Read Tunen Lúkasɛ 5 Bible Online

Lúkasɛ 5 - Tunen bible

Lúkasɛ 5

¹Hímotí hinó, Yə́susu a ka bá ɔ ɛsɛ́lɛ́ yɛ́ nɛɛ́ŋɛa ɔnɛ́á bá ndɔ ɛ́lɛnɛna bá sɛ́á Yənə́salɛtɛ. Bɛndɔ bəəŋí bá ka bá bá ndɔ nyɛkɛnana ɔ ɔwayɛ́ ɛmɛ́ŋɛ́, ɛlɔ́áyɛ́ ɛtambá yɛ́ Huɛlɛ́ ɔwɔ́kɔ.

²Yə́susu a ná bisóyí yámá bɛ́fandɛ́ ɔ ɛsɛ́lɛ́ yɛ́ nɛɛ́ŋɛa, bəlumbəlumbə bá ka tukəkinə uwəbú məbúnjə́ ɔsɔa.

³A ná tálɛ́má ɔ isóyí yɛ́ Símono, a ná wɛɛ́ya batá a sɛ́á, á bísúə́lə́ hata ná ɛsɛ́lɛ́. Yə́susu a ná tuə́nə ɔ isóyí nuúmə́, a ná ákánána ɔ busíə́ ɔ ilúkunə uwukúniə.

⁴Ɛnaka a hɔ́á ɔhɔ́ɔ, a ná Símono lɛ́na a sɛ́á: «Tɔ́mbálɛ́lá hə́ní hata ɔ yumbə, nɔ́ mə́núə́ məbúnjə́ əmbə́kínə mbá nɔ tuɔfɔ́ hálɛ́ákɛ́na.»

⁵Símono a sɛ́á: «Á Muinə́niə, tɔ ná nyɔ́ɔ́kɔ́ bulúə́ bukimə, tɔ sá halɛna ata bɔɔ́la. Mba, ɛ́sɛ́á ɔ ná láá nɔ́yɛ́, ɛkasɛ mɛ məbúnjə́ əmbə́kínə.»

⁶Ɛnaka bá məbúnjə́ əmbə́kínə, bá ná tuɔfɔ́ hálɛ́ákɛ́ná tuəŋí ɔ nindínə́ ɔnɛ́á mə́búə́ məbúnjə́ má ná lúmə́ ɔ ɔsalɛa.

⁷Bá ná bəkúlə́kulə kə́síníə́ ɔbá bá ná báá ɔ yííní isóyí, bá sɛ́á bá sɔ́nɔ bá ndá bəə́bu ɔlɔ. Báaba bá ná ndáfama, bá ná úndúsíə́ bisóyí bɛ́fandɛ́ bɛ́ tuɔfɔ́ ɔ nindínə́ ɔnɛ́á, bɛ́ ná botólíə́ ɔ ɔnyúɛ́na ɔ mənífə́ nuúmə́.

⁸Ɛnaka Símono á yámá nɔ́yɛ́, a ná kiníə́ á Yə́susu busíə́ a sɛ́á: «Á Isə́lúkú, bísúə́lə́ hata na mɛaŋɔ́á bɔkɔasɛ́á mɛ lɛa mɔkɛamabɛ́á!»

⁹Bɔkɔ́lɔ́ma bɔ́ ná Símono na bááyɛ́ bəkimə ɔbá bá ná báá na wɛɛ́ya itíə́ ɛlɔ́áyɛ́ buiŋí bɔ́ tuɔfɔ́ ɔtɔ́á bá ná hálɛ́ákɛ́na.

¹⁰Hɔ́ánánátɔ́ na bikindəniə bɛ́ Símono, Yákɔbɔ na Yɔhánɛsɛ á baná bá Sɛbɛtɛ́. Mba, Yə́susu a ná Símono lɛ́na a sɛ́á: «Ɔ lɛ kɔlɔma, ɔ botolokiə isíŋáka bɛndɔ ɔ ŋɔ nɔ́fɔ́kɔ.»

¹¹Əlimə yɛ nɔ́yɛ́, bá ná bisóyí súə́kə́ ɔ ɛsɛ́lɛ́, bá ná bikimə tíkə́, bá ná Yə́susu ɔŋgɔ́kɔ.

¹²Hinó hímotí, Yə́susu a ka báá ɔ bətínə́ yɛ bɔ́táyɛ́ bɔnɔŋɔ, mɔndɔ ɔwá minú yɛ́ ná bá yáyɛ́nátɔ́ a ná hulə. Ɛnaka a Yə́susu yámá, a ná kɔ́á imbúbiə ɔwayɛ́ busíə́ na ɔwayɛ́ ɔbɛ́tɔ́kɔ́lɛna a sɛ́á: «Á Isə́lúkú, ábá ɔ ndɔ hikiə, ɔ óso ɔwámɛ uniŋəsiə.»

¹³Yə́susu a ná mɔkátá sándɔ́na, a ná wɛɛ́ya itíə́lə, a sɛ́á: «Ɛ́ɛ! Mɛ ndɔ hikiə, niŋə.» Ɔ umisíumə́ wɛ́ɛ́yɛ́ mɔndɔ a ná niŋə.

¹⁴Nɔ́yɛ́, Yə́susu a ná wɛɛ́ya umbə́ndə́ índíə́ ɔwá a lɛ lɛ́na ata mɔndɔ, A sɛ́á: «Káka bínə́níə́ ɔbánɔ́ á mutitiəmahánɛna, ɔ́ nɛhánɛna nɛ́ nibínə́ŋəsiə índíə́ tɔ́na ɔnɛ́á Mósisi a ná tínímíə́ ɔkɛaka ɔwá bəkimə bá manyá bá sɛ́á ɔ ná niŋə.»

¹⁵Niínyə nɛ́ Yə́susu nɛ́ ná yambáná ɔ ɔyáyɛ́na; bilúkunə biəŋí bɛ́ kɔtakana ɔwayɛ́ ɔwɔ́kɔ, na iniŋəsiə yɛ́ yə́búə́ mɛɛ́mbɔ ukusənə.

¹⁶Mba ɔwayɛ́ a ka bá a ndɔ bísúə́lə ɔ bɛbɔ́ka bɛ́ yə́ə́bu ɔhá a ná bá ndɔ kabɛkalɛna.

¹⁷Hinó hímotí, Yə́susu a ka bá ɔ uwinə́niə. Bɛfalísia na bamanyumbə́ndə́ bá ka báá ɔmɔ́tɔ́yɛ́. Bá ka húlə́kinə ɔ mɔnɔŋɔ ɔmá má lɛ́á ɔ Kalɛ́lɛa na má Yútɛa, na má Yəlúsalɛma. Injiŋə yɛ Isə́lúkú á Huɛlɛ́ yɛ́ ka báá na Yə́susu, yɛ́ kɛaka a bɛnákɛnákɛ niŋəsəkiə.

¹⁸Bɛndɔ bá ná húlə́ bá nɔ́ yaáta yɛ́ mɔndɔ túána ɔ ɛkaálɛa. Bá ka siəkə ɔ ɔwayɛ́ ufínənə ɔ miímə mbá bá wɛɛ́ya bɛ́lɛ́na ɔwayɛ́ busíə́.

¹⁹Ɛ́sɛ́á nɛmɔndɔ nɛ́ ná báá undúə́tɔ́ ɔ miímə, bá sa manya hə́níə́ bá wɛɛ́ya fíníə́. Bá ná yɛ́ɛ́yɛ́ ikúílí báláka ɔ muanda, bá ná yósi oso. Bá ná wɛɛ́ya tukíníə́ na yáyɛ́á ɛkaálɛa ətíə́ yɛ bɛndɔ, á Yə́susu busíə́.

²⁰Ɛnaka á yə́búə́ ilumininə siəkínə, a ná mɔndɔ wa mɔɔ́mbɔ lɛ́na a sɛ́á: «Á yamɛ́á ɛŋgɔ́áyɛ́, mɛ ná aŋɔ́á máwɔ́á mabɛ́á niasɛ́na.»

²¹Əlimə yɛ bɛ́táyɛ́ bɛtambá, bamanyumbə́ndə́ na Bɛfalísia bá ná botólíə́ ɔ ubílúlə bá sɛ́á: «Ɛ́yánɛ́ mɔndɔ wɔ́ɔwɔ ɔwá a ndɔ Huɛlɛ́ kɔ́ba əə́? Ɛ́yánɛ́ á óso ɔ mabɛ́á ɔnɛasɛna əə́? Yɛ́ sá bá á Huɛlɛ́ bíbúə́.»

²²Mba, Yə́susu a ná mə́búə́ mafɛka manyá, a ná bəə́bu lɛ́na a sɛ́á: «Ɛlɔ́áyɛ́ yatɛ́ nɔ lɛ́á na yɛ́táyɛ́ ɛnya yɛ mafɛka ɔ uwənú mɛlɛ́má əə́?

²³Yatɛ́ yɛ́ lɛ́á ányákátɔ́ ɔlaa ɔwá, mɛ ná aŋɔ́á máwɔ́á mabɛ́á niasɛ́na, ataná ɔlaa ɔwá, hɔalɛ́na kɛndáka əə́?»

²⁴Mba, mɛ ndɔ siə uwənú umənyəsiə mɛ sɛ́á: «Mɔná wa mɔndɔ a báka na kuənjə ɔ mabɛ́á ɔnɛasɛna ɔ misí.» A ná yaáta yɛ́ mɔndɔ lɛ́na a sɛ́á: «Hɔalɛ́na, ɛtá yáwɔ́á ɛkaálɛa, úlúə́ ɔwáwɔ ɔmbɛ́la.»

²⁵Ɔ umisíumə́, mɔndɔ a ná tɛ́nɛ́má ɔ məə́sə má bɛndɔ bəkimə, a ná yáyɛ́á ɛkaálɛa túáná ɔyɛ́á a ná báá sianátɔ.

²⁶Yələ́mənə na bɔkɔ́lɔ́ma bɔ́ ná bɛndɔ bəkimə itíə́, bá Huɛlɛ́ nyamaka, bá laaka bá sɛ́á: «Tɔ ná bɛyɛmbɛlana bɛ́ bɛkɔa siəkínə́ niɔfɛ́nɛ.»

²⁷Əlimə yɛ nɔ́yɛ́, Yə́susu a ná ákana, a ná mɔkɔtabɛtásɛ yama, nɛ́áyɛ́á niínyə á Lə́wi, tuənə́tɔ́ ɔ ɔwayɛ́ ɛbɔ́ka yɛ́ buolí. A ná wɛɛ́ya lɛ́na a sɛ́á: «Ɔŋgɔ́kɔ́ mɛaŋɔ́á.»

²⁸Lə́wi a ná hɔalɛ́na, a ná tíkə́ bikimə ɔ ɛbɔ́ka ɔyɛ́á a ná báá tuənə́tɔ́, a ná wɛɛ́ya ɔŋgɔ́kɔ.

²⁹Ɛlɔ́áyɛ́ nɔ́yɛ́, a ná ɛŋganda yɛŋɛ́ŋa tíkə́ ɔ ɔwayɛ́ ɔmbɛ́la ɔ nióni nɛ́ Yə́susu. Bakɔtabɛtásɛ bəəŋí na bɔ́mɔtɛ́ bɛndɔ bá ka báá ɔ ɛtáka na bəə́bu.

³⁰Ɛnaka Bɛfalísia na bamanyumbə́ndə́ bá ɛ́ná nɔ́yɛ́, bá ná botólíə́ ɔ ubílúlə; bá ná bɔkɔ́nɛna bá Yə́susu lɛ́na bá sɛ́á: «Ɛlɔ́áyɛ́ yatɛ́ nɔ ndɔ nyínəniə, nɔ níə́kəniə na bakɔtabɛtásɛ na bakɛamabɛ́á əə́?»

³¹Yə́susu a sɛ́á: «Bɛndɔ ɔbá bá ndɔ niŋə muɛsɛ abáka bá lɛ ɛmɔ́ɛ́nɛ́ siə, mba, bɛnákɛnákɛ abáka bá ɛmɔ́ɛ́nɛ́ siəkə.

³²Mɛ sa ndasá ɔ bááyɛ́ bátaká ɔwɛ́lɛna, mba, ɛlɔ́áyɛ́ bakɛamabɛ́á ɔkɛaka ɔwá bá mɔlɛ́má kɔŋɔna.»

³³Bɛfalísia bá ná Yə́susu lɛ́na bá sɛ́á: «Bɔkɔ́nɛna bá Yɔhánɛsɛ bá ndɔ bítə́tə́niə, bá ndɔ bɛ́kálɛ́na ikúílí tɛ́á. Mba báwɔ́á bɔkɔ́nɛna uwəbú, abáka bá nɛ́áka, bá nyákɛna.»

³⁴Yə́susu a sɛ́á: «Abáka maŋgɔ́áyɛ́ má wɛ́ɛ́yɛ́ ɔwá a nɔ́ húlə ɔ ɔbɛ́lɛna bá lɛ bítə́tə́níə́ ɔ ɔnɛ́á ɔ ikúílí ɔyɛ́á a lɛ́á na bəə́bu.

³⁵Mba, tunó tɔ́ ŋɔ ndafámá ɔtɔ́á bá ŋɔ yəbúə́ ibə́ húliə; ɔ yɛ́táyɛ́ ikúílí, bá ŋɔ bítə́tə́kəniə.»

³⁶A ná bəə́bu wúuwu ɔŋana tɛ́ná a sɛ́á: «Ata mɔndɔ ɔmɔtɛ́ a sa ósó ɔ ifəsiə yɛ́ nɛbata nɛɔmɔ́mɔ ɔwɛta, ɛlɔ́áyɛ́ unibinə ɔ ilunə́ki yɛ́ nɛbata. Ábá mɔndɔ a ná nɔ́yɛ́ kɛ́áka, nɛbata nɛɔmɔ́mɔ nɛ́ sɔ́ ŋɔ bá bɔkɔa bɔ́mɔtɛ́ na ilunə́ki.

³⁷Ata mɔndɔ ɔmɔtɛ́ a sa ósó ɔ mutəkuniə wɔ́ məluku ɔháá ɔ ibióki yɛ́ mɛsɔ́á; ábá a ná nɔ́yɛ́ kɛ́áka, mutəkuniə wɔ́ məluku wɔ́ ŋɔ ibióki yɛ́ mɛsɔ́á sánáka. Məluku má ŋɔ olokokiə, mɛsɔ́á tɔ́na yɛ́ tɛŋɛtɛŋɛa.

³⁸Mba, bá ná hɔ́ánána ɔ mutəkuniə ɔháa ɔ mɛsɔ́á miɔmɔ́mɔ.

³⁹Ata ɛ́yánɛ́ mɔndɔ, ábá a ná yundú yɛ́ məluku nyɛ́ná, abáka a lɛ mutəkuniə hikíə́ bɔkɔasɛ́á, a ŋɔ laa a sɛ́á yundú yɛ́ lɛ́á məluku ɔ maasɛ.»