Read Tunen Yɔhánɛsɛ 13 Bible Online

Yɔhánɛsɛ 13 - Tunen bible

Yɔhánɛsɛ 13

¹Ɔ uyə́səkiə wɔ́ ɛŋganda yɛ Básɛ́ka, Yə́susu a manyaka ɔwá ɛlɔ́áyɛ́ ayɛ́, ikúílí yɛ́ nɔ́ ndáfámá ɔ ɔhɛ́kɛakɛa ɔ yɛ́ɛyɛ misí ɔ ɔwákaka á Isə́ ɛmɛ́ŋɛ́, bikúílí bikimə, a ka bááyɛ́ hikəkiə ɔbá bá ná báá ɔ misí, a ná bəə́bu hikə́kíə́ ɔkafámáká ɔ nisúki.

²Yə́susu a ka báá ɔ ɔnɛ́á bɛkɔlakɔ́lá na báyɛ́á bɔkɔ́nɛna, əlimə ɔwá sátana a nɔ́ ɛfɛka yɛ́ ɔwayɛ́ ɔ ɔsɛma háá ɔ mɔlɛ́má wɔ́ Yútasɛ á mɔná wa Símono Isikalióto.

³Yə́susu a manyaka ɔwá Isə́ a ka bikimə híə́niə ɔ ɔwayɛ́ makátá, a manyaka wɛɛ́ya bɛ́múɛ́tɛ́ ɔwá a ka húlínə na Huɛlɛ́, a lɛa ɔ ɔwákaka á Huɛlɛ́ busíə́,

⁴a ná hɔalɛ́na ɔ ɛtáka, a ná bɔlɛŋa bíhúlíə́, a ná hitumbə ɛ́ta, a ná bítíŋə́ ɔ nɛlálá.

⁵Əlimə yɛ nɔ́yɛ́, a ná mənífə́ kútə́ ɔ ɛfána, a ná botólíə́ ɔ makɔlɔ́ má báyɛ́á bɔkɔ́nɛna ɔ ɔsɔa, a maáta húnəkə na hitumbə ɔhɛ́á hɛ́ ná báá ɔ ɔwayɛ́ nɛlálá.

⁶Ɛnaka a ndáfámá á Símono busíə́, Símono a sɛ́á: «Á Isə́lúkú, aŋɔ́á ɛkasɛ ɔ mɛaŋɔ́á makɔlɔ́ sɔ́áka əə́?»

⁷Yə́susu a sɛ́á: «Ɔ lɛ ndɔ manya yatɛ́ ɔyɛ́á mɛ ndɔ kɛa isíŋáka, mba, ɔ ŋɔ nɔ́yɛ́ manya əlimə yɛ ikúílí.»

⁸Bíə́lə a sɛ́á: «Bóo! Ata ɔ hííní hinó, táta aŋɔ́á ɔ ŋɔ mɛaŋɔ́á makɔlɔ́ sɔaka.» Yə́susu a sɛ́á: «Ábá mɛ sá aŋɔ́á makɔlɔ́ sɔa, ɔ sa ndá nioko ɛtá na mɛaŋɔ́á!»

⁹Símono a sɛ́á: «Ábá nɔ́yɛ́, á Isə́lúkú, ɔ lɛ mɛaŋɔ́á sɔ́á á makɔlɔ́ bíbúə́, mba, sɔ́áká mɛaŋɔ́á makátá na mɔlɔ́á tɔ́na.»

¹⁰Yə́susu a sɛ́á: «Wɛ́ɛ́yɛ́ ɔwá a ná bɛ́sɔ́áka, bá sá hɔ́ánana ɔ ɔwayɛ́ ɔsɔa, mba, a lɛa naŋátɔ́ wɛɛ́ya mukimə, uwə́nú, nɔ lɛa naŋátɔ, mba, tátá bənú bəkimə.»

¹¹Ɔ taká, a ka bá a ndɔ wɛ́ɛ́yɛ́ manya muɛsɛ ɔwá ɛkasɛ a wɛɛ́ya sɛma, ɔ́ ɛlɔ́áyɛ́ nɔ́yɛ́ a ndɔ laa a sɛ́á: «Nɔ lɛ bá bənú bəkimə naŋátɔ.»

¹²Ɛnaka a bəə́bu makɔlɔ́ sɔ́áka, a ná bɔ́áyɛ́á bɔlɛŋa bíhíə́níə́, a ná híáná ɔ ɛtáka, a ná bəə́bu lɛ́na a sɛ́á: «Nɔ ná manya yatɛ́ ɔyɛ́á mɛ nɔ́ bənú kɛaka əə́?

¹³Nɔ ndɔ mɛaŋɔ́á ɛ́lɛnɛna Mulə́liə, na Isə́lúkú, nɔ ndɔ laa muɛsɛ bɔkɔasɛ́á, ɔ́ nɔ́yɛ́ mɛ lɛ́á.

¹⁴Ábá ɔwámɛ á Isə́lúkú na Mulə́liə, mɛ ná bənú makɔlɔ́ sɔ́áka, bənú tɔ́na nɔ ná hɔ́ánána ɔ makɔlɔ́ ɔsɔana bənú ná bənú,

¹⁵ɔ taká, ɔ́ hɛŋgɛtɛ́nɛ́á hííyí mɛ́ nɔ́ bənú ínə́niə ɔkɛaka ɔwá, bənú tɔ́na nɔ́ kɛ́áká ɛ́sɛ́á mɛ ná kɛ́áka ɛlɔ́áyɛ́ ənú.

¹⁶Ɛ́ɛ! Ɔ taká, mɛ ndɔ bənú nɔ́yɛ́ lɛna, mɔnyɛna a lɛ bá mɔŋɛ́ŋa yáyɛ́ná yayɛ́á isə́lúkú, ata mɔsɔ́másɔma a lɛ bá mɔŋɛ́ŋa yáyɛ́na wɛ́ɛ́yɛ́ ɔwá a ná wɛɛ́ya lɔma.

¹⁷Isíŋáka nɔ ndɔ nɔ́yɛ́ manya, nɔ ŋɔ báá ɔ nɛhɔnɔ ábá nɔ ná nɔ́yɛ́ bɛ́kɛ́ákɛ́na.

¹⁸Mɛ lɛ ndɔ hɛ́na ɛlɔ́áyɛ́ bənú bəkimə, mɛ ndɔ bááyɛ́ manya ɔbá mɛ ná tɛfa. Mba, yɛ́ɛ́yɛ́ ɛtambá yɛ́ Mətilə yɛ́ ná hɔ́ánána ɔ bíúndúsiniə yɛ́ sɛ́á: “Wɛ́ɛ́yɛ́ ɔwá tɔ ná níə́kə́níə́, a ná mɛaŋɔ́á híánɛ́na əlimə.”

¹⁹Mɛ ndɔ bənú nɔ́yɛ́ lɛna isíŋáka ubusíə́ ɔbɔ́á bɔ́ɛ́yɛ́ bɔkɔa bɔ́ ndáfámá ɔkɛaka ɔwá, ikúílí bɔ́ ŋɔ ndafámá nɔ́ lumínə ɔwá, ɔwámɛ, mɛaŋɔ́á mɛ lɛ́á wɛ́ɛ́yɛ́ ɔwá mɛ lɛ́á.

²⁰Ɛ́ɛ! Ɔ taká, mɛ ndɔ bənú lɛna, ata ɛ́yánɛ́ ɔwá a ŋɔ wɛ́ɛ́yɛ́ káha ɔwá mɛ ná lɔ́má, ɔ ɔwámɛ a ndɔ káha, ata ɛ́yánɛ́ ɔwá a ŋɔ mɛaŋɔ́á káha, a ndɔ wɛ́ɛ́yɛ́ káha ɔwá a ná mɛaŋɔ́á lɔma.»

²¹Əlimə yɛ bɛ́táyɛ́ bɛtambá, hɛtányɛ́ hɛ́ ná Yə́susu kátɛ́á, a ná fə́mə́lə́níə́ ɔ mianyɔ́ a sɛ́á: «Ɛ́ɛ! Ɔ taká, mɛ ndɔ bənú nɔ́yɛ́ lɛna, ɔmɔtɛ́ ɔ uwənú ətíə́ a ŋɔ mɛaŋɔ́á sɛma.»

²²Əlimə yɛ nɔ́yɛ́, bɔkɔ́nɛna bá ná siəlínə́nə, bá lɛ mɔndɔ manyá ɔwá a ndɔ hɛ́na.

²³Wɔmɔtɛ́ ətíə́ yɛ bɔkɔ́nɛna, wɛ́ɛ́yɛ́ ɔwá Yə́susu a ná bá a ndɔ hikiə mɔŋɛ́ŋa, a ka báá tuənə́tɔ́ ɔ ɔwayɛ́ ɛmɛ́ŋɛ́.

²⁴Símono a ná wɛɛ́ya hɛsála ɔkɛaka ɔwá, a Yə́susu batá á mɔndɔ ɔwá a ndɔ hɛ́na.

²⁵Wɛ́ɛ́yɛ́ mɔkɔ́nɛna a ná lɛŋɛma, a ná wɛɛ́ya bə́sə́líníə́ a sɛ́á: «Á Isə́lúkú, ɛ́yánɛ́ mɔ́táyɛ́ əə́?»

²⁶Yə́susu a sɛ́á: «Ɛkasɛ mɛ hiɔ́mbɛ yubə́ ɔ bɔnɛ́ná, wɛ́ɛ́yɛ́ ɔwá mɛ ndɔ índiəkinə, wɛɛ́ya.» Nɔ́yɛ́, a ná hiɔ́mbɛ yubə́, a ná índíə́ á Yútasɛ á mɔná wa Símono Isikalióto.

²⁷Ikúílí Yútasɛ a ná hiɔ́mbɛ ɛtá, Sátana a ná wɛɛ́ya fínə́ ɔ mɔlɛ́má. Yə́susu a sɛ́á: «Yatɛ́ ɔyɛ́á ɔ ndɔ siə ɔkɛa, kɛ́áká yɛɛ́ta tɔfá.»

²⁸Mba, ata ɔmɔtɛ́ ɔ uwəbú ətíə́ ɔbá bá ná báá ɔ ɛtáka, a sa manya ɛlɔ́áyɛ́ yatɛ́ a ndɔ nɔ́yɛ́ hɛ́na.

²⁹Ɛ́sɛ́á Yútasɛ a ná bá na ɔmbalá wɔ́ mɔnɛ́á, bəəŋí bá fɛkaka ɔwá, Yə́susu a ná wɛɛ́ya lɛ́na ɔwá, a ká bɛɛ́la ɔ́ndɔ́kɔ́ ɔbɛ́á bɛ́ ndɔ bəə́bu bísiə ɛlɔ́áyɛ́ ɛŋganda, ataná, á ká nɛhánɛna índíə́ ɔ tɔtɔyɔ́nɔ́.

³⁰Yútasɛ, á hiɔ́mbɛ káhá, ɔ umisíumə́ a ná fama, ibínə́binə yɛ́ ka báá kɔ́átɔ.

³¹Ɛnaka Yútasɛ a fámá, Yə́susu a sɛ́á: «Isíŋáka ɛkasɛ bá Mɔná mɔndɔ úmə́kíə́, Huɛlɛ́ ɛkasɛ á úmə́kə́ ɔ tɔ́mbákɛna na wɛɛ́ya.

³²[Mba, ábá tuúmə tɔ́ Huɛlɛ́ tɔ́ ná bífə́mə́lə́níə́ ɔ ɔwayɛ́,] Huɛlɛ́ wɛɛ́ya bɛ́múɛ́tɛ́, a ŋɔ Mɔná úmə́kiə, a ŋɔ wɛɛ́ya tuúmə híə́niniə ɔ ikúílí tɛ́tɛ́á.

³³Á bámɛ́á baná, mɛ lɛa na bənú ɛlɔ́áyɛ́ tɛ́tɛ́á yɛ ikúílí. Nɔ ŋɔ tíkə́ mɛaŋɔ́á siəkə, mba, isíŋáka mɛ ndɔ bənú lɛna yatɛ́ ɔyɛ́á mɛ ná lákɛ́na ɔ Bɛyútɛnɛ, nɔ sa ósó ɔndasá ɔ ɛbɔ́ka ɔyɛ́á mɛ nɔ́ ákána.»

³⁴«Mɛ ndɔ bənú umbə́ndə́ muɔ́sɔ tíkínə. Nɔ́ hikə́kə́níə́ bənú na bənú ɛ́sɛ́á mɛ ná bənú híkə́kíə́, nɔ́ hikə́kə́níə́ bɔ́mɔtɛ́ na bə́ə́ní.

³⁵Ábá nɔ ndɔ hikəniə bənú na bənú, nɔ́yɛ́, bəkimə bá ŋɔ manya ɔwá nɔ lɛa bámɛ́á bɔkɔ́nɛna.»

³⁶Símono a ná Yə́susu batá a sɛ́á: «Á Isə́lúkú, hə́níə́ ɔ nɔ́ ákáná əə́?» A ná wɛɛ́ya bíhíə́níníə́ a sɛ́á: «Ɔ ɛbɔ́ka ɔyɛ́á mɛ nɔ́ ákána, ɔ sa ósó ɔwámɛ ɔwɔŋgɔ, mba, ɔ ŋɔ mɛaŋɔ́á ɔ́ŋgɔkɔ əlimə yɛ ikúílí.»

³⁷Bíə́lə a sɛ́á: «Á Isə́lúkú ɛlɔ́áyɛ́ yatɛ́ mɛ sɔ́ ŋɔ óso ɔwáwɔ ɔwɔŋgɔ isíŋáka əə́? Mɛ ndɔ luminə ɔ uwə́ə́ ɛlɔ́áyɛ́ áwɔ.»

³⁸Mba, Yə́susu a sɛ́á: «Ɔ ndɔ luminə ɔ uwínə ɛlɔ́áyɛ́ ámɛ! Taká, taká, mɛ ndɔ aŋɔ́á lɛna, ubusíə́ ɔbɔ́á miɔkɔ́ yɛ lɔ́ŋɔ́, ɔ ndɔ sáŋɔnaka bikúílí bɛ́lálɔ́ ɔwá ɔ lɛ ndɔ mɛaŋɔ́á manya.»