Read Tunen Yɔhánɛsɛ 10 Bible Online

Yɔhánɛsɛ 10 - Tunen bible

Yɔhánɛsɛ 10

¹Yə́susu a sɛ́á: «Ɛ́ɛ! Taká, mɛ ndɔ bənú nɔ́yɛ́ lɛna, wɛ́ɛ́yɛ́ ɔwá a sá fíninə ɔ hɛkɔ́kɛ hɛ́ yɛla yɛ́ ɛndɔ́mbá mbá a ndɔ ɛmbambala fɛ́njálana, mɔ́táyɛ́ a lɛa muíbi, mɔtɔnɛba tɔ́na.

²Mba, wɛ́ɛ́yɛ́ ɔwá a ná fínínə ɔ hɛkɔ́kɛ, wɛɛ́ya a lɛ́á mɔtáta ɛndɔ́mbá.

³Mutə́tə́niə wa hɛkɔ́kɛ a ndɔ wɛɛ́ya nikí kuninə, ɛndɔ́mbá yɛ́ ndɔ nɛ́áyɛ́á nióni ɔ́kɔ. A ndɔ yə́yíə́ ɛndɔ́mbá ɛ́lɛnɛna muítə tɛ́á ɔ ɔwayɛ́ niínyə. A yiítə ákakana ɔ niə́lətíə́.

⁴Ikúílí a ná yiítə fə́mə́kíə́ yikimə, a kɛndaka uwəbú busíə́, ɛndɔ́mbá yɛ́ wɛɛ́ya ɔŋgɔkɔ bɔkɔasɛ́á, yɛ́ ndɔ nɛ́áyɛ́á nióni manya.

⁵Mba, yɛ́ sa ndá mɔndɔ ɔŋgɔ́ ɔwá yɛ́ lɛ ndɔ manya. Ɔ nifəŋə, yɛ́ ŋɔ tɛbakɛna hata na wɛɛ́ya bɔkɔasɛ́á, yɛ́ lɛ ndɔ nɛ́áyɛ́á nióni manya.»

⁶Yə́susu a ka bəə́bu wííyí ɔŋana tɛ́ɛ́na, mba, bɛndɔ bá sa ɔ́kɔ yatɛ́ ɔyɛ́á a ná bá a ndɔ siə ɔlaa.

⁷Yə́susu a ná híánɔ́lɔ́na ɔ bɛndɔ ɔ ɔlɛna a sɛ́á: «Ɛ́ɛ! Taká mɛ ndɔ bənú nɔ́yɛ́ lɛna, mɛaŋɔ́á mɛ lɛ́á hɛkɔ́kɛ hɛ́ yɛla yɛ́ ɛndɔ́mbá.

⁸Bááyɛ́ bəkimə ɔbá bá ná taŋá ɔ ɔndafámá, bá lɛa boóbi, bɔtɔnɛba tɔ́na, mba, ɛndɔ́mbá yɛ́ sa bəə́bu ɔ́kɛ́na.

⁹Mɛaŋɔ́á mɛ lɛ́á hɛkɔ́kɛ: Wɛ́ɛ́yɛ́ ɔwá a ŋɔ fínə ɔ tɔ́mbákɛna ɔ ɔwámɛ, Huɛlɛ́ a ŋɔ wɛɛ́ya nuəkəniə, a ŋɔ fíə́kinə, a ŋɔ fámáka, a ŋɔ bɔ́labɔ́nɛ́á bɔ́ŋɔ.

¹⁰Muíbi a ndɔ ndasá ɔbánɔ́ ɔ uwoóbo, ɔ ɔwɔ́nɔ, na ɔ unímə́siə. Ɔwámɛ, mɛ ka ndasá ɔkɛaka ɔwá, bɛndɔ bá báá na buɔmɔ́, bá bámɛ́nɛ́ná na bɔɛ́ta ɔ ɔyáyɛ́na.

¹¹Mɛaŋɔ́á mɛ lɛ́á mɔtáta muɛsɛ. Mɔtáta muɛsɛ a lɛa ɛ́mɛ́nɛ́nátɔ́ ɔ ɔwayɛ́ buɔmɔ́ uwíndiə ɛlɔ́áyɛ́ yə́yíə́ ɛndɔ́mbá.

¹²Mɔndɔ ɔwá a ndɔ nyɔɔ ɛlɔ́áyɛ́ mɔnɛ́á, a lɛ bá tiísi yɛ mɔtáta, tátá yə́yíə́ ɛndɔ́mbá. Ikúílí ɔyɛ́á a ná mɛkɔ yámá ɔ ɔsákɔna, a yiítə tíkə, a tɛbakɛna. Əlimə yɛ nɔ́yɛ́, mɛkɔ yɛ́ ɛndɔ́mbá halɛakɛna, hiɔ́bɔ hɛ́ sámbána.

¹³Ɔ taká, mɔndɔ ɔwá a ndɔ nyɔɔ ɔbánɔ́ ɛlɔ́áyɛ́ mɔnɛ́á, a sa ósó ɔ ɛndɔ́mbá utə́tə́niə muɛsɛ.

¹⁴Mɛaŋɔ́á mɛ lɛ́á mɔtáta muɛsɛ, mɛ ndɔ yə́míə́ ɛndɔ́mbá manya, yɛ́ ndɔ mɛaŋɔ́á manya tɔ́na,

¹⁵ɛ́sɛ́á yamɛ́á Isə́ a ndɔ mɛaŋɔ́á manya, mɛ ndɔ yamɛ́á Isə́ manya tɔ́na. Mɛ ndɔ bɔ́ámɛ́á buɔmɔ́ índiə ɛlɔ́áyɛ́ yə́míə́ ɛndɔ́mbá.

¹⁶Mɛ báka na yímotí ɛndɔ́mbá tɔ́na ɔyɛ́á yɛ́ lɛ bá ɔ yɛ́ɛyɛ yɛla. Mɛ ná hɔ́ánána ɔ yiítə ufíniə tɔ́na, yɛ́ ŋɔ nɛ́ámɛ́á nióni ɔ́kɔ́kɛna, yɛ́ ŋɔ híána hiɔ́bɔ hímotí na mɔtáta ɔmɔtɛ́.

¹⁷Isə́ a ndɔ mɛaŋɔ́á hikiə bɔkɔasɛ́á, mɛ ndɔ bɔ́ámɛ́á buɔmɔ́ índiə ɔkɛaka ɔwá, mɛ híánɔ́lɔ́na ɔ bɔɛ́ta ɔwɛta.

¹⁸Ata mɔndɔ a lɛ ndɔ bɔ́ámɛ́á buɔmɔ́ ɛta. Mba, mɛ ndɔ bɔ́ɛ́ta índiə na wə́míə́ uhikiə. Mɛ báka na kuənjə ɔ bɔ́ɛ́ta uwíndiə, mɛ báka na kuənjə tɔ́na ɔ bɔɛ́ta ɔwɛta. Ɔ́ umbə́ndə́ ɔwá yamɛ́á Isə́ a ná mɛaŋɔ́á índíə́.»

¹⁹Ɛlɔ́áyɛ́ bɛ́táyɛ́ bɛtambá, Bɛyútɛnɛ bá ná manyɔ́ bɛ́álɔ́na.

²⁰Bəəŋí ɔ uwəbú ətíə́ bá sɛ́á: «A báka na umbúínyi mɔbɛ́á, a lɛa ndamátɔ, ɛlɔ́áyɛ́ yatɛ́ nɔ ndɔ wɛɛ́ya ɔ́kɛ́na əə́?»

²¹Mba, bɔ́mɔtɛ́ bá sɛ́á: «Abáka mɔndɔ wa umbúínyi mɔbɛ́á a lɛ hɔ́ɔ́ nɔ́yɛ́. Umbúínyi mɔbɛ́á wɔ́ sá ósó ɔ məə́sə má mundímə́ndímə uwubúnə!»

²²Yɛ́ ka báá ikúílí yɛ́ əmbumə ɔ Yəlúsalɛma, bá ka báá ɔ ɛŋganda yɛ ɛhanyɛhányɛ́ yɛ́ ninəŋəsiə nɛ́ Tɛ́mbɛlɛ utúmbiə.

²³Yə́susu a ka báá ɔ Tɛ́mbɛlɛ, a bálaka a lɔɔkɔ ətíə́ yɛ makɔɛnɛ́ má yanda yɛ́ Salómono.

²⁴Ɔ yɛ́ɛ́yɛ́ ikúílí, Bɛyútɛnɛ bá ná wɛɛ́ya nɛŋɛ́lɛ́na, bá ná wɛɛ́ya lɛ́na bá sɛ́á: «Ɔ́ uyə́níə́ ikúílí ɔ ŋɔ súkə ɔ uwəsú unəŋiniə əə́? Ábá ɔ lɛa Mɛ́sia, lɛ́na bəsú tə́lə́ŋu.»

²⁵A ná bəə́bu bíhíə́níníə́ a sɛ́á: «Mɛ ná bənú lakɛ́ná buɔnɔ́, mba, nɔ sá lumininə. Bɛkɔa ɔbɛ́á mɛ ndɔ kɛa ɔ niínyə nɛ́ yamɛ́á Isə́, bɛ́ ndɔ mɛaŋɔ́á imbóŋi híə́niniə.

²⁶Mba nɔ lɛ ndɔ lumininə bɔkɔasɛ́á nɔ lɛ báá bá yə́míə́ ɛndɔ́mbá.

²⁷Yə́míə́ ɛndɔ́mbá yɛ́ ndɔ nɛ́ámɛ́á nióni ɔ́kɔ, mɛ ndɔ yiítə manya, yɛ́ ndɔ mɛaŋɔ́á ɔŋgɔ.

²⁸Ɔwámɛ, mɛ ndɔ yiítə buɔmɔ́ bɔ́ ikúílíə́kimə índiə, yɛ́ sa ndə́niminə, ata mɔndɔ a sa ósó ɔ yiítə ɔlalɔna ɔ ɔwámɛ mɔkátá.

²⁹Yamɛ́á Isə́ ɔwá a ná mɛaŋɔ́á yiítə índíə́, a lɛa mɔŋɛ́ŋa yáyɛ́ná bikimə, ata mɔndɔ a lɛ bá na iŋgínə́ yɛ bɔɔ́la ɔwɔ́lɔ ɔ mɔkátá wɔ́ yamɛ́á Isə́.

³⁰Na mɛaŋɔ́á na yamɛ́á Isə́, tɔ lɛa bɔkɔa bɔ́mɔtɛ́.»

³¹Nɔ́yɛ́, Bɛyútɛnɛ bá ná híánɔ́lɔ́na ɔ miɔkɔ ɔbáta mbá bá wɛɛ́ya luməkə.

³²Mba, Yə́susu a sɛ́á: «Mɛ ná kɛ́áka nɔ ná bɛkɔa bɛɛsɛ bɛ́ yamɛ́á Isə́ siəkínə́ biəŋí. Mba, ɔ́ búə́níə́ bɔkɔa nɔ ndɔ siə ɔwámɛ ɔwɔnɛ́na na miɔkɔ əə́?»

³³Bɛyútɛnɛ bá sɛ́á: «Tátá ɛlɔ́áyɛ́ bɔkɔa buɛsɛ tɔ ndɔ siə ɔwáwɔ ɔwɔnɛ́na na miɔkɔ, mba, ɛlɔ́áyɛ́ ɔkɔ́ba wɔ́ Huɛlɛ́ bɔkɔasɛ́á, ɔwáwɔ ɔwá ɔ lɛ́á mɔndɔ, ɔ ndɔ siə ɔlaa ɔwá bá aŋɔ́á ɛ́lɛ́ákɛ́nɛ́ná Huɛlɛ́.»

³⁴Yə́susu a sɛ́á: «Bá ka tiləkə ɔ uwənú umbə́ndə́ ɔwá, Huɛlɛ́ a sɛ́á: “Mɛ ka laa ɔwá, nɔ lɛa bɛhuɛlɛ́.”

³⁵Tɔ ndɔ manya yatɛ́ ɔyɛ́á umbə́ndə́ wɔ́ ndɔ laa, mɔndɔ a sa ósó ɔ muítə uhúə́siə. Tɔ́ ákáná usinə, bááyɛ́ ɔbá bá ná Ɛtambá yɛ́ Huɛlɛ́ ɔ́kɔ́, a ka bəə́bu ɛ́lɛakɛnɛna bɛhuɛlɛ́.

³⁶Ɔwámɛ, Isə́ a ka mɛaŋɔ́á yɔmɔkɛna, a ná mɛaŋɔ́á lɔ́má tɔ́na ɔ misí. Mba, nəníə́ nɔ ósó ɔlaa ɔwá mɛ ndɔ Huɛlɛ́ kɔ́ba bɔkɔasɛ́á, mɛ ná láá mɛ sɛ́á, mɛ lɛa Mɔná wa Huɛlɛ́ əə́?

³⁷Ábá mɛ lɛ ndɔ bɛkɔa bɛ́ yamɛ́á Isə́ kɛa, nɔ lɛ níə́núə́ nɛkɔmba tálɛ́ná ɔ ɔwámɛ.

³⁸Mba, ábá mɛ ndɔ bɛɛ́ta kɛa, ɛnáká nɔ sá nɛkɔmba tálɛ́na ɔ ɔwámɛ, nɔ́ lumínínə ɔ bɛ́táyɛ́ bɛkɔa ɔkɛaka ɔwá, nɔ manyá muɛsɛ nɔ sɛ́á, Isə́ a lɛa ɔ ɔwámɛ nuúmə́, ɛ́sɛ́á mɛ lɛ́á á Isə́ nuúmə́.»

³⁹Nɔ́yɛ́, bá ka siəkə tɔ́na ɔ ɔwayɛ́ ɔhalɛna, mba, a ná sɔ́tɔ́nɔ́á ɔ uwəbú makátá.

⁴⁰Yə́susu a ná tilə́ ɔ yííní tanɛ́ yɛ́ Yúlútɛnɛ, ɔ ɛbɔ́ka ɔyɛ́á Yɔhánɛsɛ a ná taŋá ɔ nɛsɔa uwíndiənə, a ná tuənə́kínə umə́.

⁴¹Bɛndɔ bəəŋí bá ná ndáfámáká ɔwayɛ́ busíə́, bá sɛ́á: «Yɔhánɛsɛ a sa isə́mə́tə́ kɛa ata ɛ́mɔtɛ́, mba, bikimə ɔbɛ́á a ná lááka ɛlɔ́áyɛ́ wɔ́ɔwɔ mɔndɔ, bɛ́ ka báá taká.»

⁴²Umə́ tɔ́na, bəəŋí bá ná níə́búə́ nɛkɔmba tálɛ́ná ɔ ɔwayɛ́.