Read Tunen Lúkasɛ 16 Bible Online

Lúkasɛ 16 - Tunen bible

Lúkasɛ 16

¹Yə́susu a ná báyɛ́á bɔkɔ́nɛna lɛ́na tɔ́na a sɛ́á: «Wɔmɔtɛ́ mɔmbiaŋɛ a ka bá na mɔkɛndana wa máyɛ́á maasɛ ɔwá, bá ná ndásɔ́mɛ́na ɔ ɔwayɛ́ busíə́ bá sɛ́á, a ndɔ máyɛ́á maasɛ tɛŋɛna.

²Isə́lúkú a ná wɛɛ́ya ɛ́lɛ́ákɛ́na, a ná wɛɛ́ya lɛ́na a sɛ́á: “Yatɛ́ mɛ ndɔ ɔ́kɔ ɛlɔ́áyɛ́ áwɔ əə́? Nífúnə́kínə́ mɛaŋɔ́á ɛ́sɛ́á ɔ ná mámɛ́á maasɛ bɛ́kɛ́ákɛ́ná bɔkɔasɛ́á, ɔ sɔ́ ŋɔ bá tɔ́na mɔkɛndana wa mámɛ́á maasɛ.”

³Mɔkɛndana a ná bílúmə́kíníə́ a sɛ́á: “Yatɛ́ mɛ háha kɛ́áka, ɛ́sɛ́á yamɛ́á isə́lúkú ɛkasɛ a mɛaŋɔ́á húə́líníə́ ɔ ɔwayɛ́ maasɛ ɔkɛndana əə́? Buolí ɔnyɔɔ ɔ ɛtɔbɔtɔ́bɔ́ əə́? Mɛ lɛ báá na iŋgínə́; mɛ́ ndɔlɔ́kɔ ɔbánɔ́ əə́? Mɛ ndɔ sɛ́ma.

⁴Ɛ́ɛ! Mɛ ná manyá yatɛ́ ɔyɛ́á ɛkasɛ mɛ kɛ́áka ɔkɛaka ɔwá, ábá bá ná mɛaŋɔ́á húə́líníə́ ɔ ɔwámɛ buolí, mɛ bá na bɛndɔ ɔbá bá ŋɔ mɛaŋɔ́á kusənə ɔ uwəbú mambɛ́la.”

⁵Ɔ yɛ́táyɛ́ ikúílí, a ná báyɛ́ bəkimə ɛ́lɛ́ákɛ́ná ɔmɔtɛ́ na ɔmɔtɛ́ ɔbá isə́lúkú a ná bá a ndɔ məhínə bata. A ná wəbusíə́ lɛ́na a sɛ́á: “Nəníə́ yamɛ́á isə́lúkú a ndɔ aŋɔ́á bata əə́?”

⁶A ná wɛɛ́ya lɛ́na a sɛ́á: “Ɛbɔ́ɛ́yɛa yɛ́ bɛbɔmbɔ bɛ́ mooló.” A ná wɛɛ́ya lɛ́na a sɛ́á: “Ɔ́ nɛ́áwɔ́á nɛfafɔ́ nɛ́ɛnɛ, tuə́nə́ tɔfá, tilə́kə́ moómo álánɔ.”

⁷Ɔwɔŋgɔkɔnɔ a ná muinə́muinə́ lɛ́na a sɛ́á: “Ɔwáwɔ, nəníə́ bɛ́áwɔ́á buhínə bɔ́ lɛ́á ə́ə́?” A sɛ́á: “Ɛbɔ́ɛ́yɛa yɛ́ mikutə yɛ́ iŋəŋə́.” Mɔkɛndana maasɛ a sɛ́á: “Ɔ́ nɛ́áwɔ́á nɛfafɔ́ nɛ́ɛnɛ, tilə́kə́ moómo ánámanɛ́.”

⁸Yayɛ́á isə́lúkú a ka mɔkɛndana mɔbɛ́á nyamaka bɔkɔasɛ́á, a ná ɛŋgɛ́lɛ́ bɛ́kɛ́ákɛ́na. Ɔ taká, bɛndɔ bá yɛ́ɛyɛ misí bá lɛa na ɛŋgɛ́lɛ́ bəə́bu na bəə́bu yáyɛ́ná baná bá isəmú.»

⁹Yə́susu ná kɔndá a sɛ́á: «Ɔwámɛ mɛ ndɔ bənú lɛna ɔwá, nɔ́ bɛŋgɔ́áyɛ́ síə́kə́ na mɔbɔ́ŋɔ má yɛ́ɛyɛ misí ɔmá má ndɔ nímbə́nə ɔkɛaka ɔwá, ɔ ikúílí má ŋɔ nímə, bɛ́táyɛ́ bɛŋgɔ́áyɛ́ bá bənú káhá ɔ bituənínə́ bɛ́ ikúílíə́kimə.

¹⁰Wɛ́ɛ́yɛ́ ɔwá a lɛ́á na yɔkɛ́nana ɔ bɔkɔa bɔtɛ́tɛ́á, a ŋɔ bá na yɔkɛ́nana ɔ bɔkɔa bɔŋɛ́ŋa, ata ɛ́yánɛ́ ɔwá a lɛ́á na mənímbə́nə́ ɔ bɔkɔa bɔtɛ́tɛ́á, a ŋɔ bá na mənímbə́nə́ ɔ bɔkɔa bɔŋɛ́ŋa.

¹¹Ábá nɔ lɛ bá na yɔkɛ́nana ɔ maasɛ má yɛ́ɛyɛ misí ɔmá má ndɔ nímbə́nə, ɛ́yánɛ́ a ŋɔ bənú maasɛ má taká índiə əə́?

¹²Ábá nɔ lɛ bá na yɔkɛ́nana ɔ maasɛ má bɔsɔ́kɔ́, ɛ́yánɛ́ a ŋɔ bənú índiə yatɛ́ ɔyɛ́á yɛ́ lɛ́á yə́nu əə́?

¹³Ata mɔnyɛna ɔmɔtɛ́, a sá óso ɔnyɛna bisə́lúkú bɛ́fandɛ́; a ŋɔ wəbusíə́ kóyokiə, á wɔ́ɔwɔ hikə́kíə́; ataná, a ŋɔ wɔ́ɔwɔ bɛ́ɔ́lɔ́kɔkɛna, á wə́ní yáŋɔ́nɛ́na. Nɔ sa ósó ɔnyɛna ikúílí ɛ́mɔtɛ́ Huɛlɛ́ na mɔnɛ́á.»

¹⁴Bɛfalísia bá ka bá bá ndɔ bɛ́táyɛ́ bɛtambá ɔ́kɔ bikimə, bá wɛɛ́ya ndɔ́sáka bɔkɔasɛ́á, bá ka bá bá ndɔ mɔnɛ́á hikiə.

¹⁵Yə́susu a ná bəə́bu lɛ́na a sɛ́á: «Nɔ ndɔ yə́núə́ taká ínə́niə ɔ məsíə́ má bɛndɔ, mba, Huɛlɛ́ a ndɔ yə́núə́ mɛlɛ́má manya bɔkɔasɛ́á, yatɛ́ ɔyɛ́á bɛndɔ bá ndɔ ɛta ɛ́sɛ́á bɔŋɛ́na, Huɛlɛ́ a ndɔ bɔɛ́ta hə́hə́niə.»

¹⁶«Umbə́ndə́ na bɔhɛ́nátɔtányɛ́ wɔ́ ka úndínə ɔ ikúílí yɛ́ Yɔhánɛsɛ Mɔsɔabɛndɔ; ɔ lúmə́kə ɔ yɛ́táyɛ́ ikúílí, bɛndɔ bá ndɔ Imbə́nú Yɛɛsɛ yɛ Nɛmanɛna nɛ́ Huɛlɛ́ túmbə́ləniə, mɔndɔ tɛ́á a ndɔ yáyɛ́á iŋgínə́ bɛ́kɛna ɔkɛaka ɔwá a ayɛ́ fínə́ umə́.»

¹⁷«Mba, nɔɔ́mɛná na misí yɛ́ óso ɔ nímínə ɛ́sɛ́á bifə́nə yáyɛ́ná hɛfɛtá hímotí ɔ ɛtambá yɛ́ umbə́ndə́ ɔ ɔwayɛ́ bɔtɛ́tɛ́á bukimə.»

¹⁸«Ata ɛ́yánɛ́ mɔndɔ ɔwá a ná wayɛ́á muəndú búlə́ mbá a ná bɛ́lɛ́ná muinə́muinə́, a ndɔ kɔa ɔ bɔbɛ́á bɔ́ nilókóno; ata ɛ́yánɛ́ ɔwá a ná muəndú bɛ́lɛ́ná ɔwá yayɛ́á ibə́ a ná búlə́, a ndɔ kɔa ɔ bɔbɛ́á bɔ́ nilókóno.»

¹⁹Yə́susu a ná bəə́bu wúmotí ɔŋana tɛ́ná a sɛ́á: «Wɔmɔtɛ́ mɔmbiaŋɛ a ka bá a ndɔ bɛ́lɛ́ŋaba na bɛlɛŋa bɛɛsɛ ɛmbáta, bɛ́ mukunə́ mɔŋɛ́ŋa. A ka báá hinó tɛ́á, a ɛŋganda tíkə.

²⁰Ɔ busíə́ bɔ́ hɛkɔ́kɛ hɛ́ ɔmbɛ́la wɔ́ mɔmbiaŋɛ, hímotí hɛtɔyɔ́nɔ́ hɛ́ mɔndɔ, á Lásalɔ, mɛɛ́lɔ mikimə bitóni na bitóni, a ka báá sianátɔ.

²¹A ka bá na ilókí ɔwá a ayɛ́ nɛ́áká ata tumbumbú ɔtɔ́á tɔ́ ná bá tɔ́ ndɔ kɔa ɔ ɛtáka yɛ́ mɔmbiaŋɛ mba, ɛmɔ́á ɔbánɔ́ yɛ́ ná bá yɛ́ ndɔ nda bɛ́áyɛ́á bitóni sɔsɔ.»

²²«Bɔ́mɔtɛ́ buɔsɛ́, hɛtɔyɔ́nɔ́ a ná wəə. Bɛáŋgɛlɛ bá na wɛɛ́ya ɛtá ɔ ɛmɛ́ŋɛ́ yɛ Ábɛlaháma. Mɔmbiaŋɛ a ayɛ́ wə́ə́, bá ná wɛɛ́ya nyəə.

²³A ka báá ɔ məsə́kə ɔ ɛbɔ́ka yɛ́ bəwə́nú, a ná məə́sə bə́líə́, a ná ká Ábɛlaháma yámá na Lásalɔ ɔ ɔwayɛ́ ɛ́mɛ́ŋɛ́.»

²⁴Ɔ yɛ́ɛ́yɛ́ ikúílí, a ná yə́mə́ a sɛ́á: «Ə́ə́! Á babá Ábɛlaháma, wə́ə́ mɛaŋɔ́á mɛɛ́lɔ, lɔ́má Lásalɔ á hɛnjánjá hɛ́ hɛnɔnɔ́ yúbə́ ɔ mənífə́, á sɔ́nɔ́ a ndá mɛaŋɔ́á nɛbɔ́mbɛ lufə́lə́ bɔkɔasɛ́á, mɛ ndɔ məsə́kə ɔ́kɔ mɔŋɛ́ŋa ɔ híihi hiwə.»

²⁵Ábɛlaháma a sɛ́á: «Á wamɛ́á mɔná, bɛ́kɔ́lɔ́mɔ́ná ɛ́sɛ́á ɔ ná báá ɔ nɛhɔnɔ nɛŋɛ́ŋa ɔ ɔwáwɔ buɔmɔ́ bukimə. Lásalɔ ɔwayɛ́, a ka ɛmɔ́kɛ́ nyááka. Isíŋáka a lɛa ɔ nɛhɔtɔ háha; mba ɔwáwɔ, ɔ lɛa ɔ məsə́kə maŋɛ́ŋa.

²⁶Ɔ yáyɛ́na yatɛ́ ɔyɛ́á mɛ aŋɔ́á lɛ́na, hɛfɛa hɛŋɛ́ŋa hɛ́ lɛa ɔ ətíə́ yɛ bənú na bəsú. Nɔ́yɛ́, bááyɛ́ ɔbá bá ndɔ siə ɔbíásɛna ɔ uwəsú tanɛ́ ata, ɔwákaka ɔ uwənú tanɛ́, bá sa óso.»

²⁷Mɔmbiaŋɛ a sɛ́á: «Ábá nɔ́yɛ́, tɔ́kɔ́lɛ ɔbánɔ́, á yamɛ́á isə́, lɔ́má Lásalɔ ɔ hikúlə hɛ́ babá.

²⁸Mɛ báka na bənínyə́ bálánɔ: Á ká bəə́bu mənyə́síə́ ɔkɛaka ɔwá, bá lɛ ndáfámá ɔ yɛ́ɛyɛ ɛbɔ́ka yɛ́ indomí.»

²⁹Ábɛlaháma a sɛ́á: «Báwɔ́á bənínyə́ bá ndɔ manya, bá bilə́líə́ bɛ́ Mósisi ná bɛ́ bɔhɛ́nátɔtányɛ́ ɔ́kɔ́kɛ́na.»

³⁰Wə́ə́ní a sɛ́á: «Bóo! Á Babá Ábɛlaháma, ábá muwə́nú a ná húlínə́ háha mbá a ná ká bəə́bu hɔ́kɛ́na, bá ŋɔ mɛlɛ́má kɔ́ŋɔ́na.»

³¹Ábɛlaháma a sɛ́á: «Ábá bá lɛ ndɔ bilə́líə́ bɛ́ Mósisi ɔ́kɔ, ata mɔndɔ a ŋɔ húlínə ɔ ətíə́ yɛ bəwə́nú, bá sɔ́ ŋɔ bɛ́áyɛ́á bɛtambá luminə.»