Read Tunen Lúkasɛ 22 Bible Online

Lúkasɛ 22 - Tunen bible

Lúkasɛ 22

¹Ɛŋganda yɛ bɛbɛlɛ́tɛ bɛ́ ɛŋaná mətəkí ɔyɛ́á bá ndɔ ɛ́lɛnɛna Básɛ́ka, yɛ́ ka bá yɛ́ ndɔ bɛ́nya.

²Bisə́lúkú bɛ́ bətitiəmahánɛna na bamanyumbə́ndə́, bá ihə́lí siəkə ɔyɛ́á bá Yə́susu ɔnɔkɔ, mba, bá ka báá bá ndɔ bɛndɔ kɔ́lɔ́ma.

³Nɔ́yɛ́, Sátana a ná fínə́ ɔ mɔlɛ́má wɔ́ Yútasɛ ɔwá bá ndɔ ɛ́lɛnɛna bá sɛ́á á Isikalióto. A ka báá umúlə wɔ́ niómo na báfandɛ́ nɛ́ bɔkɔ́nɛna.

⁴A ná káhɔ́ɔ́kɔ́ na bisə́lúkú bɛ́ bətitiəmahánɛna, na bisə́lúkú bɛ́ batáta Tɛ́mbɛlɛ, nəníə́ a óso ɔ uwəbú á Yə́susu ɔsɛmɛna.

⁵Bisə́lúkú bá ná nɛhɔnɔ ɔkɔ, bá ná Yútasɛ bílíhə́níə́ ɔwá mbá bá wɛɛ́ya mɔnɛ́á índíə́.

⁶A ná lumínə, a ná lúmə́ ikúílí yɛɛsɛ ɔ usiə ɔyɛ́á a bəə́bu Yə́susu sɛmɛ́ná ɔ kɛaka ɔwá nɛmɔndɔ nɛ́ lɛ manya.

⁷Ikúílí yɛ́ ɛŋganda yɛ bɛbɛlɛ́tɛ bɛ́ ɛŋaná mətəkí yɛ́ ná ndáfámá ɔyɛ́á yɛ́ ná báá ɔwá, bá tɔndɔ́mbándɔ́mbá ɔ́nɔ́kɔ́ ɛlɔáyɛ́ bɛ́labɔ́nɛ́á bɛ́ Básɛ́ka,

⁸Yə́susu a ná Bíə́lə na Yɔhánɛsɛ lɔ́má a sɛ́á: «Nɔ́ ákáná nɔ́ ká bəsú bɛ́labɔ́nɛ́á bɛ́ Básɛ́ka tábɔ́nákɛ́na.»

⁹Bá ná wɛɛ́ya batá bá sɛ́á: «Hə́níə́ ɔ ndɔ siə ɔwá tɔ bɛɛ́ta tábɔ́náka əə́?»

¹⁰A sɛ́á: «Ikúílí ɔyɛ́á nɔ ndɔ kafámáká ɔ bətínə́, nɔ ndɔ mɔndɔ ɛ́nyánakana na itókótókó yɛ́ mənífə́ túánátɔ. Nɔ́ wɛɛ́ya ɔŋgɔ́kɔ ɔ miímə ɔyɛ́á a ndɔ fíə́kinə.

¹¹Nɔ́ muití miímə lɛná nɔ sɛ́á: “Mulə́liə a ndɔ aŋɔ́á bata a sɛ́á hə́níə́ ɛtaŋɛ́á yɛ́ lɛ́á ɔyɛ́á ɛkasɛ mɛ Básɛ́ka nɛ́áka na bámɛ́á bɔkɔ́nɛna əə́?”

¹²A ndɔ bənú ɛtaŋɛ́á yɛŋɛ́ŋa ínə́kiniə hɔ́átɔ́ ɔ ɔtábɔ́na, ɔmɔ́tɔ́yɛ́ mbá nɔ Básɛ́ka tábɔ́náka.»

¹³Bɔkɔ́nɛna bá ná ákáná, bá ná bɛkɔa bikimə níbə́ ɛ́sɛ́á Yə́susu a ná bəə́bu lakɛ́na, bá ná bɛ́labɔ́nɛ́á bɛ́ Básɛ́ka tábɔ́náka.

¹⁴Ikúílí yɛ́ ɔnɛ́á yɛ́ ná ndáfámá, Yə́susu a ná tuənə ɔ ɛtáka na báyɛ́á basɔ́másɔma.

¹⁵A ná bəə́bu lɛ́na a sɛ́á: «Mɛ ná síə́kə ɔ bɛɛ́bɛ bɛ́labɔ́nɛ́á bɛ́ Básɛ́ka ɔ ɔwɛta na bənú na ilókí yɛŋɛ́ŋa ɔ busíə́ ɔbɔ́á mɛ məsə́kə kusə́nə.

¹⁶Ɔ taká, mɛ ndɔ bənú nɔ́yɛ́ lɛna, mɛ sɔ́ ŋɔ bɛɛ́bɛ bɛ́labɔ́nɛ́á nɛ́á tɔ́na ɔkafámáká ɔ hinó ɔhɛ́á Huɛlɛ́ a ŋɔ bɛɛ́ta úndúsiniə bikimə ɔ ɔwayɛ́ Nɛmanɛna.»

¹⁷Ɔ yɛ́ɛ́yɛ́ ikúílí, bá ná wɛɛ́ya ɛnyɛ́ná yɛ́ məluku índíə́, a ná Huɛlɛ́ mohóloniə híə́níníə́, a sɛ́á: «Nɔ́ yɛ́ɛyɛ ɛnyɛ́ná yɛ́ məluku ɛtá, nɔ́ áfákána.

¹⁸Ɛ́ɛ! Mɛ ndɔ bənú nɔ́yɛ́ lɛna, ɔ botolokiə isíŋáka, mɛ sa ndá máama məluku nyɛ́ná tɔ́na ɔkafámáká ɔ ikúílí ɔyɛ́á Nɛmanɛna nɛ́ Huɛlɛ́ nɛ́ ndáfama.»

¹⁹Nɔ́yɛ́, a ná bɛlɛ́tɛ ɛtá, a ná Huɛlɛ́ mohóloniə híə́níníə́, a ná mɛɛ́ta bísə́kə́níə́, a ná bəə́bu mɛɛ́ta índíə́ a sɛ́á: «Yɛ́ɛyɛ́ yɛ́ lɛa yamɛ́á mɛɛ́lɔ ɔyɛ́á mɛ ná índíə́ ɛlɔ́áyɛ́ ənú. Nɔ́ nɔ́yɛ́ kɛ́áka ɔ ɔwámɛ ɛbɛ́kɔ́lɔmɔna.»

²⁰Əlimə yɛ ɔnɛ́á, a ná nɔ́yɛ́ híə́núlíníə́ na ɛnyɛ́ná yɛ́ məluku, a sɛ́á: «Yɛ́ɛyɛ ɛnyɛ́ná yɛ́ məluku yɛ́ lɛa nɛtɔana niɔ́sɔ nɛ́ máámɛ́á manɔ́ŋɔ́ ɔmá má ná ólókókíə́ ɛlɔáyɛ́ ənú.

²¹Mba, wɛ́ɛ́yɛ́ ɔwá a ndɔ mɛaŋɔ́á sɛma, a lɛa háha ɔ ɛtáka na mɛaŋɔ́á!

²²Ɔ taká, Mɔná wa mɔndɔ a ŋɔ wə́ə́ ɛ́sɛ́á Huɛlɛ́ a ná tínímíə́, mba, indimisi na wɛ́ɛ́yɛ́ ɔwá a ndɔ wɛɛ́ya sɛma!»

²³Bá ná lúmə́ ɔ ɔbɛ́bata bəə́bu na bəə́bu ɔwá ɛ́yánɛ́ ɔ uwəbú ətíə́ a ndɔ nɔ́yɛ́ kɛaka.

²⁴Bɔkɔ́nɛna bá ná tuənə ɔ tə́ŋə́niə nióni nɛŋɛ́ŋa ɔkɛaka ɔwá bá manyá ɛ́yánɛ́ ɔ uwəbú ətíə́ a lɛ́á mɔŋɛ́ŋa ɔ bəkimə ɔyáyɛ́na əə́?

²⁵Yə́susu a ná bəə́bu lɛ́na a sɛ́á: «Abáka bənəni bá mɔnɔŋɔ bá maáta manakɛna na busə́lúkú bukimə, bááyɛ́ ɔbá bá ndɔ bəə́bu manɛna, bá hikəkiə ɔwá bá bəə́bu ɛ́lɛ́ákɛ́na, bakɛabuɛsɛ.

²⁶Mba, nɔ́yɛ́ yɛ́ sá hɔ́ánana ɔbá ɛlɔáyɛ́ ənú, wɛ́ɛ́yɛ́ ɔwá a lɛ́á mɔŋɛ́ŋa ɔ uwənú ətíə́, a ná hɔ́ánána ɔbáá ɛ́sɛ́á mɔná mɔtɛ́tɛ́á, wɛ́ɛ́yɛ́ ɔwá a ndɔ manɛna, á bámɛ́nɛ́ná ɔ́maná ɛ́sɛ́á ɔwá a lɛ́á mɔnyɛna.

²⁷Ɔ taká, ɛ́yánɛ́ a lɛ́á mɔŋɛ́ŋa; ɔ́ wɛ́ɛ́yɛ́ ɔwá a lɛ́á ɔ ɛtáka alɛ́ɛ́, ɔ́ wɛ́ɛ́yɛ́ ɔwá a lɛ́á mɔnyɛna əə́? Tátá ɔ́ wɛ́ɛ́yɛ́ ɔwá a lɛ́á ɔ ɛtáka əə́? Ɛ́ɛ! Mba ɔ ɔwámɛ, mɛ lɛa ɔ uwənú ətíə́ ɛ́sɛ́á mɔnyɛna.»

²⁸«Uwənú, nɔ lɛa bááyɛ́ ɔbá bá ná makɔsɔnana ísə́bíníə́ na mɛaŋɔ́á.

²⁹Ɔwámɛ, mɛ ndɔ Nɛmanɛna bɛ́lɛ́na ɛlɔ́áyɛ́ búə́núə́ buɛsɛ, ɛ́sɛ́á yamɛ́á Isə́ a ná nɛɛ́ta bɛ́lɛ́na ɔ ɔwámɛ buɛsɛ,

³⁰Nɔ́yɛ́ mbá nɔ ŋɔ nɛ́áka, nɔ́ nyákɛ́ná tɔ́na ɔ ɔwámɛ ɛtáka ɔ ətíə́ yɛ nɛ́ámɛ́á Nɛmanɛna, nɔ́ ŋɔ tuənəkinə ɔ tukómo ɔkɛaka ɔwá nɔ niómo na tɔ́fandɛ́ nɛ́ tutikə tɔ́ Ísilahɛ́lɛ kə́lə́sə́kíə́.»

³¹Isə́lúkú a sɛ́á: «Á Símono, á Símono, Sátana a ná bənú bəkimə sɔ́káká ɔ kɛaka ɔwá a bənú fúkə́lə́ ɔ́maná ɛ́sɛ́á abáka bá uŋəŋə́ fúmə́kinə.

³²Mba, mɛ ná bɛ́kálákɛ́na ɛlɔ́áyɛ́ áwɔ ɔkɛaka ɔwá yáwɔ́á ilumininə yɛ́ lɛ nimə. Ikúílí ɔyɛ́á ɔ ŋɔ ndahíáná, ónókíníə́ báwɔ́á bənínyə́.»

³³Bíə́lə a sɛ́á: «Á Isə́lúkú, mɛ lɛa hoóyi ɔ ɔwákaka na aŋɔ́á, ata ɔ ɛbɔka mbá ata ɔ nyɛmbɛ́.»

³⁴Yə́susu a sɛ́á: «Á Bíə́lə, mɛ ndɔ aŋɔ́á lɛna, miɔkɔ́ yɛ́ sɔ ŋɔ lɔ́ŋɔ niɔfɛ́nɛ, ɛŋaná ɔwámɛ ɔbɛ́sáŋɔ́na bikúílí bɛ́lálɔ́ na ɔlaa ɔwá, ɔ lɛ ndɔ mɛaŋɔ́á manya.»

³⁵Nɔ́yɛ́, a ná bəə́bu bəkimə lɛ́na a sɛ́á: «Ikúílí mɛ ná bənú lɔ́ma ɛŋaná ɔmbalá wɔ́ mɔnɛ́á, ɛŋaná mukutə, ɛŋaná bɛtafɛ́ná, nɔ ka báá ɔ nɛsɔ́ka nɛ́ bɔɔ́la əə́?» Bá sɛ́á ata bɔɔ́la.

³⁶A sɛ́á: «Mba isíŋáka, ata ɛ́yánɛ́ ɔwá a lɛ́á na ilímbí yɛ́ mɔnɛ́á á yɛɛ́ta ɛta, ata ɔwá a lɛ́á na mukutə á muítə ɛta. Wɛ́ɛ́yɛ́ ɔwá a lɛ bá na mɔkɔ́átá, a nɛ́áyɛ́á nilókiə lúə́ ɔkɛaka ɔwá a muítə ɔndɔ.

³⁷Ɔ taká, mɛ ndɔ bənú lɛna, yɛ́ lɛa hɔ́ánánátɔ́ ɔwá yɛ́ɛyɛ ɛtambá ɔyɛ́á yɛ́ lɛ́á tilə́kə́tɔ́, Huɛlɛ́ á yɛɛ́ta úndúsíníə́ ɔ ɔwámɛ ɛlɔ́á yɛ́ sɛ́á: “Bá ka wɛɛ́ya fanɛna ɔ umúlə wɔ́ bakɛamabɛ́á”. Ɔ taká, yatɛ́ ɔyɛ́á Huɛlɛ́ a ná lááka ɛlɔ́áyɛ́ ámɛ yɛ́ lɛa hoóyi ɔ ubíúndúsiniə.»

³⁸Bɔkɔ́nɛna bá sɛ́á: «Á Isə́lúkú, ɔ́ mɛkɔ́átá ífəndí yíiyi.» Mba a sɛ́á: «Nɔ́yɛ́ yɛ́ ná hɔ́ánána.»

³⁹Yə́susu a ná fama, a ná ákáná ɛ́sɛ́á yáyɛ́á ihílí ɔ ɔmáá wɔ́ Olífia. Báyɛ́á bɔkɔ́nɛna bá ná wɛɛ́ya ɔŋgɔ́kɔ.

⁴⁰Ɛnaka bá káfámá umə́, a ná bəə́bu lɛ́na a sɛ́á: «Nɔ́ bɛ́kálákɛ́na ɔkɛaka ɔwá nɔ lɛ kɔ́á ɔ mɔkɔ́lɛna.»

⁴¹Ɔ yɛ́ɛ́yɛ́ ikúílí, a ná bísúə́lə́ na báyɛ́á bɔkɔ́nɛna hoóyi na tɛ́tɛ́á yɛ mabaná. A ná moŋgóndi lúmə́ ɔ misí, a ná bɛ́kálákɛ́na,

⁴²a sɛ́á: «Á Isə́, ábá ɔ ndɔ nɔ́yɛ́ hikiə, ə́kə́nə́síə́ yɛ́ɛ́yɛ́ ɛnyɛ́ná yɛ́ məsə́kə hata na mɛaŋɔ́á. Tátá ɛ́sɛ́á mɛ ndɔ hikiə, mba ɛ́sɛ́á ɔ ndɔ siə.» [

⁴³Ɔ umisíumə́, áŋgɛlɛ a ná húlínə́ ɔ nɔɔ́mɛná, a ná wɛɛ́ya bínə́níə́ ɛlɔ́áyɛ́ ɔwayɛ́ uwoníniə.

⁴⁴Bɔkɔ́lɔ́ma bɔ́ ná Yə́susu itíə́, a ná botólíə́ ɔ ubíyə́bə a bɛ́kálákɛna mɔŋɛ́ŋa. Ilúhə́ ɔyɛ́á yɛ́ ná bá yɛ́ ndɔ wɛɛ́ya fáma, yɛ́ ka báá ɛ́sɛ́á mətə́bí má manɔ́ŋɔ́ ɔmá má ndɔ kɔa ɔ misí].

⁴⁵Əlimə yɛ́ mabɛ́kálɛ́na, a ná hɔalɛ́na, a ná ndáhíáná ɔ ɛmɛ́ŋɛ́ yɛ báyɛ́á bɔkɔ́nɛna; a ná bəə́bu kɔ́ána ɔ hinó, na busə́kə ɔ mɔlɛ́má.

⁴⁶A ná bəə́bu lɛ́na a sɛ́á: «Yatɛ́! Nɔ lɛa ɔ hinó! Nɔ́ hɔalɛ́na, nɔ́ bɛ́kálákɛ́na ɔkɛaka ɔwá nɔ lɛ kɔɛ́na ɔ mɔkɔ́lɛna.»

⁴⁷Ikúílí Yə́susu a ná bá a ndɔ hɔ́ɔ́ nɔ́yɛ́, mɔlɔ́ŋɔ́ wɔ́ bɛndɔ wɔ́ ná ndáfama. Wɛ́ɛ́yɛ́ ɔwá bá ná báá bá ndɔ ɛ́lɛnɛna bá sɛ́á á Yútasɛ, ɔmɔtɛ́ ɔ ətíə́ yɛ niómo na báfandɛ́ nɛ́ bɔkɔ́nɛna, a ná tɔ́mbálɛ́la ɔ uwəbú busíə́, a ná kátɛ́nɛ́má á Yə́susu busíə́ ɔkɛaka ɔwá a wɛɛ́ya bíə́ŋə́lə́níə́.

⁴⁸A ná Yútasɛ lɛ́na a sɛ́á: «Á Yútasɛ, na nibíə́ŋə́ləniə ɔ ndɔ Mɔná wa mɔndɔ fíɔ́tɔ əə́?»

⁴⁹Ɛnaka báyɛ́á bɔkɔ́nɛna bá síə́kínə́ yatɛ́ ɔyɛ́á yɛ́ ndɔ siə ɔbɛ́tɔ́mba, bá ná wɛɛ́ya batá bá sɛ́á: «Á Isə́lúkú, tɔ ósó ɔnɔaka na mɔkɔ́átá əə́?»

⁵⁰Ɔmɔtɛ́ ɔ uwəbú ətíə́ a ná mɔnyɛna wa mutitiəmahánɛna mɔŋɛ́ŋa mulúə́ wɔ́ mɔkátá ɔ bɛnɔ́mɛ fala.

⁵¹Mba, Yə́susu a sɛ́á: «Nɔ́ niása yɛ́ bɛ́kɛ́áká ɛ́sɛ́á nɔ́yɛ́ yɛ́ ná hɔ́ánána.» A ná mulúə́ wɔ́ wɛ́ɛ́yɛ́ mɔnyɛna itíə́lə, a ná wɛɛ́ya niŋə́síə́.

⁵²A ná yɛ́ɛ́yɛ́ ikúílí hɔ́lɛ́na ɔ bááyɛ́ ɔbá bá ná ndásá ɔ ɔwayɛ́ ɔhalɛna; bɛnatákɛ bɛ́ bɔnɔŋɔ, bisə́lúkú bɛ́ bətitiəmahánɛna na bisə́lúkú bɛ́ bɔkɔfɔnɛa bá Tɛ́mbɛlɛ, a sɛ́á: «Nɔ ná húlə́kə́ na mɛkɔ́átá, na ɛmbɔ́ŋɔ́ ɔ ɔwámɛ ɔndahalɛ́ná ɛ́sɛ́á mɔtɔnɛba.

⁵³Mɔɔsɛ́ məkimə mɛ ka báá na bənú ɔ Tɛ́mbɛlɛ, nɔ sa siə ɔ ɔwámɛ ɔhalɛna, mba uwənú isíŋáka, ɔ́ ikúílí yɛ́ɛyɛ, ɔ́ yə́núə́ ikúílí yɛ́ɛyɛ, ikúílí yɛ́ iŋgínə́ yɛ tubíndindíə́.»

⁵⁴Bá ná Yə́susu halɛ́na, bá ná wɛɛ́ya ákánána, bá ná wɛɛ́ya fínə́nə ɔ miímə yɛ́ mutitiəmahánɛna mɔŋɛ́ŋa. Bíə́lə a tíkə́ bəə́bu ɔŋgɔkɔ əlimə hata.

⁵⁵Bá ka hiwə hɛŋɛ́ŋa kɔtaka ɔ niə́lətíə́; Bíə́lə a ná tuə́nə́ ɔ ɛbɔ́ka ɔyɛ́á bɛndɔ bá ná báá buɔnɔ́ hiwə nɛŋɛ́lɛ́nátɔ.

⁵⁶Mɔnyɛna muəndú ɔmɔtɛ́, a ná Bíə́lə yámá ɔ isəmú yɛ́ hiwə tuənə́tɔ, a ná wɛɛ́ya məə́sə tala, a sɛ́á: «Wɔ́ɔwɔ mɔndɔ tɔ́na a ná báá na Yə́susu.»

⁵⁷Mba Bíə́lə a ná sáŋɔ́ná a sɛ́á: «Á muəndú, mɛ lɛ ndɔ wɛɛ́ya manya!»

⁵⁸Tɛ́tɛ́á yɛ ikúílí, wɔmɔtɛ́ mɔndɔ á wɛɛ́ya yámá, a sɛ́á: «Aŋɔ́á tɔ́na ɔ lɛa wəbú.» Mba, Bíə́lə a sɛ́á: «Bóo! Mɛ lɛ bá wəbú.»

⁵⁹Əlimə yɛ háwɔa ɛmɔtɛ́, wɔmɔtɛ́ mɔndɔ tɔ́na a ná híánɔ́lɔ́ná a sɛ́á: «Taká, wɔ́ɔwɔ mɔndɔ a ná báá ná wɛɛ́ya bɔkɔasɛ́á, a lɛa wa Kalɛ́lɛa.»

⁶⁰Bíə́lə a sɛ́á: «Mɛ lɛ ndɔ manya yatɛ́ ɔyɛ́á ɔ ndɔ siə ɔlaa.» Ɔ umisíumə́ ɛ́sɛ́á a na bá a ndɔ hɔ́ɔ́ nɔ́yɛ́, miɔkɔ́ yɛ́ ná lɔŋɔ.

⁶¹Isə́lúkú a ná bɛ́kɔ́ŋɔ́ná, a ná wɛɛ́ya məə́sə tala. Ɔ yɛ́ɛ́yɛ́ ikúílí, Bíə́lə a ná ɛtambá bɛ́kɔ́lɔ́mɔ́na ɔyɛ́á Isə́lúkú a ná wɛɛ́ya lɛ́na a sɛ́á: «Ubusíə́ ɔbɔ́á miɔkɔ́ yɛ́ lɔ́ŋɔ́ niɔfɛ́nɛ, ɔ ŋɔ bá ɔ nɔ́ mɛaŋɔ́á bɛ́sáŋɔ́na bikúílí bɛ́lálɔ́.»

⁶²A ná fáma, a ná lɛláká mɔŋɛ́ŋa ɛmbáta.

⁶³Bɛndɔ ɔbá bá ná báá bá ndɔ Yə́susu táta, bá wɛɛ́ya kɛ́kɛ́lakɛna, bá wɛɛ́ya súbə́kə.

⁶⁴Bá ná wɛɛ́ya busíə́ sɛ́ŋɛ́ná na iləbə́; bá ná wɛɛ́ya batá bá sɛ́á: «Lɛná bəsú, baánɛ, ɛ́yánɛ́ a ná aŋɔ́á súbə́ əə́? Hɔ́lɔ́ ɛ́sɛ́á mɔhɛ́nátɔtányɛ́.»

⁶⁵Bá wɛɛ́ya bɛ́mɔtɛ́ bɛkɔ́bálɛ́ biəŋí laaka.

⁶⁶Ɛnaka ɔyáá wɔ́ yáá, nɛkɔta nɛ́ bɛnatákɛ bɛ́ bɔnɔŋɔ, bisə́lúkú bɛ́ bətitiəmahánɛna na bamanyumbə́ndə́ nɛ́ ná fíə́kínə, bá ná Yə́susu ákánána ɔ nindúmə́ nɛŋɛ́ŋa nɛ́ bəkə́lə́siə.

⁶⁷Bá ná wɛɛ́ya batá bá sɛ́á: «Lɛná bəsú ábá aŋɔ́á ɔ́ lɛ́á Mɛ́sia.» A ná bəə́bu bíhíə́níníə́ a sɛ́á: «Ata mɛ ndɔ bənú lakɛna, nɔ sɔ́ ŋɔ luminə.

⁶⁸Ábá mɛ ná bənú bɔkɔa batá, nɔ sɔ́ ŋɔ mɛaŋɔ́á bɛ́kámɔsɔna.

⁶⁹Mba ɔ botolokiə isíŋáka, Mɔná wa mɔndɔ a ndɔ tuənəkinə ɔ ɛsalɛ yɛ́ bɛnɔ́mɛ yɛ́ Huɛlɛ́ yɛ injiŋə.»

⁷⁰Bəə́bu bəkimə bá sɛ́á: «Aŋɔ́á, ɔ lɛ́á Mɔná wa Huɛlɛ́ əə́?» A sɛ́á: «Ɛ́sɛ́á nɔ ndɔ laa, taká, mɛ nɔ́yɛ́ báka.»

⁷¹Mba, bá sɛ́á: «Yatɛ́ tɔ́na tɔ ndɔ siə, tɔ lɛ bá na ilókí yɛ́ bəmbóŋímboŋi. Ɔ taká, bəsú bɛ́múɛ́tɛ́ tɔ ná bɛtambá ɔ́kɔ́kɛ́na ɔbɛ́á bɛ́ ná fámáká ɔ ɔwayɛ́ munuə.»