ́yɛ́ ɔwá a ŋɔ nioko ɛta ɔ nɛnɛ́á ikúílí ɔyɛ́á Huɛlɛ́ a ŋɔ ndahíáná ɔ ɔwayɛ́ Nɛmanɛna.»

¹⁶Yə́susu a ná wɛɛ́ya wúuwu ɔŋana tɛ́ná a sɛ́á: «Mɔndɔ ɔmɔtɛ́ a ka nɛnɛ́á tíkə, a ná ɛ́lɛ́ákɛ́ná bɛndɔ bəəŋí.

¹⁷Ikúílí yɛ́ ɔnɛ́á yɛ́ ná ndáfámá, a ná wayɛ́á mɔnyɛna lɔ́má ɔwá a bááyɛ́ siə́kə ɔbá a ná ɛlɛ́ákɛ́na, a sɛ́á: “Nɔ́ sɔ́nɔ isíŋáka bikimə bɛ́ lɛa tábɔ́nákátɔ.”»

¹⁸«Nɔ́yɛ́, ɔ́maná ɛ́sɛ́á bá ná hɔ́kɛ́na ɔbánɔ́, bəkimə bá ná lúmə ɔ ɔbɛ́níásɛna.» Wəbusíə́ a ná mɔnyɛna lɛ́na a sɛ́á: «Mɛ nɔ́ húlə ɔ ɛtɔbɔtɔ́bɔ́ ɔwɔ́ndɔ. Yɛ́ lɛa hɔ́ánánátɔ́ ɔwá mɛ ká yɛɛ́ta siəlínə, tɔ́kɔ́lɛ, niasɛ́na mɛaŋɔ́á.»

¹⁹Wɔmɔtɛ́ a sɛ́á: «Mɛ ka mahámɔ́ má bɛfɔŋɔ ɔ́ndɔ álánɔ, mɛ ndɔ siə mɛ ká bɛɛ́ta bɛ́kánɛ́na ɔ ɔnyɛna; tɔ́kɔ́lɛ niasɛ́ná mɛaŋɔ́á»

²⁰Wɔmɔtɛ́ a sɛ́á: «Mɛ nɔ́ húlə ɔ ɔbɛ́lɛna; ɛlɔ́áyɛ́ nɔ́yɛ́ mɛ sa ósó ɔndafama.»

²¹Ikúílí mɔnyɛna a ná kə́tílə́ ɔ bɔsɔ́ma, a ná Isə́lúkú nífúnə́kínə́ ɛ́sɛ́á bá ná wɛɛ́ya bɛ́kámɔ́sɔ́na. Ɔ umisíúmə́, muití ɔmbɛ́la a ná məsə́kə ɔkɔ, a na mɔnyɛna lɛ́na a sɛ́á: «Tɛbálɛ́na, káka ɔ bɛbɔ́ka bikimə, na ɔ bɛnɔ́mɛ bikimə bɛ́ bətínə́, húlə́nə́ tɔtɔyɔ́nɔ́ háha, bɛkátá, bəndímə́ndímə na bitíndə.»

²²Əlimə yɛ ikúílí, mɔnyɛna a ná Isə́lúkú lɛ́na a sɛ́á: «Yatɛ́ ɔyɛ́á ɔ ná manɛ́na, mɛ ná kɛ́áká, mba, bituənínə́ bɛ́ nabáka.»

²³Isə́lúkú a ná yɛ́ɛ́yɛ́ ikúíli mɔnyɛna bíhíə́níníə́ a sɛ́á: «Fáma, káka ɔ bɛnɔ́mɛ bikimə bɛ́ mahɔ́ma na bɛ́ ɛmɛ́ŋɛ́ mɛkákɔ, íkíníə́ bəə́bu bá fíə́kínə ɔ kɛaka ɔwá yamɛ́á miímə yɛ́ úndúə́.»

²⁴Ɔ taká, mɛ ndɔ bənú nɔ́yɛ́ lɛna: Ata ɔmɔtɛ́ ɔbá mɛ ná ɛlɛ́ákɛ́na, a sa ndá bɛ́ámɛ́á bɛ́labɔ́nɛ́á ɔ́kɔ́lɛ́na.

²⁵Iloŋo yɛ́ bɛndɔ yɛ́ ka báá yɛ́ ndɔ kɛnda na Yə́susu, á bɛ́kɔ́ŋɔ́ná, a ná bəkimə lɛ́na a sɛ́á:

²⁶«Ata ɛ́yánɛ́ ɔwá a ndɔ ndasá na mɛaŋɔ́á a ná hɔ́ánána ɔwámɛ uhikiə yáyɛ́ná yayɛ́á isə́, yayɛ́á inyə́, wayɛ́á muəndú na báyɛ́á baná, báyɛ́á bənísə́ ɔ balɛ́mɛndɔ́, na bəəndú, yáyɛ́ná bɔ́áyɛ́á buɔmɔ́ bɔ́ bɛ́múɛ́tɛ́. Yɛ́ sá báá nɔ́yɛ́, a sa ósó ɔbáá wamɛ́á mɔkɔ́nɛna.

²⁷Wɛ́ɛ́yɛ́ ɔwá a lɛ ndɔ wə́yíə́ ɔmbásá túána ɔkɛaka ɔwá a mɛaŋɔ́á ɔ́ŋgɔ́kɔ, a sa ósó ɔbáá wamɛ́á mɔkɔ́nɛna.»

²⁸«Ɔ taká, ɛ́yánɛ́ ɔ uwənú ətíə́ ɔwá a ndɔ siə ɔ miímə mɛŋɛ́ŋa ɔ ɔfalaba, a lɛ naŋɔ́ tuənə ɔ misí ɔkɛaka ɔwá, a masɛma fanáká mbá a manyá ábá a lɛa na məndunə́ má buolí ɔ ɔhɔ́nala əə́?

²⁹Ábá a ná miímə tɛ́kɛ́ná a lɛ hɔ́nála ɔ ɔfalaba, bəkimə ɔbá bá ŋɔ nɔ́yɛ́ siəkinə, bá ŋɔ wɛɛ́ya ɔnɔkɔ.»

³⁰Bá sɛ́á: «Wɔ́ɔwɔ mɔndɔ a ka botoliə ɔ miímə ɔfalaba, mba, a sa kafáma ɔ ɔhɔ́nala.»

³¹Hɔ́ánánátɔ́, ábá munəni ɔmɔtɛ́ a ndɔ siə ɔwakána ɔ bilə́ na wɔmɔtɛ́ munəni, a ndɔ naŋɔ́ tuənə ɔ misí, a bɛ́bata a sɛ́á: «Mɛ báka na niómo nɛ́ tukóló nɛ́ bɛndɔ. Mɛ ósó ɔ wamɛ́á mubəniə ɔkásɔ́na ɔwá a lɛ́á na moómo áfandɛ́ má tukóló má bɛndɔ ə́ə́?»

³²Mba, yɛ́ sá báá nɔ́yɛ́, ikúílí ɔyɛ́á wɛ́ɛ́yɛ́ munəni a nalɛ́á hata, a wɛɛ́ya basɔ́másɔma lɔ́mɛ́na ɔwá bá bumbə́nú tɔa.

³³Hɔ́ánánátɔ́, ata ɔmɔtɛ́ ɔ uwə́nú ətíə́ a sa ósó ɔbáá wamɛ́á mɔkɔ́nɛna ábá a sá sáŋɔ́na bikimə ɔbɛ́á a lɛ́á itíə́nə́tɔ.

³⁴«Ibusə́ yɛ́ lɛa bɔɔ́la buɛsɛ; mba ɛ́bá yɛ́ ná sɔnɔ́á na yatɛ́ bá ŋɔ máyɛ́á matáma híə́niə əə́?

³⁵Yɛ́ lɛ báá yɛɛsɛ ata ɔ misí mbá ata ɔ nianá: Bá yɛɛ́ta omboko ɔ niə́lətíə́. Wɛ́ɛ́yɛ́ ɔwá a lɛ́á na məlúə́ má ɔ́wɔ́kɔ́nɔ, á ɔ́kɔ́kɛ́na.»