Read Tunen Lúkasɛ 17 Bible Online

Lúkasɛ 17 - Tunen bible

Lúkasɛ 17

¹Yə́susu a ná báyɛ́á bɔkɔ́nɛna lɛ́na a sɛ́á: «Manya má bɛkɔa má ŋɔ bá bikúílí biəŋí ɔmá bɛndɔ bá sɔ́ ŋɔ kɔtɔ ɔ bɔbɛ́á ɔkɛa. Mba, yatɛ́ ɛmɔ́kɛ́ ɛlɔ́áyɛ́ wɔ́ɔwɔ ɔwá a ndɔ bɔsɔ́kɔ́ nyɛkɛna ɔ bɔbɛ́á!

²Tɔ óso ukətiə náana ɔwá, yɛ́ lɛa muɛsɛ ɛlɔ́áyɛ́ ayɛ́ ɔwá bá wɛɛ́ya muɔkɔ mɔŋɛ́ŋa ɔ́lɔ́kɔ́kɛ́na ɔ ɛmɛna, bá wɛɛ́ya əmbínə ɔ nɔmɔ́ nuúmə́, yáyɛ́ná ɔ wɛ́ɛ́yɛ́ ɔ mɔtɛ́tɛ́á ɔ ukuəsiə ɔ bɔbɛ́á.

³Nɔ́ bɛ́tátáká muɛsɛ!» «Ábá wawɔ́á mukúlə́kulə a ndɔ bɔbɛ́á kɛa, kɛ́kɛ́lákɛ́ná wɛɛ́ya, ábá a ná sə́hə́kíníə́, niasɛ́ná wɛɛ́ya.

⁴Ábá a ndɔ aŋɔ́á bɔbɛ́á kɛa bikúílí bɛ́lɛ́ndɔ́lɔ́mɔnɔ ɔ buɔsɛ́, a ndáhíáná ɔwáwɔ ɔ ndalɛ́na ɔ ikúílí tɛ́á a sɛ́á: “Mɛ lɛa na isə́hísə́hí”, ɔ ŋɔ wɛɛ́ya niasɛna.»

⁵Basɔ́másɔma bá ná Isə́lúkú lɛná bá sɛ́á: «Kɔndɛ́ná bəsú ilumininə.»

⁶Isə́lúkú a sɛ́á: «Ábá nɔ óso ɔbáá na ilumininə ɛ́sɛ́á mɔsámá wɔ́ hɛlɔa, nɔ ŋɔ óso ɔ bɔ́ɔbɔ bɔlɛ́á ɔlɛna nɔ sɛ́á: “Tɔbá yə́wúə́ mɛkaŋá háha, káka bɛ́nɛ́má ɔ nɔmɔ́”, bɔ́ ŋɔ bənú ɔ́kɛ́na.»

⁷«Ɛ́yánɛ́ ɔ uwə́nú ətíə́, ábá a lɛa na mɔnyɛna ɔwá a ndɔ ɛtɔbɔtɔ́bɔ́ kulə, ataná, a ndɔ bilúkə́ tə́tə́niə, ikúílí mɔnyɛna a nɔ́ kətilə́ ɔ bɛtɔbɔtɔ́bɔ́, a wɛɛ́ya lɛna a sɛ́á: “Sɔ́nɔ́ tɔfá ɔ ndətuə́nə ɔ ɛtáka.”

⁸A ŋɔ wɛɛ́ya lɛna ɔbánɔ́ a sɛ́á: “Tábɔ́nákɛ́ná mɛaŋɔ́á bɔ́labɔ́nɛ́á, bɛ́háá bɛlɛŋa bɛɛsɛ ɔ́ mɛaŋɔ́á áfɛ́na, mɛ́ nɛ́áká, mɛ́ nyákɛ́na; əlimə yɛ nɔ́yɛ́ mbá ɔ́ tíkə́ ákána ɔ ɔnɛ́á na ɔnyɛ́na.”

⁹A sa hɔ́ánána ɔ wayɛ́á mɔnyɛna ɔ mohóloniə uhíə́nini bɔkɔasɛ́á, a ná kɛ́áká yatɛ́ ɔyɛ́á a ná wɛɛ́ya manɛ́na.

¹⁰Yɛ́ lɛa bɔkɔa bɔ́mɔtɛ́ ɛlɔ́áyɛ́ ənú tɔ́na, ikúílí nɔ ná bikimə kɛ́áka ɔbɛ́á Huɛlɛ́ a ndɔ bənú manɛna, nɔ́ láá nɔ sɛ́á, tɔ báka ɔbánɔ́ bɔnyɛna bá ndəmə: “Tɔ́ kɛ́áka ɔbánɔ́ yatɛ́ ɔyɛ́á tɔ ná hɔ́ánána ɔkɛa.”»

¹¹Yə́susu a ka bá ɔ ɔwákaka ɔ Yəlúsalɛma a tɔ́mbákɛna ɔ ɔmbándá wɔ́ misí ətíə́ yɛ Kalɛ́lɛa na Samália.

¹²Ɛnaka á báá ɔ ufíə́kinə ɔ bɔ́mɔtɛ́ bɔnɔŋɔ, niómo nɛ́ bɛndɔ bə́mínú bá ná ndásá ɔ ɔwayɛ́ nɛnyáná, bá ná tɛ́nɛ́má hata na wɛɛ́ya.

¹³Bá ná botólíə́ ɔ uyə́mə mɔŋɛ́ŋa bá sɛ́á: «Á Yə́susu, á Muinə́niə, tɔ́kɔ́lɛ, wə́ə́ bəsú mɛɛ́lɔ.»

¹⁴Ikúílí a ná bəə́bu yámá, a ná bəə́bu lɛ́na a sɛ́á: «Nɔ́ kə́bínə́níə́ ɔ bətitiəmahánɛna.» Ikúílí bá ná báá ɔ ɔwákaka, bá ná niŋə.

¹⁵Ɛnaka wɔmɔtɛ́ ɔ uwəbú ətíə́, á bɛ́bɔ́ŋɔ́ ɔwá a ná niŋə́, a ná tilə́ na əlimə, a ná botólíə́ á Huɛlɛ́ ɔ tuúmə uhíə́niniə na nióni nɛŋɛ́ŋa.

¹⁶A ná ká Yə́susu kɔ́ɛ́na ɔ makɔlɔ́, busíə́ lúmə́tɔ́ ɔ misí, a ná wɛɛ́ya mohóloniə híə́níníə́. Mɔ́táyɛ́ mɔndɔ a ka báá wa Samália.

¹⁷Yə́susu a ná ɛtambá ɛ́tá a sɛ́á: «Tátá bəə́bu niómo bá ná niŋə́ əə́? Mba, hə́níə́ bááyɛ́ ibo bá lɛ́á əə́?

¹⁸Ata ɔmɔtɛ́ ɔ uwəbú ətíə́ a sá bílúmíniə ɔndahíáná á Huɛlɛ́ ɔ mohóloniə uhíə́niniə ɔ́maná ɔ́ yɛ́ɛyɛ ɛsalasala!»

¹⁹Yə́susu a ná Mɔsamália lɛ́na a sɛ́á: «Hɔalɛ́na káka, ɛ́sɛ́á ɔ ná lumínínə, Huɛlɛ́ a ná aŋɔ́á núə́kə́níə́.»

²⁰Bɛfalísia bá ná Yə́susu batá bá sɛ́á: «Ɔ́ uyə́níə́ ikúílí Nɛmanɛna nɛ́ Huɛlɛ́ nɛ́ ŋɔ ndafámá əə́?» A sɛ́á: «Nɛmanɛna nɛ́ Huɛlɛ́ nɛ sɔ́ ŋɔ húlə ɛ́sɛ́á bɔɔ́la ɔbɔ́á bɔ́ ndɔ sinənə.

²¹Bá sɔ́ ŋɔ laa bá sɛ́á: “Nɛ́ lɛa háha, ataná nɛ́ lɛa hə́ə́ní.” Ɔ taká, ɔ́ Nɛmanɛna nɛ́ Huɛlɛ́ nɛ́ɛnɛ háha ɔ uwənú ətíə́.»

²²A ná bɔkɔ́nɛna lɛ́na a sɛ́á: «Ikúílí yɛ́ lɛa ɔ ɔsákɔna ɔyɛ́á nɔ ŋɔ siəkə usinə ata hinó hímotí hɛ́ Mɔná wa mɔndɔ, mba, nɔ sá wɛɛ́ya yama.»

²³Bɛndɔ bá ŋɔ bənú lakɛna bá sɛ́á: «A lɛa hə́ə́ní ataná, a lɛa háha.» Nɔ lɛ ákáná umə́, nɔ lɛ tibínə́níə́ umə́.

²⁴Ɔ taká, ɛ́sɛ́á abáka ɛmɔanyama yɛ́ fámálana həmə́tu, yɛ́ bɛátɛ bikimə bɛ́ ɔmbáŋá numəkiə, nɔ́yɛ́ á hinó hɛ́ Mɔná wa mɔndɔ hɛ́ ŋɔ bámɛnɛna.

²⁵Mba ɔ busíə́ bɔ́ ikúílí, a ná hɔ́ánána ɔ məsə́kə usinə mɔŋɛ́ŋa, bɛndɔ bá yɛ́ɛyɛ ɛhanyɛ bá ŋɔ wɛɛ́ya omboko.

²⁶«Yatɛ́ ɔyɛ́á yɛ́ ná bɛ́tɔ́mbáká ɔ ikúílí yɛ́ Nówa, nɔ́yɛ́ yɛ́ ŋɔ bɛ́tɔ́mbáka hɔ́ánánátɔ́ ɔ tunó tɔ́ Mɔná wa mɔndɔ.

²⁷Bɛndɔ bá ka báá bá ndɔ nɛ́á, bá nyákɛna, bá bəəndú bɛ́lɛakɛna, bá baná lónokiə ɔkafámáká ɔ hinó ɔhɛ́á Nówa a ná fínə́ ɔ isóyí yɛŋɛ́ŋa: Əlimə yɛ nɔ́yɛ́, mulumə wɔ́ ná fɛndáka, bəkimə tɔ́na bá ná wə́kúnə.

²⁸Nɔ́yɛ́ yɛ́ ná báá tɔ́na ɛ́sɛ́á ikúílí yɛ́ Lóto, bɛndɔ bá lɛ nɛ́áka, bá lɛ nyákɛna, bá lɛ ɔ́ndɔ́kɔ, bá lɛ sɛmaka, bá lɛ falabaka.

²⁹Mba, ɔ buɔsɛ́ ɔbɔ́á Lóto a ná fámá ɔ Sótomo, Huɛlɛ́ a ná hiwə hɛŋɛ́ŋa kuəsíə́ na məŋə́ má kɔnjɔ́kɔ́tɔ, hɛ́ ná bááyɛ́ bɛndɔ bəkimə nímə́síə́.

³⁰Nɔ́yɛ́ yɛ́ ŋɔ báá bɔkɔa bɔ́mɔtɛ́ hɔ́ánánátɔ́ ɔ buɔsɛ́ ɔbɔ́á Mɔná wa mɔndɔ a ŋɔ fámálana.»

³¹«Ɔ bɔ́táyɛ́ buɔsɛ́, wɛ́ɛ́yɛ́ ɔwá a ŋɔ báá ɔ muanda ɔmbáŋá, a sa ndə́túkínə ɔ ɔwáyɛ́ bɛɛ́la ufə́miə ɔ miímə. Hɔ́ánánátɔ́, wɛ́ɛ́yɛ́ ɔwá a ŋɔ báá ɔ bɛtɔbɔtɔ́bɔ́, a sa ndáhíáná ɔ ɔwayɛ́ ɔmbɛ́la.

³²Nɔ́ muəndú wa Lóto bɛ́kɔ́lɔ́mɔ́na.

³³Wɛ́ɛ́yɛ́ ɔwá a ŋɔ siəkə ɔ ɔwayɛ́ buɔmɔ́ unuəniə, a ŋɔ bɔɛ́ta nyúə́kiə, wɛ́ɛ́yɛ́ tɔ́na ɔwá a ŋɔ bɔ́áyɛ́á buɔmɔ́ nyúə́kiə, a ŋɔ bɔɛ́ta nuəkəniə.

³⁴Ɛ́ɛ! Mɛ ndɔ bənú nɔ́yɛ́ lɛna, ɔ bɔ́táyɛ́ bulúə́, bɛndɔ báfandɛ́ bá ŋɔ báá ɔ bɔaná bɔ́mɔtɛ́, bá ŋɔ ɛta ɔmɔtɛ́, bá wɛ́ɛ́yɛ́ tikə.

³⁵Bəəndú báfandɛ́ bá ŋɔ báá iŋgində́ ɔ ɛmbásáká ɔwɔkɔ, bá ŋɔ ɛta ɔmɔtɛ́, bá wɛ́ɛ́yɛ́ tikə. [

³⁶Balɛ́mɛndɔ́ báfandɛ́ bá ŋɔ báá ɔ ɛtɔbɔtɔ́bɔ́ ɛ́mɔtɛ́, bá ŋɔ ɛta ɔmɔtɛ́, bá wɛ́ɛ́yɛ́ tikə].»

³⁷Bɔkɔ́nɛna bá ná Yə́susu batá bá sɛ́á: «Á Isə́lúkú, hə́níə́ nɔ́yɛ́ yɛ́ ŋɔ bɛ́tɔ́mbáka əə́?» A ná bəə́bu bíhíə́níníə́ a sɛ́á: «Ɔ ɛbɔ́ka ɔyɛ́á ɛkɔɔ́lɛa yɛ́ ŋɔ bámɛnɛna, ɔmɔ́tɔ́yɛ́ biombí bɛ́ ŋɔ kɔtakana.»