Read Tunen Lúkasɛ 15 Bible Online

Lúkasɛ 15 - Tunen bible

Lúkasɛ 15

¹Bakɔtabɛtásɛ na bɔ́mɔtɛ́ bakɛamabɛ́á bəkimə bá ka nda tɔ́mbálɛ́la á Yə́susu ɛmɛ́ŋɛ́ ɔ ɔwáyɛ́ ɔwɔ́kɔ.

²Bɛfalísia na bamanyumbə́ndə́ bá ka báá bá ndɔ bílúlə bá sɛ́á: «Wɔ́ɔwɔ mɔndɔ a ndɔ bakɛamabɛ́á káha, a nɛ́áka tɔ́na na bəə́bu.»

³Ɔ yɛ́táyɛ́ ikúílí, Yə́susu a ná bəə́bu wúuwu ɔŋana tɛ́ná a sɛ́á:

⁴«Ábá ɔmɔtɛ́ ɔ uwənú ətíə́ a báka na ɛbɔ́ɛ́yɛa yɛ́ ɛndɔ́mbá mbá úmotí wɔ́ ná nyɔ́áká, a sɔ́ ŋɔ yííyí moómo ibo na ibo yɛ́ ɛndɔ́mbá tíkə ɔ makɔ́tákɛ ɔkɛaka ɔwá a ká wííyí síə́kə ɔwá wɔ́ ná nyɔ́áká ɔ nindínə́ ɔnɛ́á a muítə bɔ́ŋɔ əə́?

⁵Ikúílí a ná muítə bɔ́ŋɔ́, a muítə tála na nɛhɔnɔ nikimə ɔ ɔwayɛ́ bɛɔsɔlɛ,

⁶a ndahíáná ɔ ɔmbɛ́la, a máyɛ́á maŋgɔ́áyɛ́ ɛ́lɛakɛna na báyɛ́á bəkúlə́kulə, a sɛ́á: “Nɔ́ bílə́nə́kə́ na mɛaŋɔ́á bɔkɔasɛ́á, mɛ ná wə́míə́ ɔndɔ́mbá bɔ́ŋɔ́ ɔwá wɔ́ ná nyɔaka.”

⁷Hɔ́ánánátɔ́, mɛ ndɔ bənú nɔ́yɛ́ lɛna, nɛhɔnɔ nɛŋɛ́ŋa nɛ́ ŋɔ báá ɔ nɔɔ́mɛná ɛlɔ́áyɛ́ mɔkɛamabɛ́á ɔmɔtɛ́ ɔwá a ŋɔ mɔlɛ́má kɔ́ŋɔ́na yáyɛ́ná bááyɛ́ moómo ibo na ibo bátaká ɔbá bá sá hɔ́ánana ɔ mɔlɛ́má ɔkɔ́ŋɔ́na.»

⁸«Ata ɛ́yánɛ́ muəndú, ábá a lɛa na niómo nɛ́ bɛcácɔ́ mbá ɛ́mɔtɛ́ yɛ́ ná nyɔ́áká, abáka a itiəkətiəkə tiə, a miímə sɔnɔkɔ, a siəkə muɛsɛ, ɔ nindínə́ ɔnɛ́á a yɛɛ́ta bɔŋɔ.

⁹Ikúílí a ná yɛɛ́ta bɔ́ŋɔ́, a bɛŋgɔ́áyɛ́ bɛ́ bəəndú ɛ́lɛakɛna na bá mamɛ́ŋɛ́ ɔ ɔwayɛ́ ɔmbɛ́la a bəə́bu lɛna a sɛ́á: “Nɔ́ sɔ́nɔ, nɔ́ bílə́nə́kə́ na mɛaŋɔ́á, bɔkɔasɛ́á, yámɛ́á ɛcácɔ́ ɔyɛ́á yɛ́ ná nyɔ́áká mɛ ná yɛɛ́ta bɔŋɔ.”

¹⁰Hɔ́ánánátɔ́, mɛ ndɔ bənú lɛna, nɛhɔnɔ nɛ́ báka á Huɛlɛ́ busíə́ na bɔ́ bɛáŋgɛlɛ ɛlɔ́áyɛ́ mɔkɛamabɛ́á ɔmɔtɛ́ ɔwá a ná mɔlɛ́má kɔŋɔna.»

¹¹Yə́susu a ná manyɔ́ laa a sɛ́á: «Mɔndɔ ɔmɔtɛ́ a ka báá na baná balɛ́mɛndɔ́ báfandɛ́.

¹²Hinó hímotí, ikukə yɛ́ mɔná a ná yayɛ́á isə́ lɛ́na a sɛ́á: “Á Ába, índíə́ mɛaŋɔ́á yámɛ́á ɛsalɛ yɛ́ nɛmbiaŋɛ ɔnɛ́á mɛ ná hɔ́ánána ukusənə.” Əlimə yɛ nɔ́yɛ́, isə́ a ná nɛmbiaŋɛ əfə́níə́ ɔ ətíə́ yɛ báyɛ́á baná báfandɛ́.

¹³Tɛ́tɛ́á yɛ mɔɔsɛ́ yɛ́ tɔ́mbá, ikukə a ná bɛ́áyɛ́á bɛɛ́la kɔtáka, a ná ákána ɔ bɔnɔŋɔ bɔ́ hata, ɔmɔ́tɔ́yɛ́ a ná bɛɛ́ta fɔlɔ́náka.

¹⁴Ikúílí a ná bikimə hɔ́á ɔ ɔfɔlɔna, mətíli má ná fínə́ ɔ bɔnɔŋɔ, a sa bá tɔ́na na bɔ́labɔ́nɛ́á.

¹⁵A ná ákáná ɔ buolí ɔ wɔmɔtɛ́ mɔndɔ wa bɔ́táyɛ́ bɔnɔŋɔ. A ná wɛɛ́ya lɔ́má ɔ ɔwayɛ́ ɛtɔbɔtɔ́bɔ́ ɔ mɛkɔnɛ́fɛ́ utə́tə́niə.

¹⁶A ka bá na ilókí yɛ́ bɛ́labɔ́nɛ́á bɛ́ mɛkɔnɛ́fɛ́ ɔnɛ́á, mba, ata mɔndɔ a sa wɛɛ́ya índiə.

¹⁷A ná bɛ́mánya, a ná lúmə́ ɔ ubílúmíniə a sɛ́á: “Bɔnyɛna bá yamɛ́á isə́ bá lɛa na bɛ́labɔ́nɛ́á ɔ ɔyáyɛ́na mbá nɔ́yɛ́, ɔwámɛ mɛ ndɔ wə́ə́ na mɛtaná!

¹⁸Ɛkasɛ mɛ́ hɔalɛ́na, mɛ tilə́ á yamɛ́á isə́ ɔmbɛ́la mɛ wɛɛ́ya lɛ́na ɔwá, a Ába mɛ lɛa bɛ́tɛ́ŋákɛ́nátɔ́ á Huɛlɛ́ busíə́ na aŋɔ́á,

¹⁹mɛ lɛ báá hɔ́ánánátɔ́ ɔbɛ́lɛnɛna ɛ́sɛ́á wawɔ́á mɔná, ɛtá mɛaŋɔ́á ɛ́sɛ́á wawɔ́á mɔnyɛna.”

²⁰A ná hɔalɛ́na, a ná ákáná á isə́ ɔmbɛ́la. Ɛ́sɛ́á a ná báá tɔ́na hata na ɔmbɛ́la, yayɛ́á isə́ a ná ká wɛɛ́ya yámá ɔ ɔsákɔna, mɛɛ́lɔ yɛ́ ná wɛɛ́ya wəə. A ná nyámálɛ́na ɔ ɔwayɛ́ nɛnyáná, a ná wɛɛ́ya bíbóŋóníə́.

²¹Mɔná a ná wɛɛ́ya lɛ́na a sɛ́á: “Á Ába, mɛ lɛa tɛŋákɛ́nátɔ́ ɔ busíə́ bɔ́ Huɛlɛ́ na aŋɔ́á, mɛ lɛ bá tɔ́na hɔ́ánánátɔ́ ɔwá bá mɛaŋɔ́á ɛ́lɛ́nɛ́ná wawɔ́á mɔná.”

²²Mba, isə́ a ná bɛ́áyɛ́á bɛɔlɛ́ lɛ́na a sɛ́á: “Nɔ́ bɔlɛŋa buɛsɛ húlə́nə́ tɔfá, nɔ́ wɛɛ́ya lɛŋáka, nɔ́ wɛɛ́ya hɛnɔ́mɛ́ná háá ɔ hɛnɔnɔ́ na bɛtafɛ́ná ɔ makɔlɔ́.

²³Nɔ́ mɔná ɛfɔŋɔ húlə́nə́ wa mɔhɔ́ŋɔ, nɔ́ yɛɛ́ta ɔnɔ. Tɔ́ nɛaka, tɔ́ yákɔ́bɔ́áka,

²⁴bɔkɔasɛ́á wamɛ́á mɔná wɔ́ɔwɔ a ka bá a nɔ wə́ə́, a nɔ́ ndahíáná ɔ buɔmɔ́, a ka bá a nɔ́ nyɔ́áka, mɛ ná wɛɛ́ya bɔŋɔ.” Ɛŋganda yɛ́ ná botólíə́.

²⁵Bɛ́ɛ́yɛ́ bikimə bɛ́ ndɔ bɛ́tɔ́mba mɔná wəbusíə́ a ka báá ɔ bɛtɔbɔtɔ́bɔ́. Ikúílí a ná báá ɔ ndahíánáká hoóyi na ɔmbɛ́la, a ná mayɔka má ɛŋganda ɔ́kɔ́ na məbínə́.

²⁶A ná wɔmɔtɛ́ mɔnyɛna ɛ́lɛ́ákɛ́na, a ná wɛɛ́ya batá yatɛ́ yɛ́ ndɔ bɛ́tɔ́mba.

²⁷Mɔnyɛna a sɛ́á: “Yáwɔ́á ikukə yɛ́ munínyə́ a nɔ́ ndahiana; ɔ́ ɛlɔ́áyɛ́ nɔ́yɛ́ yawɔ́á isə́ a ná ɛfɔŋɔ yɛ mɔhɔ́ŋɔ ɔ́nɔ́ bɔkɔasɛ́á, wayɛ́á mɔná a ná ndáhíáná muɛsɛ.”

²⁸Hilóbi hɛ́ ná munínyə́ wəbusíə́ tuana, a ná kɔtɔ́ ɔ ufínə ɔ miímə.

²⁹Mba, a ná isə́ bíhíə́níníə́ a sɛ́á: “Ɔ́kɔ́kɛ́na! Ɔ́ tuɔŋɔ tɔ́nɛ́á mɛ́ ndɔ aŋɔ́á nyɛna, mɛ sa kinə ɔ ɔkɛa ata yatɛ́ ɔ ndɔ siə. Ata hinó hímotí ɔ sa mɛaŋɔ́á mɔná imúínyi índiə ɔkɛaka ɔwá mɛ bílə́nə́kə́ na bɛ́ámɛ́á bɛŋgɔ́áyɛ́.

³⁰Mba, ikúílí wɔ́ɔwɔ wawɔ́á mɔná a nɔ́ ndahíáná, ɔwayɛ́ ɔwá a nɔ́ ka máwɔ́á maasɛ məkimə tɛŋákɛ́ná na tɔsɔmɔ, ɛlɔ́áyɛ́ ayɛ́, ɔ nɔ́ ɛfɔŋɔ yɛ́ mɔhɔ́ŋɔ ɔ́nɔ.”

³¹Isə́ a sɛ́á: “Á wamɛ́á mɔná, ɔwáwɔ, bikúílí bikimə ɔ báka na mɛaŋɔ́á; bikimə ɔbɛ́á bɛ́ lɛ́á bɛ́ámɛ bɛ́ báka bɛ́áwɔ.

³²Mba, yɛ́ lɛa muɛsɛ ɔwá tɔ́ ɛŋganda tikə, tɔ́ yákɔ́bɔ́áká bɔkɔasɛ́á, wɔ́ɔwɔ wawɔ́á munínyə́ a ka bá a nɔ́ wə́ə́, a nɔ́ ndahíáná ɔ buɔmɔ́; a ka bá nyɔ́ákátɔ, á wɔ́ɔwɔ mɛ ná wɛɛ́ya bɔŋɔ.”»