Read Tunen Yɔhánɛsɛ 1 Bible Online

Yɔhánɛsɛ 1 - Tunen bible

Yɔhánɛsɛ 1

¹Ɔ nɛbalɛ́ná Ɛtambá yɛ́ ka báá, Ɛtambá yɛ́ ka báá ɔ ɛmɛ́ŋɛ́ yɛ Huɛlɛ́, Ɛtambá tɔ́na á Huɛlɛ́.

²Ɔ nɛbalɛ́ná Ɛtambá yɛ́ ka báá ɛmɛ́ŋɛ́ yɛ Huɛlɛ́.

³Ɔ tɔ́mbákɛna yɛ́táyɛ́ Ɛtambá á bikimə bɛ́ ná bɛbɔta, ɛŋaná yɛɛ́ta ata bɔɔ́la bɔ́mɔtɛ́ bɔ́ sa bɛ́bɔ́ta; ɛŋaná yɛɛ́ta ata bɔɔ́la bɔ́mɔtɛ́ bɔ́ sa bɛ́tábɔ́na.

⁴Ɛtambá yɛ́ ka báá hɛnyɔ́nyɔ hɛ́ buɔmɔ́, buɔmɔ́ bɔ́ ka báá isəmú ɔyɛ́á yɛ́ ndɔ bɛndɔ numiə.

⁵Isəmú yɛ́ nɔmaka ɔ ibínə́binə nuúmə́, ibínə́binə yɛ́ sa yɛɛ́ta halɛna.

⁶Huɛlɛ́ a ka mɔndɔ lɔ́ma ɔmɔtɛ́, nɛ́áyɛ́á niínyə á Yɔhánɛsɛ.

⁷A ka ndasá ɛ́sɛ́á mumbóŋímboŋi, ɔ imbóŋi uhíə́niniə isəmú ɔkɛaka ɔwá, bəkimə bá lumínínə ɔ tɔ́mbákɛna na wɛɛ́ya.

⁸Mɔ́táyɛ́ mɔndɔ a sa báá isəmú, mba, a ka báá hɔ́yɛ́ ɔ imbóŋi uhíə́niniə ɔ isəmú.

⁹Ɛtambá yɛ́ ka báá taká yɛ isəmú; ɛnaka yɛ́ ndáfámá ɔ misí yɛ́ nɔmakɛna ɔ bɛndɔ bəkimə.

¹⁰Ɛtambá yɛ́ ka báá ɔ misí, na yɛɛ́ta á misí yɛ́ ná bɛbɔta, mba, misí yɛ́ sa yɛɛ́ta lɛnda.

¹¹A ka ndasá á bɔayɛ́, mba, bɔayɛ́ bá sa wɛɛ́ya káha.

¹²Ata nɔ́yɛ́, bááyɛ́ ɔbá bá ná wɛɛ́ya káhá, bááyɛ́ ɔbá bá ná yə́búə́ yɔnɛ́nɛna tálɛ́ná ɔ ɔwayɛ́ niínyə, a ka kɛaka ɔwá bá híáná baná bá Huɛlɛ́.

¹³Bá sa bíbíə́nə na manɔ́ŋɔ́, ata na uhikiə wɔ́ mɔsá, ata na ɛfɛka yɛ́ mɔndɔ, mba, bá ka bíbíə́nə na uhikiə wɔ́ Huɛlɛ́.

¹⁴Ɛtambá yɛ́ ka bɛ́kɛaka mɔndɔ, yɛ́ ka tuənəkinə ɔ uwəsú ətíə́, tɔ ka tɔ́áyɛ́á tuúmə siəkinə, tuúmə ɔtɔ́á tɔ́ ndɔ húlínə na Isə́ ɛ́sɛ́á yohí yɛ́ mɔná úndúə́tɔ́ na nyɔnɔ, na taká.

¹⁵Yɔhánɛsɛ Mɔsɔabɛndɔ a ndɔ wɛɛ́ya imbóŋi híə́niniə a sɛ́á: «Á wɔ́ɔwɔ mɛ́ ná bá mɛ ndɔ laa ɔwá, wɛ́ɛ́yɛ́ ɔwá a lɛ́á ɔ ɔsákɔna ɔwámɛ əlimə, a lɛa mɔŋɛ́ŋa yáyɛ́ná mɛaŋɔ́á bɔkɔasɛ́á, ɔwámɛ busíə́ a ka báá.»

¹⁶Bəsú bəkimə tɔ ka nɛ́áyɛ́á nɛmbiaŋɛ nɛ́ nyɔnɔ afakana, tɔ ka nyɔnɔ kusənə ɔ mɛɛ́lɔ yɛ nyɔnɔ.

¹⁷Əlimə yɛ umbə́ndə́ ɔwá Mósisi a ná mə́nyə́síə́, nyɔnɔ na taká bɛ́ ka húlínə na Yə́susu Kilísitusu.

¹⁸Ata mɔndɔ a lɛa boóko a ná Huɛlɛ́ sínə, á yohí yɛ́ Mɔná, ɔwá a lɛ́á Huɛlɛ́, hoóyi na Isə́; wɛɛ́ya a ná kɛ́áka ɔwá tɔ wɛɛ́ya manya.

¹⁹Ɔ́ imbóŋi yɛ Yɔhánɛsɛ yɛ́ɛyɛ, ikúílí Bɛyútɛnɛ bəə́bu ɔ Yəlúsalɛma bá ná bətitiəmahánɛna na Bɛlə́witi lɔ́má ɔ ɔwayɛ́ busíə́ ɔwayɛ́ ɔbata bá sɛ́á: «Baánɛ, aŋɔ́á ɛ́yánɛ́ əə́?»

²⁰Á sa kinə ɔ ɔbɛ́kámɔsɔna, mba, a ná bífə́mə́lə́níə́ ɔ uwəbú busíə́ a sɛ́á: «Mɛ lɛ báá Mɛ́sia.»

²¹Bá ná wɛɛ́ya batá bá sɛ́á: «Mba, aŋɔ́á ɛ́yánɛ́ nə́ə əə́? Aŋɔ́á á Ɛlíásɛ əə́?» A sɛ́á: «Bóo! Tátá mɛaŋɔ́á.» Aŋɔ́á Mɔhɛ́nátɔtányɛ́ əə́? A sɛ́á: «Bóo!»

²²Ɔ yɛ́ɛ́yɛ́ ikúílí, bá ná wɛɛ́ya batá bá sɛ́á: «Mba aŋɔ́á ɛ́yánɛ́ nə́ə əə́? Tɔ ndɔ siə ɔ bááyɛ́ bíhíə́niniə ɔbá bá ná bəsú lɔ́má. Nəníə́ ɔ ndɔ bɛ́laa aŋɔ́á bɛ́múɛ́tɛ́ əə́?»

²³Yɔhánɛsɛ a sɛ́á: «Mɛaŋɔ́á mɛ lɛ́á wɛ́ɛ́yɛ́ ɔwá a ndɔ yə́mə ɔ mándaŋɛ́á: “Nɔ́ ɛnɔ́mɛ yɛ́ Isə́lúkú sɛ́kɔ́náká muɛsɛ!” Ɛ́sɛ́á mɔhɛ́nátɔtányɛ́ á Isáya a ná hɔɔkɔ.»

²⁴Ətíə́ yɛ bɛndɔ ɔbá bá ná lɔ́má á Yɔhánɛsɛ busíə́, bɔ́mɔtɛ́ bá ka báá Bɛfalísia.

²⁵Bá ná wɛɛ́ya batá tɔ́na bá sɛ́á: «Ábá ɔ lɛ bá Mɛ́sia, ata á Ɛlíásɛ mbá ata Mɔhɛ́nátɔtányɛ́, ɛlɔ́áyɛ́ yatɛ́ ɔ ndɔ nɛsɔa índiənə əə́?»

²⁶A ná bəə́bu bíhíə́níníə́ a sɛ́á: «Ɔwámɛ, mɛ ndɔ nɛsɔa índiənə na mənífə́; mba uwənú ətíə́, mɔndɔ a báka ɔwá nɔ lɛ ndɔ manya.

²⁷A lɛa ɔ ɔsákɔna ɔwámɛ əlimə, mɛ lɛ bá hɔ́ánánátɔ́ ɔ mikolí yɛ́ bɛ́áyɛ́á bɛtafɛ́ná uhumbulə».

²⁸Bɛ́táyɛ́ bɛkɔa bikimə bɛ́ ka bɛ́tɔ́mbáka ɔ Bɛtánia ɔ yííní ɛsɛ́lɛ́ yɛ́ Yúlútɛnɛ ɔ ɛbɔ́ka ɔyɛ́á Yɔhánɛsɛ a ná báá a ndɔ nɛsɔa índiənə.

²⁹Ɛnaka ɔyáá wɔ́ yáá, Yɔhánɛsɛ a ná Yə́susu yámá ɔ ɔsákɔna ɔwayɛ́ busíə́, a sɛ́á: «Ɔ́ Mɔnándɔ́mbá wa Huɛlɛ́ wɔ́ɔwɔ ɔwá a ndɔ bɔbɛ́á bɔ́ bɛndɔ bá misí hɛ́kɛa.

³⁰Ɔ ɔwayɛ́ mɛ́ ná báá mɛ ndɔ laa mɛ sɛ́á: “Mɔndɔ a lɛa ɔ ɔsákɔna ɔwámɛ əlimə, a lɛa mɔŋɛ́ŋa yáyɛ́ná mɛaŋɔ́á bɔkɔasɛ́á, a ka báá wəbusíə́ na mɛaŋɔ́á”.

³¹Ɔwámɛ, mɛ sa bá mɛ ndɔ wɛɛ́ya manya. Mba, mɛ ka ndasá ɔ nɛsɔa uwíndiənə na mənífə́ ɔkɛaka ɔwá ilúkunə yɛ́ Ísilahɛ́lɛ yɛ́ wɛɛ́ya manya.»

³²Yɔhánɛsɛ a ka yɛ́ɛ́yɛ́ imbóŋi fə́mə́ləniə a sɛ́á: «Mɛ ka Umbúínyi Mɔnaŋanaŋa siəkinə wɔ́ nɔ́ húlínə ɔ nɔɔ́mɛná ɛ́sɛ́á hibúbə́, wɔ́ ná Yə́susu tálɛ́mɛ́na ɔ mɔlɔ́á.

³³Ubusíə́ bɔ́ ikúílí, mɛ sa bá mɛ ndɔ wɛɛ́ya manya, mba, wɛ́ɛ́yɛ́ ɔwá a ná mɛaŋɔ́á lɔ́má a sɛ́á mɛ nɛsɔa índíə́kínə́nə́ na mənífə́, a ka mɛaŋɔ́á lɛna a sɛ́á: “Wɛ́ɛ́yɛ́ ɔwá ɔ ŋɔ siəkinə Umbúínyi Mɔnaŋanaŋa wɔ́ nɔ́ tálɛ́mɛna, wɛɛ́ya á ŋɔ nɛsɔa índiəkinənə na Umbúínyi Mɔnaŋanaŋa.”

³⁴Ɔwámɛ, mɛ ka nɔ́yɛ́ siəkinə, mɛ ndɔ imbóŋi índiə ɔwá, wɛɛ́ya a lɛ́á Mɔná wa Huɛlɛ́.»

³⁵Ɔ ɔyáyáka, Yɔhánɛsɛ a ka báá ɔmɔ́tɔ́yɛ́ na báyɛ́á bɔkɔ́nɛna báfandɛ́.

³⁶Ikúílí Yə́susu a ná báá ɔ ɔtɔ́mbáka, a ná wɛɛ́ya məə́sə tála, a sɛ́á: «Ɔ́ Mɔnándɔ́mbá wa Huɛlɛ́ wɔ́ɔwɔ.»

³⁷Ɛnaka bááyɛ́ bɔkɔ́nɛna báfandɛ́ bá Yɔhánɛsɛ bá bɛ́ɛ́yɛ́ bɛtambá ɔ́kɔ́, bá ná Yə́susu ɔŋgɔ́kɔ.

³⁸A ná bɛkɔŋɔna, a ná yámá ɔwá bá ndɔ wɛɛ́ya ɔŋgɔ; a ná bəə́bu batá a sɛ́á: «Yatɛ́ nɔ́ ndɔ siə əə́?» Bá sɛ́á: «Á Lábi (ɔ́ niɔŋɔ́, á Mulə́liə) baánɛ, hə́níə́ ɔ ndɔ tuənə əə́?»

³⁹A sɛ́á: «Nɔ́ sɔ́nɔ, nɔ́ ndɔ siəkinə.» Bá ná ákáná, bá ná bɔ́ŋɔ́ ɔ ɛbɔ́ka ɔyɛ́á a ná bá a ndɔ tuənə; ɔ bɔ́táyɛ́ buɔsɛ́, bá ná tuə́nə́ na wɛɛ́ya. Yɛ́ ka báá hoóyi na ɛŋgɛ́ŋɛ́ ínisə yɛ́ əlimə yɛ kɔɔsɔ.

⁴⁰Andɛlɛ́, munínyə́ wa Símono Bíə́lə, a ka báá ɔmɔtɛ́ wa bááyɛ́ báfandɛ́ ɔbá bá ná bɛtambá bɛ́ Yɔhánɛsɛ ɔ́kɔ́kɛ́na, bá ná Yə́susu ɔŋgɔ́kɔ.

⁴¹Mɔndɔ wəbusíə́ ɔwá Andɛlɛ́ a ná kɔ́ána, á Símono ɔ wayɛ́á munínyə́. A ná wɛɛ́ya lɛ́na a sɛ́á: «Tɔ ná Mɛ́sia bɔŋɔ.»

⁴²Əlimə yɛ nɔ́yɛ́ Andɛlɛ́ a ná wayɛ́á munínyə́ ɛ́tá á Yə́susu busíə́. Yə́susu á wɛɛ́ya məə́sə tálá, a sɛ́á: «Aŋɔ́á ɔ lɛ́á Símono, á mɔná wa Yɔhánɛsɛ; bá ŋɔ aŋɔ́á ɛ́lɛakɛna Kɛ́fasɛ» (ɔ́ niɔŋɔ́ ɔ sɛ́á á Muɔkɔ).

⁴³Ɔyáyáka, Yə́susu a ná mɔkɛnda ɛtá ɔ wákaka ɔ Kalɛ́lɛa. A ná Filíbo ɛ́nyánána, a ná wɛɛ́ya lɛ́na a sɛ́á: «Ɔŋgɔ́kɔ́ mɛaŋɔ́á!»

⁴⁴Filíbo a ka báá wa Bɛtɛsayíta, ɔ bətínə́ yɛ Andɛlɛ́ na Bíə́lə.

⁴⁵A ná Natanahɛ́lɛ ɛ́nyánána, a ná wɛɛ́ya lɛ́na a sɛ́á: «Tɔ ná wɛ́ɛ́yɛ́ yámá ɔwá Mósisi a ná hɔ́kɛ́na ɔ hiəfulə hɛ́ umbə́ndə́, wɛ́ɛ́yɛ́ ɔwá bɔhɛ́nátɔtányɛ́ bá ná hɔ́kɛ́na: Á Yə́susu á mɔndɔ wa Násalɛtɛ, mɔná wa Yɔ́sɛbɛ.»

⁴⁶Natanahɛ́lɛ a ná wɛɛ́ya lɛ́na a sɛ́á: «Baánɛ, yatɛ́ bɔɔ́la buɛsɛ bɔ́ óso ɔfáma ɔ Násalɛtɛ əə́? » Filíbo a sɛ́á: «Sɔ́nɔ, ɔ ndɔ siəkinə.»

⁴⁷Yə́susu a ná Natanahɛ́lɛ yámá ɔsákɔna ɔwayɛ́ busíə́, a ná hɔ́lɛ́na ɔ ɔwayɛ́ ɛsalɛ a sɛ́á: «Ɔ taká, ɔ́ tokó yɛ mɔndɔ wa Ísilahɛ́lɛ wɔ́ɔwɔ ɔwá a lɛ́á ɛŋana hɛkabalɛ.»

⁴⁸Natanahɛ́lɛ a ná wɛɛ́ya batá a sɛ́á: «Hə́níə́ ɔ ndɔ mɛaŋɔ́á manyɛna əə́?» Yə́susu a sɛ́á: «Ubusíə́ ɔbɔ́á Filíbo a aŋɔ́á ɛ́lɛ́ákɛ́na, mɛ ka aŋɔ́á siəkinə ɔ indínə́ yɛ bɔlɛ́á ɔbɔ́á bá ndɔ ɛ́lɛnɛna bá sɛ́á bufíkiə.»

⁴⁹Ɔ yɛ́ɛ́yɛ́ ikúílí, Natanahɛ́lɛ a ná wɛɛ́ya lɛ́na a sɛ́á: «Á Lábi, aŋɔ́á ɔ lɛ́á Mɔná wa Huɛlɛ́, ɔ lɛa munəni wa Ísilahɛ́lɛ!»

⁵⁰Yə́susu a sɛ́á: «Ɔ ndɔ luminə ɔbánɔ́ bɔkɔasɛ́á, mɛ ná aŋɔ́á lɛ́na ɔwá mɛ ka aŋɔ́á siəkinə ɔ indínə́ yɛ bɔlɛ́á bɔ́ fíkiə. Ɔ́ ŋɔ bɛkɔa biəŋí siəkinə bɛŋɛ́ŋa yáyɛ́ná bɛ́ɛbɛ.

⁵¹Ɛ́ɛ! Taká mɛ ndɔ bənú lɛna: Nɔ́ ŋɔ siəkinə nɔɔ́mɛná yɛ́ nɔ́ bíúbúnə, bɛáŋgɛlɛ bɛ́ Huɛlɛ́ bɛ́ bálaka bɛ́ lɔɔkɔ ɔ mɔlɔ́á wɔ́ Mɔná wa mɔndɔ.»