Read Tunen Lúkasɛ 21 Bible Online

Lúkasɛ 21 - Tunen bible

Lúkasɛ 21

¹Yə́susu a ná bɛ́híámɛ́la, a ná bambiaŋɛ yámá bá ndɔ mə́búə́ mahánɛna háá ɔ bikoó bɛ́ mahánɛna ɔ Tɛ́mbɛlɛ.

²A ná hɛtɔyɔ́nɔ́ hɛ́ ilíkímúə́ndú yámá tɔ́na, a nɔ́ háá umə́ tɔcácɔ́cácɔ́ tɔ́fandɛ́.

³A ná yɛ́ɛ́yɛ́ ikúílí láá a sɛ́á: «Mɛ ndɔ bənú lɛna mɛ sɛ́á nɔ́yɛ́ yɛ́ lɛa taká, híihi hɛtɔyɔ́nɔ́ hɛ́ ilíkə́ a ná háá yáyɛ́ná bə́ə́ní bəkimə.

⁴Ɔ taká bə́ə́ní bəkimə bá ná índíə́ ɔ nɛhánɛna á bɛcácɔ́ ɔbɛ́á bá sá bá na ilókí yɛ́ bɔkɔa ɔbɛ́kɛna; mba ɔwayɛ́, na nɛ́áyɛ́á nɛsɔ́ka, a ná índíə́ yatɛ́ yikimə ɔyɛ́á yɛ́ ná wɛɛ́ya bá ɛlɔ́áyɛ́ uniŋə.»

⁵Bɔ́mɔtɛ́ bɛndɔ bá ka báá bá ndɔ hɛ́ɛ́na ɛlɔ́áyɛ́ Tɛ́mbɛlɛ, bá sɛ́á yɛ́ lɛa mɛmbányɛ na yə́yíə́ miɔkɔ na bɛɛ́la ɔbɛ́á bɛndɔ bá ná Huɛlɛ́ hánákɛ́na. Mba, Yə́susu a sɛ́á:

⁶«Mɔɔsɛ́ má ŋɔ ndafámá ɔwá ata muɔkɔ úmotí wɔ́ sɔ́ ŋɔ tíkə́nə tálátɔ́ ɔ wúmotí muɔkɔ; yatɛ́ ɔyɛ́á nɔ ndɔ hɔ́yɛ́ sínə, yɛ́ ŋɔ kɔakɔna yikimə.»

⁷Bá ná wɛɛ́ya batá bá sɛ́á: «Á Mulə́liə, ɔ́ uyə́níə́ ikúílí nɔ́yɛ́ yɛ́ ŋɔ bɛ́kɛaka əə́? Yatɛ́ hɛŋgɛtɛ́nɛ́á hɛ́ yələ́mənə hɛ́ ŋɔ bá ɔhɛ́á hɛ́ ŋɔ ikúílí ínə́niə ata mɔɔsɛ́ ɔmá bɛ́táyɛ́ bɛkɔa bɛ́ ŋɔ ndafámá əə́?»

⁸Yə́susu a sɛ́á: «Nɔ manyaka, nɔ lɛ bɛ́níása ɔwá bá bənú nə́nə́síə́. Ɔ taká, bɛndɔ bəəŋí bá ŋɔ ndasá bá nɛ́ámɛ́á niínyə bɛ́kɛ́ákɛ́na, bá ŋɔ laaka bá sɛ́á, ɔwámɛ á Huɛlɛ́ a ná lɔma: “Ikúílí yɛ́ nɔ ndafámá!” Nɔ lɛ bəə́bu ɔŋgɔ.

⁹Ikúílí nɔ ŋɔ ɔ́kɔ́kɛna bɛndɔ bá ndɔ hɛ́ɛ́na ɛlɔ́áyɛ́ bilə́ na mətuŋulə, nɔ lɛ kɔ́lɔ́má bɔkɔasɛ́á, nɔ́yɛ́ yɛ́ ŋɔ ndafámá ɔ busíə́ bɔ́ ikúílí; mba, nɔ́yɛ́ yɛ́ sɔ́ ŋɔ bá ɔ umisíúmə́ nisúki nɛ́ misí.»

¹⁰A ná manyɔ́ laa a sɛ́á: «Bɔnɔŋɔ bɔ́mɔtɛ́ bɔ́ ŋɔ ɔsɔ́kɔ́ bɔnɔŋɔ nuəkiə, nɛ́mɔtɛ́ nɛmanɛna nɛ́ ŋɔ ɔsɔ́kɔ́ nɛmanɛna kumunə.

¹¹Misí yɛ́ ŋɔ ndandɛmaka mɔŋɛ́ŋa ɔ bɛ́mɔtɛ́ bɛbɔ́ka, mɛtaná na bilibi bɛ́ mɛɛ́mbɔ bɛ́ ŋɔ báá; bɛkɔa bɛ́ bɔkɔ́lɔ́ma uwitiəsiə, ɛnyɛnya yɛ́ tɔŋgɛtɛ́nɛ́á tɔŋɛ́ŋa tɔ́ ŋɔ húlə́kinə ɔ ɔmbáŋá.»

¹²«Mba ɔ busíə́ bɔ́ bɛ́ɛ́yɛ́ bikimə, bá ŋɔ bənú halɛakɛna, bá ŋɔ bənú tə́kə́sə́kə, bá ŋɔ bənú sɛmɛna ɔ məə́bə má mabɛ́kálɛ́na, bá ŋɔ bənú hákɛna ɔ bɛbɔka, bá ŋɔ ka bənú fámáná ɔ busíə́ bɔ́ bisə́lúkú na bamanɛna ɛlɔ́áyɛ́ ámɛ.

¹³Nɔ́yɛ́ yɛ́ ŋɔ báá ɛlɔ́áyɛ́ ənú ikúílí ɔyɛ́á nɔ yamɛ́á imbóŋi fə́mə́lə́níə́.

¹⁴Nɔ manyaka, nɔ lɛ bɛ́kɔ́lɔ́mɔ́ná ɛlɔ́áyɛ́ níə́núə́ nɛbɛ́kála.

¹⁵Ɔ taká mɛaŋɔ́á bɛ́múɛ́tɛ́ mɛ ŋɔ bənú bɛtambá índiə ɔ nindínə́ ɔnɛ́á ata ɔmɔtɛ́ wənúə́ mukóyíkoyi a sɔ́ ŋɔ bɛɛ́ta nuəsiə, ata ɔ bɛɛ́ta ɔsáŋɔ́na.

¹⁶Bíə́núə́ bisə́ na binyə́, bə́núə́ bənínyə́, mə́núə́ məkúlə, na bɛŋgɔ́áyɛ́ bá ŋɔ bənú sɛmaka, bá ŋɔ bəəŋí ɔ uwənú ətíə́ ɔ́nɔ́kɔ.

¹⁷Bɛndɔ bəkimə bá ŋɔ bənú kóyokiə ɛlɔ́áyɛ́ ámɛ.

¹⁸Ata hihúínyi hímotí ɔ uwənú mɔlɔ́á hɛ́ sá ndányɔa.

¹⁹Nɔ ŋɔ búə́núə́ buɔmɔ́ nuəkəniə ábá nɔ ná tiŋímínə.»

²⁰«Ɔ ikúílí ɔyɛ́á nɔ ŋɔ mɛlɔ́ŋɔ́ yɛ́ bilə́ siəkinə yɛ́ nɔ́ Yəlúsalɛma nɛŋɛlɛna, nɔ ŋɔ manya ɔ yɛ́táyɛ́ ikúílí ɔwá ɛkasɛ bá yɛɛ́ta nɔkɔ́lɔ́kɔ́na.

²¹Ɛlɔ́áyɛ́ nɔ́yɛ́, bááyɛ́ ɔbá bá ŋɔ báá ɔ Yútɛa bá tɛbákɛ́na ɔ ɛmáá ɔmbáŋá, ɔbá bá ŋɔ bá ɔ Yəlúsalɛma bá ŋɔ fámáka, ɔbá bá ŋɔ bá ɔ mahɔ́ma, bá lɛ fínə ɔ bətínə́.

²²Ɔ taká, mufunənə wɔ́ ŋɔ báá ɔ mátáyɛ́ mɔɔsɛ́. Ɛ́sɛ́á tuəfulə tɔ́ ndɔ laa ɛlɔ́áyɛ́ yatɛ́ yikimə ɔyɛ́á yɛ́ ŋɔ bɛ́kɛaka.

²³Yatɛ́ ɛmɔ́kɛ́ yɛ́ ŋɔ báá, ɔ mááyɛ́ mɔɔsɛ́ ɛlɔ́áyɛ́ bəəndú bá ɛ́mɛ́lákátɔ́ na bááyɛ́ ɔbá bá ŋɔ báá bá ndɔ baná nyóhiə bɔkɔasɛ́á, busə́kə bɔŋɛ́ŋa bɔ́ ŋɔ báá ɔ bɔnɔŋɔ. Huɛlɛ́ a ŋɔ híə́yíə́ hilóbi ínə́niə ɔ yɛ́táyɛ́ ilúkunə.

²⁴Bá ŋɔ bəə́bu ɔ́nɔ́kɔ na mɔkɔ́átá, bá ŋɔ bəə́bu ɛtaka mikómó ɔ ətíə́ yɛ mɔnɔŋɔ mənə́mənə́ məkimə, mɔnɔŋɔ má ŋɔ Yəlúsalɛma tafaka ɔkafámáká ikúílí ɔyɛ́á, Huɛlɛ́ a ná bəə́bu índíə́ a sɛ́á yɛ́ tɔ́mba.»

²⁵«Tɔŋgɛtɛ́nɛ́á tɔ́ yələ́mənə tɔ́ ŋɔ báá ɔ hiɔtɔ́tɔ́, ɔ muilí, na tusənji, ɔ misí, mɔnɔŋɔ má ŋɔ báá ɔ bɔkɔ́lɔ́ma bɔŋɛ́ŋa, ɛlɔ́áyɛ́ məkumbəki má iŋgínə́ má nɔmɔ́, na iŋunu.

²⁶Bɛndɔ bá ŋɔ wə́kunə na bɔkɔ́lɔ́ma bɔŋɛ́ŋa ikúílí bá ŋɔ bɛ́kɔ́lɔmɔna yatɛ́ ɔyɛ́á yɛ́ ŋɔ ndafámá ɔ misí bɔkɔasɛ́á, Huɛlɛ́ a ŋɔ tundondoní tɔ́ nɔɔ́mɛná ndəndəməkiə.

²⁷Nɔ́yɛ́, bɛndɔ bá ŋɔ Mɔná wa mɔndɔ siəkinə ɔsákɔna tálɛ́mátɔ́ ɔ ɛlɔndɔ́, ɔ injiŋə, na tuúmə tɔŋɛ́ŋa.

²⁸Ikúílí bɛ́táyɛ́ bɛkɔa bɛ́ ŋɔ lúmə ɔndafámá, nɔ́ tɛ́nɛ́ma, nɔ́ mɛlɔ́á nyákɔ́ná tɔ́na bɔkɔasɛ́á, níə́núə́ nihutunə nɛ́ lɛa hoóyi.»

²⁹Yə́susu a ná bəə́bu iŋgətí ɛ́tɛ́na a sɛ́á: «Nɔ́ bɔlɛ́á bɔ́ fíkiə siəkínə na mə́ə́ní malɛ́á:

³⁰Ikúílí nɔ ŋɔ túə́búə́ tɔánjɛ tɔtɔ́tɔ́ siəkinə tɔsɔ́kɔ́tɔ́, nɔ́ manyá ɔwá ikúílí yɛɛsɛ yɛ́ lɛa hoóyi.

³¹Nɔ́yɛ́ tɔ́na, ikúílí nɔ ŋɔ bɛ́ɛ́yɛ́ bɛkɔa siəkinə bɛ́ nɔ́ ndáfama, nɔ́ manyá ɔwá, Nɛmanɛna nɛ́ Huɛlɛ́ nɛ́ lɛa hoóyi.

³²Mɛ ndɔ bənú nɔ́yɛ́ lɛna, nɔ́yɛ́ yɛ́ lɛa taká: Bɛndɔ bá yɛ́ɛyɛ ɛhanyɛ bá sa ndátɔ́mbá bəkimə ubusíə́ ɔbɔ́á bɛ́ɛ́yɛ́ bɛkɔa bikimə bɛ́ ndafámá.

³³Nɔɔ́mɛná na misí bɛ́ ŋɔ tɔ́mba, mba, bɛ́ámɛ́á bɛtambá bɛ́ sá ndátɔmba.»

³⁴«Nɔ́ bɛ́tátáká ɔkɛaka ɔwá, yə́núə́ mɛlɛ́má yɛ́ lɛ lɛmá na ɛmbáta yɛ ɔnɛ́á, yɛ ɔnyɛ́na, na bisə́hísə́hí bɛ́ buɔmɔ́, bɔ́táyɛ́ buɔsɛ́ bɔ́ lɛ bənú fámɛ́ná həmə́tu.

³⁵Ɔ taká, bɔ́ ŋɔ ndafámá ɛ́sɛ́á nibúnjə́ ɔkɛaka ɔwá, nɛ́ kɔɛ́na ɔ bɛndɔ bəkimə bá misí mikimə.

³⁶Nɔ lɛ ákáná ɔ hinó, nɔ́ bɛ́kálákɛ́ná ikúílí tɛ́á; nɔ́yɛ́, nɔ ŋɔ iŋgínə́ kusənə ɔ bɛkɔa bikimə ɔ yáyɛ́na ɔbɛ́á bɛ́ lɛ́á ɔsákɔna ɔkɛaka ɔwá, nɔ bínə́níə́ bátaká ɔ busíə́ bɔ́ Mɔná wa mɔndɔ.»

³⁷Yə́susu ka bá a ndɔ buɔsɛ́ túmbiə ɔ uwinə́niə ɔ Tɛ́mbɛlɛ; mba, bɛkɔlakɔ́lá, a ka bá a ndɔ fáma, a ka bulúə́ túmbíə́ ɔ ɔmáá ɔwá bá ndɔ ɛ́lɛnɛna bá sɛ́á ɔmáá wɔ́ Olífia.

³⁸Bɛndɔ bəkimə bá ka báá bá ndɔ ndasá ɛsɔ́mbalɛ́ ɔ Tɛ́mbɛlɛ ɔ ɔwayɛ́ ɔwɔ́kɔ.