Read Tunen Lúkasɛ 3 Bible Online

Lúkasɛ 3 - Tunen bible

Lúkasɛ 3

¹Tibɛ́lɛ á Káyɛsa, a ka bá a nɔ́ kɛaka buniə bɔ́ tuɔŋɔ ɔ nɛmanɛna. Bɔ́ŋɔ́sú Bilátɛ a ka báá mɔmanɛna ɔ misí yɛ Yútɛa; Əlóto a misí yɛ Kalɛ́lɛa manakɛna, wayɛ́á munínyə́ á Filíbo ɔ misí yɛ Itulí na yɛ Talakoníki, Lisaniásɛ a ayɛ́ manakɛna ɔ misí yɛ Abilɛ́nɛ.

²Ána na Kayífi bá ka báá bisə́lúkú bɛ́ bətitiəmahánɛna. Ɔ yɛ́ɛ́yɛ́ ikúílí, ɔ makɔ́tákɛ, Huɛlɛ́ a ná Yɔhánɛsɛ á mɔná wa Sakalɛ́á hɔ́kɛ́na.

³Nɔ́yɛ́, a ná botólíə́ ɔ ɔkɛnda ɔ bɔnɔŋɔ bukimə ɔbɔ́á bɔ́ ná báá ɔ ɛmɛ́ŋɛ́ yɛ nuíyi nɛ́ Yúlútɛnɛ. A ná lúmə́ ɔ nɛkálɔ uhúlə́ túmbiə a sɛ́á: «Nɔ́ mɛlɛ́má kɔ́ŋɔ́náka, nɔ́ nɛsɔa kusə́nə, mbá Huɛlɛ́ a ŋɔ bənú mə́núə́ mabɛ́á niasɛna.»

⁴Ɛ́sɛ́á mɔhɛ́nátɔtányɛ́ á Isáya a ná tílə́kə ɔ ɔwayɛ́ hiəfulə a sɛ́á: «Mɔndɔ a ndɔ yə́mə ɔ makɔ́tákɛ ɔwá, nɔ́ mɔndɔ́ŋɔ́ tábɔ́náka ɔwá Isə́lúkú a ŋɔ húlínə. Nɔ́ bɛ́áyɛ́á bɛnɔ́mɛ tínímə́kíə́ muɛsɛ.

⁵Nɔ́ tɔása úndúsə́kíníə́, nɔ́ ɛmáá na tɔmbáŋámbáŋá tukimə sɛkɔ́náka, nɔ́ mɛndɔ́ŋɔ́ yɛ́ kɔ́tɛ́mákátɔ́ tínímə́kíə́, nɔ́ bɛnɔ́mɛ bɛbɛ́á tábɔ́náka.

⁶Bɛndɔ bəkimə bá ŋɔ siəkinə nəníə́ Huɛlɛ́ a ndɔ bɛndɔ nuəniə.»

⁷Iloŋo yɛ́ ka bá yɛ́ ndɔ ndasá á Yɔhánɛsɛ busíə́ ɔkɛaka ɔwá bá nɛsɔa kusə́nə. A bəə́bu lakɛna a sɛ́á: «Á nikúlə nɛ́ ɛmbɛ́nɛ, hilóbi hɛ́ Huɛlɛ́ hɛ́ lɛa ɔsákɔna, nɔ́ ndɔ fɛka nɔ sɛ́á nɔ ŋɔ hiítə hɛ́ba əə́? Ɛ́yánɛ́ a ná bənú nɔ́yɛ́ lɛ́na əə́?

⁸Nɔ́ ínə́níə́ na bíə́núə́ bɛnyɛná ɔwá nɔ ná mɛlɛ́má kɔŋɔna. Nɔ lɛ bɛ́láá nɔ sɛ́á: “Á Ábɛlaháma a lɛ́á yəsúə́ isə́kínə́” bɔkɔasɛ́á, mɛ ndɔ bənú lɛna, Huɛlɛ́ a óso ɔ yííyí miɔkɔ ɔbɛ́kɛakɛna yɛ́ híánaka ɛndɛkɛ yɛ Ábɛlaháma!

⁹Nɛhɔ́ká nɛ́ lɛa hoóyi ɔ bɔlɛ́á ɔ ɔsɔ́mbɛ́na ɔ mɛkaŋá, ata ɔ́ búə́níə́ bɔlɛ́á ɔbɔ́á bɔ́ sɔ́ ŋɔ tɔtámátámá tuɛsɛ háá, bá ŋɔ bɔɛ́ta sɔ́mba, bá ə́mbinə ɔ hiwə.»

¹⁰Bɛndɔ bá wɛɛ́ya bataka bá sɛ́á: «Yatɛ́ tɔ ná hɔ́ánána ɔkɛa əə́?»

¹¹A sɛ́á: «Ábá nɔ lɛa na bɛlɛŋa bɛ́fandɛ́, nɔ́ bɔ́mɔtɛ́ índíə́ ɔwá a lɛ báá itíə́nə́tɔ. Wɛ́ɛ́yɛ́ ɔwá a lɛ́á na bɔ́labɔ́nɛ́á á kɛ́áká nɔ́yɛ́ hɔ́ánánátɔ.»

¹²Bakɔtabɛtásɛ bá ka ndásákɔna tɔ́na usiəkə ɔwá bá nɛsɔa kusə́nə, bá ná wɛɛ́ya batá bá sɛ́á: «Á Muinə́niə, yatɛ́ tɔ́ ná hɔ́ánána ɔkɛa əə́?»

¹³A ná bəə́bu bíhíə́níníə́ a sɛ́á: «Nɔ lɛ mɔnɛ́á batá yáyɛ́ná yatɛ́ ɔyɛ́á umbə́ndə́ wɔ́ ndɔ laa.»

¹⁴Hɔ́ánánátɔ́, bɔkɔfɔnɛa bá ná wɛɛ́ya batá bá sɛ́á: «Mba uwəsú, yatɛ́ tɔ ná hɔ́ánána ɔkɛa əə́?» A ná bəə́bu lɛ́na a sɛ́á: «Nɔ lɛ mɔnɛ́á má bɛndɔ ɔ́lɛ́ná ɔ iŋgínə́, ata ɔ uwəbú ɔkanjɛna; nɔ́ siəkínə ɔbánɔ́ ɔ wə́núə́ mɔsábɔ́náná.»

¹⁵Iloŋo yɛ́ bɛndɔ yɛ́ ka bá yɛ́ ndɔ Mɛ́sia táta na yɔnɛ́nɛna; bá fɛkaka ɔ uwəbú mɛlɛ́má bá sɛ́á: «Yɛ́ óso ɔbáá á Yɔhánɛsɛ a lɛ́á Mɛ́sia.»

¹⁶Yɔhánɛsɛ a ná bəkimə lɛ́na a sɛ́á: «Ɔwámɛ, mɛ ndɔ bənú nɛsɔa índiə na mənífə́, mba, wɛ́ɛ́yɛ́ ɔwá a lɛ́á ɔ ɔsákɔna a lɛa na injiŋə yáyɛ́ná mɛaŋɔ́á. Mɛ lɛ báá hɔ́ánánátɔ́ ɔ mikolí yɛ́ bɛ́áyɛ́á bɛtafɛ́ná ɔ uhumbulə. Ɔwayɛ́, a ŋɔ bənú nɛsɔa índiəkinə na Umbúínyi Mɔnaŋanaŋa na hiwə.

¹⁷A lɛa na ɛsɛkɛ́lɛ́ná itíə́tɔ́ ɔ ɔwayɛ́ mɔkátá ɛlɔ́áyɛ́ mɛsámá ɔbalɔna na bɛhɔlɛ. A ŋɔ mɛsámá tə́tə́kəniə ɔ ɔwayɛ́ yaába, mba, a ŋɔ bɛhɔlɛ titəkiə ɔ hiwə ɔhɛ́á hɛ́ sa ndə́nimə.»

¹⁸Nɔ́yɛ́ Yɔhánɛsɛ a ná bəə́bu bɛkɔa biəŋí úkúnə́kíə́, a ná ilúkunə Imbə́nú Yɛɛsɛ nɔŋɔ́nákɛ́na.

¹⁹Mba, a ka munəni á Əlóto kɔ́áyɛna bɔkɔasɛ́á, a ka Əlotiátɛ bɛ́lɛna á muəndú wa wayɛ́á munínyə́, tɔ́na a ka bɛ́mɔtɛ́ bɛkɔa bɛbɛ́á kɛaka biəŋí.

²⁰Bɔkɔa bɔbɛ́á bɔŋɛ́ŋa ɔbɔ́á Əlóto a ná kɔ́ndá: A ka Yɔhánɛsɛ háá ɔ ɛbɔka.

²¹Ikúílí á Yɔhánɛsɛ a ná bɛndɔ bəkimə nɛsɔa índíə́kínə, a ka Yə́susu nɛsɔa índiə tɔ́na. Ikúílí Yə́susu a ná bá a ndɔ bɛ́kálɛ́na, Huɛlɛ́ a ná nɔɔ́mɛná kuúnə.

²²Umbúínyi Mɔnaŋanaŋa wɔ́ ná tukínə ɔ ɔwayɛ́ mɛɛ́lɔ, wɔ́ siəkinənə ɛ́sɛ́á hibúbə́. Bá ná nióni ɔ́kɔ́ ɔ nɔɔ́mɛná nɛ́ ndɔ laa nɛ́ sɛ́á: «Ɔ lɛa wamɛ́á Mɔná wa mɔlɛ́má; aŋɔ́á ɔ lɛ́á nɛ́ámɛ́á nɛhɔnɔ nikimə.»

²³Ikúílí Yə́susu a ná bɔ́áyɛ́á buolí botólíə́, a ka bá hoóyi na moómo álálɔ́ má tuɔŋɔ. Ɛ́sɛ́á ɛfɛka yɛ́ bɛndɔ, a ka báá mɔná wa Yɔ́sɛbɛ, Yɔ́sɛbɛ ɔyɛ́ Ə́líásɛ.

²⁴Ə́líasɛ ɔyɛ́ Matáta, Matáta ɔyɛ́ Lə́wi, Lə́wi ɔyɛ́ Mələsíə́, Mələsíə́ ɔyɛ́ Yanáyɛ, Yanáyɛ ɔyɛ́ Yɔ́sɛbɛ.

²⁵Yɔ́sɛbɛ ɔyɛ́ Matatíásɛ, Matatíásɛ ɔyɛ́ Ámoso, Ámoso ɔyɛ́ Nahúmu, Nahúmu ɔyɛ́ Əsəlíə́, Əsəlíə́ ɔyɛ́ Nakáyɛ.

²⁶Nakáyɛ ɔyɛ́ Mátɛ, Mátɛ ɔyɛ́ Matatíásɛ, Matatíásɛ ɔyɛ́ Sɛmɛ́na, Sɛmɛ́na ɔyɛ́ Yɔsɛkɛ, Yɔsɛkɛ ɔyɛ́ Yɔta.

²⁷Yɔta ɔyɛ́ Yɔánana, Yɔánana ɔyɛ́ Lɛ́sa, Lɛ́sa ɔyɛ́ Sɔlɔbabɛ́lɛ, Sɔlɔbabɛ́lɛ ɔyɛ́ Salatiə́lə, Salatiə́lə ɔyɛ́ Nə́líə́.

²⁸Nə́líə́ ɔyɛ́ Mɛlɛkíə́, Mɛlɛkíə́ ɔyɛ́ Áti, Áti ɔyɛ́ Kɔsama, Kɔsama ɔyɛ́ Ɛlɛmátama, Ɛlɛmátama ɔyɛ́ Ɛ́lɛ.

²⁹Ɛ́lɛ ɔyɛ́ Yə́susu, Yə́susu ɔyɛ́ Ɛlɛsɛ́lɛ, Ɛlɛsɛ́lɛ ɔyɛ́ Yɔlíma, Yɔlíma ɔyɛ́ Matáta, Matáta ɔyɛ́ Lə́wi.

³⁰Lə́wi ɔyɛ́ Simɛyɔ́ŋɔ, Simɛyɔ́ŋɔ ɔyɛ́ Yúta, Yúta ɔyɛ́ Yɔ́sɛbɛ, Yɔ́sɛbɛ ɔyɛ́ Yɔ́nama, Yɔ́nama ɔyɛ́ Ɛliakími, Ɛliakími ɔyɛ́ Mɛ́lɛa.

³¹Mɛ́lɛa ɔyɛ́ Mɛ́na, Mɛ́na ɔyɛ́ Matáta, Matáta ɔyɛ́ Natána, Natána ɔyɛ́ Ndə́witi,

³²Ndə́witi ɔyɛ́ Yə́sə́, Yə́sə́ ɔyɛ́ Ɔbɛtɛ, Ɔbɛtɛ ɔyɛ́ Bɔɔsɛ, Bɔɔsɛ ɔyɛ́ Salá, Salá ɔyɛ́ Nasɔ́na.

³³Nasɔ́na ɔyɛ́ Aminatába, Aminatába ɔyɛ́ Atamínə, Atamínə ɔyɛ́ Álini, Álini ɔyɛ́ Ɛsɛlɔ́mɔ, Ɛsɛlɔ́mɔ ɔyɛ́ Fálɛsɛ, Fálɛsɛ ɔyɛ́ Yúta.

³⁴Yúta ɔyɛ́ Yákɔbɔ, Yákɔbɔ ɔyɛ́ Ísaakɛ, Ísaakɛ ɔyɛ́ Ábɛlaháma, Ábɛlaháma ɔyɛ́ Tála, Tála ɔyɛ́ Nakɔ́lɔ,

³⁵Nakɔ́lɔ ɔyɛ́ Sə́luku, Sə́luku ɔyɛ́ Lakaó, Lakaó ɔyɛ́ Fálɛkɛ, Fálɛkɛ ɔyɛ́ Ɛbɛlɛ, Ɛbɛlɛ ɔyɛ́ Salá.

³⁶Salá ɔyɛ́ Kɛnáma, Kɛnáma ɔyɛ́ Alafasátɛ, Alafasátɛ ɔyɛ́ Sɛ́ma, Sɛ́ma ɔyɛ́ Nówa, Nówa ɔyɛ́ Lámɛkɛ.

³⁷Lámɛkɛ ɔyɛ́ Matusála, Matusála ɔyɛ́ Hɛ́nɔkɔ, Hɛ́nɔkɔ ɔyɛ́ Yálɛtɛ, Yálɛtɛ ɔyɛ́ Malɛlɛyɛ́lɛ, Malɛlɛyɛ́lɛ ɔyɛ́ Kɛnáma.

³⁸Kɛnáma ɔyɛ́ Ɛnɔ́sɔ, Ɛnɔ́sɔ ɔyɛ́ Sə́tə, Sə́tə ɔyɛ́ Átama. Átama ɔ́ mɔná wa Huɛlɛ́.