Read Tunen Yɔhánɛsɛ 14 Bible Online

Yɔhánɛsɛ 14 - Tunen bible

Yɔhánɛsɛ 14

¹Yə́susu a ná báyɛ́á bɔkɔ́nɛna lɛ́na a sɛ́á: «Nɔ lɛ kɔlɔma, nɔ́ níə́núə́ nɛkɔmba tálɛ́ná á Huɛlɛ́, nɔ́ níə́núə́ nɛkɔmba tálɛ́ná tɔ́na ɔ ɔwámɛ.

²Ɔ ɔmbɛ́la wɔ́ yamɛ́á Isə́, bɛbɔ́ka bɛ́ utuənə bɛ́ lɛa biəŋí yɛ́ sá bá nɔ́yɛ́, há mɛ sa bənú nɔ́yɛ́ lɛna ɔwá, mɛ nɔ́ ákána mɛ ká bənú bituənínə́ tábɔ́nákɛ́na.

³Ɛnáká mɛ ákáná uwənú ɔ ɛbɔ́ka ɔ katábɔ́nɛ́na, mɛ ŋɔ ndahíáná mɛ ndá bənú ɛ́tá na mɛaŋɔ́á ɔkɛaka ɔwá, bənú tɔ́na nɔ bámɛ́nɛ́ná ɔ ɛbɔ́ka ɔyɛ́á mɛ lɛ́á.

⁴Ɔ ɛbɔ́ka ɔyɛ́á mɛ nɔ́ ákáná, nɔ ndɔ ɛnɔ́mɛ manya.»

⁵Tɔ́masɛ a ná wɛɛ́ya lɛ́na a sɛ́á: «Á Isə́lúkú, tɔ lɛ ndɔ manya ɔ ɛbɔ́ka ɔyɛ́á ɔ nɔ́ ákáná. Nəníə́ ɛ́kɛ tɔ ɔmanya ɔbánɔ́ á ɛnɔ́mɛ əə́?»

⁶Yə́susu a sɛ́á: «Mɛaŋɔ́á mɛ lɛ́á ɛnɔ́mɛ, taká na buɔmɔ́. Mɔndɔ a sa ósó ɔwakána á Isə́ ábá a sá tɔ́mbɛ́na ɔ ɔwámɛ.

⁷Ata nɔ bá nɔ ndɔ mɛaŋɔ́á manya, há nɔ ndɔ yamɛ́á Isə́ manya tɔ́na. Ɔ botolokiə isíŋáka nɔ ndɔ wɛɛ́ya manya, nɔ ná wɛɛ́ya siəkínə.»

⁸Filíbo a sɛ́á: «Á Isə́lúkú, ínə́níə́ bəsú Isə́, nɔ́yɛ́ yɛ́ ná bəsú hɔ́ánánɛ́na.»

⁹Yə́susu a sɛ́á: «Á Filíbo, hata yɛ ikúílí ɔyɛ́á mɛ lɛ́á na bənú, ɔ ndɔ laa ɔwá, ɔ lɛ ndɔ mɛaŋɔ́á manya əə́? Wɛ́ɛ́yɛ́ ɔwá a ná mɛaŋɔ́á síə́kínə, a ná yamɛ́á Isə́ síə́kínə. Nəníə́ ɔ óso ɔlaa ɔwá, ínə́níə́ bəsú Isə́ əə́?

¹⁰Mɛ lɛa á yamɛ́á Isə́ nuúmə. Yamɛ́á Isə́ a lɛa ɔwámɛ nuúmə́. Ɔ lɛ ndɔ nɔ́yɛ́ lumininə əə́? Bɛtambá ɔbɛ́á mɛ ndɔ bənú lɛna bɛ́ lɛ ndɔ húlínə na mɛaŋɔ́á, mba, yamɛ́á Isə́ ɔwá a lɛ́á ɔwámɛ nuúmə, wɛɛ́ya a ndɔ bɛ́áyɛ́á biolí bɛ́ bɛ́múɛ́tɛ́ úndúsiniə.

¹¹Nɔ́ lumínə ɔwá mɛ lɛa á yamɛ́á Isə́ nuúmə, Isə́ a lɛa ɔwámɛ nuúmə. Ábá nɔ sá yámɛ́á ɛtambá luminə, nɔ lumínínə ɛlɔ́áyɛ́ bɛ́táyɛ́ biolí.

¹²Ɛ́ɛ! Taká mɛ ndɔ bənú nɔ́yɛ́ lɛna: Wɛ́ɛ́yɛ́ ɔwá a ná nɛ́áyɛ́á nɛkɔmba tálɛ́ná ɔ ɔwámɛ, a ŋɔ biolí nyɔɔkɔ tɔ́na ɔbɛ́á mɛ ndɔ nyɔɔ. A ŋɔ biolí bɛŋɛ́ŋa nyɔɔkɔ tɔ́na ɔyáyɛ́na bɔkɔasɛ́á, mɛ nɔ́ ákáná á yamɛ́á Isə́ busíə́.

¹³Bikimə ɔbɛ́á nɔ ŋɔ bataka ɔ ɔwámɛ niínyə, mɛ ŋɔ nɔ́yɛ́ kɛaka ɔkɛaka ɔwá, Mɔná á tuúmə tɔ́ Isə́ fə́mə́lə́níə́.

¹⁴Ata yatɛ́ bɔkɔa nɔ ndɔ bata ɔ ɔwámɛ niínyə, mɛ ŋɔ nɔ́yɛ́ kɛaka.»

¹⁵«Ábá nɔ ndɔ mɛaŋɔ́á hikiə, nɔ ŋɔ yə́míə́ imbə́ndə́ tə́tə́kəniə.

¹⁶Ɔwámɛ, mɛ ŋɔ Isə́ bɛ́kálákɛna. A ŋɔ bənú Mɔkamɛla muinə́muinə́ índiə ɔwá a ŋɔ bámɛnɛna na bənú ikúílíə́kimə.

¹⁷Ɔ́ Umbúínyi ɔwá wɔ́ ndɔ bɛndɔ taká yɛ Huɛlɛ́ ínə́niə. Bɛndɔ bá misí bá sa óso ɔwáyɛ́ ɔkáha bɔkɔasɛ́á, bá lɛ ndɔ wɛɛ́ya sinə, bá lɛ ndɔ wɛɛ́ya manya. Mba uwənú, nɔ ndɔ wɛɛ́ya manya bɔkɔasɛ́á a ndɔ niŋə na bənú, a lɛa bikúílí bikimə na bənú.

¹⁸Mɛ sɔ́ ŋɔ bənú tíkə bíbúə́ ɛ́sɛ́á tunə́minú. Mɛ ŋɔ ndahíáná ɔ uwənú ɛmɛ́ŋɛ́.

¹⁹Ikúílí tɛ́tɛ́á, bɛndɔ bá misí bá sɔ́ ŋɔ mɛaŋɔ́á sinə tɔ́na, mba ɔ uwənú, nɔ ŋɔ mɛaŋɔ́á siəkinə bɔkɔasɛ́á mɛ lɛa ɔ buɔmɔ́, bənú tɔ́na nɔ ŋɔ nɔmɔkɔ.

²⁰Ɔ hítə́yí hinó, nɔ ŋɔ manya ɔwá mɛ lɛa á yamɛ́á Isə́ nuúmə́, nɔ lɛa ɔwámɛ nuúmə́, mɛaŋɔ́á ɔ uwənú nuúmə́.»

²¹«Wɛ́ɛ́yɛ́ ɔwá a ndɔ yə́míə́ imbə́ndə́ tə́tə́niə, ɔwá a ndɔ yiítə bɛ́kɛna, wɛɛ́ya á ndɔ mɛaŋɔ́á hikiə. Wɛ́ɛ́yɛ́ ɔwá a ndɔ mɛaŋɔ́á hikiə, yamɛ́á Isə́ a ŋɔ wɛɛ́ya hikəkiə, mɛ ŋɔ wɛɛ́ya hikəkiə tɔ́na, mɛ ŋɔ wɛɛ́ya bínə́niə.»

²²Yútu, mba tátá á Yútasɛ Isikalióto, a ná wɛɛ́ya lɛ́na a sɛ́á: «Á Isə́lúkú, nəníə́ ɛ́kɛ ɔ lɛ bínə́níə́ ɔ bɛndɔ bá misí, ɔ bínə́niə ɔbánɔ́ ɔ uwəsú əə́? »

²³Yə́susu a sɛ́á: «Wɛ́ɛ́yɛ́ ɔwá a ndɔ mɛaŋɔ́á hikiə, a ŋɔ tə́tə́niə yatɛ́ ɔyɛ́á mɛ ndɔ laa. Yamɛ́á Isə́ a ŋɔ wɛɛ́ya hikəkiə, mɛaŋɔ́á na yamɛ́á Isə́, tɔ ŋɔ ndasá ɔ ɔwayɛ́ lɛ́á, tɔ ŋɔ tuənə́kínə ɔwayɛ́ ɔmbɛ́la.

²⁴Wɛ́ɛ́yɛ́ ɔwá a lɛ ndɔ mɛaŋɔ́á hikiə, a lɛ ndɔ bɛ́ámɛ́á bɛtambá tə́tə́niə. Ɛtambá ɔyɛ́á nɔ ndɔ ɔ́kɔ, yɛ́ lɛ ndɔ húlínə na mɛaŋɔ́á, mba, na yamɛ́á Isə́ ɔwá a ná mɛaŋɔ́á lɔma.

²⁵Mɛ ná bənú bɛ́ɛ́yɛ́ bikimə lakɛ́ná ikúílí ɔyɛ́á mɛ nalɛ́á na bənú.

²⁶Ɔ ɔwámɛ niínyə, Isə́ a ŋɔ Umbúínyi Mɔnaŋanaŋa lɔ́ma, wɛɛ́ya a ŋɔ bənú ɔ́lɔ, á bənú úkúnə́kíə́ bikimə, á bənú bɛkɔa bɛ́kɔ́lɔ́mɔ́kɔ́nɛ́ná bikimə ɔbɛ́á mɛ ná bənú lákɛ́na.»

²⁷«Mɛ ndɔ bənú bumbə́nú tíkínə, bɔ́ámɛ́á bumbə́nú mɛ́ ndɔ bənú índiə. Bumbə́nú ɔbɔ́á mɛ ndɔ bənú índiə, bɔ́ lɛ bá ɛ́sɛ́á ɔbɔ́á bɛndɔ bá misí bá ndɔ índiənə. Nɔ lɛ konobo, bá lɛ bənú kúlúmíə́.

²⁸Nɔ ná ɔ́kɔ́kɛ́na ɛ́sɛ́á mɛ ná bənú lɛ́ná mɛ sɛ́á: “Mɛ nɔ́ ákána, mba mɛ ŋɔ ndahíáná ɔ uwənú ɛmɛ́ŋɛ́.” Ata nɔ bá nɔ ndɔ mɛaŋɔ́á hikiə, há nɔ ndɔ bílə́nə na ɔmanya ɔwá, mɛ nɔ́ ákána ɔ ɛmɛ́ŋɛ́ yɛ Isə́ bɔkɔasɛ́á, Isə́ a lɛa mɔŋɛ́ŋa yáyɛ́na mɛaŋɔ́á.

²⁹Mɛ ndɔ bənú bɛ́táyɛ́ bɛkɔa lɛna isíŋáka, ubusíə́ ɔbɔ́á bɛ́ ndáfámá ɔkɛaka ɔwá mbá nɔ ŋɔ lumininə ikúílí nɔ́yɛ́ yɛ́ ŋɔ bɛ́kɛaka.

³⁰Ɔ botolokiə isíŋáka, mɛ sɔ́ ŋɔ hɔ́ɔ́ tɔ́na na bənú bɔkɔasɛ́á, munəni wa yɛ́ɛyɛ misí a lɛa ɔ ɔsákɔna. A sa óso ɔ ɔwámɛ ɔkɛa ata bɔkɔa.

³¹Mba yɛ́ lɛa hɔ́ánánátɔ́ ɔwá, bɛndɔ bá misí bá manyá ɔwá mɛ ndɔ Isə́ hikiə, mɛ ndɔ kɛa ɛ́sɛ́á a ná mɛaŋɔ́á mánɛ́na. Nɔ́ hɔalɛ́na, tɔ́ háha hɛ́kɛ́á!»