Read Tunen Lúkasɛ 20 Bible Online

Lúkasɛ 20 - Tunen bible

Lúkasɛ 20

¹Hinó hímotí, Yə́susu a ka báá ɔ bɛndɔ uwukúniə ɔ Tɛ́mbɛlɛ, a bəə́bu Imbə́nú Yɛɛsɛ nɔŋɔnakɛna tɔ́na. Bisə́lúkú bɛ́ bətitiəmahánɛna, bamanyumbə́ndə́ bá ná ndə́fə́mə́kə́níə́ na bɛnatákɛ.

²Bá ná wɛɛ́ya batá bá sɛ́á: «Lɛná bəsú na yanɛ́ kuənjə ɔ ndɔ bɛ́ɛ́yɛ́ bɛkɔa kɛna əə́? Ɛ́yánɛ́ a ná aŋɔ́á iŋgínə́ índíə́ ɔ nɔ́yɛ́ ɔkɛa əə́?»

³A sɛ́á: «Mɛaŋɔ́á tɔ́na, ɛkasɛ mɛ́ bənú ɛmbataka bata. Nɔ́ ámɛ lɛ́na:

⁴Ɛ́yánɛ́ a ná Yɔhánɛsɛ lɔ́má ɔ nɛsɔa uwíndiənə əə́? Á Huɛlɛ́ alɛ́ɛ́ bɛndɔ əə́?»

⁵Mba, bá ná botólíə́ ɔ utə́ŋə́niə bəə́bu na bəə́bu, bá sɛ́á: «Ábá tɔ ná wɛɛ́ya bɛ́kámɔ́sɔ́ná tɔ sɛ́á á Huɛlɛ́ a ná wɛɛ́ya lɔ́má, a ndɔ bəsú lakɛna a sɛ́á: “Ɛlɔ́áyɛ́ yatɛ́ nɔ sa Yɔhánɛsɛ lumininə əə́?”

⁶Ábá tɔ ná bɛ́kámɔ́sɔ́ná tɔ́ sɛ́á bɛndɔ bá ná wɛɛ́ya lɔ́má, bɔnɔŋɔ bukimə bɔ́ ndɔ bəsú lúmə́kə na miɔkɔ bɔkɔasɛ́á, bá ndɔ fɛka bá sɛ́á Yɔhánɛsɛ a ka báá mɔhɛ́nátɔtányɛ́.»

⁷Bá sɛ́á: «Tɔ lɛ ndɔ wɛ́ɛ́yɛ́ manya ɔwá a ná wɛɛ́ya lɔ́má ɔ nɛsɔa uwíndiənə.»

⁸Yə́susu a sɛ́á: «Ata mɛaŋɔ́á tɔ́na mɛ sɔ́ ŋɔ bənú lɛna na yanɛ́ kuənjə mɛ́ ndɔ bɛ́táyɛ́ bɛkɔa kɛɛna.»

⁹A ná ilúkunə wúuwu ɔŋana tɛ́ná a sɛ́á: «Mɔndɔ ɔmɔtɛ́ a ka ɛtɔbɔtɔ́bɔ́ nyɔɔkɔ, a ná índíə́ ɔ ɛlɛ́ndɛa ɔ bəhuə, a ná ákáná ɔ mɔkɛnda wɔ́ ikúílí yɛtatánɛ.

¹⁰Ɛnaka ikúílí yɛ́ məhuə yɛ́ ndáfámá, a ná mɔnyɛna lɔ́ma á bááyɛ́ busíə́ ɔkɛaka ɔwá, bá wɛɛ́ya nɛ́áyɛ́á nioko nɛ́ bɛlɔŋɔ́tɛ́ híə́níníə́. Mba, bəhuə bá ná mɔnyɛna subəkə, bá ná wɛɛ́ya tilə́síə́ makátá ndəmə.

¹¹A ná wɔmɔtɛ́ mɔnyɛna lɔ́má tɔ́na, bá ná wɛɛ́ya súbə́kə́, bá ná wɛɛ́ya kɔbaka, bá ná wɛɛ́ya tilə́síə́, bá lɛ índíə́ ata bɔɔ́la.

¹²A ná mɔnyɛna lɔ́má ɔ bikúílí bɛ́lálɔ́, ɔ wɛ́ɛ́yɛ́, bá ná wɛɛ́ya úmúísə́kíə́, bá ná wɛɛ́ya bulə́kə.

¹³Isə́lúkú yɛ ɛtɔbɔtɔ́bɔ́ a sɛ́á: “Nəníə́ mɛ háha kɛáka əə́? Ɛkasɛ mɛ wamɛ́á mɔná wuhikiə lɔma, ɔmbáŋíndíə́ bá ŋɔ wɛɛ́ya bə́təkiə muɛsɛ.”

¹⁴Mba, ɛnaka bəhuə bá mɔná yámá, bá ná bɛ́láá bəə́bu na bəə́bu bá sɛ́á: “Á wə́ə́ní a ŋɔ ɛhálálá tíkə́nənə. Tɔ́ wɛɛ́ya ɔ́nɔ́kɔ́ mbá ɛtɔbɔtɔ́bɔ́ yɛ́ ŋɔ híána yə́su.”

¹⁵Bá ná wɛɛ́ya fámáná ɔ ɛtɔbɔtɔ́bɔ́, bá ná wɛɛ́ya ɔnɔkɔ.» Yə́susu a ná batá a sɛ́á: «Yatɛ́ Isə́lúkú yɛ ɛtɔbɔtɔ́bɔ́ a ŋɔ bəə́bu kɛaka əə́?»

¹⁶A ŋɔ ndafama, a ŋɔ bááyɛ́ bakɛma ɔ́nɔ́kɔ, a ŋɔ yáyɛ́á ɛtɔbɔtɔ́bɔ́ índíə́ ɔ bənə́bənə́. Ɛnaka bɛndɔ bá bɛ́ɛ́yɛ́ bɛtambá ɔ́kɔ́, bá sɛ́á: «Bóo! Nɔ́yɛ́ yɛ́ sa óso ɔbɛ́kɛa.»

¹⁷Mba, a ná bəə́bu məə́sə tala, a sɛ́á: «Yatɛ́ ɛtambá yɛ́ Mətilə yɛ́ ndɔ siə ɔlaa: “Muɔkɔ ɔwá bafalaba bá ná ombóko, wɔ́ ka híána muɔkɔ wɔ́ nihíkíli əə́?”

¹⁸Ata ɛ́yánɛ́ mɔndɔ ɔwá a ŋɔ kɔɛna ɔ mútə́yí muɔkɔ a ŋɔ bɛ́nɔ́kɔkɔ, mba, ábá muɔkɔ wɔ́ ná mɔndɔ kɔɛ́na, wɔ́ ŋɔ muití ɔ́kɔkɔ.»

¹⁹Bamanyumbə́ndə́ na bisə́lúkú bɛ́ bətitiəmahánɛna bá ka siəkə ɔ ɔwayɛ́ ɔhalɛna ɔ yɛ́táyɛ́ ikúílí bɔkɔasɛ́á, bá ka manya bá sɛ́á uwəbú ɛlɔ́á a ná wííyí ɔŋana tɛɛna, mba, bá ilúkunə kɔ́lɔ́maka.

²⁰Bá ná botólíə́ a Yə́susu ɔ ɔtɛ́ka; əlimə yɛ ikúílí, bá ná wɛɛ́ya bɛndɔ lɔ́mɛ́ná ɔbá bá ndɔ bínə́niə bá sɛ́á bá lɛa bátaká, ɛlɔ́áyɛ́ ɔwayɛ́ ɔlámbɛ́na na ɛmbataka; bá hɛkɔma bɔ́ŋɔ mbá bá wɛɛ́ya halɛ́na, bá índíə́ ɔ makátá má mɔmanɛna.

²¹Bá ná wɛɛ́ya yɛ́ɛyɛ ɛmbataka batá bá sɛ́á: «Á Mulə́liə, tɔ ndɔ manya tɔ sɛ́á ɔ ndɔ laa, ɔ ndɔ úkúniə tɔ́na á bɛkɔa bɛ́ taká, ɔ lɛ ndɔ nifəŋə háá ətíə́ yɛ bɛndɔ; mba, ɔ ndɔ úkúniə á taká ɔyɛ́á Huɛlɛ́ a ndɔ bəsú bata a sɛ́á tɔ kɛ́áka.

²²Lɛná bəsú ɛ́ɛ, ata bóo! Tɔ báka na kuənjə ɔ ɛtásɛ ɔsábɔ́nɛna á Káyɛsa əə́?»

²³Mba, Yə́susu a ná manyá a sɛ́á hɛlámba hííyí; a ná bəə́bu lɛ́na a sɛ́á:

²⁴«Nɔ́ mɛaŋɔ́á ɛcácɔ́ ínə́níə́ ɛ́mɔtɛ́; bɔ́ánɛ́ busíə́ na nɛ́ánɛ́ niínyə nɛ́ lɛ́á lutə́tɔ́ ɔ yɛ́táyɛ́ ɛcácɔ́ əə́?» Bá sɛ́á: «Bɔ́ Káyɛsa.»

²⁵A ná bəə́bu lɛ́na a sɛ́á: «Nɔ́ índíə́ á Káyɛsa yatɛ́ ɔyɛ́á yɛ́ lɛ́á yɛ́ Káyɛsa, á Huɛlɛ́ yatɛ́ ɔyɛ́á yɛ́ lɛ́á yɛ́ Huɛlɛ́.»

²⁶Bá sa hɛkɔma bɔ́ŋɔ ɔ bɛtambá bɛ́ Yə́susu ɔ busíə́ bɔ́ ilúkunə, yáyɛ́á ɛbɛ́kámɔsɔna yɛ́ ná bəə́bu ə́lə́mə́nə́síə́, bá ná nə́yə́níə́ yə́ə́bu.

²⁷Bɔ́mɔtɛ́ Bɛsalutúsia bá ná bɛ́nyálɛ́la á Yə́susu ɛmɛ́ŋɛ́; uwəbú ɔbá bá ndɔ sáŋɔ́na ɔwá, abáka bəwə́nú bá lɛ hɔŋɔ́á, bá ná wɛɛ́ya batá bá sɛ́á:

²⁸«Á Mulə́liə, Mósisi a ka umbə́ndə́ tiləkə ɛlɔ́áyɛ́ əsú a sɛ́á: “Ábá mɔndɔ wa bɛ́lɛ́nátɔ́ a báka na munínyə́ mbá a ná wə́ə́ ɛŋaná mɔná, munínyə́ a ná hɔ́ánána ilíkə́ ɔbɛ́lɛna ɔkɛaka ɔwá, a wɛ́ɛ́yɛ́ ɛndɛkɛ tíkínə́ ɔwá a ná wəə.”

²⁹Ɔ yɛ́táyɛ́ ikúílí, bənínyə́ bá ka báá bálɛ́ndɔ́lɔ́mɔnɔ; wəbusíə́ a ná bɛ́lɛ́ná, a ná wə́ə́ ɛŋaná mɔná.

³⁰Ɔwá a ná úndúsíníə́ báfandɛ́ a ná ilíkə́ ɛ́ta, a ná ayɛ́ wə́ə́ tɔ́na ɛŋaná mɔná.

³¹Yɛ́ ná bɛ́kɛ́áká tɔ́na nɔ́yɛ́ ɔ wa niɔŋgɔnɔ nɛ́ bənínyə́ bálálɔ́, hɔ́ánánátɔ́ na bááyɛ́ bálɛ́ndɔ́lɔ́mɔnɔ, bá ná hɔ́á ɔ uwə́ə́ ɛŋaná baná.

³²Ɔ utifəkə, muəndú a ná ayɛ́ wəə.

³³Ɔ buɔsɛ́ bɔ́ nɛhɔŋɔa nɛ́ bəwə́nú, a ŋɔ báá wanɛ́ muəndú əə́? Ɔ taká, a ka báá muəndú wa bəə́bu bálɛ́ndɔ́lɔ́mɔnɔ bəkimə.»

³⁴Yə́susu a sɛ́á: «Abáka balɛ́mɛndɔ́ na bəəndú bá yɛ́ɛyɛ misí bá bɛ́lɛakɛnana.

³⁵Mba bɛndɔ ɔbá bá lɛ́á hɔ́ánánɛ́nátɔ́ ɔ nɛhɔŋɔa nɛ́ bəwə́nú, na uniŋə ɔ misí yɛ ɔsákɔna, abáka bá lɛ bɛ́lɛ́nána.

³⁶Bá sá hɔ́ánana uwə́ə́ tɔ́na bɔkɔasɛ́á, bá lɛ hɔ́ákátɔ́ ɔ bɛáŋgɛlɛ. Bá lɛ baná bá Huɛlɛ́ bɔkɔasɛ́á, Huɛlɛ́ a ná bəə́bu huŋúə́síə́.

³⁷Mósisi a ka ínə́niə tə́lə́ŋu ɔwá, bəwə́nú bá ŋɔ hɔŋɔakɛa, ɛnaka a bá a ndɔ hɛ́na ɛsalɛ yɛ́ hiwə hɛ́ ɛfakafáká nuúmə́; a ndɔ Isə́lúkú ɛ́lɛnɛna a sɛ́á: “Huɛlɛ́ yɛ Ábɛlaháma, yɛ Ísakɛ, na yɛ Yákɔbɔ.”»

³⁸Yə́susu a ná kɔndá a sɛ́á: «Huɛlɛ́ a lɛ báá Huɛlɛ́ yɛ bəwə́nú, mba, yɛ bɔɔmɔ́ bɔkɔasɛ́á, bəkimə bá ndɔ niŋə ɛ́lɔ́áyɛ́ ayɛ́.»

³⁹Bɔ́mɔtɛ́ bamanyumbə́ndə́ bá ná wɛɛ́ya lɛ́na bá sɛ́á: «Á Muinə́niə, ɔ ná hɔ́ɔ́kɔ́ muɛsɛ.»

⁴⁰Ɔ taká, bá sa óso tɔ́na ɛmbataka yinə́yinə́ ɔ ɔwayɛ́ ɔbata.

⁴¹Yə́susu a ná bəə́bu lɛná tɔ́na a sɛ́á: «Nəníə́ bɛndɔ bá ndɔ laa bá sɛ́á Mɛ́sia a lɛa mɔná wa Ndə́witi əə́?

⁴²Ɔ taká, Ndə́witi a ndɔ fə́mə́ləniə wɛɛ́ya bɛ́múɛ́tɛ́ ɔ hiəfulə hɛ́ tumboŋo a sɛ́á: “Sɔ́nɔ ɔ ndətuə́nə ɔ ɔwámɛ mɔkátá wɔ́ bɛnɔ́mɛ;

⁴³mɛ ŋɔ kɛaka ɔwá báwɔ́á bokóyíkoyi bá bámɛ́nɛ́ná nɛbɛ́lɛ́nɛ́ná nɛ́ máwɔ́á makɔlɔ́.”

⁴⁴Nɔ́yɛ́, Ndə́witi a ndɔ wɛɛ́ya ɛ́lɛnɛna a sɛ́á “Isə́lúkú”, mba, nəníə́ ɛkasɛ Mɛ́sia a bá tɔ́na mɔná wa Ndə́witi əə́?»

⁴⁵Ilúkunə yikimə yɛ́ ka báá məlúə́ básɛ́átɔ́ á Yə́susu, ɛnaka a bá a ndɔ báyɛ́á bɔkɔ́nɛna lɛna a sɛ́á:

⁴⁶«Nɔ bɛ́tátáka, nɔ lɛ kɛ́á ɛ́sɛ́á bamanyumbə́ndə́! Bááyɛ́ ɔbá bá ndɔ hikiə ɔkɛnda na maŋgɔmba matatánɛ, bá hikəkiə tɔ́na bá sɛ́á bá bəə́bu hólókíə́ ɔ manáka, bá bɛɔkɔ́ bíbúsíə́ tɛ́fáka ɔ məə́bə má mabɛ́kálɛ́na, ɔ bɛbɔ́ka bɛ́ tuúmə ɔ manɛ́áka.

⁴⁷Bá ndɔ bilíkə́ makátá kɔ́lɔ, na uyəŋiə ɔ mabɛ́kálɛ́na ɔkɛaka ɔwá mbá bá bəə́bu siəkínə. Ɛlɔ́áyɛ́ nɔ́yɛ́, Huɛlɛ́ a ŋɔ bəə́bu sɔ́kɔ́tɛa mɔŋɛ́ŋa ɔ ɔyáyɛ́na.»