Read Tunen Lúkasɛ 19 Bible Online

Lúkasɛ 19 - Tunen bible

Lúkasɛ 19

¹Yə́susu a ná fínə́ ɔ Yəlíko, a bətínə́ bíásakɛna.

²Mɔndɔ a ka báá ɔmɔ́tɔ́yɛ́ nɛ́áyɛ́á niínyə á Sakíyo. A ka báá bɔ́ŋɔ́tɔ, isə́lúkú tɔ́na yɛ bakɔtabɛtásɛ.

³A ka bá a ndɔ siə ɔwá, a manyá ɛ́yánɛ́ a lɛ́á Yə́susu. Mba, ɛ́sɛ́á ilúkunə yɛ́ ná wɛɛ́ya lindíə́, a sá óso ɔ ɔwayɛ́ usinə bɔkɔasɛ́á, a ka báá mukítíkiti.

⁴A ná tɛbálɛ́na, a ná ákáná ɔ busíə́, a ná báláka ɔ bɔlɛ́á ɔbɔ́á bá ndɔ ɛ́lɛnɛna bá sɛ́á sikɔmɔ́lɛ ɔkɛaka ɔwá, a Yə́susu siəkínə, a ka bá a ndɔ manya a sɛ́á a ndɔ tɔ́mbákɛna ɔ ɔmɔ́tɔ́yɛ́.

⁵Ikúílí Yə́susu a ná káfámá ɔ indínə́ yɛ bɔ́táyɛ́ bɔlɛ́á, a ná məə́sə bə́líə́, a ná Sakíyo lɛ́na a sɛ́á: «Á Sakíyo, tukínə́ tɔfá bɔkɔasɛ́á, niɔfɛ́nɛ mɛ ndɔ siə utuənə ɔ ɔwáwɔ ɔmbɛ́la.»

⁶Sakíyo a ná tukə́kínə́ tɔfá, a ná Yə́susu káhá na nɛhɔnɔ.

⁷Bəkimə ɔbá bá ná síə́kínə́ nɔ́yɛ́, bá ná bótólíə́ ɔ ubílúlə, bá sɛ́á: «Nəníə́ ɛ́kɛ wɔ́ɔwɔ mɔndɔ a óso ufínə ɔ miímə yɛ wɔ́ɔwɔ mɔkɛamabɛ́á.»

⁸Mba, Sakíyo a ná bɛ́nyálɛ́lá á Isə́lúkú busíə́ a sɛ́á: «Á Isə́lúkú ɔ́kɔ́kɛ́na, abáka mɛ mámɛ́á maasɛ sələniə ɔ ətíə́, mɛ yɛ́mɔtɛ́ ɛsalɛ índiə ɔ tɔtɔyɔ́nɔ́, ábá mɛ ka mɔnɛ́á má mɔndɔ ɛta məəŋí ɛŋana hɛkɔma, mɛ wɛɛ́ya híə́niniə bikúílí bínisə.»

⁹Yə́susu a ná wɛɛ́ya lɛ́na a sɛ́á: «Ɔ niɔfɛ́nɛ Huɛlɛ́ a ná bɛndɔ bá yɛ́ɛyɛ miímə nuəkə́níə́ bɔkɔasɛ́á, aŋɔ́á tɔ́na ɔ báka wa hikúlə hɛ́ Ábɛlaháma.

¹⁰Ɔ taká Mɔná wa mɔndɔ a ka ndasá ɔ ndəsíə́ na unuəniə bɛndɔ bəkimə ɔbá bá ná nyɔaka.»

¹¹Ɛnaka bɛndɔ bá bɛ́táyɛ́ bɛtambá ɔ́kɔ́kɛ́na, Yə́susu a ná ɔŋana táá tɔ́na úmotí bɔkɔasɛ́á, bá ka báá hoóyi na Yəlúsalɛma, bá fɛkaka bá sɛ́á ɛkasɛ Nɛmanɛna nɛ́ Huɛlɛ́ nɛ́ bínə́níə́ ɔ umisíúmə́.

¹²A ná láá a sɛ́á: «Mɔndɔ ɔmɔtɛ́ wa nikúlə nɛŋɛ́ŋa a ná ákáná ɔ bɔnɔŋɔ bɔ́ hata a sɛ́á bá wɛɛ́ya tɛ́fáká munəni wa bɔ́táyɛ́ bɔnɔŋɔ, a ŋɔ ndahíáná əlimə yɛ ikúílí.»

¹³Ɔ busíə́ bɔ́ wə́yíə́ ɔwákaka a ná niómo nɛ́ báyɛ́á bɔnyɛna ɛ́lɛ́ákɛ́na, a ná mɔnyɛna tɛ́á índíə́ ɛcácɔ́ ɛ́mɔtɛ́ a sɛ́á: «Nɔ́ nyuŋgə́ kɛ́áká na bɛ́táyɛ́ bɛcácɔ́ ɔkafámáká ɔ ikúílí ɔyɛ́á mɛ ŋɔ ndahiana.»

¹⁴Mba, bɛndɔ bá bɔ́ɛ́yɛ́ bɔnɔŋɔ bá wɛɛ́ya bányáka, bá ná tíkə́ basɔ́másɔma lɔ́ma á munəni əlimə bá sɛ́á: «Tɔ lɛ ndɔ hikiə ɔwá a bəsú mánákɛ́na.»

¹⁵Nɔ́yɛ́, ɛnaka bá wɛɛ́ya tɛ́fáká munəni, a ná ndáhíáná ɔ ɔwayɛ́ bɔnɔŋɔ. A ná sá báyɛ́á bɔnyɛna ɛ́lɛakɛna ɔkɛaka ɔwá, a manya yatɛ́ mɔsɛ́ŋɛ́ bá ná kusə́nə.

¹⁶Wəbusíə́ a ná bɛ́nyálɛ́la a sɛ́á: «Á Isə́lúkú, mɛ ná mɔsɛ́ŋɛ́ nɛ́á niómo nɛ́ bɛcácɔ́.»

¹⁷Munəni a sɛ́á: «Muɛsɛ nɔ́yɛ́, á mɔnyɛna muɛsɛ ɛ́sɛ́á ɔ lɛ́á na yɔkɛ́nana ɔ bɛkɔa bɛtɛ́tɛ́á, mɛ ná aŋɔ́á tuəníníə́ mɔmanɛna wa niómo nɛ́ bətínə́.»

¹⁸Wa ɔwɔŋgɔkɔnɔ a ná tɔ́mbálɛ́la, a sɛ́á: «Á Isəlúkú, mɛ ná nɛ́á bɛcácɔ́ bɛ́lánɔ.»

¹⁹Munəni a sɛ́á: «Ɔwáwɔ tɔ́na bámɛ́nɛ́ná mɔmanɛna wa bətínə́ bɛ́lánɔ.»

²⁰Wɔmɔtɛ́ mɔnyɛna a sɛ́á: «Á Isə́lúkú, ɔ́ yawɔ́á ɛcácɔ́ yɛ́ɛyɛ, mɛ ka yɛɛ́ta tə́tə́niə muɛsɛ, mɛ ná ɔ́lɔ́kɔ́kɔ́ na iləbə́.

²¹Mɛ ka aŋɔ́á kɔ́lɔ́maka bɔkɔasɛ́á, ɔ lɛa mɔndɔ wa mɔlɛ́má natákátɔ, ɔ ndɔ báta ɔ ɛbɔ́ka ɔyɛ́á ɔ sá bɛ́lɛna, ɔ huəkə tɔ́na ɔ ɛbɔ́ka ɔyɛ́á ɔ sá sɛla.»

²²Munəni a ná wɛɛ́ya lɛ́na a sɛ́á: «Ɔ lɛa mɔnyɛna mɔbɛ́á ɛkasɛ mɛ aŋɔ́á kə́lə́sə́kíə́ ɔwɔŋgɔkɔnɔ bɛ́áwɔ́á bɛtambá. Ɔ ka bá ɔ ndɔ manya ɔwá mɛ lɛa mɔndɔ wa mɔlɛ́má natákátɔ, mɛ ndɔ báta ɔ ɛbɔka ɔyɛ́á mɛ sá bɛ́lɛna, mɛ ndɔ huə ɔ ɛbɔ́ka ɔyɛ́á mɛ sá sɛla.

²³Nɔ́yɛ́, ɛlɔ́áyɛ́ yatɛ́ ɔ sa mámɛ́á mɔnɛ́á háá ɔ ɛbáŋgɛa ɔhá mɛ ŋɔ bɛtɛmá kusənə ɛnáká mɛ ndáhíáná əə́?»

²⁴A ná bááyɛ́ lɛ́na ɔbá bá ná báá ɔmɔ́tɔ́yɛ́ a sɛ́á: «Nɔ́ yɛ́ɛ́yɛ́ ɛcácɔ́ ɔ́lɔ, nɔ́ índíə́ ɔ wɛ́ɛ́yɛ́ ɔwá a lɛ́á na niómo.»

²⁵Bá sɛ́á: «Á Isəlúkú, bɛ́ sɛ́á a báka buɔnɔ́ na niómo nɛ́ bɛcácɔ́!»

²⁶Munəni a sɛ́á: «Wɛ́ɛ́yɛ́ ɔwá a lɛ́á itíə́nə́tɔ́, a ŋɔ kusənə ɔ ɔyáyɛ́na, mba wɛ́ɛ́yɛ́ ɔwá a lɛ bá itíə́nə́tɔ́, bá ŋɔ yayɛ́á tɛ́tɛ́á kátɔ́na ɔyɛ́á a lɛ́á itíə́nə́tɔ.

²⁷Mba, ɛlɔ́áyɛ́ bámɛ́á bəbəniə ɔbá bá sa hikiə ɔwá mɛ bəə́bu manákɛ́na, nɔ́ bəə́bu húlə́nə́ háha, nɔ́ bəə́bu ɔ́nɔ́kɔ́ ɔwámɛ busíə́.»

²⁸Əlimə yɛ bɛ́táyɛ́ bɛtambá, Yə́susu a ná báláka ɔ Yəlúsalɛma.

²⁹Ikúílí a ná báá hoóyi na Bɛtɛfasɛ́ ɔ Bɛtánia, ɔ ɔwákaka ɔmáá wɔ́ malɛ́á má olífia, a ná bɔkɔ́nɛna buəkíníə́ báfandɛ́.

³⁰A sɛ́á: «Nɔ́ ákáná ɔ bɔnɔŋɔ ɔbɔ́á bɔ́ lɛ́á ɔ busíə́; ɛ́kɛ nɔ́ káfámá umə́, nɔ ndɔ mɔná ɛnjakásɛ yámáka tiŋə́tɔ, ɔyɛ́á ata mɔndɔ a nana talɛma. Nɔ́ yɛɛ́ta tuŋúnə, nɔ́ yɛɛ́ta húlə́nə́ háha.

³¹Ábá mɔndɔ a ná bənú bátá a sɛ́á: “Ɛlɔ́áyɛ́ yatɛ́ nɔ ná yɛɛ́ta tuŋúnínə əə́”, nɔ́ wɛɛ́ya lɛná nɔ sɛ́á: “Isəlúkú a ndɔ yɛɛ́ta siə.”»

³²Bɔkɔ́nɛna bá ná ákáná, bá ná yámá bɛkɔa bikimə ɛ́sɛ́á Yə́susu a ná bəə́bu lakɛ́na.

³³Ikúílí bá ná báá ɔ mɔ́táyɛ́ mɔná ɛnjakásɛ ɔ utuŋunə, bəmuití mɛnyama bá ná bəə́bu batá bá sɛ́á: «Ɛlɔ́áyɛ́ yatɛ́ nɔ ndɔ wɛ́ɛ́yɛ́ mɔná ɛnjakásɛ tuŋuninə əə́?»

³⁴Bɔkɔ́nɛna bá sɛ́á: «Isəlúkú a ndɔ yɛɛ́ta siə.»

³⁵Bá ná ɛnjakásɛ ákánána á Yə́susu busíə́, bá ná bɛlɛŋa táláká ɔ mɛnyama ɔmbáŋá, bá ná wɛɛ́ya tuəníníə́.

³⁶Ɛnakaka a kɛndaka tálɛ́mátɔ́ ɔ ɛnjakásɛ, bɛndɔ bá mə́búə́ molókiə tɛ́káka ɔ mɔndɔ́ŋɔ́ ɔwayɛ́ busíə́.

³⁷Á Yə́susu a ná káfámá ɔ ɛnɔ́mɛ yɛ́ ɔlɔɔkɔ ɔ ɔmáá wɔ́ malɛ́á má olífia, hoóyi na Yəlúsalɛma, nɛhɔnɔ nɛ́ ná iloŋo yikimə yɛ́ bɔkɔ́nɛna itíə́, bá ná lúmə́ á Huɛlɛ́ ɔnyama na nióni nɛŋɛ́ŋa ɛlɔ́áyɛ́ bisə́mə́tə́ bɛ́ bɛkɔa ɔbɛ́á bá ná síə́kínə.

³⁸Bá laaka bá sɛ́á: «Huɛlɛ́ á Munəni saná ɔwá a lɛ́á ɔ ɔsákɔna ɔ niínyə nɛ́ Isə́lúkú! Bumbə́nú ɔ nɔɔ́mɛná, tuúmə na Huɛlɛ́!»

³⁹Bɛ́mɔtɛ́ Bɛfalísia ɔbá bá ná bá ɔ ilúkunə, bá ná Yə́susu lɛ́na bá sɛ́á: «Á Muinə́niə, nə́yíə́ báwɔ́á bɔkɔ́nɛna.»

⁴⁰A sɛ́á: «Mɛ ndɔ bənú nɔ́yɛ́ lɛna, ábá bá ná nə́yə́níə́, miɔkɔ yɛ́ ŋɔ yə́mə́kə.»

⁴¹Ɛnaka Yə́susu a bá a ndɔ bɛ́nya ɔ bətínə́, a ná mɛɛ́ta yámá, a ná lɛláka ɛlɔ́áyɛ́ ayɛ́.

⁴²A sɛ́á: «Aŋɔ́á tɔ́na, ata ɔ bá ɔ ndɔ manya ɔ bɔ́ɔbɔ buɔsɛ́ yatɛ́ ɔyɛ́á yɛ́ óso ɔwáwɔ ɔ bumbə́nú uwíndiə, mba isíŋáka, bɔ́ lɛa bítímə́tɔ́ ɔwáwɔ məə́sə.

⁴³Ɛ́ɛ! Mɔɔsɛ́ má ŋɔ ndáfámá ɛlɔ́áyɛ́ áwɔ ɔ ɛbɔ́ka ɔyɛ́á, bəbəniə bá ŋɔ tuənəkinə ɔwáwɔ ɛmɛ́ŋɛ́, bá ŋɔ aŋɔ́á nɛŋɛlɛna na mafalaba má ɔ́nɔ́kɛ́nátɔ, bá ŋɔ aŋɔ́á fɔ́táka bɛsalɛ bikimə.

⁴⁴Bá ŋɔ aŋɔ́á tɛsaka aŋɔ́á mukimə, na aŋɔ́á na báwɔ́á bɛndɔ bəkimə. Bá sɔ́ ŋɔ niasa ata muɔkɔ úmotí tálátɔ́ ɔ muinə́muinə́ bɔkɔasɛ́á, ɔ sa ikúílí lɛnda ɔyɛ́á Huɛlɛ́ a ná ndásá ɔ ɔwáwɔ unuəniə.»

⁴⁵Yə́susu a ná fínə́ ɔ Tɛ́mbɛlɛ, a ná lúmə́ ɔ bɛndɔ bəlúə́ ukúbə.

⁴⁶A bəə́bu lakɛna a sɛ́á: «Huɛlɛ́ a ndɔ laa ɔ tuəfulə a sɛ́á: “Yamɛ́á miímə yɛ́ ŋɔ báá miímə yɛ mabɛ́kálɛ́na”, mba uwənú, nɔ ná mɛɛ́ta híə́nə́síə́ nibítímínə́ nɛ́ boóbi.»

⁴⁷A ka bá a ndɔ ínə́niə buɔsɛ́ tɛ́á ɔ Tɛ́mbɛlɛ. Bisə́lúkú bɛ́ bətitiəmahánɛna, bamanyumbə́ndə́, bá siəkə ɔ ɔwayɛ́ ɔwɔ́nɔ.

⁴⁸Mba, bá lɛ manya nəníə́ bá nɔ́yɛ́ kɛ́áka. Ɔ taká, bɛndɔ bəkimə bá ka báá məlúə́ básɛ́átɔ́ ɔ ɔwayɛ́ ɔwɔ́kɔ.