Read Tunen Yɔhánɛsɛ 11 Bible Online

Yɔhánɛsɛ 11 - Tunen bible

Yɔhánɛsɛ 11

¹Ɔ yɛ́táyɛ́ ikúílí, mɔndɔ ɔmɔtɛ́ nɛ́áyɛ́á niínyə á Lásalɔ, a ka kɔa ɔ mɔɔ́mbɔ. A ka báá ɔ Bɛtánia, ɔ hitikə ɔhɛ́á Malɛ́á na wayɛ́á munínyə́ á Máta bá ná báá bá ndɔ tuənə.

²Malɛ́á, ɔ́ wɛ́ɛ́yɛ́ muəndú ɔwá a ná Isə́lúkú bunumbə buɛsɛ olókínə ɔ makɔlɔ́, a ná maáta sɔ́tɔ́kɔ́ na tɔ́áyɛ́á tuhúínyi, ɔ́ wayɛ́á munínyə́ á Lásalɔ a ná kɔ́á ɔ mɔɔ́mbɔ.

³Báyɛ́á bənínyə́ báfandɛ́ bá ná mɔndɔ lɔ́má ɔwá a ká Yə́susu lɛ́na a sɛ́á: «Á Isə́lúkú, yawɔ́á ɛŋgɔ́áyɛ́ yɛ mɔlɛ́má a ndɔ náá.»

⁴Ɛnaka Yə́susu á yɛ́ɛ́yɛ́ imbə́nú ɔ́kɔ́, a sɛ́á: «Tátá nyɛmbɛ́ yɛ́ lɛ́á nisúki nɛ́ wííyí mɔɔ́mbɔ, wɔ́ lɛa ɛlɔ́áyɛ́ injiŋə yɛ tuúmə tɔ́ Huɛlɛ́ ɔ uwinə́niə na wayɛ́á Mɔná ɔ uwumə́siə.»

⁵Yə́susu a ka bá a ndɔ Máta na Malɛ́á hikiə, na wəbúə́ munínyə́ a Lásalɔ.

⁶Ata nɔ́yɛ́, ɛnaka á ɔ́kɔ́ ɔwá Lásalɔ a ndɔ náá, a ná hɔ́á tɔ́na tunó tɔ́fandɛ́ ɔ ɛbɔ́ka ɔyɛ́á a ná bámɛ́nɛ́na.

⁷Əlimə yɛ nɔ́yɛ́, a ná báyɛ́á bɔkɔ́nɛna lɛ́na a sɛ́á: «Tɔ́ tilə́ ɔ Yútɛa.»

⁸Bɔkɔ́nɛna bá sɛ́á: «Á Mulə́liə, mənə́níə́, bɛndɔ bá Yútɛa bá ka siəkə ɔ ɔwáwɔ ɔwɔ́nɔ na miɔkɔ, ɔ ndɔ siə utilə umə́ əə́?»

⁹Yə́susu a sɛ́á: «Baánɛ, buɔsɛ́ bɔ́ lɛ boóko na niómo nɛ́ bɛháwɔa na bɛ́fandɛ́ əə́? Ábá mɔndɔ a ndɔ kɛnda na buɔsɛ́, abáka a lɛ úmbúfə́nə bɔkɔasɛ́á, a ndɔ sinənə muɛsɛ, a ndɔ isəmú yɛ́ yɛ́ɛyɛ misí sinə.

¹⁰Mba, ábá a ndɔ kɛnda na bulúə́, abáka a úmbúfəkənə bɔkɔasɛ́á, a lɛ bá na isəmú.»

¹¹Ɛnaka a hɔ́ɔ́kɔ́ nɔ́yɛ́, a ná kɔndá a sɛ́á: «Yəsúə́ ɛŋgɔ́áyɛ́ a Lásalɔ a ná ákáná ɔ hinó, mba, ɛkasɛ mɛ ákáná mɛ́ wɛɛ́ya hunyíə́.»

¹²Bɔkɔ́nɛna bá ná wɛɛ́ya batá bá sɛ́á: «Á Isə́lúkú, ábá a ná ákáná ɔ hinó, a ŋɔ niŋə.»

¹³Ɔ taká, Yə́susu a ka hɔ́kɛna ɛlɔ́áyɛ́ nyɛmbɛ́ yɛ Lásalɔ, mba, bɔkɔ́nɛna bá ka əbú fɛka ɔwá, a ndɔ hɛ́na ɛlɔ́áyɛ́ hinó hɛ́ itə́mbí.

¹⁴Əlimə yɛ nɔ́yɛ́, Yə́susu a ná bəə́bu lɛ́na tə́lə́ŋu a sɛ́á: «Lásalɔ a lɛa wə́ə́tɔ.

¹⁵Mɛ ndɔ nɛhɔnɔ ɔ́kɔ mɔŋɛ́ŋa bɔkɔasɛ́á mɛ sá báá umə́, nɔ́yɛ́ yɛ́ ŋɔ báá mɔsɛ́ŋɛ́ ɛ́lɔ́áyɛ́ ənú ɔkɛaka ɔwá nɔ lumínínə. Mba, tɔ́ ákáná ɔ ɔwayɛ́ ɛmɛ́ŋɛ́.»

¹⁶Əlimə yɛ nɔ́yɛ́, Tɔ́masɛ ɔwá bá ndɔ ɛ́lɛnɛna bá sɛ́á: Ɔmbɔ́ásalɛ́, a ná bɔsɔ́kɔ́ bɔkɔ́nɛna lɛ́na a sɛ́á: «Tɔ́ əsú ákáná tɔ́na mbá tɔ wə́ə́níə́ na wəsúə́ Muinə́niə.»

¹⁷Ikúílí Yə́susu a ná káfámá, bá ná wɛɛ́ya lɛ́na ɔwá, ɔ́ tunó túnisə ɛ́sɛ́á bá ná Lásalɔ nyəə.

¹⁸Ɛ́sɛ́á Bɛtánia yɛ́ sa bá hata na Yəlúsalɛma, hoóyi na tukóló tɔ́lálɔ́ tɔ́ amaná,

¹⁹Bɛyútɛnɛ biəŋí bá ka ndá Máta na Malɛ́á bíhíkə ɔ malɛlá má wəbúə́ munínyə́.

²⁰Ɛnaka Máta a ɔ́kɔ́ bá ndɔ laa ɔwá Yə́susu a lɛa ɔ ɔsákɔna, a ná ákáná ɔ ɔwayɛ́ nɛnyáná, mba, Malɛ́á a ná tíkə́nə́ tuənə́tɔ́ ɔ miímə.

²¹Máta a ná Yə́susu lɛ́na a sɛ́á: «Á Isə́lúkú, ata ɔ báá háha, há wamɛ́á munínyə́ a sá wə́ə́.

²²Mba ata nɔ́yɛ́, mɛ ndɔ manya ɔwá ata isíŋáka, Huɛlɛ́ a ndɔ aŋɔ́á índiəkinə yatɛ́ yikimə ɔyɛ́á ɔ ndɔ wɛɛ́ya bataka.»

²³Yə́susu a sɛ́á: «Wawɔ́á munínyə́ a ndɔ hɔŋɔakɛa.»

²⁴Máta a sɛ́á: «Ɛ́ɛ! Mɛ ndɔ nɔ́yɛ́ manya, a ŋɔ hɔŋɔa ɛnáká bəwə́nú bəkimə bá hɔŋɔ́ákɛ́á ɔ hinó hínítifə́.»

²⁵Yə́susu a sɛ́á: «Mɛaŋɔ́á mɛ lɛ́á nɛhɔŋɔa, mɛaŋɔ́á mɛ lɛ́á buɔmɔ́. Wɛ́ɛ́yɛ́ ɔwá a ŋɔ nɛ́áyɛ́á nɛkɔmba tálɛ́na ɔ ɔwámɛ, ata a ŋɔ wə́ə́, a ŋɔ nɔmɔkɔ.

²⁶Nɔ́yɛ́, wɛ́ɛ́yɛ́ ɔwá a ndɔ niŋə, ɔwá a ndɔ nɛ́áyɛ́á nɛkɔmba tálɛ́na tɔ́na ɔ ɔwámɛ, a sa ndá wəə. Ɔ ndɔ nɔ́yɛ́ lumininə əə́?»

²⁷Máta a sɛ́á: «Ɛ́ɛ, á Isə́lúkú! Mɛ ndɔ lumininə ɔwá, aŋɔ́á ɔ lɛ́á Mɛ́sia, á Mɔná wa Huɛlɛ́, wɛ́ɛ́yɛ́ ɔwá a ná hɔ́ánána ɔndasá ɔ misí.»

²⁸Ɛnaka á hɔ́ɔ́kɔ́ nɔ́yɛ́, Máta a ná ákáná á wayɛ́á munínyə́ busíə́ á Malɛ́á, a ná wɛɛ́ya lɛ́na ɔ hɛtɔkɔ a sɛ́á: «Isə́lúkú a báka háha, a ndɔ aŋɔ́á ɛ́lɛna.»

²⁹Ɛnaka Malɛ́á a bɛ́ɛ́yɛ́ bɛtambá ɔ́kɔ́, hɔasábɔ! A ná hɔalɛ́na, a ná ákáná ɔwayɛ́ busíə́.

³⁰Ɔ taká, Yə́susu a sa bá a nɔ́ kafámá ɔ hitikə, a ka báá ɔ ɛbɔ́ka ɔyɛ́á Máta a ná wɛɛ́ya ɛ́nyánána.

³¹Bɛyútɛnɛ ɔbá bá ná báá ɔ miímə na Malɛ́á ɔ ɔwayɛ́ ukokoliniə, bá yámá a nɔ́ hɔalɛna tɔfá ɔ fámáka, bá ná wɛɛ́ya oŋgóníə́. Bá fɛkaka ɔwá, a nɔ́ ákáná ɔ malɛlá ɔ ɛmɛ́ŋɛ́ yɛ munyə́.

³²Malɛ́á a ná káfámá ɔ ɛbɔ́ka ɔyɛ́á Yə́susu a ná báá. Ɛnaka a wɛɛ́ya yámá, a ná kɔa ɔ ɔwayɛ́ makɔlɔ́, a sɛ́á: «Á Isə́lúkú, ata ɔ báá háha, há wamɛ́á munínyə́ a sá wə́ə́.»

³³Yə́susu a ná Malɛ́á yámá a ndɔ bɛ́sába na Bɛyútɛnɛ ɔbá bá ná wɛɛ́ya ɔŋgɔ́kɔ, a ná sakɛ́mála, wə́yíə́ mɔlɛ́má wɔ́ ná bítúŋúlə́lə.

³⁴A sɛ́á: «Hə́níə́ nɔ ná wə́yíə́ umimə bɛ́lɛ́na əə́?» Bá sɛ́á: «Á Isə́lúkú, sɔ́nɔ, ɔ ndɔ siəkinə.»

³⁵Yə́susu a ná mə́kúnúə́ ɔ malɛlá.

³⁶Bɛyútɛnɛ bá sɛ́á: «Nɔ́ siəlínə ɛ́sɛ́á a ná bá a ndɔ wɛɛ́ya hikiə.»

³⁷Mba, bɔ́mɔtɛ́ ɔ uwəbú ətíə́ bá sɛ́á: «Ɔwayɛ́ ɔwá a ná məə́sə má mundímə́ndímə úbúnə́, ɛlɔ́áyɛ́ yatɛ́ a sa kotiə ɔwá, Lásalɔ a lɛ wə́ə́ əə́?»

³⁸Yə́susu a ná sakɛ́málá tɔ́na, a ná ákáná ɔ munyə́, wɔ́ ka báá ihíkə yɛ́ muɔkɔ tɔ́ákátɔ, wúmotí híkínə́tɔ́ ɔ nifínínə́.

³⁹Ɔ yɛ́ɛ́yɛ́ ikúílí, a ná láá a sɛ́á: «Nɔ́ wííyí muɔkɔ hɛ́kɛ́á.» Máta á munínyə́ wa muwə́nú, a ná wɛɛ́ya lɛ́na a sɛ́á: «Á Isə́lúkú, a ndɔ numbə mɔbɛ́á, ɔ taká ɔ́ tunó túnisə tɔ́ɔtɔ ɛ́sɛ́á bá ná wɛɛ́ya bɛ́lɛ́na ɔ munyə́.»

⁴⁰Mba, Yə́susu a sɛ́á: «Mɛ sa aŋɔ́á lɛna ɔwá ábá ɔ ná lumínínə, ɔ ŋɔ tuúmə tɔ́ Huɛlɛ́ siəkinə əə́?»

⁴¹Bá ná yɛ́ɛ́yɛ́ ikúílí muɔkɔ hɛ́kɛ́á. Yə́susu a ná məə́sə bə́líə́ ɔ ɔmbáŋá, a sɛ́á: «Á Ába, mɛ ndɔ aŋɔ́á bíhóliə bɔkɔasɛ́á ɔ ná mɛaŋɔ́á ɔ́kɛna.

⁴²Mɛ ndɔ manya bikúílí bikimə ɔwá ɔ ndɔ mɛaŋɔ́á ɔ́kɛ́na, mba, mɛ ndɔ hɛ́na nɔ́yɛ́ ɛlɔ́áyɛ́ bɛndɔ ɔbá bá ná mɛaŋɔ́á nɛ́ŋɛ́lɛ́na ɔkɛaka ɔwá, bá lumínínə́ bá sɛ́á aŋɔ́á ɔ ná mɛaŋɔ́á lɔma.»

⁴³Ɛnaka a hɔ́ɔ́kɔ́ nɔ́yɛ́, a ná yə́mə́ nióni nɛŋɛ́ŋa a sɛ́á: «Á Lásalɔ fámá hɔ́yɛ́!»

⁴⁴Lásalɔ a ná fama, makɔlɔ́ na makátá ɔ́lɔ́kɔ́kɔ́tɔ́ na bifəsiə, bɔ́áyɛ́á busíə́ bɔŋɛ́nátɔ́ na ɔmbɔ́mɔ́. Yə́susu a ná bɛndɔ lɛ́na a sɛ́á: «Nɔ́ wɛɛ́ya humbúlə́kə, nɔ́ wɛɛ́ya niása á ákana.»

⁴⁵Bɛyútɛnɛ biəŋí ɔbá bá ná ndá Malɛ́á bíhíkə́, bá ná siəkínə́ yatɛ́ ɔyɛ́á Yə́susu a ná kɛ́áka, bá ná níə́búə́ nɛkɔmba tálɛ́ná ɔ ɔwayɛ́.

⁴⁶Mba, bɔ́mɔtɛ́ ɔ uwəbú ətíə́, bá ná ká Bɛfalísia kɔ́ána, bá ná bəə́bu nífúnə́kínə́ yatɛ́ ɔyɛ́á Yə́susu a ná kɛ́áka.

⁴⁷Bisə́lúkú bɛ́ bətitiəmahánɛna na Bɛfalísia, bá ná kɔtákána ɔ nindúmə́ nɛŋɛ́ŋa nɛ́ bəkə́lə́siə bá sɛ́á: «Wɔ́ɔwɔ mɔndɔ a ndɔ tɔŋgɛtɛ́nɛ́á tɔ́ yələ́mənə kɛa tuəŋí, nəníə́ tɔ́ kɛ́áka əə́?

⁴⁸Ábá tɔ ná niása ɔwá a ákánána ɔ busíə́, ɛkasɛ bəkimə bá níə́búə́ nɛkɔmba tálɛ́ná ɔ ɔwayɛ́, nɔ́yɛ́, bɛndɔ bá Lɔ́ma bá ŋɔ nda yəsúə́ Tɛ́mbɛlɛ na búə́súə́ bɔnɔŋɔ katáka.»

⁴⁹Mba, ɔmɔtɛ́ ɔ uwəbú ətíə́ ɔwá a ná báá isə́lúkú mɛŋɛ́ŋa yɛ bətitiəmahánɛna ɔ hítə́yí hiɔŋɔ, nɛ́áyɛ́á niínyə á Kayífi, a ná bəə́bu lɛ́na a sɛ́á: «Nɔ lɛ ndɔ ɔ́kɔ ata bɔkɔa.

⁵⁰Nɔ́ bílúmə́kíníə́ muɛsɛ, yɛ́ lɛa mɔsɛ́ŋɛ́ ɛlɔ́áyɛ́ ənú ɔwá, mɔndɔ ɔmɔtɛ́ á wínə́ ɛlɔ́áyɛ́ bɔnɔŋɔ, nɔ́yɛ́ mbá bɔnɔŋɔ bukimə bɔ́ sɔ́ ŋɔ nímə.»

⁵¹Bɛtambá bɛ́ Kayífi bɛ́ sa bá bɛ́ ndɔ húlínə na wɛɛ́ya bɛ́múɛ́tɛ́, mba, ɛ́sɛ́á a ná báá ɔ hítə́yí hiɔŋɔ isə́lúkú mɛŋɛ́ŋa yɛ bətitiəmahánɛna, a ka bá a ndɔ hɔ́ɔ́ ɛ́sɛ́á mɔhɛ́nátɔtányɛ́ ɔwá, Yə́susu a ná hɔ́ánána uwínə ɛlɔ́áyɛ́ bɔnɔŋɔ.

⁵²Táta ɔ́maná ɛlɔ́áyɛ́ bɔnɔŋɔ bíbúə́, mba, ɔ́ ɔkɛaka ɔwá baná bá Huɛlɛ́ ɔbá bá lɛ́á sámbánátɔ́ bá báá ɔ bɔlatɔ́.

⁵³Ɔ botolokiə ɔ hítə́yí hinó, bá ná bɛtɛ́nɛ́mɛ́ná ɛtá á Yə́susu ɔ ɔwɔ́nɔ.

⁵⁴Ɛlɔ́áyɛ́ nɔ́yɛ́, a ná súkə́ ɔ ɔbála na ɔ ɔlɔɔ ɔ mianyɔ́ ɔ ətíə́ yɛ Bɛyútɛnɛ. A ná bísúə́lə́ ɔ yɛ́mɔtɛ́ misí ɔ ɛmɛ́ŋɛ́ makɔ́tákɛ, ɔ bətínə́ ɔyɛ́á bá ndɔ ɛ́lɛnɛna, Ɛfalahími, ɔmɔ́tɔ́yɛ́ á ná tuənə́kínə na báyɛ́á bɔkɔ́nɛna.

⁵⁵Básɛ́ka, á ɛŋganda ɔ Bɛyútɛnɛ, yɛ́ ka báá hoóyi bɛndɔ bá bɔnɔŋɔ bəəŋí bá ná báláka ɔ busíə́ bɔ́ ikúílí ɔ Yəlúsalɛma, ɛlɔ́áyɛ́ nibínə́ŋəsiə.

⁵⁶Bá Yə́susu siəkə, ikúílí ɔyɛ́á bá ná bákɔ́na ɔ Tɛ́mbɛlɛ, bá bɛ́bátaka bəə́bu na bəə́bu bá sɛ́á: «Baánɛ, a sɔ́ ŋɔ ndasá ɔbánɔ́ ɔ ɛŋganda əə́?»

⁵⁷Bisə́lúkú bɛ́ bətitiəmahánɛna na Bɛfalísia bá ná nɛkálɔ túmbə́kíə́ ɔwá, ábá mɔndɔ a ná manyá ɔ ɛbɔ́ka ɔyɛ́á Yə́susu a lɛ́á, a nda bəə́bu lɛ́na ɔkɛaka ɔwá mbá bá wɛɛ́ya halɛ́na.