Read Tunen Lúkasɛ 23 Bible Online

Lúkasɛ 23 - Tunen bible

Lúkasɛ 23

¹Ilúkunə yikimə yɛ́ nindúmə́ nɛŋɛ́ŋa nɛ́ bəkə́lə́siə, bá ná huəlínə́níə́ bəə́bu bəkimə, bá ná Yə́susu ákánána á Bilátɛ busíə́.

²Umə́, bá ná botólíə́ ɔwayɛ́ ɔsɔ́mɛna bá sɛ́á: «Tɔ ná wɔ́ɔwɔ mɔndɔ nibə́ a ndɔ búə́súə́ bɔnɔŋɔ tuŋulə. A ndɔ laa a sɛ́á bá lɛ ɛtásɛ yɛ Káyɛsa sabɔna, a ndɔ bɛ́laa Mɛ́sia, á munəni.»

³Bilátɛ a ná Yə́susu batá a sɛ́á: «Aŋɔ́á ɔ lɛ́á taká munəni wa Bɛyútɛnɛ əə́?» A sɛ́á: «Aŋɔ́á ɔ ndɔ nɔ́yɛ́ laa.»

⁴Bilátɛ a ná bisə́lúkú bɛ́ bətitiəmahánɛna na nɛmɔndɔ lɛ́na a sɛ́á: «Mɛ sá hɛkɔma bɔ́ŋɔ ɔhɛ́á hɛ́ ná wɛɛ́ya hɔkɛ́na.»

⁵Mba, bɔsɔ́mɛna bá Yə́susu bá ná ɛ́mbálɛ́ná bá sɛ́á: «A ndɔ bɛndɔ íkíniə ɔ ɔfamɔbɔa na bɛ́áyɛ́á bilə́líə́ ɔ balakɛna ɔ misí yɛ Kalɛ́lɛa ɔ tɔ́mbákɛna ɔ misí yɛ́ Yútɛa, isíŋáka a nɔ́ ndafámá háha.»

⁶Ikúílí Bilátɛ a ná ɔ́kɔ́kɛ́na nɔ́yɛ́, a ná batá ɔwá ábá wɛ́ɛ́yɛ́ mɔndɔ a lɛa wa Kalɛ́lɛa.

⁷Ɛnaka a manyá ɔwá a lɛa wa nɛmanɛna nɛ́ Əlóto, a ná wɛɛ́ya lɔ́má ɔ ɔwayɛ́ busíə́ bɔkɔasɛ́á, a ka báá wɛɛ́ya tɔ́na ɔ Yəlúsalɛma ɔ tɔ́táyɛ́ tunó.

⁸Əlóto a ka bá na nɛhɔnɔ á Yə́susu usinə bɔkɔasɛ́á, a ka bá a ndɔ yayɛ́á indumə ɔ́kɔ, ɔ taká, hata yɛ ikúílí, a ka bá na ilókí ɔwá bá ɛ́nyánána. A ka bá na ɛnánɛna ɔwá mbá a yɛ́mɔtɛ́ isə́mə́tə́ kɛ́áka ɔwayɛ́ busíə́.

⁹A ka wɛɛ́ya bataka bɛkɔa biəŋí; mba, Yə́susu á sa bíhíə́niniə ata bɔkɔa.

¹⁰Bisə́lúkú bɛ́ bətitiəmahánɛna na bamanyumbə́ndə́ bá ka báá ɔmɔ́tɔ́yɛ́, bá wɛɛ́ya sɔ́mɔkɛna mɔbɛ́á.

¹¹Əlóto na báyɛ́á bɔkɔfɔnɛa bá wɛɛ́ya yaŋɔnakɛna, bá wɛɛ́ya sɔ́kɔ́nakɛna, bá ná wɛɛ́ya lɛŋáká na maŋgɔmba má bunəni, bá ná wɛɛ́ya tilə́síə́ á Bilátɛ busíə́.

¹²Ɔ bɔ́táyɛ́ buɔsɛ́ Əlóto na Bilátɛ bá ná nɛŋgɔ́áyɛ́ tɔ́á mbá nɔ́yɛ́ ɔ yítə́ní ikúílí bá bányákana.

¹³Ɔ yɛ́ɛ́yɛ́ ikúílí, Bilátɛ a ná bisə́lúkú bɛ́ bətitiəmahánɛna na bamanɛna bá bɔnɔŋɔ bukimə kɔtáka.

¹⁴A ná bəə́bu lɛ́na a sɛ́á: «Nɔ ná mɛaŋɔ́á wɔ́ɔwɔ mɔndɔ húlə́nínə nɔ sɛ́á mutuŋulə wa bɔnɔŋɔ, mba, mɛ ná wɛɛ́ya njɔnɔ́kɔ ɔ uwənú busíə́. Uwənú, nɔ ndɔ wɛɛ́ya sɔ́mɛna; mba, ɔwámɛ mɛ sá hɛkɔma bɔ́ŋɔ ata hímotí ɔhɛ́á nɔ ná wɛɛ́ya sɔ́mɛ́nɛ́na.

¹⁵Əlóto bɛ́múɛ́tɛ́ a sá áyɛ́ bɔkɔa bɔbɛ́á bɔ́ŋɔ ɔbɔ́á a ná kɛ́áka, ɔ́ ɛlɔ́áyɛ́ nɔ́yɛ́ a ná bəsú wɛɛ́ya tilə́síníə́. Wɔ́ɔwɔ mɔndɔ a sa tɛŋɛna ata bɔkɔa ɔkɛaka ɔwá bá wɛɛ́ya ɔnɔkɔ.

¹⁶Ɛkasɛ mɛ iŋgínə́ índíə́ bá wɛɛ́ya hɔ́ányáká muɛsɛ mbá mɛ tíkə́ wɛɛ́ya niasa.» [

¹⁷Ɛŋganda tɛ́á yɛ Básɛ́ka, Bilátɛ a ka báá bíə́kíníə́tɔ́ uwəbú ɔ mɔndɔ wa ɛbɔka ɔniasɛna ɔmɔtɛ́].

¹⁸Mba, bɛndɔ bəkimə bá ná botólíə́ ɔ uyə́mə bá sɛ́á: «Ónósíə́ wɛ́ɛ́yɛ́ mɔndɔ; ɔ́ bəsú Banábasɛ niasɛ́na.»

¹⁹Ikúílí bɛndɔ bá ná ituəmə kuəsíə́ ɔ bətínə́ yɛ Yəlúsalɛma, Banábasɛ a ka nɛɛmɛ́ túána, a ná mɔndɔ ɔnɔ; ɔ́ ɛlɔ́áyɛ́ nɔ́yɛ́ bá ná wɛɛ́ya hɛ́na ɔ ɛbɔka.

²⁰Ɛ́sɛ́á Bilátɛ a ná bá na ilókí á Yə́susu ɔniasa, a ná bəə́bu ɛtambá híə́níníə́.

²¹Mba uwəbú, bá ná yə́mə́níə́ bá sɛ́á: «Ɔ́mɔ́kɛ́ná wɛɛ́ya ɔ ɔmbásá, ɔ́mɔ́kɛ́na wɛɛ́ya!»

²²Ɔ bikúílí bɛ́lálɔ́, a ná bəə́bu lɛ́na a sɛ́á: «Yatɛ́ bɔbɛ́á wɔ́ɔwɔ mɔndɔ a ná kɛ́áka əə́? Mɛ sá bɔbɛ́á bɔ́ŋɔ ata bɔ́mɔtɛ́ ɔbɔ́á bɔ́ ndɔ wɛɛ́ya hɔkɛna ɔ nyɛmbɛ́. Ɛlɔ́áyɛ́ nɔ́yɛ́, ɛkasɛ mɛ iŋgínə́ indíə́ bá wɛɛ́ya hɔ́ányáka, əlimə yɛ nɔ́yɛ́ mbá mɛ wɛɛ́ya niása.»

²³Mba bɛndɔ bá ná ɛ́mbálɛ́ná na uwoníniə bá sɛ́á: «Ɔ́mɔ́kɛ́ná wɛɛ́ya ɔ ɔmbásá!» Mə́búə́ moóni má ná yáyɛ́nána.

²⁴Nɔ́yɛ́, Bilátɛ a ná ihə́ŋiə ɛtá ɔwá yɛ́ bɛ́kɛ́áka ɛ́sɛ́á bá ná bata.

²⁵A ná mɔndɔ niása ɔwá bá ná bata. Ɔ́ wɛ́ɛ́yɛ́ ɔwá a ná báá ɔ ɛbɔka bɔkɔasɛ́á, a ka mɔndɔ ɔ́nɔ́kɔ ikúílí yɛ́ ituəmə. A ná bəə́bu Yə́susu índíə́, a sɛ́á: «Nɔ́ wɛɛ́ya kɛ́áká ɛ́sɛ́á nɔ ndɔ siə.»

²⁶Ɛ́sɛ́á bɔkɔfɔnɛa bá ná Yə́susu fámáná ɔ bətínə́, bá ná wɔmɔtɛ́ mɔndɔ ɛ́nyánána, nɛ́áyɛ́á niínyə á Símono, mɔndɔ wa bətínə́ yɛ Silɛ́nɛ. A ka báá ɔ ndahíánáka ɔ bɛtɔbɔtɔ́bɔ́, bá ná wɛɛ́ya íkíníə́ ɔwá á ɔmbásá túáná, a Yə́susu ɔŋgɔ́kɔ.

²⁷Ilúkunə yɛŋɛ́ŋa yɛ́ bɔnɔŋɔ yɛ́ ka bá yɛ́ ndɔ Yə́susu ɔŋgɔ na bəəndú ɔbá bá ná báá bá ndɔ lɛla; bá bɛsasa bíkítəkə ɛlɔ́áyɛ́ ayɛ́.

²⁸Yə́susu a ná bɛkɔŋɔna, a ná bááyɛ́ bəəndú lɛ́na a sɛ́á: «Á milóní yɛ́ Yəlúsalɛma, nɔ lɛ lɛlá ɛlɔ́áyɛ́ ámɛ; mba, nɔ́ lɛláka ɛlɔ́áyɛ́ bənú bɛ́múɛ́tɛ́ na bə́núə́ baná;

²⁹bɔkɔasɛ́á mɔɔsɛ́ má ŋɔ ndafámá ɔwá bá ŋɔ laaka bá sɛ́á: “Nɛhɔnɔ na bɛlɛla bɛ́ bəəndú, bááyɛ́ ɔbá bá sa bíə́nə ata bááyɛ́ ɔbá bá sa baná nyóhiə.”

³⁰Nɔ́yɛ́, bɛndɔ bá ŋɔ lúmə ɔ ɔlaa bá sɛ́á: “Á ɛmáá, nɔ́ bəsú kɔ́ákɔ́nɛ́na, á bikindəki, nɔ́ bəsú bitəkə.”

³¹Ábá bá ndɔ nɔ́yɛ́ kɛa ɔ bɔlɛ́á buɔ́sɔ, bikúílí bɛ́nɛ́á ɔ bɔkɔ́tákánɔ́ əə́?»

³²Bá ná bəcəŋə ákánána tɔ́na báfandɛ́ usiəkə ɔwá bá bəə́bu ɔ́nɔ́kɔ́ na Yə́susu.

³³Bá káfámá ɔ ɛbɔ́ka ɔyɛ́á bá ndɔ ɛ́lɛnɛna bá sɛ́á hɛbɔmbɔ́, bá ná Yə́susu ɔ́mɔ́kɛ́na ɔmɔ́tɔ́yɛ́ ɔ ɔmbásá, bá ná bəcəŋə báfandɛ́ ɔ́mɔ́kɛ́ná tɔ́na ɔ ɛmbásá yinə́yinə́, wɔ́ɔwɔ ɔ ɛsalɛ yɛ́ bɛnɔ́mɛ, wə́ə́ní ɔ ɛsalɛ yɛ́ biəní.

³⁴Yə́susu a sɛ́á: «Á Ába, niasɛ́ná bəə́bu bɔkɔasɛ́á, bá lɛ ndɔ manya yatɛ́ bá ndɔ kɛa.» Bá ná bɛ́áyɛ́á bɛlɛŋa súbínə́ ɔ ndɔŋɔ́, bá ná afákána.

³⁵Bɛndɔ bá ná tuənə́kínə, bá siəkinə yatɛ́ ɔyɛ́á yɛ́ ndɔ bɛ́tɔ́mba. Bamanɛna bá Bɛyútɛnɛ bá wɛɛ́ya yaŋɔnakɛna bá sɛ́á: «A ka bənə́bənə́ nuəkəniə, á bínúə́kə́níə́ wɛɛ́ya bɛ́múɛ́tɛ́ ábá a sɛ́á wɛɛ́ya a lɛ́á Mɛ́sia, wɛ́ɛ́yɛ́ ɔwá Huɛlɛ́ a ná tɛfa.»

³⁶Bɔkɔfɔnɛa tɔ́na bá wɛɛ́ya kɛ́kɛ́lakɛna; bá ná bɛ́nyálɛ́la ɔwayɛ́ busíə́, bá ná wɛɛ́ya bɛnásákɛ bɛ́ məluku índíə́.

³⁷Bá laaka bá sɛ́á: «Ábá aŋɔ́á ɔ lɛ́á munəni wa Bɛyútɛnɛ, bínúə́kə́níə́ aŋɔ́á bɛ́múɛ́tɛ́.»

³⁸Ɔ ɔwayɛ́ mɔlɔ́á ɔmbáŋá, yɛ́ ka báá tilə́kə́tɔ́ yɛ́ sɛ́á: «Wɔ́ɔwɔ a lɛa munəni wa Bɛyútɛnɛ.»

³⁹Mucəŋə ɔmɔtɛ́ ɔwá a ná báá ɔ́mɔ́kɛ́nátɔ́ ɔ ɔmbásá, a ná Yə́susu kɔ́bálá a sɛ́á: «Ɔ ndɔ laa ɔ sɛ́á aŋɔ́á ɔ lɛ́á Mɛ́sia, bínúə́kə́níə́ nə́ə aŋɔ́á bɛ́múɛ́tɛ́, na bəsú tɔ́na.»

⁴⁰Mba, wə́ə́ní a ná wɛɛ́ya kɔ́áyɛ́na a sɛ́á: «Ɔwáwɔ ɔ lɛa sɔ́kɔ́tɛ́átɔ́ ɛ́sɛ́á wɔ́ɔwɔ mɔndɔ; ɔ lɛ ndɔ Huɛlɛ́ kɔ́lɔ́ma əə́?

⁴¹Ɛlɔ́áyɛ́ əsú, yɛ́ lɛa hɔ́ánánátɔ́ bɔkɔasɛ́á, tɔ ná mɔsábɔ́náná kúsə́nə ɔ yatɛ́ ɔyɛ́á tɔ ná kɛ́áka; mba ɔwayɛ́, a sá ayɛ́ bɔkɔa bɔbɛ́á kɛa.»

⁴²A sɛ́á: «Á Yə́susu, ɔ ámɛ bɛ́kɔ́lɔmɔna ikúílí ɔ ŋɔ ndahíáná ɔ ɔwáwɔ nɛmanɛna.»

⁴³Yə́susu a sɛ́á: «Ɔ taká, mɛ ndɔ aŋɔ́á lɛna, niɔfɛ́nɛ ɔ ndɔ bákɔna na mɛaŋɔ́á ɔ balatísi.»

⁴⁴Yɛ́ ka báá hoóyi na kɔɔsɔ, ibínə́binə yɛ́ ná kɔ́á ɔ misí mikimə ɔkafámáká ɛŋgɛ́ŋɛ́ ɛ́lálɔ́ yɛ́ əlimə yɛ kɔɔsɔ.

⁴⁵Hiɔtɔ́tɔ́ hɛ́ ná nimə, nɛbata ɔnɛ́á nɛ́ ná báá táŋɛ́lɛ́ánátɔ́ ɔ Tɛ́mbɛlɛ nɛ́ ná salɛ́á ɔ ətíə́.

⁴⁶Yə́susu a ná yə́mə́ na nióni nɛŋɛ́ŋa a sɛ́á: «Á Ába, mɛ ndɔ híə́míə́ hɛtányɛ́ híə́niə ɔ ɔwáwɔ makátá.» Ɛnaka a hɔ́lɔ́ nɔ́yɛ́, a ná kátɛ́á.

⁴⁷Mɔmanɛna wa bɔkɔfɔnɛa á siəkínə́ nɔ́yɛ́, a ná botólíə́ á Huɛlɛ́ ɔnyama a sɛ́á: «Ɛ́ɛ! Taká taká, wɔ́ɔwɔ mɔndɔ a ka báá wataká.»

⁴⁸Bɛndɔ bəkimə ɔbá bá ná ndásákɔ́na ɔ yɛ́táyɛ́ ɛnámánámá yɛ́ bɔkɔa, bá ná siəkínə́ yatɛ́ ɔyɛ́á yɛ́ ná bɛ́kɛ́áka, bá úluəkə bá bɛsasa bíkítəkə.

⁴⁹Bɛŋgɔ́áyɛ́ bikimə bɛ́ Yə́susu, na bəəndú ɔbá bá ná wɛɛ́ya ɔŋgɔ́kɔ ɔ botolokiə ɔ Kalɛ́lɛa, bá ka báá tɛ́nɛ́mákátɔ́ hə́ní hata, bá siəkinə yatɛ́ ɔyɛ́á yɛ́ ndɔ bɛ́tɔ́mba.

⁵⁰Mɔndɔ ɔmɔtɛ́ a ka báá ɔmɔ́tɔ́yɛ́ nɛ́áyɛ́á niínyə á Yɔ́sɛbɛ, wa bətínə́ yɛ Alimatíə́, yɛmɔtɛ́ bətínə́ yɛ Bɛyútɛnɛ, a ka báá mɔndɔ muɛsɛ, a umbə́ndə́ ɔŋgɔkɔ hoóyíhoóyi.

⁵¹A ka bá na ɛnánɛna yɛ́ ɔ ndafámáká wɔ́ Nɛmanɛna nɛ́ Huɛlɛ́. A ka báá ɛláŋa yɛ́ ilúkunə ɔ nindúmə́ nɛŋɛ́ŋa nɛ́ bəkə́lə́siə, mba a sa bɛtɛ́nɛ́mɛ́ná luminə ɔbɛ́á bɔsɔ́kɔ́ bá na ɛ́ta, bá ná bɛ́kɛ́ákɛ́na.

⁵²A ná ákáná á Bilátɛ busíə́, a ná wɛɛ́ya umimə wɔ́ Yə́susu bata.

⁵³A ná wə́yíə́ umimə tukíníə́ ɔ ɔmbásá, a ná muítə bɔŋɔ́kɛ́ná na ɔmbɔ́mɔ́ muɛsɛ, a ná ká muítə bɛ́lɛ́na ɔ munyə́ ɔwá wɔ́ ná báá tɔ́ákátɔ́ ɔ muɔkɔ ɔ ɛbɔ́ka ɔyɛ́á bá sa bá bá nɔ́ mɔndɔ háá.

⁵⁴Yɛ́ ka báá buɔsɛ́ bɔ́ nɛbɛ́tábɔ́na ɔ ufíə́kínə wɔ́ Sábatɛ.

⁵⁵Bəəndú ɔbá bá ná Yə́susu ɔŋgɔ́kɔ ɔ botolokiə ɔ Kalɛ́lɛa, bá ná bɛ́látá na Yɔ́sɛbɛ. Bá ná məə́sə tálá ɔ munyə́ na usinə nəníə́ bá ná wə́yíə́ umimə bɛ́lɛ́na.

⁵⁶Nɔ́yɛ́, bá ná híánáka ɔ bətínə́, bá ná mooló na mənumbə tábɔ́náka ɛlɔ́áyɛ́ umimə wɔ́ Yə́susu. Bá ná hɔtɔ́kɔ ɔ buɔsɛ́ bɔ́ Sábatɛ, ɛ́sɛ́á umbə́ndə́ wɔ́ ndɔ ínə́niə.