Read Tunen Lúkasɛ 24 Bible Online

Lúkasɛ 24 - Tunen bible

Lúkasɛ 24

¹Ɔ ɛsɔ́mbalɛ́ ɔ buɔsɛ́ bɔ́ indílí, bəəndú bá ná ákáná ɔ munyə́ na mooló na mənumbə ɔmá bá ná tábɔ́náka.

²Bá ná muɔkɔ ɔwá wɔ́ ná báá híə́níníə́tɔ́ ɔ munyə́ kɔ́áná bákɛ́átɔ.

³Bá ná finə, mba, bá sa umimə wɔ́ Isə́lúkú á Yə́susu sinə.

⁴Ɛ́sɛ́á bá ná báá ə́lə́mə́nə́tɔ́ ɛlɔ́áyɛ́ bɔ́táyɛ́ bɔkɔa, bɛndɔ báfandɛ́ bá ná bəə́bu fámɛ́ná həmə́tu na maŋgɔmba nɔmákátɔ.

⁵Na bɔkɔ́lɔ́ma bukimə, bá ná busíə́ lúmə́ ɔ misí. Bááyɛ́ bɛndɔ báfandɛ́ bá ná bəə́bu bátá bá sɛ́á: «Ɛlɔ́áyɛ́ yatɛ́ nɔ ndɔ muɔmɔ́ siə ɔ ətíə́ yɛ bəwə́nú əə́?

⁶A lɛ báá háha, mba a ná hɔŋɔ́á. Nɔ́ bɛ́kɔ́lɔ́mɔ́ná ɛ́sɛ́á a ná bənú lɛ́na ɔ ikúílí a ná báá ɔ Kalɛ́lɛa.

⁷A ka bá a ndɔ bənú lɛna a sɛ́á: “Yɛ́ lɛa hɔ́ánánátɔ́ ɔwá, bá Mɔná wa mɔndɔ sɛmá ɔ makátá má babɛ́á, bá wɛɛ́ya ɔ́mɔ́kɛ́na ɔ ɔmbásá; əlimə yɛ tunó tɔ́lálɔ́, á hɔŋɔ́á.”»

⁸Ɔ yɛ́ɛ́yɛ́ ikúílí, bá ná bɛtambá bɛ́ Yə́susu bɛ́kɔ́lɔ́mɔ́na.

⁹Bá ná hɛ́kɛ́á ɔ munyə́, bá ná bɛ́táyɛ́ bɛkɔa bikimə nífúnə́kínə ɔ niómo na ɔmɔtɛ́ nɛ́ basɔ́másɔma, na bənə́bənə́ bəkimə.

¹⁰Bátáyɛ́ bəəndú bá ka báa: Malɛ́á Mətəlínə, Yɔhána, na Malɛ́á á inyə́ yɛ Yákɔbɔ. Bɔ́mɔtɛ́ bəəndú tɔ́na ɔbá bá ná báá na bəə́bu, bá ná basɔ́másɔma bɛ́táyɛ́ bɛkɔa bikimə nífúnə́kínə.

¹¹Mba uwəbú, bá bɛ́táyɛ́ bɛtambá ɔ́kɔ́kɛna ɛ́sɛ́á bɛndɛ́sa, ɛlɔ́áyɛ́ nɔ́yɛ́ bá sa luminə yatɛ́ ɔyɛ́á bá ná bəə́bu lakɛ́na.

¹²Mba, Bíə́lə a ná mɔlɛ́lá ɛ́ta, a ná káfámá ɔ munyə́, á fɛŋɛ́mɛ́na, a ná yámá ɔ́maná há biləbə́. Ɔ yɛ́ɛ́yɛ́ ikúílí, a ná tilə́ ɔ ɔwayɛ́ ɔmbɛ́la, a ka báá ə́lə́mə́nə́tɔ́ ɔ yatɛ́ ɔyɛ́á yɛ́ ná bɛtɔmbaka.

¹³Ɔ bɔ́táyɛ́ buɔsɛ́, bɔkɔ́nɛna báfandɛ́ bá ka báá ɔ ɔwákaka ɔ bɔnɔŋɔ bɔ́ Ɛmayúsu. Hoóyi na bɛháwɔa bɛ́fandɛ́ bɛ́ mɔkɛnda ɔkafámáká ɔ Yəlúsalɛma.

¹⁴Bá ka báá bá ndɔ hɛ́na ɔ bɛkɔa bikimə ɔbɛ́á bɛ́ ná bɛtɔmbaka.

¹⁵Ikúílí ɔyɛ́á bá ná báá ndɔ hɔ́ɔ́ bá tə́ŋə́kəniə, Yə́susu bɛ́múɛ́tɛ́ a ná tɔ́mbálɛ́la ɔ uwəbú ɛmɛ́ŋɛ́, a ná mɔkɛnda ɛtá na bəə́bu.

¹⁶Bɔkɔ́nɛna bá wɛɛ́ya siəkinə, mba, bɔ́mɔtɛ́ bɔɔ́la bɔ́ bəə́bu kotokiə ɔwá bá lɛ wɛɛ́ya lɛnda.

¹⁷Yə́susu a ná bəə́bu batá a sɛ́á: «Yatɛ́ abáka nɔ kɛndaka nɔ tə́ŋə́kəniə əə́?» Bá ná tɛ́nɛ́má iŋguə́lə́ŋgə́ti ɔ busíə́.

¹⁸Ɔmɔtɛ́ ɔ uwəbú ətíə́ nɛ́áyɛ́á niínyə á Kɛlɛɔ́basɛ, a sɛ́á: «Aŋɔ́á bíbúə́ ɔ lɛ́á ɔ Yəlúsalɛma ɔwá ɔ lɛ ndɔ manya yatɛ́ ɔyɛ́á yɛ́ nɔ́ bɛ́tɔ́mbáka ɔ tɔ́ɔtɔ tunó əə́?»

¹⁹A ná bəə́bu bíhíə́níníə́ a sɛ́á: «Yatɛ́ nə́ə əə́?» Bá sɛ́á: «Ɔ bikimə ɔbɛ́á bɛ́ ná bɛ́tɔ́mbáká ɛsalɛ yɛ́ Yə́susu wa Násalɛtɛ, ɔwá a ná báá mɔhɛ́nátɔtányɛ́ wa injiŋə. A ka nɔ́yɛ́ ínə́niə na bɛ́áyɛ́á bɛnyɛná, na bɛ́áyɛ́á bɛtambá á Huɛlɛ́ busíə́ na ɔ bɛndɔ bəkimə.

²⁰Bíə́súə́ bisə́lúkú bɛ́ bətitiəmahánɛna na bə́súə́ bamanɛna bá ná wɛɛ́ya índíə́ ɔwá bá wɛɛ́ya hɔkɛ́na ɔ nyɛmbɛ́, bəə́bu bá ná wɛɛ́ya ɔ́mɔ́kɛ́na ɔ ɔmbásá.

²¹Uwəsú, tɔ ka báá na ɛnánɛna ɔwá wɛɛ́ya a ŋɔ Ísilahɛ́lɛ háŋɔ́na. Mba na bɛ́táyɛ́ bikimə, ɔ́ álálɔ́ niɔfɛ́nɛ ɛ́sɛ́á bɛ́táyɛ́ bilukusu bɛ́ ná bɛtɔmbaka.

²²Bɔ́mɔtɛ́ bəəndú uwəsú ətíə́ bá ná bəsú ə́lə́mə́nə́síə́, bá ná ákáná ɛsɔ́mbalɛ́ ɔ munyə́.

²³Mba, bá sa wə́yíə́ umimə kɔana. Bá ná ndá bəsú lɛ́na ɔwá, bá ná bɛáŋgɛlɛ siəkínə, bá ná bəə́bu lɛ́na bá sɛ́á a lɛa muɔmɔ́.

²⁴Bɛ́mɔtɛ́ bíə́súə́ bikindəniə bá ka ákána ɔ munyə́, bá ná bɛkɔa bikimə nibə́ ɛ́sɛ́á bəəndú bá ná nífúnə́kə, mba ɔwayɛ́, bá sa wɛɛ́ya sinə.»

²⁵Nɔ́yɛ́, Yə́susu a ná bəə́bu lɛ́na a sɛ́á: «Á bɛndɔ bá ɛŋaná ɛmanya, na bá mɛlɛ́má natákátɔ́ ɔ ulumininə yatɛ́ ɔyɛ́á bɔhɛ́nátɔtányɛ́ bá ná hɔɔkɔ.

²⁶Yɛ́ sa báá ɔwá Mɛ́sia á ɛmɔ́kɛ́ nyááká ɔ nɛ́táyɛ́ nindínə́, əlimə yɛ́ nɔ́yɛ́ mbá a fínə́ ɔ ɔwayɛ́ tuúmə əə́?»

²⁷Ɔ balakɛna ɔ hiəfulə hɛ́ Mósisi, na hɛ́ bɔhɛ́nátɔtányɛ́ bəkimə, a ná bəə́bu nífúnə́kínə́ ɔ Mətilə məkimə yatɛ́ ɔyɛ́á yɛ́ ná bá yɛ́ ndɔ wɛɛ́ya sinə.

²⁸Ɔkafámáká hoóyi na bɔnɔŋɔ ɔbɔ́á bá ná báá ɔ ɔwákaka, Yə́susu a ná kɛ́á ɛ́sɛ́á a nɔ́ ákána hata.

²⁹Mba, bá ná wɛɛ́ya tínímíə́, bá sɛ́á: «Tɔ́kɔ́lɛ, túə́nə́ na bəsú buɔsɛ́ bɔ́ nɔ́ hɔ́á.» A ná bílúmə́kíníə́, a ná fínə́ ɔ miímə, a ná túə́nə́ na bəə́bu.

³⁰Ikúílí bá ná tuə́nə ɔ ɔnɛ́á, a ná bɛlɛ́tɛ ɛta, a ná Huɛlɛ́ mohóloniə híə́níníə́, a ná mɛɛ́ta bísə́níə́, a ná bəə́bu índíə́.

³¹Ɔ umisíumə́ məə́sə má bɔkɔ́nɛna má ná yaa, bá ná wɛɛ́ya lɛnda, mba, a ná nyɔ́á mbasɛ́á uwəbú busíə́.

³²Bá ná botólíə́ ɔ ɔbɛ́bata bá sɛ́á: «Baánɛ, ikúílí tɔ ndɔ báá ɔ ɛnɔ́mɛ, yə́súə́ mɛlɛ́má yɛ́ sá bá yɛ́ ndɔ kɔnjɔ ikúílí a ná bá a ndɔ bəsú Mətilə nífúninə əə́?»

³³Ɔ umisíumə́ bá ná hɔalɛ́na, bá ná tilə́ mɔlɛ́lá ɔ Yəlúsalɛma, bá ná káfámá umə́, bá ná niómo na ɔmɔtɛ́ nɛ́ bɔkɔ́nɛna kɔ́áná kɔtálánátɔ́ na bíə́búə́ bikindəniə.

³⁴Bá ná bəə́bu lɛ́na bá sɛ́á: «Ɔ taká, Yə́susu a lɛa hɔŋɔ́átɔ! A ná Símono bínə́níə́.»

³⁵Bɔkɔ́nɛna báfandɛ́ bá ná bəə́bu nɛŋɔ́nákɛ́ná yatɛ́ ɔyɛ́á yɛ́ ná bɛ́tɔ́mbáká ɔ ɛnɔ́mɛ, nəníə́ bá ná wɛɛ́ya lɛndá ikúílí a ná bɛlɛ́tɛ bísə́níə́.

³⁶Ɛ́sɛ́á bá ná báá bá ndɔ hɔ́ɔ́ nɔ́yɛ́, Yə́susu a ná fáma ɔ uwəbú ətíə́, a ná bəə́bu lɛ́na a sɛ́á: «Bumbə́nú bɔ́ báá na bənú.»

³⁷Bɔkɔ́lɔ́ma bɔ́ ná bəə́bu itíə́, bá kílíməkə, bá fɛkaka bá sɛ́á yití bá ndɔ sinə.

³⁸Mba, a ná bəə́bu lɛ́na a sɛ́á: «Yatɛ́ nɔ ndɔ kɔ́lɔ́mɛna əə́? Ɛlɔ́áyɛ́ yatɛ́ mítə́yí mɛnyɔ́ ɔ uwənú mɛlɛ́má nuúmə əə́?

³⁹Nɔ́ mámɛ́á makátá síə́línə na mámɛ́á makɔlɔ́: Mɛaŋɔ́á. Nɔ́ mɛaŋɔ́á itíə́lə, nɔ́ siəlínə; yití yɛ́ lɛ booko na iməhú ata na biuhə́, mba ɔwámɛ nɔ ndɔ sinə ɔwá bɛ́ ámɛ báka.»

⁴⁰Əlimə yɛ bɛ́táyɛ́ bɛtambá, a ná bəə́bu máyɛ́á makátá na máyɛ́á makɔlɔ́ ínə́níə́.

⁴¹Ɛ́sɛ́á bá sa báá bá nɔ́ luminə, bá ka bá úndúə́tɔ́ na nɛhɔnɔ, ə́lə́mə́nə́tɔ́, Yə́susu a ná bəə́bu batá a sɛ́á: «Nɔ háha báka na bɔ́labɔ́nɛ́á əə́?»

⁴²Bá ná wɛɛ́ya ɛkɛ́tɛ yɛ́ hiɔfɔ́ índíə́ hakákátɔ.

⁴³A na hiítə ɛtá, a ná nɛ́áká ɔ uwəbú busíə́.

⁴⁴A ná bəə́bu lɛ́na a sɛ́á: «Ikúílí ɔyɛ́á mɛ ná báá na bənú, ɔ́ bɛtambá bɛɛ́bɛ mɛ́ ná bənú lákɛ́na ɛlɔ́áyɛ́ ámɛ: Yɛ́ ka báá ɔwá, bikimə ɔbɛ́á bá ná tílə́kə ɔ tuəfulə tɔ́ umbə́ndə́ wɔ́ Mósisi, tɔ́ Bɔhɛ́nátɔtányɛ́ na tɔ́ Tumboŋo, bɛ́ bíúndúsíníə́.»

⁴⁵Ɔ yɛ́ɛ́yɛ́ ikúílí, a ná bəə́bu ɛmanya úbúnə́ ɔkɛaka ɔwá bá Mətilə ɔ́kɔ́kɛ́na.

⁴⁶A ná bəə́bu lɛ́na a sɛ́á: «Náana yɛ́ lɛ́á tilə́kə́tɔ: “Mɛ́sia a ŋɔ ɛmɔ́kɛ́ nyááka, əlimə yɛ tunó tɔ́lálɔ́, a ŋɔ hɔŋɔa.

⁴⁷Ɔ ɔwayɛ́ niínyə bá ŋɔ nɛkɔ́ŋɔ́na nɛ́ mɔlɛ́má yəmbələkəniə ɛlɔ́áyɛ́ nɛniasɛna nɛ́ mabɛ́á ɔ bɛndɔ bəkimə bá misí, ɔ botolokiə ɔ Yəlúsalɛma.”

⁴⁸Bənú nɔ́ lɛ́á bəmbóŋímboŋi bá bɛ́ɛ́yɛ́ bɛkɔa.

⁴⁹Ɔwámɛ, mɛ ŋɔ bənú lɔ́mɛ́na yatɛ́ ɔyɛ́á yamɛ́á Isə́ a ná bənú bílíhə́níə́. Uwənú, nɔ́ tuə́nə ɔtáta ɔ bətínə́ ɔwá nɔ iŋgínə́ yɛ nɔɔ́mɛná kúsə́nə.»

⁵⁰Əlimə yɛ nɔ́yɛ́, Yə́susu a na báyɛ́á bɔkɔ́nɛna ákánána hoóyi na Bɛtánia; ɔmɔ́tɔ́yɛ́, a ná makátá húə́líníə́ a ná bəə́bu sana.

⁵¹Ikúílí a ná báá ɔ uwəbú ɔsana, a ná bɛ́álɔ́ná na bəə́bu, a ná báláka ɔ nɔɔ́mɛná.

⁵²Bɔkɔ́nɛna uwəbú, bá ná wɛɛ́ya lúbúnə́kə, bá ná tilə́ ɔ Yəlúsalɛma úndúə́tɔ́ na nɛhɔnɔ.

⁵³Bá ka báá ikúílíə́kimə ɔ Tɛ́mbɛlɛ, bá Huɛlɛ́ nyamaka.