Read Tunen Yɔhánɛsɛ 12 Bible Online

Yɔhánɛsɛ 12 - Tunen bible

Yɔhánɛsɛ 12

¹Tunó tɔ́lɛ́ndálɔ ubusíə́ bɔ́ Básɛ́ka, Yə́susu a ná ákáná ɔ bɔnɔŋɔ bɔ́ Bɛtánia, ɔ ɛbɔ́ka ɔyɛ́á Lásalɔ á mɔndɔ ɔwá a ná huŋúə́síə́ á ná bámɛ́nɛ́na.

²Ɔmɔ́tɔ́yɛ́, bá ná bɛ́labɔ́nɛ́á fə́míə́ ɔ ɔwayɛ́ nióni. Máta a ka báá ɔ nɛafa, Lásalɔ a ka báá ɔmɔtɛ́ wa bááyɛ́ ɔbá bá ná báá ɔ ɛtáka na Yə́susu.

³Malɛ́á a ná nɛbɛka nɛ́ bunumbə bɔ́ mukunə́ mɔŋɛ́ŋa ɛtá tábɔ́nákátɔ́ na tiísi yɛ́ binumbə. A ná olókínə ɔ makɔlɔ́ má Yə́susu, a ná maáta sɔ́tɔ́kɔ́ na tɔ́áyɛ́á tuhúínyi. Miímə mikimə yɛ́ ná úndúə́ na bɔ́ɛ́yɛ́ bunumbə.

⁴Mba, wɔmɔtɛ́ mɔkɔ́nɛna wa Yə́susu, nɛ́áyɛ́á niínyə á Yútasɛ Isikalióto, wɛ́ɛ́yɛ́ ɔwá ɛkasɛ a wɛɛ́ya lúə́, a sɛ́á:

⁵«Ɛlɔ́áyɛ́ yatɛ́ bá sá bɔ́táyɛ́ bunumbə lúínə bɛbɔ́ɛ́yɛa bɛ́lálɔ́ bɛ́ bɛcácɔ́ mbá bá afákɛ́ná ɔ tɔtɔyɔ́nɔ́ əə́?»

⁶A ka hɔ́lɔ nɔ́yɛ́, tátá ɛlɔ́áyɛ́ isə́hísə́hí yɛ́ tɔtɔyɔ́nɔ́, mba, a ka báá muíbi. A ka bá a ndɔ ilímbí yɛ́ bɛcácɔ́ tə́tə́niə, a mɔ́mɔtɛ́ húlə́kiə.

⁷Nɔ́yɛ́, Yə́susu a sɛ́á: «Niásá wɛ́ɛ́yɛ́ muəndú yə́ə́bu, a ná kɛ́áká nɔ́yɛ́ ɛlɔ́áyɛ́ bɔ́ámɛ́á buɔsɛ́ bɔ́ mənyənə.

⁸Nɔ ŋɔ bá na tɔtɔyɔ́nɔ́ ɔ uwənú ətíə́ bikúílí bikimə, mba ɔwámɛ, nɔ sɔ́ ŋɔ báá ná mɛaŋɔ́á bikúílí bikimə.»

⁹Ɔ yɛ́ɛ́yɛ́ ikúílí, iloŋo yɛŋɛ́ŋa yɛ́ Bɛyútɛnɛ bá ná ɔ́kɔ́ ɔwá Yə́susu a ka báá ɔmɔ́tɔ́yɛ́. Tátá ɔ́maná ɛlɔ́áyɛ́ ayɛ́ bá ná ákánɛ́ná umə́, mba tɔ́na, ɛlɔ́áyɛ́ Lásalɔ usinə ɔwá a ná huŋúə́síə́ ɔ ətíə́ yɛ bəwə́nú.

¹⁰Ɔ botolokiə ɔ yɛ́táyɛ́ ikúílí, bisə́lúkú bɛ́ bətitiəmahánɛna bá ná bɛtɛ́nɛ́mɛ́ná ɛtá ɔwá bá Lásalɔ ɔnɔkɔ,

¹¹bɔkɔasɛ́á ɛlɔ́áyɛ́ ayɛ́, Bɛyútɛnɛ biəŋí bá ka bəə́bu bɛ́sala, bá ná níə́búə́ nɛkɔmba tálɛ́ná a Yə́susu.

¹²Ɔ ɔyáyáka, iloŋo miəŋí yɛ́ bɛndɔ ɔyɛ́á yɛ́ ná ndásákɔ́ná ɔ ɛŋganda yɛ Básɛ́ka, yɛ́ ná ɔ́kɔ́ ɔwá Yə́susu a lɛa ɔ ɔsákɔna ɔ Yəlúsalɛma.

¹³Bá ná matala sɔmbaka, bá ná fə́mə́kə́níə́ ɔ bətínə́ ɔ wákaka ɔ ɔwayɛ́ nɛnyáná, bá yə́mə́kə bá sɛ́á: «Hosána! Huɛlɛ́ á wɛ́ɛ́yɛ́ sáná ɔwá a lɛ́á ɔ ɔsákɔna ɔ niínyə nɛ́ Isə́lúkú. Á munəni wa Ísilahɛ́lɛ.»

¹⁴Yə́susu a ná mɔná ɛnjakásɛ yama, a ná tálɛ́má ɛ́sɛ́á Mətilə má ndɔ laa má sɛ́á:

¹⁵«Uwənú á bɛndɔ bá Síyono nɔ lɛ kɔlɔma, ɔ́ wənúə́ munəni wɔ́ɔwɔ a nɔ́ ndasá tálɛ́mátɔ́ ɔ mɔná ɛnjakásɛ ɔmbáŋá.»

¹⁶Ɔ yɛ́táyɛ́ ikúílí bɔkɔ́nɛna bá sa báá bá nɔ́ ɔ́kɔ, mba, ɛnaka Huɛlɛ́ a wɛɛ́ya úmə́kíə́, bá ná bɛ́kɔ́lɔ́mɔ́na ɔwá, yatɛ́ ɔyɛ́á Mətilə má ná hɔ́ɔ́kɔ́ ɛlɔ́áyɛ́ ayɛ́, ɔ́ yatɛ́ ɔyɛ́á bɛndɔ bá ndɔ úndúsiniə.

¹⁷Bɛndɔ bəkimə ɔbá bá ná báá ikúílí ɔyɛ́á Yə́susu a ná Lásalɔ huŋúə́síə́ ɔ ətíə́ yɛ́ bəwə́nú, a ná wɛɛ́ya fə́míə́ ɔ munyə́, bá húlə́ yəmbələkəniə yatɛ́ ɔyɛ́á bá ná siəkínə.

¹⁸Ɔ́ ɛlɔ́áyɛ́ nɔ́yɛ́ ilúkunə yɛ́ ná ndásákɔ́na ɔ ɔwayɛ́ nɛnyáná bɔkɔasɛ́á, bɛndɔ bá ka hɛŋgɛtɛ́nɛ́á hɛ́ yələ́mənə siəkinə ɔhɛ́á a ná kɛ́áka.

¹⁹Nɔ́yɛ́, Bɛfalísia bá ná lúmə́ ɔ ɔlaa bəə́bu na bəə́bu bá sɛ́á: «Nɔ́ síə́línə, bɛndɔ bəkimə bá ndɔ ɔŋgɔ ɔwayɛ́ əlimə! Tɔ lɛa ə́kə́tɔ.»

²⁰Bɔ́mɔtɛ́ bɛndɔ bá Kɛlɛ́kɛ bá ka báá ɔ ilúkunə na bááyɛ́ ɔbá bá ná ndásákɔ́na á Huɛlɛ́ ulúbúnə ɔ Yəlúsalɛma ɔ ikúílí yɛ́ ɛŋganda.

²¹Bá ná tɔ́mbálɛ́la ɔ ɛmɛ́ŋɛ́ yɛ Filíbo, á mɔndɔ wa hitikə hɛ́ Bɛtɛsayíta ɔ misí yɛ Kalɛ́lɛa, bá ná wɛɛ́ya batá bá sɛ́á: «Ə́ə́! Á isə́lúkú, tɔ ndɔ siə á Yə́susu usinə.»

²²Filíbo a ná ákána, a ná Andɛlɛ́ lɛ́na, iŋgində́, bá ná ká Yə́susu nɔ́yɛ́ lɛ́na.

²³A sɛ́á: «Ɔ́ ikúílí yɛ́ɛyɛ ɔyɛ́á Huɛlɛ́ a ná hɔ́ánána ɔ Mɔná wa mɔndɔ uwumə́siə.

²⁴Ɛ́ɛ! Ɔ taká, ɛ́bá niísə nɛ́ ɔmbásáká ɔnɛ́á bá ná háá ɔ misí, nɛ́ sá únúnuəliə, abáka nɛ́ lɛ lɔa, mba, ɛ́bá nɛ́ ná únúnúə́líə́, nɛ́ lɔ́á, nɛ́ tɔtámátámá hákɛna tuəŋí.

²⁵Wɛ́ɛ́yɛ́ ɔwá a ndɔ bɔ́áyɛ́á buɔmɔ́ hikiə, a ŋɔ bɔ́ɛ́ta nyúə́kiə. Wɛ́ɛ́yɛ́ ɔwá a lɛ ndɔ bɔ́áyɛ́á buɔmɔ́ hikiə ɔ yɛ́ɛyɛ misí, a ŋɔ bɔ́ɛ́ta nuəkəniə ɛlɔ́áyɛ́ buɔmɔ́ bɔ́ ikúílíə́kimə.

²⁶Ábá mɔndɔ a ndɔ siə ɔwámɛ ɔnyɛna, a ná hɔ́ánána á mɛaŋɔ́á ɔ́ŋgɔ́kɔ, nɔ́yɛ́, wamɛ́á mɔnyɛna a ŋɔ bámɛnɛna ɔ ɛbɔ́ka ɔyɛ́á mɛ lɛ́á. Yamɛ́á Isə́ a ŋɔ wɛ́ɛ́yɛ́ bə́tiə ɔwá a ndɔ mɛaŋɔ́á nyɛna.»

²⁷«Isíŋáka híə́míə́ hɛtányɛ́ hɛ́ lɛa bítúŋúlə́lə́tɔ, nəníə́ mɛ láá əə́? Mɛ láá ɔwá, a Ába nuəkə́níə́ mɛaŋɔ́á ɔ yatɛ́ ɔyɛ́á ɛkasɛ yɛ́ ndá mɛaŋɔ́á fámɛ́ná əə́? Mba, bóo! Ɔ́ ɛlɔ́áyɛ́ nɔ́yɛ́ mɛ́ ná ndásɛ́ná ɔ misí.

²⁸A Ába, úmə́síə́ nɛ́áwɔ́á niínyə!» Nɔ́yɛ́, nióni nɛ́ ná húlínə́ ɔ nɔɔ́mɛná nɛ́ sɛ́á: «Mɛ ka wɛɛ́ya úmə́kiə, mɛ ŋɔ wɛɛ́ya úmə́kiə tɔ́na.»

²⁹Iloŋo yɛ́ bɛndɔ ɔbá bá ná báá ɔmɔ́tɔ́yɛ́, ɔbá bá ná ɔ́kɔ́kɛ́na, bá laaka bá sɛ́á: «Ɛmalamanda yɛ́ ná sana.» Bɔ́mɔtɛ́ bá sɛ́á: «Yɛmɔtɛ́ áŋgɛlɛ a ná wɛɛ́ya hɔ́lɛ́na.»

³⁰Mba, Yə́susu a sɛ́á: «Nióni ɔnɛ́á nɔ ná ɔ́kɔ́kɛ́na, tátá ɛlɔ́áyɛ́ ámɛ, mba ɛlɔ́áyɛ́ ənú.

³¹Isíŋáka ɛkasɛ Huɛlɛ́ á yɛ́ɛyɛ misí kə́lə́sə́kíə́, isíŋáka ɛkasɛ bá isə́lúkú yɛ yɛ́ɛyɛ misí ómbóko ɔ niə́lətíə́.

³²Mba ɔwámɛ, ɛnáká bá mɛaŋɔ́á bə́líə́ ɔ ɔmbáŋá, mɛ ŋɔ bɛndɔ bəkimə bísúə́linə na mɛaŋɔ́á.»

³³A ka bá a ndɔ hɔ́ɔ́ nɔ́yɛ́ ɔ uwinə́niə nindínə́ nɛ́ nyɛmbɛ́ ɔ ɔnɛ́á a ŋɔ wínə.

³⁴Iloŋo yɛ́ bɛndɔ bá ná wɛɛ́ya bíhíə́níníə́ bá sɛ́á: «Ɔ hiəfulə yɛ́ umbə́ndə́, tɔ ka ɔ́kɔ́naka ɔwá Mɛ́sia a ŋɔ nɔmɔkɔ ikúílíə́kimə. Nəníə́ ɔ óso ɔlaa ɔ sɛ́á: “Bá ŋɔ Mɔná wa mɔndɔ bə́ləkiə əə́?” Ɛ́yánɛ́ a lɛ́á mɔ́táyɛ́ Mɔná wa mɔndɔ əə́?»

³⁵Yə́susu a sɛ́á: «Isəmú yɛ́ lɛa tɔ́na na bənú ɛlɔ́áyɛ́ tɛ́tɛ́á yɛ ikúílí. Nɔ́ kɛndáka ikúílí ɔyɛ́á nɔ lɛ́á na isəmú ɔkɛaka ɔwá, ibínə́binə yɛ́ lɛ bənú hálɛ́na. Mba, wɛ́ɛ́yɛ́ ɔwá a ndɔ kɛnda ɔ ibínə́binə nuúmə́, a lɛ ndɔ manya ɔ ɛbɔ́ka ɔyɛ́á a ndɔ ákána.

³⁶Nɔ́ isəmú lúmínínə ikúílí ɔyɛ́á nɔ lɛ́á na yɛɛ́ta, nɔ́yɛ́ mbá nɔ ŋɔ híána baná bá isəmú.» Ɛnaka a hɔ́á ɔ ɔhɔ́ɔ́ nɔ́yɛ́, a ná bisuələ, a ná kə́bitimə.

³⁷Ata nɔ́yɛ́ ɛ́sɛ́á Yə́susu a ná tɔŋgɛtɛ́nɛ́á tɔ́ yələ́mənə kɛ́áká tuəŋí uwəbú busíə́, Bɛyútɛnɛ bá sá níə́búə́ nɛkɔmba tálɛ́na ɔ ɔwayɛ́,

³⁸Ɔ́ ɔkɛaka ɔwá Huɛlɛ́ á ɛtambá yɛ́ mɔhɛ́nátɔtányɛ́ á Isáya úndúsíníə́ ɔyɛ́á a ná láá a sɛ́á: «Á Isə́lúkú, ɛ́yánɛ́ a ná yəsúə́ imbə́nú lúmínínə əə́? Ɔwanɛ́ á Isə́lúkú a ná yayɛ́á injiŋə ínə́níə́ əə́?»

³⁹Isáya a ka laa tɔ́na ɛlɔ́áyɛ́ yatɛ́ bá sá óso ulumininə, a sɛ́á:

⁴⁰«Huɛlɛ́ a ka bəə́bu indímə́ lúmə, a ná wə́búə́ mɔlɛ́má nə́tə́síə́ ɔkɛaka ɔwá mə́búə́ məə́sə ma lɛ sinə́nə, bá lɛ bɔkɔa manyá ɔwá, bá mɔlɛ́má kɔ́ŋɔ́ná mbá mɛ bəə́bu nuəkə́níə́.»

⁴¹Isáya a ka laa nɔ́yɛ́ bɔkɔasɛ́á, a ka bɔŋɛ́ŋa bɔ́ Mɛ́sia siəkínə, a ná hɔ́kɛ́na ɛlɔ́áyɛ́ ayɛ́.

⁴²Ata nɔ́yɛ́, ətíə́ yɛ bisə́lúkú bɛ́ Bɛyútɛnɛ bɛ́múɛ́tɛ́, bəəŋí bá ka níə́búə́ nɛkɔmba tálɛ́na ɔ ɔwayɛ́, mba, ɔ inditiə. Ɛlɔ́áyɛ́ Bɛfalísia, bá sa yə́búə́ ilumininə fə́mə́ləniə, bá kɔ́lɔ́maka ɔwá, ɛkasɛ bá bəə́bu bulə́kə ɔ miímə yɛ mabɛ́kálɛ́na.

⁴³Ɔ taká, bá ka báá bá ndɔ hikiə á tuúmə ɔtɔ́á tɔ́ ndɔ húlínə na bɛndɔ yáyɛ́ná ɔtɔ́á tɔ́ ndɔ húlínə na Huɛlɛ́.

⁴⁴Ɔ yɛ́ɛ́yɛ́ ikúílí, Yə́susu a sɛ́á: «Wɛ́ɛ́yɛ́ ɔwá a ndɔ nɛkɔmba tálɛ́na ɔ ɔwámɛ, tátá ɔ́maná ɔ ɔwámɛ a ndɔ nɛ́áyɛ́á nɛkɔmba tálɛ́na, mba, ɔ wɛ́ɛ́yɛ́ ɔwá a ná mɛaŋɔ́á lɔma.

⁴⁵Wɛ́ɛ́yɛ́ ɔwá a ndɔ mɛaŋɔ́á sinə, a ndɔ wɛ́ɛ́yɛ́ sinə tɔ́na ɔwá a ná mɛaŋɔ́á lɔma.

⁴⁶Ɔwámɛ, mɛ ka ndasá ɔ misí ɛ́sɛ́á isəmú ɔkɛaka ɔwá, ata ɛ́yánɛ́ ɔwá a ná nɛkɔmba tálɛ́na ɔ ɔwámɛ, a lɛa tuə́nə ɔ ətíə́ yɛ ibínə́binə.

⁴⁷Ábá mɔndɔ a ná bɛ́ámɛ́á bɛtambá ɔ́kɔ́kɛ́na mbá a sá bɛɛ́ta bɛ́kɛna, tátá mɛaŋɔ́á mɛ ndɔ wɛɛ́ya kə́lə́siə, ɔ taká, mɛ sa ndasá ɔ misí ukə́lə́siə, mba ɛlɔ́áyɛ́ misí unuəniə.

⁴⁸Wɛ́ɛ́yɛ́ ɔwá a lɛ ndɔ mɛaŋɔ́á hikiə mbá a lɛ ndɔ bɛ́ámɛ́á bɛtambá lumininə, a lɛa na wayɛ́á mukə́lə́siə: Bɛ́ámɛ́á bɛtambá bɛ́ ŋɔ wɛɛ́ya kə́lə́səkiə ɔ hinó hɛ́ nitifə́.

⁴⁹Mɛ́ sa hɛ́na na mɛaŋɔ́á bɛ́múɛ́tɛ́, mba, Isə́ ɔwá a ná mɛaŋɔ́á lɔ́má, wɛɛ́ya bɛ́múɛ́tɛ́ a ná mɛaŋɔ́á mánɛ́ná yatɛ́ ɔyɛ́á mɛ ná hɔ́ánána ɔlaa na uwinə́niə.

⁵⁰Mɛ ndɔ manya ɔwá, wə́yíə́ umbə́ndə́ wɔ́ ndɔ buɔmɔ́ bɔ́ ikúílíə́kimə índiə. Nɔ́yɛ́, yatɛ́ ɔyɛ́á mɛ ndɔ laa, mɛ ndɔ nɔ́yɛ́ laa ɛ́sɛ́á yamɛ́á Isə́ a ná mɛaŋɔ́á mánɛ́na.»