Read Tunen Lúkasɛ 6 Bible Online

Lúkasɛ 6 - Tunen bible

Lúkasɛ 6

¹Hímotí hinó hɛ́ Sábatɛ, Yə́susu na báyɛ́á bɔkɔ́nɛna bá ná tɔ́mbɛ́ná ɔ bɛtɔbɔtɔ́bɔ́ bɛ́ ɛmbásáká. Báyɛ́á bɔkɔ́nɛna bá ná túə́nə ɔ ɛmbásáká ɔ ɔnɔkɔ bá kɛ́sáka, bá nɛ́áka.

²Bɛ́mɔtɛ́ Bɛfalísia bá ná bəə́bu lɛ́na bá sɛ́á: «Ɛlɔ́áyɛ́ yatɛ́ ɔ buɔsɛ́ bɔ́ Sábatɛ nɔ ndɔ kɛa ɔbɔ́á umbə́ndə́ wɔ́ ndɔ sáŋɔ́na əə́?»

³Yə́susu a sɛ́á: «Nɔ́ sa fana yatɛ́ ɔyɛ́á Ndə́witi a ná kɛ́áká na báyɛ́á bɛndɔ ikúíli ɔyɛ́á mɛtaná yɛ́ ná bəə́bu itíə́ əə́?

⁴A ka fínə ɔ Tɛ́mbɛlɛ, a ná bɛbɛlɛ́tɛ ɛtá ɔbɛ́á bɛ́ ná báá bɛ́ Huɛlɛ́. A ná nɛ́áka, a ná índíə́kínə ɔ bɛndɔ ɔbá bá ná báá na wɛɛ́ya, ata nɔ́yɛ́ ɛ́sɛ́á ɔ́maná ɔ bətitiəmahánɛna á umbə́ndə́ wɔ́ ndɔ iŋgínə́ índiə ɔ bɛɛ́ta ɔnɛ́á.»

⁵A ná bəə́bu lɛ́na tɔ́na a sɛ́á: «Mɔná wa mɔndɔ a lɛa Isə́lúkú yɛ Sábatɛ.»

⁶Hímotí hinó tɔ́na hɛ́ Sábatɛ hɛ́ ná ndafama, a ná fínə́ ɔ miímə yɛ mabɛ́kálɛ́na a ná túə́nə uwinə́niə. Mɔndɔ ɔmɔtɛ́ a ka báá ɔmɔ́tɔ́yɛ́ na mɔkátá wɔ́ bɛnɔ́mɛ sɔ́ákátɔ.

⁷Bamanyumbə́ndə́ na Bɛfalísia bá ka bá bá ndɔ wɛɛ́ya tɛ́ka hoyíhóyi, mbá bá núnə́ ábá ɛkasɛ a mɔndɔ niŋə́síə́ ɔ buɔsɛ́ bɔ́ Sábatɛ ɔkɛaka ɔwá, bá hɛkɔma yámá mbá bá wɛɛ́ya sɔ́mɛ́na.

⁸Mba, a ka bá a ndɔ mə́búə́ mafɛka manya, a ná mɔndɔ lɛ́na ɔwá a ná báá na mɔkátá sɔ́ákátɔ́ a sɛ́á: «Hɔalɛ́na, sɔ́nɔ háha, tɛ́nɛ́ma ɔ busíə́ bɔ́ bɛndɔ bəkimə!» A ná hɔalɛ́na a ná tɛnɛma.

⁹Yə́susu a ná bəə́bu lɛ́na a sɛ́á: «Mɛ ndɔ bənú bata ábá umbə́ndə́ wɔ́ ndɔ iŋgínə́ indíə́ ɔ buɔsɛ́ bɔ́ Sábatɛ ɔ buɛsɛ ɔkɛa mbá ata ɔ bɔbɛ́á ɔkɛa, ɔ mɔndɔ unuəniə ata ɔ ɔwayɛ́ ɔwɔ́nɔ əə́?»

¹⁰A ná bɛndɔ bəkimə məə́sə tala, a ná wɛ́ɛ́yɛ́ mɔndɔ lɛ́na a sɛ́á: «Sandɔ́ná wə́wúə́ mɔkátá.» A ná sandɔ́ná, mɔkátá wɔ́ ná niŋə.

¹¹Hilóbi hɛ́ ná bəə́bu tuana, bá na botólíə́ ɔ ɔhɔ́ɔ́ bəə́bu na bəə́bu yatɛ́ bá Yə́susu kɛ́áka.

¹²Ɔ yɛ́táyɛ́ ikúílí, Yə́susu a ná báláka ɔ ɔmáá ɔ ɔbɛ́kálɛ́na. A ná túmbíə́ bulúə́ bukimə a ndɔ Huɛlɛ́ bɛ́kálɛ́na.

¹³Ɛnaka á yáá, a ná báyɛ́á bɔkɔ́nɛna ɛ́lɛ́ákɛ́na, a ná tɛ́fá ɔ uwəbú ətíə́ niómo na báfandɛ́ ɔbá a ná niínyə nɛ́ basɔ́másɔma índíə́.

¹⁴Símono, ɔwá a ná ɛ́lɛ́nɛ́ná á Bíə́lə, Andɛlɛ́ ɔ wayɛ́á munínyə́, Yákɔbɔ, Yɔhánɛsɛ, Filíbo, Batələmí,

¹⁵Matíó, Tɔ́masɛ, Yákɔbɔ á mɔná wa Alɛfɛ́, Símono ɔwá bá ndɔ ɛ́lɛnɛna Mɔsɛlɔ́tɛ,

¹⁶Yútasɛ mɔná wa Yákɔbɔ, na Yútasɛ Isikalióto, wɛ́ɛ́yɛ́ ɔwá a ŋɔ Yə́susu sɛma.

¹⁷Ɛnaka á lɔɔ́kɔ́ na bəə́bu a ná tɛ́nɛ́má ɔ ɛbɔ́ka yɛ́ tɛ́kɛ́mátɔ. Ɔmɔ́tɔ́yɛ́ báyɛ́á bɔkɔ́nɛna bəəŋí bá ka bá na umúlə wɔ́ bɛndɔ bá Yútɛa yikimə, bá Yəlúsalɛma na bá ɛsɛ́lɛ́ yɛ́ Tíli na Sítono.

¹⁸Bəkimə bá ka ndásákɔna á Yə́susu ɔwɔ́kɔ na yə́búə́ mɛɛ́mbɔ ubíníŋəsiə, bááyɛ́ ɔbá bá ná báá na imbúínyi mɛbɛ́á, a ka bəə́bu niŋəsəkiə.

¹⁹Bɛndɔ bəkimə bá ka bá bá ndɔ siə ɔ ɔwayɛ́ uwitiələ bɔkɔasɛ́á, iŋgínə́ yɛ́ ka bá yɛ́ ndɔ fáma ɔ ɔwayɛ́ mɛɛ́lɔ, a bəə́bu bəkimə niŋəsəkiə tɔ́na.

²⁰Əlimə yɛ nɔ́yɛ́, á Yə́susu a ná báyɛ́á bɔkɔ́nɛna məə́sə tálá, a sɛ́á: «Nɛhɔnɔ na bənú á tɔtɔyɔ́nɔ́ bɔkɔasɛ́á, Nɛmanɛna nɛ́ Huɛlɛ́ nɛ́ báka níə́nu.

²¹Nɛhɔnɔ na bənú ɔbá mɛtaná yɛ́ ndɔ nuɛna isíŋáka bɔkɔasɛ́á, nɔ ŋɔ bá íyə́tɔ! Nɛhɔnɔ na bənú uwənú ɔbá nɔ ndɔ lɛla isíŋáka bɔkɔasɛ́á, nɔ ŋɔ ɔnɔkɔ.»

²²«Nɛhɔnɔ na bənú ɛnáká bɛndɔ bá lúmə́ ɔ uwənú ukóyiə. Ɛnáká bá lúmə́ ɔ uwənú ubulə, ɔ uwənú ɔkɔ́ba na ɔ uwənú ɔyakɔtɔna ɛlɔ́áyɛ́ Mɔná wa mɔndɔ!

²³Nɔ́ bílə́nə́kə́ ɔ bɔ́táyɛ́ buɔsɛ́, nɔ́ tiakáláká bɔkɔasɛ́á, ɛfɔná yɛŋɛ́ŋa yɛ́ ndɔ bənú táta ɔ nɔɔ́mɛná. Ɔ taká, nɔ́yɛ́ bíə́búə́ bisə́kínə́ bá ná bɔhɛ́nátɔtányɛ́ tə́kə́sə́kə.

²⁴Mba, indimisi uwənú a bobóŋí bɔkɔasɛ́á, nɔ lɛa ɔ nɛhɔnɔ.

²⁵Indimisi uwənú ɔbá nɔ́ lɛ́á na bikimə itíə́nə́tɔ isíŋáka bɔkɔasɛ́á, nɔ ŋɔ bá na mɛtaná! Indimisi uwənú ɔbá nɔ́ ndɔ ɔnɔ isíŋáka bɔkɔasɛ́á, nɔ ŋɔ báá ɔ mənyənə na malɛlá!»

²⁶Indimisi uwənú ɛnáká bɛndɔ bəkimə bá bá bá ndɔ bənú nyama bɔkɔasɛ́á, nɔ́yɛ́ bíə́búə́ bisə́kínə́ bá ná bítíkə́kə́ na bɔhɛ́nátɔtányɛ́ bá bɛkanja!

²⁷«Mba mɛ ndɔ bənú lɛna, uwənú ɔwá nɔ ndɔ mɛaŋɔ́á ɔ́kɔ. Nɔ́ bə́núə́ bokóyíkoyi hikə́kíə́; nɔ́ buɛsɛ kɛ́áká ɔ báyɛ́ ɔbá bá ndɔ bənú kóyiə.

²⁸Nɔ́ bɛnyɔnɔ índíə́ ɔ bəkimə ɔbá bá ndɔ bənú indimisi húlə́ninə, nɔ́ bɛ́kálákɛ́ná ɛlɔ́áyɛ́ báaba ɔbá bá ndɔ bənú kanjɛna.

²⁹Ábá mɔndɔ a ná aŋɔ́á sánɛ́na ɔ bɔlɔ́ŋɔ́lɔ́ŋɔ́, ínə́níə́ wɛɛ́ya búíní. Ábá mɔndɔ a ná nɛ́áwɔ́á nilókiə ɛtá, indíə́ wɛɛ́ya tɔ́na yawɔ́á sɔ́tɛ.

³⁰Índíə́ ata ɛ́yánɛ́ ɔwá a ná aŋɔ́á bɔɔ́la kɔŋɛ́na. Mba, ábá mɔndɔ a ná bɔ́áwɔ́á bɔɔ́la ɔ́lɔ́, ɔ lɛ bata.

³¹Yatɛ́ ɔyɛ́á ɔ ndɔ hikiə ɔwá bɛndɔ bá kɛ́áka ɛlɔ́áyɛ́ áwɔ, kɛ́áká aŋɔ́á tɔ́na ɛlɔ́áyɛ́ əbú.

³²Ábá nɔ ndɔ hikiə ɔbánɔ́ ɔbá bá ndɔ bənú hikiə, yatɛ́ məbíhóloniə bá ŋɔ bənú índiə əə́? Bakɛamabɛ́á tɔ́na abáka bá hikəkiə ɔbá bá ndɔ bəə́bu hikiə.

³³Ábá nɔ ndɔ buɛsɛ kɛa ɔbá bá ndɔ bənú buɛsɛ kɛa, ɛlɔ́áyɛ́ yatɛ́ ɛ́kɛ nɔ mohóloniə tátákɛna əə́? Ata bakɛamabɛ́á bá ndɔ nɔ́yɛ́ kɛa.

³⁴Ábá nɔ ndɔ foloniə ɔbá bá ŋɔ bənú híə́niniə, yatɛ́ mohóloniə bá ŋɔ bənú índiə əə́? Bakɛamabɛ́á tɔ́na bá ndɔ əbú foloniə ɔbá bá ndɔ bəə́bu híə́nəkiniə.

³⁵Mba, nɔ́ bə́núə́ bokóyíkoyi hikə́kíə́, nɔ́ buɛsɛ kɛ́áka, nɔ́ folókóníə́ ɛŋana ɛnánɛna yɛ́ muití uhíə́niniə. Nɔ́yɛ́ yə́núə́ ɛfɔná yɛ́ ŋɔ bá yɛŋɛ́ŋa, nɔ ŋɔ bá baná bá wə́ní ɔ Mɔŋɛ́ŋa ɔmbáŋá bɔkɔasɛ́á, a lɛa muɛsɛ ɛlɔ́áyɛ́ baasɛ na babɛ́á.»

³⁶«Nɔ́ bámɛ́nɛ́ná úndúə́tɔ́ na buɛsɛ, ɛ́sɛ́á yənúə́ Isə́ a lɛ́á úndúə́tɔ́ na buɛsɛ.

³⁷Nɔ lɛ híáná bəkə́lə́siə mbá bá sɔ́ ŋɔ bənú kə́lə́siə, nɔ lɛ sɔ́kɔ́tɛ́a mbá bá sɔ́ ŋɔ ənú sɔ́kɔ́tɛa, nɔ́ niasákɛ́nána mbá bá ŋɔ ənú niasakɛna.

³⁸Nɔ́ índíə́ mbá bá ŋɔ ənú índiə. Bá ŋɔ bənú kətiniə úndúə́tɔ́ fɔɔmɔ! Nɛ́ ólókíə́ bɔkɔasɛ́á, bá ŋɔ bənú kətiniə á hikətíníə́ ɔhɛ́á nɔ ŋɔ bɛ́kɛakɛna ɛlɔ́áyɛ́ bɔsɔ́kɔ́.»

³⁹Yə́susu a ná bəə́bu wúuwu ɔŋana tɛ́ná a sɛ́á: «Mundímə́ndímə a óso á ɔsɔ́kɔ́ mundímə́ndímə ɔkɛndana əə́? Tátá bəə́bu bəkimə nɔ ŋɔ kakɔ́á ɔ hɛfɛa əə́?

⁴⁰Mɔkɔ́nɛna a lɛ ndɔ wayɛ́á mulə́liə yáyɛ́na, mba, mɔkɔ́nɛna ɔwá a ná ɔ́kɔ́náká muɛsɛ, a ŋɔ bá ɛ́sɛ́á wayɛ́á mulə́liə.

⁴¹Ɛlɔ́áyɛ́ yatɛ́ ɔ ndɔ ɛnáná sinə ɔyɛ́á yɛ́ lɛ́á ɔ niísə nɛ́ mɔnátɛ́á, mbá nɔ́yɛ́ ɔ lɛ ndɔ hɛkasakásá sínə ɔyɛ́á yɛ́ lɛ́á ɔ ɔwáwɔ niísə əə́?

⁴²Nəníə́ ɛ́kɛ ɔ mɔnátɛ́á lɛna ɔ sɛ́á: “Á wamɛ́á munísə́, níása mɛ ɛkɛ́tɛ húlíə́ ɔ ɔwáwɔ niísə”, ɔwáwɔ ɔ lɛ ndɔ hɛkasakásá sinə ɔ ɔwáwɔ niísə əə́? Á mɔbɛ́nyɔ́nyɔlɔ, naŋɔ́ híə́wúə́ hɛkasakásá húliə ɔ ɔwáwɔ niísə, əlimə yɛ nɔ́yɛ́ mbá ɔ siəkínə́nə́ muɛsɛ ɔkɛaka ɔwá ɔ ɛkɛ́tɛ húlíə́ ɔyɛ́á yɛ́ lɛ́á ɔ niísə nɛ́ mɔnátɛ́á.»

⁴³«Tátá bɔlɛ́á buɛsɛ abáka bɔ́ hɛtámátámá hɛbɛ́á háá, ata bɔlɛ́á bɔbɛ́á abáka bɔ́ lɛ hɛtámátámá hɛɛsɛ haa.

⁴⁴Ɔ taká bá ndɔ bɔlɛ́á tɛ́á manyɛna ɔ ɔwayɛ́ hɛtámátámá. Abáka bá lɛ məfunú kɛ́tá ɔ bɛsɛ́ndɛ́ ɔ ɔmbáŋá, abáka bá lɛ bɛtɔtɔ kɛ́tá ɔ biɔndɔndɔ́.

⁴⁵Mɔndɔ muɛsɛ a ndɔ ɛta ɔwayɛ́ mɔlɛ́má á bɔɔ́la buɛsɛ bɔkɔasɛ́á, wɔ́ lɛa úndúə́tɔ́ na bɛɛ́la bɛɛsɛ; mɔndɔ mɔbɛ́á a ndɔ ɛta ɔwayɛ́ mɔlɛ́má á bɔɔ́la bɔbɛ́á bɔkɔasɛ́á, yatɛ́ ɔyɛ́á abáka munuə wɔ́ fə́mə́ləniə yɛ́ lɛa ɔ mɔlɛ́má nuúmə́.»

⁴⁶«Ɛlɔ́áyɛ́ yatɛ́ nɔ́ ndɔ mɛaŋɔ́á ɛ́lɛnɛna “Isəlúkú, Isəlúkú”, mba, nɔ lɛ ndɔ kɛa yatɛ́ ɔyɛ́á mɛ ndɔ laa əə́?»

⁴⁷«Ata ɛ́yánɛ́ mɔndɔ ɔwá a ndɔ ndasá ɔwámɛ mbá a ndɔ bɛ́ámɛ́á bɛtambá ɔ́kɔ, a bɛɛ́ta bɛ́kɛakɛna, ɛkasɛ mɛ bənú ínə́níə́ ɔwanɛ́ a lɛ́á hɔ́ákátɔ.»

⁴⁸«A lɛa hɔ́ákátɔ́ ɔ mɔndɔ ɔwá a ndɔ miímə lúmə. A ná misí timəkə, a ná tímə́kə́ ɔ nuúmə́, a ná yɛ́ɛ́yɛ́ ikúílí tɛ́kɛ́ná ɔ muɔkɔ ɔmbáŋá. Ikúílí yɛ́ ɛmbɔŋɔ, mənífə́ má hɔmbáka, yəŋə́lumə́ yɛ́ bísúbə́ ɔ miímə, yɛ́ lɛ ósó ɔ mɛɛ́ta ɔbɛa bɔkɔasɛ́á, yɛ́ lɛa lúmə́kə́tɔ́ muɛsɛ.

⁴⁹Mba ɔ wɛ́ɛ́yɛ́ ɔwá a ndɔ bɛ́ámɛ́á bɛtambá ɔ́kɔ, a lɛ kɛ́á yatɛ́ ɔyɛ́á mɛ ndɔ laa. A lɛa hɔ́ákátɔ́ ɔ mɔndɔ ɔwá a ná yayɛ́á miímə lúmə́kə́ ɛŋaná mɛɛ́ta ukətiə muɛsɛ. Ikúílí yɛ́ ɛmbɔŋɔ, mənífə́ má hɔmbáka, yəŋə́lumə́ yɛ́ bísúbə́ ɔ miímə, yɛ́ kúsúnúəkiə, yɛ́ kɔakɔna mikimə hulukutukutu!»