Read Tunen Lúkasɛ 8 Bible Online

Lúkasɛ 8 - Tunen bible

Lúkasɛ 8

¹Əlimə yɛ́ nɔ́yɛ́, Yə́susu a ka bá a ndɔ tɔ́mbɛ́na ɔ bətínə́ na tutikə ɔ Imbə́nú Yɛɛsɛ yɛ́ Nɛmanɛna nɛ́ Huɛlɛ́ ɔ ɔnɔŋɔna.

²Niómo nɛ́ bɔkɔ́nɛna na báfandɛ́ nɛ́ ka báá ɔ ɔwayɛ́ ɛmɛ́ŋɛ́ na bɔ́mɔtɛ́ bəəndú ɔbá a ná tɔtányɛ́ tɔbɛ́á húlə́kíə́, a ná bəə́bu yə́búə́ mɛɛ́mbɔ niŋə́síə́: Malɛ́á ɔwá bá ndɔ ɛ́lɛnɛna bá sɛ́á wa Mákátala, ɔ ɔwayɛ́ Yə́susu a ná tɔtányɛ́ tɔbɛ́á tɔ́lɛ́ndɔ́lɔ́mɔnɔ húlə́kíə́;

³Yɔhána, muəndú ɔwá Kúsa, mutə́tə́níə́ maasɛ má Əlóto; Susána na bɔ́mɔtɛ́ tɔ́na ɔbá bá ná bəə́bu ɔ́lɔ́kɛ́ná na mə́búə́ maasɛ.

⁴Bɛndɔ bá ka tɔakana, bá húlə́kəniə ɔ bətínə́ bəkimə ɔ ndasákɔ́ná ɔ ɔwayɛ́ busíə́. A ná bəə́bu wúuwu ɔŋana tɛ́ná a sɛ́á:

⁵«Hímotí hinó, mɔnɛmanɛma a ná ákáná ɔwayɛ́ məfumə́ uminə. Ɛ́sɛ́á á ná bá a ndɔ minə mɔ́mɔtɛ́ məfumə́ má kɔakɔna ɔ ɛmɛ́ŋɛ́ yɛ ɛnɔ́mɛ. Bá ná tafáka, tunoní tɔ́ ná maáta tɔ́bɔ́kɔ́ məkimə.

⁶Mɔ́mɔtɛ́ má ná kɔakɔ́na ɔ hiɔ́na. Ikúílí ɔyɛ́á má ná lɔ́áka, má ná kɔ́táká bɔkɔasɛ́á, mənífə́ má sa báá nyɔ́átɔ́ ɔ misí.

⁷Mɔ́mɔtɛ́ má ná kɔakɔna ɔ ətíə́ yɛ bɛkɛlɛ́. Má ná kumə́kə́níə, bɛkɛlɛ́ bɛ́ ná məfumə́ fɔta.

⁸Mɔ́mɔtɛ́ má ná kɔakɔ́na ɔ misí ɔ mɛɛsɛ. Má ná ɔ́mbɔkɔ, bɔlɔŋɔ́tɛ́ tɛ́á bɔ́ tɔtámátámá hákɛna ɔ ɔyáyɛ́na ɛbɔ́ɛ́yɛa.» Ɛnaka á bɛ́táyɛ́ bɛtambá hɔ́ɔ́kɔ́ nɔ́yɛ́, a ná yə́mə́ a sɛ́á: «Wɛ́ɛ́yɛ́ ɔwá a lɛ́á na məlúə́ má bɔkɔa ɔwɔ́kɔ, á ɔ́kɔ́kɛ́na.»

⁹Mba, báyɛ́á bɔkɔ́nɛna bá ná tuə́nə ɔ ɔwayɛ́ ɔ binífúnínə́ bɛ́ wútə́yí ɔŋana ɔbata.

¹⁰A sɛ́á: «Ɔ uwənú, Huɛlɛ́ a ka kɛaka ɔwá nɔ ɛndɔnɔ yɛ Nɛmanɛna nɛ́ Huɛlɛ́ mánya; mba ɛlɔ́áyɛ́ bɔ́mɔtɛ́, ɔ tɔ́mbákɛna na ɛŋana ɔkɛaka ɔwá, bá siəkínə́ ɛ́sɛ́á bá lɛ ndɔ sinə, bá ɔ́kɔ́kɛ́na, bá lɛ káfámá ɔ binífúnínə́ ɔwɔ́kɔ.»

¹¹«Ɔ́ binífúnínə́ bɛ́ wúuwu ɔŋana bɛɛ́bɛ: Ɛtambá yɛ́ Huɛlɛ́ yɛ́ lɛ́á məfumə́.

¹²Ɔmá ɛmɛ́ŋɛ́ yɛ ɛnɔ́mɛ, ɔ́ bɛndɔ ɔbá bá ndɔ ɛtambá ɔ́kɔ, mba, umbúínyi mɔbɛ́á wɔ́ ndáfámá, wɔ́ ɛtambá húliə ɔ uwəbú mɛlɛ́má ɔkɛaka ɔwá bá lɛ lumínínə mbá bá sɔ́ ŋɔ nibínuəniə kusənə.

¹³Bɔ́mɔtɛ́ bá báka ɛ́sɛ́á misí yɛ hiɔ́na. Ikúílí bá ná ɛtambá ɔ́kɔ́, bá yɛɛ́ta kusənə na nɛhɔnɔ; mba, bá lɛ niása ɔwá ɛtambá yɛ́ ɔ́nɔ́kɛ́na, bá ndɔ lumininə tɛ́tɛ́á yɛ ikúílí, mɔkɔ́lɛna má ndáfámá bá bísúə́lə.

¹⁴Məfumə́ ɔmá má ná kɔakɔ́na ɔ ətíə́ yɛ bɛkɛlɛ́, ɔ́ bááyɛ́ ɔbá bá ndɔ ɛtambá ɔ́kɔ, mba bisə́hísə́hí, nɛbɔ́ŋɔ na mətəkunə má buɔmɔ́ má ɛtambá fɔ́ta, yɛ́ lɛ tɔtámátámá tɔ́ ɔ́nɔ́kɛ́nátɔ́ haa.

¹⁵Mɔ́mɔtɛ́ məfumə́ má ka kɔakɔna ɔ misí mɛɛsɛ: Ɔ́ bɛndɔ ɔbá bá ndɔ ɛtambá ɔ́kɔ na mɔlɛ́má muɛsɛ, na taká. Bá yɛɛ́ta tə́tə́niə na nisíbiniə, bá tɔtámátámá hákɛna ɔ ɔyáyɛ́na.»

¹⁶«Abáka mɔndɔ a lɛ itiəkətiəkə konjíə́ ɔkɛaka ɔwá, a yɛɛ́ta húə́ na ɛlɔŋgá ata a mɛɛ́ta háá ɔ matá ma bɔaná. Ɔ nifəŋə, abáka bá yɛɛ́ta bɛ́lɛna ɔ ɛbɔ́ka yɛ́ nyámɔ́nɔ́átɔ́ ɔkɛaka ɔwá, bááyɛ́ ɔbá bá ndɔ fínə, bá isəmú siəkinə.

¹⁷Ɔ taká, bikimə ɔbɛ́á bɛ́ lɛ́á bítímə́tɔ́ bɛ́ ŋɔ fámálana ɔ ɛnjaŋɛnjaŋɛ yɛ buɔsɛ́, bikimə ɔbɛ́á bɛ́ lɛ́á inditiə bá ŋɔ bɛɛ́ta manya, bá ŋɔ fə́mə́ləkəniə ɔ mianyɔ́.

¹⁸Nɔ́yɛ́, nɔ ŋgɛtɛakɛa muɛsɛ ɔ ɛnya ɔyɛ́á nɔ ndɔ ɔ́kɔ! Ɔ taká wɛ́ɛ́yɛ́ ɔwá a lɛ́á itíə́nə́tɔ́, a ŋɔ kusənə ɔ ɔyáyɛ́na. Mba, wɛ́ɛ́yɛ́ ɔwá a lɛ báá itíə́nə́tɔ́, bá ŋɔ yayɛ́á tɛ́tɛ́á kátɔ́na ɔyɛ́á a lɛ́á itíə́nə́tɔ.»

¹⁹Inyə́ na bənísə́ bá Yə́susu bá ka ndá wɛɛ́ya kɔana. Mba ɛlɔ́áyɛ́ iloŋo yɛ́ bɛndɔ, bá sa óso ɔkafámá ɔ ɔwayɛ́ ɛmɛ́ŋɛ́.

²⁰Nɔ́yɛ́, bá ná wɛɛ́ya túmbə́lə́níə́ bá sɛ́á: «Yáwɔ́á inyə́ na banánɛ́á bá lɛa hə́ə́ní ɔ níə́lətíə́, bá ndɔ siə ɔwáwɔ usinə.»

²¹Mba, Yə́susu a ná lɛ́na ɔ bɛndɔ bəkimə a sɛ́á: «Yamɛ́á inyə́ na bámɛ́á bənísə́, ɔ́ bááyɛ́ ɔbá bá ndɔ ɛtambá yɛ́ Huɛlɛ́ ɔ́kɔ, bá ndɔ yɛɛ́ta bɛ́kɛna tɔ́na.»

²²Hinó hímotí, Yə́susu a ná tálɛ́má ɔ isóyí na báyɛ́á bɔkɔ́nɛna, a ná bəə́bu lɛ́na a sɛ́á: «Tɔ́ bíásɛ́na ɔ yííní tanɛ́ yɛ nɛɛ́ŋɛa» bá ná ákána.

²³Ikúílí yɛ́ ɔbíásakɛna, hinó hɛ́ ná wɛɛ́ya ɛta. Ɔ umisíúmə́ umbúínyi mɔŋɛ́ŋa wɔ́ ná botólíə́ ɔ uhúkə ɔ nɛɛ́ŋɛa, mənífə́ má ná úndúə́ ɔ isóyí, bá ná kɔɛ́na ɔ yɛmba.

²⁴Bɔkɔ́nɛna bá ná bɛ́nyálɛ́la ɔ ɔwayɛ́ ɛmɛ́ŋɛ́, bá ná wɛɛ́ya hunyə́kíə́ bá ndɔ yə́mə, bá sɛ́á: «Á Isə́lúkú, á Isə́lúkú, bɛ́ sɛ́á tɔ nɔ́ ákána uwə́ə́!» Yə́susu á hɔnyɔ́á, a ná iŋunu na umbúínyi bámálɛ́na, wɔ́ ná nə́yə́níə́. Ɛbɔ́ka yikimə yɛ́ ná náyá yə́ə́bu.

²⁵Nɔ́yɛ́, a ná bəə́bu lɛ́na a sɛ́á: «Hə́níə́ yənúə́ ilumininə yɛ́ lɛ́á əə́?» Bɔkɔ́lɔ́ma bɔ́ ná bəə́bu itíə́; bá ná ə́lə́mə́nə, bá hɔ́ɔ́kɔ bəə́bu na bəə́bu bá sɛ́á: «Ɛ́yánɛ́ mɔndɔ wɔ́ɔwɔ əə́? Ata umbúínyi na mənífə́, a ndɔ manɛna, yɛ́ ndɔ wɛɛ́ya ɔ́kɛ́na.»

²⁶Yə́susu na báyɛ́á bɔkɔ́nɛna bá ná káfámá ɔ bɔnɔŋɔ bɔ́ Kɛlɛkɛsɛníɛ́ŋɛ, ɔ yííní tanɛ́ yɛ nɛɛ́ŋɛa, nɛ́ Kalɛ́lɛa.

²⁷Ɛnaka Yə́susu a tukínə ɔ misí, mɔndɔ ɔmɔtɛ́ a ná húlínə́ ɔ bətínə́, a ka bá na imbúínyi mɛbɛ́á; hata yɛ ikúílí, a sa bá na bɔlɛŋa ɔ mɛɛ́lɔ, a lɛ tuə́nə ɔ miímə, mba, a niŋəkə ɔ ətíə́ yɛ minyə́.

²⁸Ɛnaka a Yə́susu yámá, a ná botólíə́ ɔ uyə́mə, a ná kɔ́á ɔ ɔwayɛ́ makɔlɔ́ na nióni nɛŋɛ́ŋa, a sɛ́á: «Á Yə́susu, á Mɔná wa Huɛlɛ́ yɛ nɔɔ́mɛná, yatɛ́ ɔ ndɔ mɛaŋɔ́á siə əə́? Tɔ́kɔ́lɛ, ɔ lɛ mɛaŋɔ́á yúkúsíníə́ tɔ́na!»

²⁹Yə́susu a ná yɛ́ɛ́yɛ́ ikúílí umbúínyi mɔbɛ́á manɛ́na ɔwá wɔ́ fámá ɔ ɔwayɛ́ mɛɛ́lɔ. Ɔ taká, bikúílí biəŋí wútə́yí umbúínyi wɔ́ ka bá wɔ́ ndɔ wɛɛ́ya halɛna; bɛndɔ bá wɛɛ́ya makátá na makɔlɔ́ ɔ́lɔ́kɔkɔ na mɛsáŋá ɔkɛaka ɔwá bá wɛɛ́ya tə́tə́níə́, mba, a yííyí mɛsáŋa kátáka, umbúínyi mɔbɛ́á wɔ́ wɛɛ́ya ákánana ɔ bɛbɔ́ka bɛ́ makɔ́tákɛ.

³⁰A ná wɛ́ɛ́yɛ́ mɔndɔ batá a sɛ́á: «Nɛ́áwɔ́á niínyə ɛ́yánɛ́ əə́?» A ná bɛ́kámɔ́sɔ́ná a sɛ́á: «Mɛaŋɔ́á iloŋo yɛ́ banɔabilə́.» Ɔ taká imbúínyi mɛbɛ́á miəŋí yɛ́ ka báá ɔ ɔwayɛ́ mɛɛ́lɔ.

³¹Bikúílí biəŋí, yítə́yí imbúínyi yɛ́ ka Yə́susu bɛ́tɔ́kɔ́lɔ́kɛ́na ɔwá, a lɛ bəə́bu lɔ́má ɔ hianyaka hɛ́ ibínə́binə.

³²Hiɔ́bɔ hɛŋɛ́ŋa hɛ́ mɛkɔnɛ́fɛ́ hɛ́ ka báá ɔmɔ́tɔ́yɛ́ hɛ́ ndɔ nɛ́na ɔ ɔmáá ɔmbáŋá. Imbúínyí mɛbɛ́á yɛ́ ná Yə́susu bɛ́tɔ́kɔ́lɔ́kɛ́na ɔwá, a bəə́bu kuənjə índíə́ yɛ́ ufínə ɔ mɛkɔnɛ́fɛ́. A ná bəə́bu kuənjə índíə́.

³³Nɔ́yɛ́, imbúínyi mɛbɛ́á yɛ́ ná fə́mə́kə́níə́ á mɔndɔ mɛɛ́lɔ, yɛ́ ná fíə́kínə ɔ mɛkɔnɛ́fɛ́. Hiɔ́bɔ hikimə hɛ́ ná lokóníə́ ɔ ɔmáá, hɛ́ ná bɛ́nyɔ́kɔ́kɔ ɔ nɛɛ́ŋɛa nuúmə́.

³⁴Ɛnaka batáta mɛkɔnɛ́fɛ́ bá siəkínə́ yatɛ́ ɔyɛ́á yɛ́ ná bɛ́kɛ́áka, bá ná tɛbákɛ́na. Bá ná ká imbə́nú túmbə́lə́níə́ ɔ bətínə́ na mɔnɔŋɔ má mamɛ́ŋɛ́.

³⁵Bɛndɔ bá ná fə́mə́kə́níə́ ɔ usinə yatɛ́ ɔyɛ́á yɛ́ nɔ́ bɛ́tɔ́mbáka. Bá ná ndáfámá á Yə́susu ɛmɛ́ŋɛ́, bá ná mɔndɔ kɔ́ána ɔwá imbúínyi mɛbɛ́á yɛ́ ná fámáká tuənə́tɔ́ ɔ makɔlɔ́ má Yə́susu, lɛŋábákátɔ́, ɔ ɔwayɛ́ malɔŋa maasɛ, bɔkɔ́lɔ́ma bɔ́ ná bəə́bu itíə́.

³⁶Bəmbóŋímboŋi ɔbá bá ná bikimə siəkínə, bá ná bəə́bu nífúnə́kínə́ ɛ́sɛ́á Yə́susu a ná mɔndɔ wa umbúínyi mɔbɛ́á niŋə́síə́.

³⁷Nɔ́yɛ́, bɛndɔ bəkimə bá bɔ́táyɛ́ bɔnɔŋɔ bá ná Yə́susu lɛ́na ɔwá, a ákáná hata na bəə́bu bɔkɔasɛ́á, bá ka báá na bɔkɔ́lɔ́ma bɔŋɛ́ŋa. Yə́susu a ná tálɛ́má ɔwayɛ́ isóyí a ná tilə.

³⁸Mɔndɔ ɔwá imbúínyi mɛbɛ́á yɛ́ ná fámáká, a ná wɛɛ́ya batá a sɛ́á: «Tɔ́kɔ́lɛ, niása mɛ́ sɔ́nɔ́ na aŋɔ́á.» Mba, Yə́susu a ná wɛɛ́ya tilə́síə́, a sɛ́á:

³⁹«Káka híánáka ɔ ɔwáwɔ ɔmbɛ́la, nífúnə́kə́ bɛkɔa bikimə ɔbɛ́á Huɛlɛ́ a ná kɛáka ɛlɔ́áyɛ́ áwɔ.» A ná yɛ́ɛ́yɛ́ ikúílí ákana, a húlə́ yəmbələkəniə ɔ bətínə́ mikimə bɛkɔa bikimə ɔbɛ́á Yə́susu a ná kɛ́áka ɛlɔ́áyɛ́ ayɛ́.

⁴⁰Ikúílí Yə́susu a ná ndáhíáná ɔ yííní tanɛ́ yɛ nɛɛ́ŋɛa, iloŋo yɛ́ bɛndɔ bá ná wɛɛ́ya káhá bɔkɔasɛ́á, bá ka bá bá ndɔ wɛɛ́ya táta.

⁴¹Mɔndɔ ɔmɔtɛ́ a ná ndáfama, nɛ́áyɛ́á niínyə á Yahíli. A ka báá isə́lúkú yɛ miímə yɛ mabɛ́kálɛ́na yɛ bɔ́táyɛ́ bɔnɔŋɔ. A ná kɔ́á á Yə́susu makɔlɔ́, a ná wɛɛ́ya batá ɔwá a sɔ́nɔ ɔ ɔwayɛ́ ɔmbɛ́la,

⁴²ɔ taká, yayɛ́á yohí yɛ́ mɔná ɔ muəndú wa niómo nɛ́ tuɔŋɔ na tɔ́fandɛ́ a ka bá kɔ́átɔ́ ɔ yomí. Ɛ́sɛ́á a ná báá ɔ ɔwákaka umə́, iloŋo yɛ́ bɛndɔ bá wɛɛ́ya fɔ́táka bɛsalɛ bikimə.

⁴³Muəndú ɔmɔtɛ́ a ka báá ɔmɔ́tɔ́yɛ́; ɔ́ niómo nɛ́ tuɔŋɔ na tɔ́fandɛ́ ɛ́sɛ́á a na báá náátɔ́ ɔ bulufí. A ka hɔ́á ɔbɛ́tɛ́ŋɛna ɔ mamɔ́ɛ́nɛ́, ata mɔndɔ a sa óso ɔ ɔwayɛ́ uniŋəsiə.

⁴⁴A ná tɔ́mbálɛ́la əlimə yɛ Yə́susu, a ná ɛnjá yɛ bɔ́áyɛ́á bɔlɛŋa itíə́lə. Ɔ umisíúmə́, bulufí bɔ́ ná hɔa.

⁴⁵Yə́susu a ná batá a sɛ́á: «Ɛ́yánɛ́ a ná mɛaŋɔ́á ítíə́lə əə́?» Bɛndɔ bəkimə bá ná bɛsaŋɔna. Bíə́lə a sɛ́á: «Á Isə́lúkú, iloŋo yɛ́ bɛndɔ bá ná aŋɔ́á nɛŋɛ́lɛ́na, bá ndɔ aŋɔ́á fɔ́tá bɛsalɛ bikimə.»

⁴⁶Mba, Yə́susu a sɛ́á: «Mɔndɔ a ná mɛaŋɔ́á ítíə́lə, mɛ ná bɛ́ɔ́kɔ́ iŋgínə́ yɛ́ nɔ́ fáma ɔ ɔwámɛ mɛɛ́lɔ.»

⁴⁷Ɛnaka muəndú a yámá ɔwá bá ná wɛɛ́ya núnə́, a ná húlə́ a ndɔ kílímə, a ná kɔ́á á Yə́susu makɔlɔ́, a ná nífúnə́kə́ ɔ busíə́ bɔ́ bɛndɔ bəkimə ɛlɔ́áyɛ́ yatɛ́ a ná wɛɛ́ya itíə́línə, nəníə́ a ná niŋə́ ɔ umisíúmə́.

⁴⁸Yə́susu a sɛ́á: «Á wamɛ́á mɔná, yawɔ́á ilumininə yɛ́ ná aŋɔ́á núə́kə́níə́, káka ɔ bumbə́nú nuúmə́.»

⁴⁹Ɛ́sɛ́á a ná bá a ndɔ hɔ́ɔ́ nɔ́yɛ́, mɔsɔ́másɔma wa isə́lúkú yɛ miímə yɛ mabɛ́kálɛ́na a ná hulə, a sɛ́á: «Wawɔ́á mɔná ɔ muəndú a lɛa wə́ə́tɔ, ɔ lɛ Isə́lúkú hɔ́mbɔ́ tɔ́na.»

⁵⁰Mba, ɛnaka Yə́susu a ɔ́kɔ́ nɔ́yɛ́, a ná Yahíli lɛ́na a sɛ́á: «Ɔ lɛ kɔlɔma, lumínínə ɔbánɔ́, a ndɔ niŋəkə.»

⁵¹Ikúílí Yə́susu a ná káfámá ɔ miímə, a sa niasa ɔwá mɔndɔ a fínə́ na wɛɛ́ya, úhúlíə́ á Bíə́lə, Yɔhánɛsɛ na Yákɔbɔ, isə́ na inyə́ yɛ mɔná.

⁵²Bɛndɔ bəkimə bá lɛlaka, bá bɛ́lɔ́mɔ́nɔkɔ ɛlɔ́áyɛ́ mɔná. Yə́susu a ná bəə́bu lɛ́na a sɛ́á: «Nɔ lɛ lɛlá tɔ́na, a lɛ bá wə́ə́tɔ, a lɛa ɔbánɔ́ ɔ hinó.»

⁵³Bɛndɔ bá wɛɛ́ya ɔnɔkɔ bɔkɔasɛá, bá ndɔ manya ɔwá a lɛa wə́ə́tɔ.

⁵⁴Mba ɔwayɛ́, a ná mɔkátá wɔ́ mɔná ɔ muəndú ɛ́ta, a ná wɛɛ́ya ɛ́lɛ́ná na nióni nɛŋɛ́ŋa a sɛ́á: «Á wamɛ́á mɔná, hɔalɛ́na!»

⁵⁵Ɔ umisíúmə́, mɔná a ná ndáhíáná ɔ buɔmɔ́, a ná hɔalɛ́na. Yə́susu a ná kuənjə índíə́ ɔwá, bá wɛɛ́ya bɔ́labɔ́nɛ́á índíə́.

⁵⁶Máyɛ́á məkúlə má ná ə́lə́mə́nə, mba, a ná bəə́bu umbə́ndə́ índíə́ ɔwá, yatɛ́ ɔyɛ́á yɛ́ nɔ́ bɛ́tɔ́mbáka, bá lɛ lɛ́na ata mɔndɔ.